ESTER

1 Eri ni mwehin Ahasuerus,* me iei, Ahasuerus me kaunda wehi 127+ sang India lel Idiopia,* 2 ni rahn ako ni ahnsou me Nanmwarki Ahasuerus wie kakaun sang nan mwoale nan tehnpaso* nan Suhsan,*+ 3 ni kesiluhwen sounpar en eh mwehi, e wiahda kamadipw ehu ong nah lapalap akan oh nah sounpapah kan koaros. Karis en sounpei en Persia+ oh Media,+ lapalap akan, oh kepinahn wehi kan kohdo ni kamadipwo, 4 oh erein rahn 180, e kasalehiong irail kepwehpwe en eh wehi lingan oh eh kehl lapalap oh wahu me e ahneki. 5 Oh ni ahnsou me rahn pwukat imwisekla, nanmwarkio wiahda kamadipw ehu erein rahn isuh ong aramas koaros me mi nan tehnpaso* nan Suhsan,* sang me keieu lapalap lel me keieu tikitik, nan wasa me kelpene ni mwetuwel en tehnpesen nanmwarkio. 6 Mie linen, koatun kaselel, oh sahl poh mei pirapiriong ni lepin likou kaselel kan, sahl ntahnmwel sang wunen sihpw* ni rihng silper kan, uhr marpel kan, oh mehn mwomwohd kohl oh silper pohn tat takai weitahta me adaneki porpiri, marpel, perl, oh marpel toantoal.

7 Re kin kihda wain nan kep kohl kan; ehuehu kep ko wekpeseng, oh wain me kohda sang rehn nanmwarkio me tohto, ni uwen me nanmwarkio kak kihda. 8 Sohte me idingkihong irail en nim; met iei kosonned ong ahnsowo, pwe nanmwarkio koasoanehdi rehn lapalap en tehnpese ko me emenemen en nim uwen me e mwahuki.

9 Lih Nanmwarki Pasdi+ pil wiahda kamadipw ehu ong lih akan ni tehnpesen Nanmwarki Ahasuerus.

10 Ni keisuhwen rahn, ni ahnsou me nanmwarkio wie pereperen pwehki waino, e ahpw ndaiong Mehuman, Pisda, Arpona,+ Pikda, Apakda, Sihdar oh Karkas, lapalap isimen en tehnpaso me wia nein Nanmwarki Ahasuerus sounpapah kan, 11 ren wahdo mwohn nanmwarki Lih Nanmwarki Pasdi, ni eh pahn mware lisoarop en lih nanmwarki, pwehn kasalehiong aramas akan oh kepina kan eh kaselel, pwe e uhdahn kaselel. 12 Ahpw Lih Nanmwarki Pasdi kin kahng kohla nin duwen ruwes en nanmwarkio, me lapalap akan en tehnpaso kairehki ih. Nanmwarkio eri uhdahn lingeringerkihda met.

13 Nanmwarkio eri koasoiong ohl loalokong kan me kin dehdehki mwahu soahng kan me wiawi mahso* (pwe ih duwen met me en nanmwarkio ire kan kin sansalohng koaros me samanih kosonnedo oh repenpwung kan, 14 oh irail kan me karanih ih iei Karsena, Sedar, Admada, Tarsis, Meres, Marsena oh Memukan, lapalap isimen+ en Persia oh Media. Irail me kin kaukaule kohdo mwohn nanmwarkio oh ahneki pwukoa keieu laud kan nan wehio). 15 Nanmwarkio eri idek: “Nin duwen kosonnedo, dahme pahn wiawihong Lih Nanmwarki Pasdi pwehki e sohte peikiong ruwes en Nanmwarki Ahasuerus me nah lapalap akan en tehnpaso kairehkin ih?”

16 Memukan eri nda mwohn nanmwarkio oh nah lapalap akan: “Kaidehn nanmwarki kelehpw me Lih Nanmwarki Pasdi wiahiong sapwung wet,+ ahpw ong lapalap akan koaros oh aramas akan koaros nan wehi koaros en Nanmwarki Ahasuerus. 17 Pwe dahme lih nanmwarkio wia pahn kohpeseng rehn lih pwopwoud kan koaros, oh re pahn mwamwahliki arail pwoud kan oh nda, ‘Nanmwarki Ahasuerus mahsanih Lih Nanmwarki Pasdi en patohla mwowe, ahpw liho kahng patohla.’ 18 Rahnwette lih akan me pwoudiki lapalap en Persia oh Media kan me ese dahme lih nanmwarkio wia pahn koasoiong lapalap koaros en nanmwarkio oh met pahn elehda sohla wahu oh lingeringer laud. 19 Ma nanmwarki ketin kupwurki, en ketin wiahda koasoandi ehu, oh en ntingdi nanpwungen kosonned kan en Persia oh Media me sohte kak sohrala,+ me Pasdi sohte pahn pwurehng patohdo mwohn Nanmwarki Ahasuerus; oh nanmwarki en ketikihong dewe rehn emen lih me mwahusang ih. 20 Oh ni ahnsou me koasoandi en nanmwarki pahn lelpeseng wasa koaros nan eh wehi laud, lih pwopwoud koaros pahn waunekihla ar pwoud kan, sang me lapalap lel me tikitik.”

21 Nanmwarkio oh lapalap akan pwungki kaweid wet, oh nanmwarkio wia dahme Memukan ndao. 22 Ih eri kadarala kisinlikou kan ong wehi koaros,+ ong ehuehu wehi ni pein eh nting oh ong emenemen aramas ni pein eh lokaia, pwe ohl pwopwoud koaros pahn wia soumas* nan imwarail oh pahn lokaiahki lokaiahn eh aramas akan.

