Rongamwahu en Luk

4 Sises eri direkihla ngehn sarawi* oh ketilahsang Sordan, oh ngehn sarawi* kahluwahla ih nan sapwtehn+ 2 erein rahn 40 oh Tepilo kin kasonge ih wasao.+ Oh e sohte ketiki mehkot erein rahn ako, e ahpw pwungitikla ni kaimwiseklahn rahn ako. 3 Tepilo eri patohwanohng: “Ma sapwellimen Kohto komwi, eri ndaiong takai wet en wiahla lopwon en pilawa ehu.” 4 Ahpw Sises ketin sapeng ih mahsanih: “E ntingdier, ‘Kaidehn pilawahte me aramas kin mourki.’”+

5 Ih eri kahluwadahla ih oh kasalehiong wehi koaros en sampah ni ahnsou tehkis.+ 6 Tepilo eri patohwanohng ih: “I pahn kihong komwi manaman pohn wehi pwukat koaros oh ar lingan, pwehki e kohiengieier+ oh I kak kihong mehmen me I men kihong. 7 Eri ma komw pahn kaudokiong ie pak ehute, komw pahn alehdi koaros.” 8 Sises ahpw ketin sapeng mahsanihong: “E ntingdier, ‘Siohwa* omw Koht me ke anahne kaudokiong, oh ih kelehpw me ke anahne papah.’”+

9 Ih eri kahrelahng ih Serusalem oh kihdiong pohn kengkeng en tehnpas sarawio oh patohwanohng ih: “Ma sapwellimen Kohto komwi, lusdihsang men,+ 10 pwe e ntingdier, ‘E pahn ketin ruwesehki sapwellime tohnleng kan duwen kowe pwe ren pereiuk,’ 11 oh ‘Re pahn kolkinuhkada pehrail kan, pwe nehmw kan en dehr lel takai.’”+ 12 Sises ahpw ketin sapeng mahsanihong: “E ntingdier, ‘Ke dehr kasonge Siohwa* omw Koht.’”+ 13 Eri Tepilo kaimwisekala kasongosong ko koaros, oh e ahpw kohkohsang reh lao pil ehu ahnsou mwahu.+

14 Sises eri ketin direkihla ngehn sarawi* oh sapahllahng Kalili.+ Oh rohng mwahu duwen ih ahpw lohkseli wasa koaros limwahn sahpwo. 15 E pil ketin tepida padahk nan arail sinakoke kan, oh aramas koaros kin wauneki.

16 E ahpw ketila Nasaret,+ wasa me e ketin tikida ieo, oh nin duwen eh kin ketin wia ni rahnen Sapad, e ketilong nan sinakokeo+ oh ketida pwe en ketin wadawad. 17 Sounpapah men ahpw kihong ih doaropwe limilimpene en soukohp Aiseia, ih eri ketin pahkpeseng oh diarada wasa me ntingdi: 18 “Sapwellimen Siohwa* ngehn sarawi* mi rehi pwehki eh ketin keieiehdier pwe I en lohki rohng mwahu ong me semwehmwe kan. E ketin poaroneiehdo pwe I en lohkihong me sensel kan ar saledek, oh me maskun ar pahn kilangada wasa oh kasaledekihala irail me mi nan apwal,+ 19 oh en kalohki pahr en sapwellimen Siohwa* kupwuramwahu.”+ 20 Ih eri ketin limpene doaropweo oh kapwurehla rehn sounpapaho, e ahpw ketidi; oh mesen irail ko koaros me mi nan sinakokeo ahpw kangkakil. 21 E ahpw tepida mahsanihong irail: “Rahnwet, nting sarawi wet me kumwail ahpwtehn rong pweidahr.”+

