SONA
1 Siohwa eri ketin mahsanihong Sona*+ nein Amidai: 2 “Uhda, kohwei Ninipe,+ kahnimw kalaimwuno oh lohki kadeik ong kahnimwo, pwehki I kilangehr soahng suwed kan me aramas ako kin wiewia.”
3 Sona ahpw uhda pwehn tangasang Siohwa kohla Tarsis; e kohdihla Sopa oh diarada sohp pwoat me pahn kohla Tarsis. Ih eri pwaindi pweine oh douda pohn sohpo pwe en iang irail seiloakla Tarsis oh tangasang Siohwa.
4 Siohwa eri ketin kadarala kisinieng kehlail ehu nansedo, oh mie melimel kehlail ehu nansedo me kahrehiong sohpo eh kereniong ohla. 5 Tohn sohp ko masepwehkada me kahrehda emenemen irail ahpw tepida likweriong eh koht peki sawas. Oh re tepida kesehla kepwehn sohpo nansedo, pwehn kamarahda sohpo.+ Ahpw Sona doudilahr nan sohpo, wasa me e wendi oh meirkelikla ie. 6 Kepdin en sohpo ahpw kohla oh ndaiong ih: “Dahme ke memeirki? Pwourda, likweriong omw kohto! Mweinele Koht mehlelo pahn ketin kasalehda me e nsenohkin kitail, oh kitail sohte pahn sohrala.”+
7 Irail eri ndapene nanpwungarail: “Kohdo, kitail usuhs+ pwehn diarada ihs me pwukoahki kahpwal wet.” Irail eri usuhs oh Sona me pilipilda.+ 8 Irail ahpw ndaiong ih: “Menlau ndaiong kiht, ihs me pwukoahki kahpwal wet me lelohng kitail? Ia omw doadoahk oh ke kohsang ia? Ia omw wehi en oh kowe mehn ia?”
9 E ahpw sapeng: “Ngehi mehn Ipru men, oh I kin lemmwiki* Siohwa, Koht en nanleng, me ketin wiahda sehd oh sahpw madekeng.”
10 Pwehki met en ohl ako masepwehko ahpwte pil laudla, oh re idek reh: “Dahme ke wiadahr?” (Ohl ako esehda me e tangatangasang Siohwa, pwehki e ndaiong irail.) 11 Irail eri ndaiong ih: “Dahme se pahn wiahiong uhk, pwe sehdet en kak mwelehdi?” Pwe melimel en sehdo wie lalaudla. 12 E ahpw sapeng: “Kumwail pwekiehda oh keseielahng nansedo, oh sehdo ahpw pahn mwelehdi; pwe I ese me ngehi me kahrehda melimel kehlail wet eh lelohng kumwail.” 13 Ahpw, ohl ako nannanti ren seikihlongala sohpo ni oaroahr, ahpw re sohte kak, pwehki melimel en sehdo wie lalaudla.
14 Irail eri likweriong Siohwa oh patohwan: “Maing Siohwa, komw kupwurkalahngan oh dehr ketin mweidohng kiht sen sohrala pwehki ohl menet! Komw dehr ketin kapwukoahkin kiht ntahn aramas soh dipe, pwehki, Maing Siohwa, mepwukat koaros wiawi nin duwen kupwuromwi.” 15 Irail eri pwekada Sona oh keselahng ih nansedo; oh sehdo ahpw mwelehdi. 16 Ohl ako ahpw lemmwikihda kowahlap Siohwa,+ oh re wiahda meirong ehu ong Siohwa oh kahukihla inou kan.
17 Siohwa eri ketin kadarala lapalahn mwahmw men pwehn kadallehla Sona, Sona eri mihmihki nan kapehden mwahmwo erein rahn siluh oh pwohng silipwong.+
2 Sona ahpw kapakapohng Siohwa eh Koht sang nan kapehden mwahmwo,+ 2 oh e patohwan:
“Sang nan ei apwal I likweriong Siohwa oh e ketin sapeng ie.+
Sang nan kepin* Sousou* I likwer peki sawas.+
Komwi eri ketin karonge ngileiet.
3 Ni omw ketin keseiedilahng nan wasa loal, nanwerengen madau,
Ahd kan kapiliepene.+
Sapwellimomwi ilok laud kan koaros pwilidohng pohi.+
4 Oh I patohwan, ‘I pekeusangehr mwohn silangomwi!
Ia duwen ei pahn pwurehng kilang sapwellimomwi tehnpas sarawio?’
5 Pihl kan kapiliepene oh keper ong ei mour;+
Pihl loal koaduhpwalihiehdi.
Oaloahd kan pidpene moangeiet.
6 I kihrdihla ni tepin nahna kan.
Ewen kelen sousou* wie ritirit pohi kohkohlahte.
Ahpw Maing Siohwa ei Koht, komw ketin kapwurehdo ei mour sang nan pwoahr.+
7 Ni ei mour* eh sosohrala, Siohwa me I tamataman.+
Eri ei kapakap lelewohng komwi, nan omwi tehnpas sarawio.+
8 Irail me kin poadidiong dikedik soh katepe kan kesehla arail utupen limpoak loalopwoat.*
9 Ahpw ngehi, I pahn patohwanohng komwi ei kapingkalahngan oh I pahn wiahiong komwi meirong.
Dahme I kahukilahr, I pahn kapwaiada.+
Komour kin pwilisang rehn Siohwa.”+
10 Kedekedeo Siohwa eri ketin ruwese mwahmwo, oh mwahmwo ahpw mwuskilahng Sona ni oaroahr.
3 Siohwa ketin mahsanihong Sona keriapak:+ 2 “Uhda, kohwei Ninipe,+ kahnimw kalaimwuno oh lohkihong kahnimwo rohng me I padahkihong uhk.”