2 Mwurin mepwukat, ni ahnsou me engieng en Nanmwarki Ahasuerus+ meleileidier, e tamanda dahme Pasdi wiahdao+ oh dahme e pilada en kalokehki ih.+ 2 Nein nanmwarkio sounpapah ko ahpw nda: “Repen peinakapw meipwon kaselel kan ong nanmwarki anahne wiawi. 3 Oh nanmwarki en ketin idihada wiliepen wehi kan koaros nan sapwellime wehi+ pwe ren wahla peinakapw meipwon kaselel kan koaros nan tehnpaso* nan Suhsan,* ni imwen lih akan.* Re pahn mi pahn epwelpen Ekai+ sapwellimen nanmwarki sounpapah* me kin apwalih lih akan, oh lih akan en ale epwelpen kalingana paliwararail kan.* 4 Oh peinakapw me nanmwarki uhdahn ketin kupwukupwure pahn wiliandi Pasdi+ oh wiahla lih nanmwarki.” Nanmwarkio eri pwungki kaweido, oh ih met me e wia.

5 Mie ohlen Suhs men nan tehnpaso* nan Suhsan*+ me adaneki Mordekai+ nein Sair nein Simei nein Kis, mehn Pensamin men,+ 6 me kalipilipala sang Serusalem iangahki aramas akan me iang Nanmwarki Sekonaia*+ en Suda kalipilipala, me Nanmwarki Nepukadnesar en Papilon kalipehla. 7 Mordekai me kin apwalih Adassa,* me iei, Ester, nein rien eh pahpao ohl,+ pwe sohte en serepeino pahpa oh nohno. Peinakapwo me paliwaramwahu oh kaselel mwomwe, oh ni mehlahn eh pahpa oh nohno, Mordekai wiahkihla ih nin duwen nah serepein. 8 Ni ahnsou me en nanmwarkio mahseno oh kosonnedo lohkpeseng oh ni ahnsou me peinakapw tohto wisikpene nan tehnpaso* nan Suhsan* pahn epwelpen Ekai,+ Ester pil iang wisikla ni tehnpesen nanmwarkio pahn epwelpen Ekai sounapwalih lih akan.

9 Peinakapwo eri kaperenda Ekai oh e pwungkihda* peinakapwo, eri e mwadangete koasoanehdi epwelpen kalingana paliweren serepeino*+ oh dahme e pahn kang, oh e koasoanehiong ih peinakapw pilipilda isimen sang ni tehnpesen nanmwarkio. E pil kasaula ih oh nah sounpapah pwulopwul ko nan wasa me keieu mwahu nan imwen lih ako.* 10 Ester sohte koasoia mehkot me pid eh aramas ako+ de kiseh kan, pwe Mordekai+ kaweidki en dehpa ndaiong emen.+ 11 Ehuehu rahn Mordekai kin moamoahlseli mwohn wasa me kelpene ni imwen lih ako* pwehn ese iren Ester oh dahme wiewiawi reh.

12 Emenemen peinakapw ahneki ahnsou en kohlongala rehn Nanmwarki Ahasuerus mwurin ar kanekehla sounpwong 12 en kalinganahla paliwararail kan me koasoandiong lih akan, pwe ih duwen met me re anahne kapwaiada ong epwelpen kalingana paliwararail kan*—sounpwong weneu re pahn doadoahngki lehn mir+ oh sounpwong weneu lehn palsam*+ oh soangen leh pwohmwahu kan ong epwelpen kalingana paliwararail.* 13 Eri peinakapw men onopadahr kohlongala rehn nanmwarkio, oh peinakapwo pahn ale sohte lipilipil dahme e peki ni ahnsou me e kohsang ni imwen lih ako* kohla ni tehnpesen nanmwarkio. 14 Nin soutik e pahn kohlongala, oh nimenseng e pahn pwurodo nan keriaun imwen lih akan,* pahn epwelpen Sahskas nein nanmwarkio sounpapah*+ me kin apwalih pekehi kan. Serepeino sohte pahn pwurehng kohla rehn nanmwarkio ihte ma nanmwarkio kin perenkihda ih oh poaronehki edeo.+

15 Oh e lelehr ahnsou me Ester pahn kohla rehn nanmwarkio. Ester nein Apieil me Mordekai pahn pahpahki, me wiakihla serepeino pein nah.+ Ester sohte kin peki mehkot, ihte me e kin wia iei dahme Ekai nein nanmwarkio sounpapah* me kin apwalih lih akan kin kaweidki. (Erein ahnsowo pwon Ester wie kenikenla mwohn aramas koaros me kin kilang ih.) 16 Ester wisikla rehn Nanmwarki Ahasuerus ni tehnpeseo ni kaeisek en sounpwong, me iei, sounpwong en Teped,* ni keisuhwen sounpar+ en eh mwehi. 17 Oh nanmwarkio poakohngala Ester laudsang lih teikan koaros. Nanmwarkio uhdahn perenkihda ih oh pwungki* ih laudsang meipwon teiko. Nanmwarkio eri kihdi lisoarop en lih nanmwarki pohn moangeo oh wiahiong ih en wiliandi Pasdi+ oh wiahla lih nanmwarki.+ 18 Oh nanmwarkio wiahda lapalahn kamadipw ehu ong nah lapalap akan koaros oh nah sounpapah kan, kamadipw en kawauwih Ester. Ih eri kalohkihda saledek ong wehi kan, oh e kin kihkihda kisakis kan ni uwen me nanmwarki ahneki.

