Keieun Kronikel
12 Iet ohl akan me kohdo rehn Depit nan Siklak+ ni ahnsou me e sohte saledek en kohkohseli pwehki Sohl+ nein Kis, oh irail iang kisehn sounpei kehlail ko me kin utung ih nan mahwen.+ 2 Re kin weuwa kesik ketieu, oh re kak doadoahngki palimaun oh palimeing en pehrail kan+ pwehn kesingki pahi+ de kesik ketieu kan. Irail keinek en Pensamin,+ me iei rien* Sohl. 3 Me kaun iei Ahieser, iangahki Sohas, ira koaros nein Semaa mehn Kipea;+ Sesiel oh Pelet nein Asmaped,+ Peraka, Sehu mehn Anadod, 4 Ismaia mehn Kipeon,+ sounpei kehlail men nanpwungen meh siliakano+ oh kaunen meh siliakano; oh pil Seremaia, Sahasiel, Sohanan, Sosapad mehn Kedera, 5 Elusai, Serimod, Pealaia, Semaraia, Sepataia mehn Arip, 6 Elkana, Issaia, Asarel, Soeser oh Sasopeam, irail mehn Kora kei;+ 7 oh Soela oh Sepadaia nein Seroham sang Kedor.
8 Ekei mehn Kad kan kohla iangala Depit ni wasahn ruk kehlailo nan sapwtehno;+ irail sounpei kehlail kei, me kaiahnda ong mahwen, koahiek en doadoahngki mehn sansar laud oh ketieu. Masarail kan rasehng mesen laion kan oh re marahra rasehng kasel en pohn nahna kan. 9 Eser me kaun, Opadaia me keriemen, Eliap me kesilimen, 10 Mismanna me kapahmen, Seremaia me kelimmen, 11 Attai me kewenemen, Eliel me keisimen, 12 Sohanan me kawelimen, Elsapad me kaduwemen, 13 Seremaia me kaeisek, Makpannai me kaeisek ehu. 14 Iei irail pwukat me mehn Kad,+ kaunen karis en sounpei kan. Me keieu luwet kakohng meh 100 oh me keieu kehlail kakohng meh 1,000.+ 15 Ih irail pwukat me kotehla Sordan ni keieun sounpwongo ni ahnsou me pillapo lapakehda, oh pwakihpeseng aramas ako koaros me kin kousoan nan wasa karakarahk kan ni palimese oh palikapi.
16 Ekei ohlen Pensamin oh Suda kan pil kohdo rehn Depit ni eh wasahn ruk kehlailo.+ 17 Depit eri kohieila mwohrail oh ndaiong irail: “Ma kumwail kohdo rehi ni popohl pwehn sewese ie, eri I pahn kasamwo kumwail nin duwen kompoakepahi. Ahpw ma kumwail pahn pangiehla rehn ei imwintihti kan ni pehi kat eh sohte wiahda mehkot sapwung, eri, Koht en samatail mehn mahs ako en ketin mahsanih met oh kadeik.”+ 18 Ngehn sarawi* ahpw tiada pohn* Amasai,+ kaunen meh siliakan, oh e nda:
“Maing Depit, kiht sapwellimomwi. Maing nein Sehsi, se iang komwi.+
Popohl, komwi en sapwellimanki popohl oh popohl ong me kin sewesei komwi,
Pwe omwi Koht kin ketin sewesei komwi.”+
Depit eri kasamwo irail oh idihirailda nanpwungen kaunen karis en sounpei ko.
19 Ekei sang keinek en Manase pil iangala Depit ni eh iang mehn Pilisdia kan kohla mahweniong Sohl; ahpw Depit sohte sewese mehn Pilisdia ko, pwe mwurin ar koasoipene, kaunen mehn Pilisdia ko+ kadarala ih, ndinda: “E pahn pwurala rehn eh kaun Sohl oh atail mour pahn mihla nan keper.”+ 20 Ni Depit eh kohla Siklak,+ iet irail akan me iangala ih sang Manase: Adnah, Sosapad, Sediael, Maikel, Sosapad, Elihu oh Silledai, kaunen meh kid kan en Manase.+ 21 Re kin sewese Depit mahweniong pwihnen loallap kan, pwehki irail koaros ohl kehlail oh kommwad kei,+ oh re wiahla kaunen karis en sounpei. 22 Rahn koaros aramas kin kohkohdo rehn Depit+ pwehn sewese ih, lao re wiahla lapalahn karis en sounpei ehu duwehte karis en Koht.+
23 Iet uwen tohtohn ohl akan me onopadahng mahwen me kohdo rehn Depit nan Ipron+ pwehn sewese ih wiliandi Sohl oh wiahla nanmwarki nin duwen kehkehlik en Siohwa.+ 24 Ohlen Suda kan me wa mehn sansar laud oh ketieu, me onopadahng mahwen iei meh 6,800. 25 Mehn Simion kan, sounpei kehlail oh kommwad kan iei meh 7,100.
26 Mehn Lipai kan iei meh 4,600. 27 Sehoiada+ me kaunen kadaudok en Aaron kan,+ oh me iangih meh 3,700, 28 oh pil Sadok+ mwahnakapw kehlail oh kommwad men, iangahki kaun 22 sang peneinei en seme mehn mahs ako.
29 Mehn Pensamin kan, rien* Sohl+ kan, iei meh 3,000. Mahso me tohto rehrail kin loalopwoat utung peneinei en Sohl. 30 Mehn Epraim kan, mie sounpei kehlail oh kommwad 20,800, me ndand nanpwungen peneinei en samarail ako.
31 Sang elep keinek en Manase, meh 18,000 me pilipilda ren kohdo kasapwiladahng Depit nanmwarki. 32 Keinek en Isakar, mie kaun 200 me kin wehwehki dahme Israel pahn wia oh ahnsou mwahu en wia met, oh riarail kan* koaros mi pahn ar kaweid. 33 Keinek en Sepulon, mie meh 50,000 me kak iang karis en sounpei, me kin onopada ni ireken mahwen ni ar wa tehtehn mahwen kan koaros. Irail koaros kin iang Depit ni loalopwoat unsek. 34 Keinek en Napdali, mie kaun 1,000, oh me kin iang irail iei meh 37,000 me kin wa mehn sansar laud oh ketieu. 35 Mehn Dan kan, irail kan me kin onopada ni ireken mahwen iei meh 28,600. 36 Oh keinek en Aser, irail kan me kak iang karis en sounpei onopada ni ireken mahwen iei meh 40,000.
37 Sang palio Sordan,+ mehn Reupen kan, mehn Kad kan oh elep keinek en Manase, mie sounpei 120,000 me kin wa soangsoangen tehtehn mahwen koaros. 38 Irail koaros ohl kei me kin iang ireken mahwen; ni mohngiong unsek re kohdo Epron pwe ren kasapwilada Depit en wia nanmwarkien mehn Israel kan koaros, oh pil luhwen mehn Israel kan koaros miniminkihpene ar men* kasapwilada Depit nanmwarki.+ 39 Oh re mihmi rehn Depit wasao erein rahn siluh, mwengemwenge oh niminim dahme riarail kan kaunopadahng irail. 40 Oh irail kan me mi limwahrail, oh pil irail kan sang wasa doh nan Isakar, Sepulon oh Napdali, kin wahwahdo mwenge kan pohn dongki kan, kamel kan, dongki laud kan* oh kou kan—pilawa amas, keik pik oh reisin me idaidpene, wain, leh oh kou oh sihpw tohtohie, pwe peren kipehdier Israel.