22 A irail koaros ahpw tepida koasoia soahng mwahu kan duwen ih oh pwuriamweikihla mahsen kaselel ko me pwilisang nin doauese,+ re ahpw nda: “Kaidehn nein Sosep pwutako met?”+ 23 E ahpw mahsanihong irail: “Mwein kumwail pahn padokohng ie mahsen wet, ‘Toahkte, kamwahwihiukala. Pil wia wasaht nan uhdakomwiet soahng kan me se rong me wiawiher nan Kapernaum.’”+ 24 Ih eri mahsanih: “I ndaiong kumwail ni mehlel, sohte soukohp men kin keniken nan uhdakeo.+ 25 Karasepe, I ndaiong kumwail ni mehlel: Mie liohdi tohto nan Israel ni mwehin Elaisa ni ahnsou me e sohla keteu erein sounpar siluh oh sounpwong weneu, oh lehk lapalap ehu kipehdi sahpwo pwon.+ 26 Ahpw sohte emen rehrail me Elaisa pekederlahng, pwe ihte rehn liohdien Sarepad men nan sapwen Saidon.+ 27 Pil ni mwehin soukohp Elisa, mie aramas tokutok tohto nan Israel, ahpw sohte emen rehrail mwakelekelda,* ihte Nahman mehn Siriao.”+ 28 Aramas koaros me rong mepwukat nan sinakokeo ahpw lingeringerda,+ 29 irail uhdahte wahieila ih likin kahnimwo, oh walahng ni keilen nahna me arail kahnimwo kokouda ie, pwe ren kesehdihla. 30 A Sises ketin keidte nanpwungarail oh ketiketla sang irail.+

31 Ih eri ketidihla Kapernaum, kahnimw ehu nan Kalili. E ahpw ketin padapadahk ong irail ni rahnen Sapad,+ 32 oh irail ahpw pwuriamweikihla mwomwen eh kin ketikihwei sapwellime padahk,+ pwe e kin mahsenwei ni manaman. 33 Eri mie ohl emen me iang mihmi nan sinakokeo, me ngehn saut men tiada powe, e ahpw ngihl laud werkihda:+ 34 “Ah! Sises mehn Nasaret, dahme se pahn kak ehukihong komwi?+ Komw ketidohng kamwomwkitala? I ese ihs komwi, komwi me sapwellimen Koht me Sarawio.”+ 35 Ahpw Sises ketin lipwoare, mahsanih: “Nennenla oh pedoisang reh.” Mwurin ngehn suwedo eh kesehdi ohlo nanpwungarail, e ahpw pedoisang reh oh sohte kamedekihala. 36 Irail ahpw pwuriamweikihla oh tepida ndindapene nanpwungarail: “Soangen mahsen dahieu met? Pwe ni manaman e kin ketin ruwese ngehn saut akan, a re kin pedoi!” 37 Ronge ahpw kin lolohkseli wasa koaros me mi limwahn sahpwo.

38 Mwurin eh ketisang ni sinakokeo, e ahpw ketilong nan imwen Saimon. A inen ahn Saimon pwoudo wie sosoumwahuki karakar laud, re ahpw patohwan peki reh en ketin sewese ih.+ 39 Ih eri ketila oh ketin kesihnenda wasa me liho wie wonohn ie oh ketin lipwoare karakaro, oh karakaro ahpw sarasang reh. Ni ahnsowohte, liho ahpw pwourda oh tepida papah irail.

40 Ahpw ni ketipin eh kihrla, irail koaros me aramas soumwahu mi ni imwarail ko ahpw patohwando reh me ahneki soangsoangen soumwahu kan. A ni eh kin ketikihdi lime ko pohn emenemen irail, e kin ketin kamwahwihirailla.+ 41 Ngehn suwed kan pil pedoisang rehn me tohto, re ahpw kin weriwer ndinda: “Komwi me sapwellimen Kohto.”+ Ahpw, e ketin lipwoareirailda oh sohte ketin mweidohng irail en lokaia+ pwe re ese me ih me Krais.+

42 Ni eh rahnpeseng, e ahpw ketin mweselda oh ketila kalapwukala wasa kis.+ Pokono ahpw tepida raparapahki oh patohla wasa me e ketiket ie, re ahpw patohwan peki reh en ketikette rehrail. 43 E ahpw mahsanihong irail: “I pil anahne lohkihong kahnimw teikan rongamwahu en Wehin Koht, pwehki ih met me I pekederkihdo.”+ 44 Ih eri ketin kalohkseli nan sinakoke kan en Sudia.