19 Eri ni meipwon ko*+ ar wisikpene ni keriapak, Mordekai wie mwomwohd ni ewen kelen tehnpesen nanmwarkio. 20 Ester sohte nda mehkot me pid kiseh kan oh eh aramas akan,+ duwehte me Mordekai kaweidkin ih; Ester usehlahte wia dahme Mordekai nda, duwehte ahnsou me e kin mi pahn epwelpen Mordekai.+

21 Ni rahn ako erein Mordekai eh wie mwomwohd ni ewen kelen tehnpesen nanmwarkio, Pikdan oh Teres, lapalap riemen en tehnpesen nanmwarkio, silepen wenihmw kan, ahpw lingeringerda oh koasoanehdi en kemehla* Nanmwarki Ahasuerus. 22 Ahpw Mordekai esehda duwen met, oh e mwadangete ndaiong Lih Nanmwarki Ester. Ester eri koasoiong nanmwarkio ni eden Mordekai.* 23 Keseu eri wiawihong ireo oh kedekedeo e dierekda me mehlel, oh ohl riemeno koaros langada pohn tuhke pwoat; oh mepwukat koaros kileldi mwohn nanmwarkio, nan pwuhken poadopoad kan.+

3 Mwurin met Nanmwarki Ahasuerus kasapwilada Aman+ nein Ammedada mehn Akak+ oh kawauwihala ih ni eh kasapwilada mwoale pohn ienge lapalap teikan koaros.+ 2 Oh nein nanmwarkio sounpapah kan koaros me mi ni ewen kelen tehnpesen nanmwarkio kin dairukedi oh lukupoardiong Aman, pwe ih met me nanmwarkio kehkehlingki me pid duwen ih. Ahpw Mordekai kahng dairukedi oh lukupoardi. 3 Nein nanmwarkio sounpapah kan me mi ni ewen kelen tehnpesen nanmwarkio ahpw ndaiong Mordekai: “Dahme ke kin pohnsehsehki kehkehlik en nanmwarkio?” 4 Rahn koaros re kin idihdek reh, ahpw e sohte kin rong irail. Irail eri ndaiong Aman en kilang ma e mweimweite en Mordekai mwekido;+ pwe e ndaiong irail me ih mehn Suhs men.+

5 Eri ni Aman eh tehkada me Mordekai kahng dairukedi oh lukupoardiong ih, Aman eri lingeringerda.+ 6 Ahpw e sohte itarki en kemehla* Mordekai kelehpw, pwe re ndaiong ih me Mordekai mehn Suhs men. Aman eri tepida rapahki en kamwomwala mehn Suhs kan koaros, iei en Mordekai aramas akan koaros nan wehin Ahasuerus pwon.

7 Ni keieun sounpwong, me iei, sounpwong en Nisan,* ni kaeisek riaun sounpar+ en Nanmwarki Ahasuerus, re doadoahngki Pur+ (me iei, Usuhs)* mwohn Aman pwehn koasoanehdi rahn oh sounpwong, oh e pwupwudi ni kaeisek riaun sounpwong, me iei, Adar.*+ 8 Aman eri ndaiong Nanmwarki Ahasuerus: “Mie soangen aramas kei me mwarahkpeseng oh mihmiseli nanpwungen aramas akan+ nan sapwellimomwi wehi kan koaros,+ me arail kosonned weksang en aramas teikan koaros; oh re sohte kin peikiong sapwellimen nanmwarki kosonned kan, oh met sohte mwahu ong nanmwarki en ketin kanengamahiong irail. 9 Ma nanmwarki ketin kupwurki, a koasoandi ehu en ntingdi me ren kasohrala. I pahn pwainohng lapalap akan silper dalend* 10,000 pwe ren kihdi nan sapwellimen nanmwarki wasahn nahk dipwisou kesempwal kan.”*

10 Nanmwarkio eri kihsang nah rihng en sidampo+ ni peho oh kihong Aman+ nein Ammedada mehn Akak,+ imwintihtien mehn Suhs kan. 11 Nanmwarkio eri ndaiong Aman: “Silper oh aramas akan kohienguhkehr, wiahiong irail dahme ke mwahuki.” 12 Nein nanmwarkio sounnting kan*+ eri likwerpene ni 13 en keieun sounpwongo. Re ntingihedi+ en Aman ruwes kan koaros ong wiliepe kan en nanmwarkio, kepina kan me kakaun wehi kan, oh lapalap akan en soangsoangen aramas akan, ong ehuehu wehi ni pein ar nting oh ong emenemen aramas ni pein eh lokaia. Met ntingdi ni eden Nanmwarki Ahasuerus oh nein nanmwarki rihng en sidampo me sidampihala.+

13 Meninkeder kan eri kihpeseng kisinlikou ko nan en nanmwarkio wehi kan koaros, me kalohkihda kehkehlik en kasohrehla, kemehla, oh kamwomwala mehn Suhs koaros, me pwulopwul oh mah, seri kan oh lih akan, ni rahn ehute, ni 13 en kaeisek riaun sounpwong, me iei, sounpwong en Adar,+ oh kihsang arail kepwe kan.+ 14 Audepen kisinlikou ko pahn kohda nin duwen kosonned ehu nan wehi koaros oh lohkohng aramas koaros, pwe ren onopadahng rahno. 15 Meninkeder ko eri mwadangete kohieila+ sang ni ruwes en nanmwarkio; kosonnedo wiawihda nan tehnpaso* nan Suhsan.*+ Nanmwarkio oh Aman eri mwohndi pwehn nim wain, ahpw kahnimw en Suhsan* wie pingiping.