3 Sona eri peikiong mahsen en Siohwa+ oh kohla Ninipe.+ Ninipe iei kahnimw ehu me inenen kalaimwun*—en alu pidakih kahnimwo* pahn reireiki rahn siluh. 4 Sona eri pedolong nan kahnimwo oh sapasapalki rahn ehu, oh e kin lohki: “Mwurinte rahn 40, Ninipe pahn mwomwla.”
5 Oh tohn Ninipe kan ahpw pwosonla Koht,+ oh pakairki kaisihsol ehu oh likawihada likoun nsensuwed,* sang me keieu lapalap lel me keieu tikitik rehrail. 6 Ni ahnsou me rohngo lella rehn nanmwarkien Ninipe, e ahpw uhdahsang nan mwoale oh kapwuhrasang eh likoun nanmwarki oh likawihada likoun nsensuwed* oh mwohndi nan pehs kan. 7 Oh e pil wiahda pakair ehu nan Ninipe pwon,
“Sang ni koasoandien nanmwarki oh sapwellime lapalap akan: Sohte aramas de mahn, pelin kou de pelin sihpw pahn kang mehkot. Re sohte pahn mwenge de pil nimpil. 8 Aramas oh mahn akan, ren likawihada likoun nsensuwed;* oh ren likweriong Koht ni ngidingid oh sohpeisang ar wiewia suwed kan oh tiahk lemei me re kin wiewia. 9 Ihs me ese ma Koht mehlelo pahn kakete wekidala kupwure* ong dahme e ketin koasoanehdi en wia oh sohpeisang sapwellime engieng, pwe kitail en dehr sohrala?”
10 Ni Koht mehlelo eh ketin mahsanihada dahme re wiahier, duwen ar sohpeisang ar wiewia suwed kan,+ e ahpw ketin wekidala kupwure* duwen kahpwal me e mahsanih e pahn ketikihdohng irail, oh e sohte ketikihdo.+
4 Ahpw Sona uhdahn nsensuwedkihla met, oh e lingeringerda. 2 Ih eri kapakapohng Siohwa, patohwan: “Maing Siohwa, kaidehn iei met me I medemedewe ni ei mihmi nan sapweio? Ihme kahrehda I song en tangalahng Tarsis+ nin tapio; pwe I ese me komwi iei Koht kupwurkalahngan oh kadek kalahngan men, me sohte kin mwadang engiengda oh diren limpoak loalopwoat,+ me kin ketin kupwurtoutoukihla kahpwal. 3 Eri, Maing Siohwa, komw kupwurkalahngan oh ketikihweisang ei mour,* pwe ei mehla mwahusang ei momour.”+
4 Siohwa eri ketin keinemwe: “Ia duwe, e pwung ken lingeringer?”
5 Sona eri kohieila sang nan kahnimwo oh mwohndi ni palimesehn kahnimwo. E wiahda eh wasahn rukusang ketipin wasao oh mwohndi pahn mweteh pwe en kilang dahme pahn wiawihong kahnimwo.+ 6 Siohwa Koht eri ketin wiahda tuhke iuhnga pwoat* en wosada pohn Sona, pwehn kihong ih mwete pohn moange oh pwehn kihsang eh nsensuwed. Oh Sona uhdahn perenkihda iuhngao.
7 Ahpw Koht mehlelo ketin kadarala mwahs men mandahn rahno ni wasa eh rarahnpeseng, oh mwahso kauwehla iuhngao oh e mengila. 8 Ni ketipino eh tepida dakada, Koht pil ketin kadarala kisinieng karakar en palimese, oh ketipino ahpw kamwasikahla moangen Sona oh e kereniong lipwongmasala. E kin pekipeki en mehla, oh e kin ndinda, “Ei mehla mwahusang ei momour.”+
9 Koht eri ketin keinemwe rehn Sona: “Ia duwe, e pwung ken lingeringerki iuhngao?”+
Ih eri sapeng, patohwan: “Mie ei pwuhng en lingeringer, I uhdahn lingeringer ihme I men mehkihla.” 10 Ahpw Siohwa ketin mahsanih: “Ke poakehla iuhngao me ke sohte koadoahke de pil kakairada; tuhkeo keirda pwohng ehute oh mengila pwohng ehute. 11 I sou pahn pil poakehla Ninipe, kahnimw kalaimwuno,+ me mie aramas tohtohsang 120,000 me sehse dahme pwung oh sapwung,* iangahki neirail mahn tohto kan?”+
Wehwehki “Mwuroi.”
De “kaudokiong.”
LI, “kapehden.”
LI, sheʼohl′. Kilang KLL.
LI, “sampah.”
LI, neʹphesh. Kilang KLL.
De kakete, “ar loalopwoat.”
LI, “kahnimw kalaimwun ehu ong Koht.”
De “en alu kotehla kahnimwo.”
E wiawihkihda mwein likou arekarek me kin wiahda ehd.
E wiawihkihda mwein likou arekarek me kin wiahda ehd.
E wiawihkihda mwein likou arekarek me kin wiahda ehd.
De “koluhkihla.”
De “koluhkihla.”
LI, neʹphesh. Kilang KLL.
De kakete, “tuhke kaster.”
De “sehse palimaun sang palimeing.”