4 Ni ahnsou me Mordekai+ esehda mehkoaros me wiawiher,+ e tehrpeseng eh likou ko oh likawihada likoun nsensuwed* ehu oh kidahng pehs pohn moangeo. Ih eri kohieila nanwerengen kahnimwo, sengiseng ni ngihl laud oh lingeringer. 2 E kohla lao lel ni ewen kelen tehnpesen nanmwarkio oh uhdi, pwe sohte me pahn pedolong ni ewen kelen tehnpesen nanmwarkio likawih likoun nsensuwed.* 3 Oh nan wehi koaros+ me en nanmwarkio mahseno oh eh koasoandio lellahng ie, mie mwahiei laud nanpwungen mehn Suhs kan, iangahki kaisihsol+ oh sengiseng oh mwahiei. Me tohto wie wonohn nan likoun nsensuwed* oh nan pehs.+ 4 Ni ahnsou me nein Ester sounpapah serepein ko oh nah sounpapah ohl ako* kohlongodo oh ndaiong ih, lih nanmwarkio eri inenen pahtoula. Ih eri kadarala likou kei rehn Mordekai en likawih a kaidehn eh likoun nsensuwedo,* ahpw Mordekai kahng ale mepwukat. 5 Ester eri likwerihedo Adak, emen nein nanmwarkio sounpapah ko,* me e idihada en papah Ester, oh Ester ruwese ih en esehda sang rehn Mordekai wehwehn met oh dahme wiewiawi.

6 Adak eri kohieila rehn Mordekai nan wasahn tuhpenehn kahnimwo mwohn ewen kelen tehnpesen nanmwarkio. 7 Mordekai eri ndaiong ih mehkoaros me wiawihong ih oh uwen mwohni+ me Aman inoukihda en pwainohng en nanmwarkio wasahn nahk dipwisou kesempwal kan pwe mehn Suhs kan en kamwomwmwomwla.+ 8 Mordekai pil kihong Adak doaropwe ehu me audaudki koasoandi me wiawihda nan Suhsan*+ pwe irail en kamwomwmwomwla. E pahn kasalehiong Ester oh kawehwehiong ih oh padahkihong ih+ en kohlongala rehn nanmwarkio oh pein peki rehn nanmwarkio en kupwurehla eh aramas akan.

9 Adak eri pwurodo oh ndaiong Ester dahme Mordekai ndao. 10 Ester eri sapengki Adak kehkehlik kan me e pahn ndaiong Mordekai:+ 11 “Sapwellimen nanmwarkio sounpapah kan koaros oh aramas akan me mi nan wehi kan en nanmwarkio ese me, ma ohl emen de lih emen kohlongala masloalen en nanmwarkio wasa me kelpeneo,+ ni eh sohte ketin malipe, ehute kosonned me pid met: E pahn kamakamala; e kak mourla ihte ma nanmwarkio ketin kapalahng aramaso sapwellime sokon kohlo.+ Oh rahnehr 30 me nanmwarkio sohte ketin malipe ie.”

12 Ni Mordekai eh rongehr dahme Ester ndao, 13 e ahpw sapengki Ester: “Ke dehr medewe me ke pahn kak pitila sang mehn Suhs teikan koaros pwehki omw wia tohnimwen nanmwarkio. 14 Pwe ma ke pahn nennenla ni ahnsou wet, sawas oh komour pahn kodohng mehn Suhs kan sang ehu wasa tohrohr,+ ahpw kowe oh tohnimwen omw pahpao pahn sohrala. Oh ihs me ese ma ong soangen ahnsou me duwehte met me ke wiahkihla lih nanmwarki men?”+

15 Ester eri sapengki Mordekai: 16 “Menlau kohla kapokonepene mehn Suhs kan koaros me dierek nan Suhsan* oh kumwail kaisihsol+ ong ie. Kumwail dehpa mwenge de nim mehkot erein rahn siluh,+ nipwong oh nin rahn. Ngehi iangahki nei sounpapah serepein kan pil pahn kaisihsol. I pahn kohlongala rehn nanmwarkio, mendahki met uhwong kosonnedo, oh ma I pahn kamakamala, eri I pahn mehla.” 17 Mordekai eri kohla oh kapwaiada mehkoaros me Ester padahkihong ih en wia.

5 Ni kesiluhwen rahn+ Ester ahpw likawihada eh likou reirei en lih nanmwarki oh kesihnenda nan wasa me kelpene me mi loale ni tehnpesen nanmwarkio, pelipelian imwen nanmwarkio, ni nanmwarkio eh mwomwohd pohn mwoale ni tehnpaso palilahsang wasahn pedolongo. 2 Ni ahnsowohte me nanmwarkio kilangada Lih Nanmwarki Ester eh wie kesikesihnen nan wasa me kelpeneo, e ahpw perenkihda eh kilangada ih, nanmwarkio eri kapalahng Ester sokon kohl+ me mi nan peho. Ester eri keila oh doahke imwin sokono.

3 Nanmwarkio eri idek reh: “Dahkot mwo, Lih Nanmwarki Ester? Ia omw pekipeken? Mehnda ma ke peki elep en ei wehi, e pahn kohieng uhk!” 4 Ester eri sapengki: “Ma nanmwarki ketin kupwurki, eri I patohwan peki nanmwarki iangahki Aman+ en ketido ni kamadipw me I kaunopadahr ong komwi rahnwet.” 5 Nanmwarkio eri ndaiong nah ohl ako: “Ndaiong Aman en mwadang kohdo, nin duwen me Ester peki.” Nanmwarkio oh Aman eri kohla ni kamadipw me Ester kaunopadahro.

6 Erein kamadipw en waino, nanmwarkio eri ndaiong Ester: “Dahme ke mwahuki? E pahn kohieng uhk! Oh ia omw pekipeken? Mehnda ma ke peki elep en ei wehi, e pahn kohieng uhk!”+ 7 Ester eri sapeng: “Dahme I mwahuki oh ei pekipeken iei, 8 Ma I kenikenla rehn nanmwarki oh ma nanmwarki ketin kupwure ei pekipek oh ketin kapwaiada ei pekipek, eri nanmwarki oh Aman en ketido ni kamadipw me I pahn kaunopada ong kumwa lakapw; oh lakapw I ahpw pahn wia dahme nanmwarki ketin mahsanih.”

9 Rahno Aman kohieila pereperen oh nsenamwahu. Ahpw ni Aman eh kilangada Mordekai ni ewen kelen tehnpesen nanmwarkio oh tehkada me e sohte kesihnenda oh sohte masak ih, Aman eri uhdahn lingeringerda pahn Mordekai.+ 10 Ahpw, Aman koledi eh lingeringer oh kohkohla ni imweo. Ih eri ileklahng kompoakepah ko oh eh pwoudo Seres.+ 11 Aman eri suweiki uwen laud en eh kepwehpwe, nah pwutak tohto,+ oh duwen nanmwarkio eh kasapwilada ih oh kawauwihala ih pohn nein nanmwarkio lapalap akan oh sounpapah kan.+

12 Aman eri usehla nda: “Pil ehu, Lih Nanmwarki Ester sohte ketin luke emen tohrohr likin ngehi, I en iang nanmwarkio ket ni kamadipw me e kaunopadahr.+ I pil lukohng lakapw I en iang ih oh nanmwarkio.+ 13 Ahpw mepwukat koaros sohte kansenamwahwihiehla ni ei kilikilang Mordekai mehn Suhso eh wie mwomwohd ni ewen kelen tehnpesen nanmwarkio.” 14 Eh pwoudo Seres oh kompoakepah ko koaros eri ndaiong ih: “Kauwada apwoat tuhkehn, me ilehki kiupid 50.* Oh nimenseng patohwanohng nanmwarkio me Mordekai anahne langada pohn tuhkeo.+ Mwuri komw kak iang nanmwarkio patohla ni kamadipwo nsenamwahu.” Kaweid wet mwomwen mwahuwong Aman, ih eri kauwada tuhke pwoat.

6 Nipwongo nanmwarkio sohte kak meirla. Ih eri nda ren wadohng pwuhken poadopoad kan,+ oh re wadekohng nanmwarkio pwuhko. 2 E kadierekda me dahme Mordekai pakairkio ntingdi nan pwuhko duwen Pikdana oh Teres, lapalap riemen en tehnpesen nanmwarkio, silepen wenihmw kan, me koasoanehdi en kemehla* Nanmwarki Ahasuerus.+ 3 Nanmwarkio eri idek: “Soangen wahu oh keting dah me Mordekai alehdi ong ire wet?” Nein nanmwarkio sounpapah ko eri nda: “Sohte mehkot kohieng ih.”

4 Mwuri nanmwarkio eri nda: “Ihs me mi nan wasa me kelpeneo?” Aman ahpwtehn pedolong wasa me kelpene me mi liki+ ni tehnpesen nanmwarkio pwehn koasoiaiong nanmwarkio me Mordekai en langadahng pohn tuhke me e kaunopadahr ong ih.+ 5 Nein nanmwarkio sounpapah ko eri ndaiong ih: “Aman+ me kesikesihnen nan wasa me kelpeneo.” Nanmwarkio eri nda: “En doulongodo.”

6 Ni Aman eh pedolong, nanmwarkio eri ndaiong ih: “Dahme pahn wiawihong aramas me nanmwarki men kawauwihala?” Aman eri nda nan eh mohngiong: “Ihs likin ngehi me nanmwarkio ketin kupwurki kawauwihala?”+ 7 Aman eri ndaiong nanmwarkio: “Ong aramas me nanmwarki ketin kupwurki kawauwihala, 8 ren wadohng likoun nanmwarki+ me nanmwarki kin ket loale oh oahs me nanmwarki kin ketin dake, me kapwat en nanmwarki mi pohn moangen oahso. 9 Eri emen sapwellimen nanmwarki lapalap akan en apwalih likou ko oh oahso, oh ren kalikawihada aramas me nanmwarki ketin kupwurki kawauwihala oh kihong en dake oahso nan wasahn tuhpenehn kahnimwo. Re pahn pakairki mwowe: ‘Ih met me wiawihong aramas me nanmwarkio ketin kupwurki kawauwihala!’”+ 10 Ni ahnsowohte nanmwarkio eri ndaiong Aman: “Mwadang! Ale likou ko oh oahso, oh wia dahme ke ahpwtehn ndahn ong Mordekai mehn Suhso me wie mwomwohd ni ewen kelen tehnpesen nanmwarki. Ke dehpa sohte wia dahme ke ndahn.”

11 Aman eri ale likou ko oh oahso, oh kalikawihada Mordekai+ oh kihong ih en dake oahso nan wasahn tuhpenehn kahnimwo oh kin pakapakairki mwowe: “Ih met me wiawihong aramas me nanmwarkio ketin kupwurki kawauwihala!” 12 Mwurin mwo Mordekai pwurala ni ewen kelen tehnpesen nanmwarkio, ahpw Aman mwadangete pwurala ni imweo nsensuwed oh perepere meseo. 13 Ni ahnsou me Aman padahkihong eh pwoudo Seres+ oh kompoakepah kan koaros mehkoaros me wiawihong ih, nah ohl loalokong kan oh eh pwoud Seres ahpw ndaiong ih: “Ma Mordekai, me ahnekier manaman laudsang komwi, iei kadaudok en mehn Suhs men, komw sohte pahn kak powehdi ih; komw uhdahn pahn lohdi mwowe.”

14 Ni ar wie koasoakoasoiong ih, lapalap akan en tehnpesen nanmwarkio ahpw leledo oh mwadangete wahla Aman ni kamadipw me Ester wiadahro.+

7 Nanmwarkio oh Aman+ eri kohlongodo ni en Lih Nanmwarki Ester kamadipwo. 2 Nanmwarkio eri pwurehng ndaiong Ester ni keriaun rahn en kamadipw en waino: “Dahme ke mwahuki, Lih Nanmwarki Ester? E pahn kohieng uhk! Oh ia omw pekipeken? Mehnda ma ke peki elep en ei wehi, e pahn kohieng uhk!”+ 3 Lih Nanmwarki Ester eri sapengki: “Maing nanmwarki, ma komw ketin kupwure ie, oh ma nanmwarki ketin kupwurki, I patohwan peki komwi en ketin doarehla ei mour* oh komwi en ketin doarehla nei aramas akan.+ 4 Pwe se netlahr,+ ngehi oh nei aramas akan, pwe sen kasohrala, kamakamala, oh kamwomwmwomwla.+ Ma se netila nin duwen lidu ohl oh lih kei, eri I sohte pahn mweseiseiki. Ahpw kahpwal wet sohte konehng, pwehki e pahn kahrehda kahpwal ong nanmwarki.”

5 Nanmwarki Ahasuerus eri ndaiong Lih Nanmwarki Ester: “Ihs men, oh ia ohl menen me kakete wia soahng wet?” 6 Ester eri nda: “Imwintihtio iei ohl suwed menet Aman.”

Aman eri masepwehkada pwehki nanmwarkio oh lih nanmwarkio. 7 Nanmwarkio eri uhda ni lingeringer sang ni kamadipw en waino oh kohlongala nan mwetuwel en tehnpaso, ahpw Aman kesihnenda pwehn peki rehn Lih Nanmwarki Ester eh mour,* pwe e ese me nanmwarkio koasoanedier en kaloke ih. 8 Nanmwarkio eri pwurodo sang nan mwetuwel en tehnpaso kohdo ni ihmw en kamadipw en waino oh kilangada me Aman mwohdalahngehr pohn mehn mwomwohd me Ester mi poweo. Nanmwarkio eri ngihl laudida nda: “Dah, e pil pahn angkehlailiong lih nanmwarki nan pein imwei?” Ni ahnsowohte me e ndahla mepwukat, re pwaindi mesen Amano. 9 Arpona,+ emen lapalap en tehnpesen nanmwarkio, eri nda: “Aman pil kaunopadahr tuhke pwoat ong Mordekai,+ me eh pakair doarehla nanmwarki.+ Tuhkeo mi ni imwen Amano, e reireiki kiupid 50.”* Nanmwarkio eri nda: “Langahda ih powe.” 10 Irail eri langahda Aman pohn tuhke me e kaunopadahng Mordekai, oh en nanmwarkio lingeringer eri meleileidi.

8 Rahno Nanmwarki Ahasuerus kihla soahng koaros me ahn Aman,+ imwintihti en mehn Suhs kan,+ rehn Lih Nanmwarki Ester; oh Mordekai eri pedolongodo mwohn nanmwarkio, pwehki Ester kasalehdahr ia duwen ih oh Mordekai ara peneinei.+ 2 Nanmwarkio eri kihsang nah rihng en sidampo+ me e kihsang rehn Aman oh kihong Mordekai. Oh Ester kihong Mordekai en apwalih soahng koaros me ahn Aman.+

3 Oh pil, Ester pwurehng koasoiong nanmwarkio. E kelepwikihdi ni nehn nanmwarkio oh sengiseng oh peki reh en katokehdi koasoandi suwed me Aman mehn Akako wiahda oh eh pilahn mwersuwed ong mehn Suhs kan.+ 4 Nanmwarkio eri kapahla sokon kohlo rehn Ester,+ Ester eri uhda oh kesihnen mwohn nanmwarkio. 5 E nda: “Ma nanmwarki ketin kupwurki oh ma e ketin kupwure ie, oh ma e mwomwen mwahuwong nanmwarki oh I kenikenla mwohn silangi, eri kehkehlik ehu en ntingda pwehn kemehla kisinlikou kan me Aman+ nein Ammedada mehn Akako+ koasoanehdi, me e ntingihada en kamwomwala mehn Suhs kan nan en nanmwarki wehi kan koaros. 6 Pwe ia duwen ei pahn kak kilengwohng kahpwal me pahn kohdiong pohn nei aramas akan, oh ia duwen ei pahn kak kilang kamwomwmwomwlahn kisehi kan?”

7 Nanmwarki Ahasuerus eri ndaiong Lih Nanmwarki Ester oh Mordekai mehn Suhso: “Kilang! I kihongehr Ester soahng koaros me ahn Aman+ oh langahda ih pohn tuhkeo,+ pwehki eh pilahn en uhwong mehn Suhs kan. 8 Eri kumwa kak ntingihedi sohte lipilipil dahme kumwa mwahuki ni mwaren nanmwarki ong mehn Suhs kan oh sidampihki nein nanmwarkio rihng en sidampo, pwe koasoandi ehu me kin ntingdi ni mwaren nanmwarki oh kin sidampki nein nanmwarki rihng en sidamp sohte kak kasohrala.”+

9 Eri nein nanmwarkio sounnting kan* ahpw likwerpene ni ahnsowo ni kesiluhwen sounpwong, me iei, sounpwong en Sipan,* ni kerieisek siluhn rahn, oh re ntingihedi mehkoaros me Mordekai kehkehlingkihong mehn Suhs kan, iangahki ong wiliepe kan en nanmwarkio,+ kepina kan, oh kaunen wehi kan+ sang India lel Idiopia, wehi 127, ong ehuehu wehi ni pein arail nting oh ong emenemen aramas ni pein eh lokaia oh ong mehn Suhs kan ni pein ar nting oh lokaia.

10 E ntingihedi met ni mwaren Nanmwarki Ahasuerus oh sidampiheki nein nanmwarkio rihng en sidampo+ oh kadarala kisinlikou ntingda ko nan pehn meninkeder kan pohn oahs kan; re dake oahs marahra kan, me kin kadoadoahk ong doadoahk en nanmwarkio. 11 Nan kisinlikou pwukat nanmwarkio mweidohng mehn Suhs kan nan kahnimw sohte lipilipil ren pokonpene oh doarehla arail mour* oh ren kasohrehla, kemehla, oh kamwomwala pwihnen aramas de wehi koaros me pahn mahweniong irail, iangahki lih akan oh seri kan, oh kihsang arail kepwe kan.+ 12 Met pahn wiawi nan rahn ehute nan wehi koaros en Nanmwarki Ahasuerus, ni 13 en kaeisek riaun sounpwong, me iei, sounpwong en Adar.*+ 13 Audepen kisinlikou ko pahn kohda nin duwen kosonned ehu nan wehi koaros. E pahn lohkohng aramas koaros, pwe mehn Suhs kan en onopadahng rahno pwe ren ikih arail imwintihti kan.+ 14 Meninkeder ko me dake oahs me kin kadoadoahk ong doadoahk en nanmwarkio eri kohieila ni karuwaru oh marahra sang ni ruwes en nanmwarkio. Kosonnedo pil wiawihda nan tehnpaso* nan Suhsan.*+

15 Mordekai eri kohkohlahsang mwohn nanmwarkio ni eh likawih likoun nanmwarki poh mei oh pwetepwet, lisoaropki nihn kohl kaselel ehu oh likawih likou puhp ntahnmwel sang wunen sihpw kaselel ehu.+ Oh kahnimw en Suhsan* ahpw weriwerki peren. 16 Pwe ong mehn Suhs kan mie saledek* oh peren oh wahu. 17 Oh nan wehi kan koaros oh nan kahnimw kan koaros, sohte lipilipil wasa me koasoandi en nanmwarkio oh eh kosonnedo lella ie, mehn Suhs kan uhdahn pereperen, wiewia kamadipw kan oh kasarawi kan. Aramas tohto nan sahpwo kin nda me irail mehn Suhs,+ pwe irail masakada mehn Suhs kan.

9 Ni 13 en kaeisek riaun sounpwong, me iei, sounpwong en Adar,*+ ni ahnsou me en nanmwarkio kehkehlik oh kosonnedo pahn wiawi,+ rahno me imwintihti en mehn Suhs kan lemeleme me re pahn poweiraildi, ahpw soh, mehn Suhs kan kalowehdi me kin kailongkin irail.+ 2 Mehn Suhs kan eri pokonpene nan arail kahnimw kan nan en Nanmwarki Ahasuerus+ wehi kan koaros pwehn mahweniong irail kan me kin songosong en kamedekirailla, oh sohte emen kak uhwong irail, pwe aramas ako koaros masak irail.+ 3 Oh lapalap koaros en wehi kan, wiliepe kan en nanmwarkio,+ kepina kan, oh irail me kin apwalih doadoahk kan en nanmwarkio kin utung mehn Suhs kan, pwehki ar masak Mordekai. 4 En Mordekai manaman+ nan tehnpesen nanmwarkio laudla, oh eh ndand kohkohpeseng nan wehi kan koaros, pwehki eh manaman wie lalaudla.

5 Mehn Suhs ko kalowehdi arail imwintihti kan koaros, re kemehkinirailla kedlahs oh kamwomwirailla; re wiahiong irail kan me kailongkin irail sohte lipilipil dahme re mwahuki.+ 6 Nan tehnpaso* nan Suhsan*+ mehn Suhs kan kemehla oh kamwomwala aramas 500. 7 Re pil kemehla Parsandeda, Dalpon, Aspahda, 8 Porada, Adalia, Aridada, 9 Parmasda, Arisai, Aridai oh Paisahda, 10 iei nein Aman pwutak ehk ko, Aman me nein Ammedada, imwintihti en mehn Suhs kan.+ Ahpw mwurin ar kemeirailla, re sohte ale arail dipwisou lohdi kan.+

11 Rahno, uwen tohtohn irail me kamakamala nan tehnpaso* nan Suhsan* ahpw pakairlahng nanmwarkio.

12 Nanmwarkio eri ndaiong Lih Nanmwarki Ester: “Nan tehnpaso* nan Suhsan* mehn Suhs kan kemelahr oh kamwomwala aramas 500 oh nein Aman pwutak ehk. Eri, dahme re pil wiadahr nan en nanmwarki wehi teikan?+ Dahme ke mwahuki? E pahn kohieng uhk. Oh dahme ke pil men peki? E pahn pweida.” 13 Ester eri sapeng: “Ma nanmwarki ketin kupwurki,+ a en ketin mweidohng mehn Suhs kan me mi nan Suhsan* ren mweimweiong wia lakapw duwehte kosonned en rahnwet;+ oh nein Aman pwutak ehk ko ren langada pohn tuhke.”+ 14 Nanmwarkio eri ruwese met en wiawi. Kosonned ehu eri wiawihda nan Suhsan,* oh nein Aman pwutak ehk ko langada.

15 Mehn Suhs kan nan Suhsan* eri pwurehng pokonpene ni 14 en sounpwong en Adar+ oh kemehla aramas 300 nan Suhsan,* ahpw re sohte ale arail dipwisou lohdi kan.

16 Luhwen mehn Suhs kan nan en nanmwarkio wehi kan pil pokonpene oh doare arail mour.+ Re kamwomwala arail imwintihti kan,+ kemehla meh 75,000 me kin kailongkin irail; ahpw re sohte ale arail dipwisou lohdi kan. 17 Met iei ni 13 en sounpwong en Adar, oh re kommoal ni 14 oh wiahkihla met rahnen kamadipw oh pereperen.

18 Mehn Suhs kan nan Suhsan* pokonpene ni 13+ oh 14,+ oh re kommoal ni 15 oh wiahkihla met rahnen kamadipw oh pereperen. 19 Ihme kahrehda mehn Suhs kan me kin kousoan nan kahnimw doh kan wiahkihla 14 en sounpwong en Adar rahnen pereperen oh kamadipw, rahnen kasarawi ehu,+ oh ahnsoun kadarpeseng mwenge kan rehn emenemen.+

20 Mordekai+ eri kilelehdi mwekid pwukat oh kadarala kisinlikou kan rehn mehn Suhs koaros nan en Nanmwarki Ahasuerus wehi kan koaros, me keren oh doh. 21 E kaweidkin irail en wia kasarawi ni 14 en sounpwong en Adar, iangahki ni 15, nan sounpar koaros, 22 pwehki nan rahn ako mehn Suhs kan kommoaldihsang arail imwintihti kan oh nan sounpwongo arail pahtou wekidekiong ni peren oh arail mwahiei+ ni rahnen kasarawi. Re pahn kasarawih rahn pwukat nin duwen rahnen kamadipw oh pereperen oh nin duwen ahnsoun kadarpeseng mwenge kan rehn emenemen oh kisakis kan ong me semwehmwe kan.

23 Oh mehn Suhs kan pwungkihda ren pousehla wia kasarawi me re tapihadahro oh wia dahme Mordekai ntingkilahng irail. 24 Pwe Aman+ nein Ammedada mehn Akako,+ imwintihti en mehn Suhs kan koaros, pilahn en uhwong mehn Suhs kan pwehn kamwomwirailla,+ oh e doadoahngki Pur,+ me iei, Usuhs,* pwehn kapingirailda oh kamwomwirailla. 25 Ahpw ni Ester eh kohlongodo mwohn nanmwarkio, nanmwarkio eri wiahda kehkehlik kei ni nting:+ “Eh pilahn mwersuwed en uhwong mehn Suhs kan+ en uhd kohdiong powe”; irail eri langahda ih oh nah pwutak ko pohn tuhkeo.+ 26 Ihme kahrehda irail kahdaneki rahn pwukat Purim,* sang ni ahd Pur.+ Eri, pwehki mehkoaros me ntingdi nan kisinlikou wet oh dahme re kilangada me pid irair wet oh dahme kohdiong pohrail, 27 mehn Suhs kan koasoanediong pein irail oh kadaudokarail kan oh koaros me iang irail,+ me re anahne kasarawih rahn riau pwukat oh kapwaiada dahme ntingdier duwen irail ni ahnsou me kileldi nan sounpar koaros. 28 Re pahn kin tamataman oh kasarawih rahn pwukat nan dih koaros, sang ehuehu peneinei, ehuehu wehi, oh ehuehu kahnimw; oh rahnen Purim pwukat sohte pahn sohrasang mehn Suhs kan, oh arail kataman mepwukat sohte pahn imwisekla nanpwungen kadaudokarail kan.

29 Lih Nanmwarki Ester, nein Apieil, oh Mordekai mehn Suhso eri ntingihada sang ni ara manaman koaros pwehn kamanahla keriaun kisinlikou me pid Purimo. 30 E kadarala kisinlikou kan rehn mehn Suhs koaros nan wehi 127,+ wehin Ahasuerus,+ ni mahsen en popohl oh mehlel 31 pwehn kamanahla kasarawien rahn akan en Purim ni ahnsou me kileldi kan, duwehte me Mordekai mehn Suhso oh Lih Nanmwarki Ester kaweidkin irail en wia+ oh duwehte me re koasoanediong pein irail oh kadaudokarail kan en kapwaiada,+ iangahki kaisihsol+ oh kapakap ni ngidingid.+ 32 Oh en Ester kehkehliko kamanahla mepwukat duwen Purim,+ oh e ntingdi nan pwuhk ehu.

10 Nanmwarki Ahasuerus eri koasoanehdi doadoahk idihd ong aramas akan me kin kousoan nan sahpw oh dekehn nansed kan.

2 Mehkoaros me e wiadahr sang ni eh manaman oh kehl, iangahki oaritik kan duwen nanmwarkio eh kasapwilada+ Mordekai,+ mepwukat sou ntinting nan pwuhken poadopoad+ en nanmwarki kan en Media oh Persia?+ 3 Mordekai mehn Suhso me keriauwih Nanmwarki Ahasuerus. E lapalap* nanpwungen mehn Suhs kan oh rie kan koaros wauneki ih, oh e kin wia doadoahk ong kamwahupen nah aramas akan oh utung nsenamwahu en* kadaudokarail kan koaros.