MAIKA
1 Ni mwehin Sodam,+ Ahas+ oh Esekaia,+ nanmwarkien Suda kan,+ Siohwa ketin mahsanihong Maika*+ en Moresed, oh e alehdi nan kaudiahl ehu duwen Sameria oh Serusalem:
2 “Kumwail aramas akan koaros, kumwail rong!
Sampah oh koaros me kousoan loale, rong kanahieng,
Oh Kaun Wasa Lapalahpie Siohwa en ketin wia sounkedipamwail+
—Siohwa sang sapwellime tehnpas sarawio.
3 Pwe kilang! Siohwa ketiket kohieila sang sapwellime wasa;
E pahn ketidihdo oh ketin tiakedi wasa ileile kan en sampah.
4 Nahna kan pahn peipeseng pahn aluweluwe kan,+
Oh wahu kan* pahn pwalpeseng
Duwehte kirihs mwohn kisiniei,
Duwehte pihl eh kin wudekidi sang ni wasa ukada ehu.
Ihs me pwukoahki uhwong en Seikop?
Kaidehkin Sameria?+
Oh ihs me pwukoahki wasa ile kan en Suda?+
Kaidehkin Serusalem?
6 I pahn wiahiong Sameria koasoakoasoak en mohn kahnimw ehu en nansapw,
Wasahn poad kreip kan;
I pahn kesehdihla* eh takai kan nan wahwo,
Oh I pahn kapwarehda poahsoane kan.
7 Eh sansal perperda kan koaros pahn kapisetikpene,+
Oh kisakis koaros me e alehdi sang eh netiki pein ih* pahn isihsla.+
I pahn kamwomwala eh dikedik kan koaros.
Pwe e alehdi mepwukat sang pweinen netiki paliwere,
Oh mepwukat pahn pwurehng wiahla pweinen lihen netiki paliwararail kan.”
Ei sengiseng pahn duwehte en kidien wel kan,
Oh ei mwahiei pahn duwehte en ostris kan.
Kalokoloko doupeseng lella ni ewen kelen Serusalem,+ wasa me nei aramas akan kin koukousoan ie.
10 “Kumwail dehpa pakairki met nan Kahd;
Kumwail sohte douluhl pahn sengiseng.
Tapwur nan pwelpar nan Ped-apra.*
11 Tohn* Sapir kan, kumwail kotehwei ni amwail kilisou oh namenek.
Tohn* Sahnan kan sohte kohieido.
E pahn mie mwahiei nan Pedesel oh met sohla pahn utung kumwail.
12 Pwe tohn* Marod kan awiawih mehkot mwahu,
Ahpw dahme suwed kohdihdosangehr rehn Siohwa kodohng ni ewen kelen Serusalem.
13 Tohn* Lakis kan,+ kapatahiong kuruma ong ni pwihnen oahs kan.
Dipen nein Saion serepein kohsang rehmw,
Pwe uhwong en Israel kan dierekda rehmw.+
14 Eri ke pahn kihla kisakis en kamwurimwur kan rehn Moresed-kahd.
Aramas en Aksip kan+ pitihedi nanmwarkien Israel kan.
15 Tohn* Maresah kan,+ I pahn wadohng uhk sounkalowehdi men.*+
Lingan en Israel pahn lella Adullam.+
16 Koimadihiukala oh sehkasang pitenmoangomwen ong noumw seri kesempwal kan.
Koimadihiukala duwehte ikel men,
Pwehki noumw seri kan kalipilipala sang uhk.”+
2 “Meid suwediong irail me kin koasoakoasoane mehkot kamedek,
Me kin koasoakoasoane mehkot suwed pohn arail peht kan!
Ni ahnsou me marain en nimenseng kin leledo re kin kapwaiada met,
Pwehki re ahneki kehl en wia dahme re koasoanehdio.+
2 Re kin noahroke mwaht kan oh kulihada mepwukat;+
Oh pil ihmw kan, oh re kin ale mepwukat;
Re kin widing pwehn alehdi imwen ohl emen,+
Oh pwehn ale eh sohso.
3 Kahrehda iet me Siohwa ketin mahsanih:
‘I koasoakoasoanehiong peneinei wet kahpwal ehu+ me kumwail sohte pahn pitsang.+
Kumwail sohla pahn kin aklapalap,+ pwe ahnsowo ahnsou apwal ehu.+
4 Rahno aramas akan pahn kapwukapwurehiong mahsen en melkahka pwoat duwen kumwail,
Oh re pahn mwahieikin kumwail.+
Re pahn nda: “Kitail uhdahn mwomwla!+
E kihsang kitail pwaisen neitail aramas akan oh kihong meteikan—e kihsang kitail met!+
E kihong me salelepek men atail mwaht kan.”
5 Eri sohte emen rehmw me pahn waikpeseng sahl en sosohngo,
Pwehn nehkpeseng sahpwo nan mwomwohdisohn Siohwa.
6 Re kin lohki, “Kumwail uhdihsang kalohk!
Mepwukat en dehr lohkseli;
Namenek sohte pahn kipeikitaildi!”
7 Kadaudok en Seikop kan, ia duwe, aramas akan kin nda:
“Siohwa* sohla kak ketin kanengamah?
Ih sapwellime wiewia kan mepwukat?”
Ia duwe, pein ei mahsen kan sou kin wahdo mehkot mwahu ong irail me kin weweid ni pwung?
8 Ahpw me keren pein nei aramas akan uhda nin duwen imwintihti men.
Kumwail waikasang douluhl mehn kapwat kaselel iangahki* likowo
Sang irail me alialu kohdo ni ar sohte perki mehkot, duwehte irail me pwurasang mahwen.
9 Kumwail kasarehla lih akan en nei aramas akan sang imwarail kan me re kin perenki;
Kumwail wahsang ei lingan kohkohlahte sang nair seri kan.
10 Uhda oh kohla, pwe sahpwet sohla wia wasahn kommoal.
Pwehki eh samin,+ e pahn mwomwla, mwomwla laud.+
11 Ma ohl emen alialu mwurin kisinieng oh widing oh koasoia likamw wet:
“I pahn kalohkihong uhk duwen wain oh sakau,”
Eri e pahn wiahte sounkalohk men ong aramas pwukat!+
12 Seikop, I uhdahn pahn kapokonepene kumwail koaros;
I uhdahn pahn kihpene mehn Israel kan me luhwehdi.+
I pahn kihirailpene ni minimin, rasehng sihpw kan nan kehl,
Rasehng pelin sihpw ehu nan ar mohs;+
Wasao pahn katairong pwehki aramas akan.’+
13 Me kin koapwoarehda dihdo pahn kohla mwohrail;
Re pahn kauwehla oh kotehla ewen kehlo oh pedoila ni ewen kehlo.+
Ar nanmwarki pahn kohieila mwohrail,
Siohwa pahn ketin kahluwa irail koaros.”+
Kumwail sou anahne ese dahkot pwung pahrek?
2 Ahpw kumwail kailongki dahme mwahu+ oh poakohng dahme suwed;+
Kumwail tehrasang kilin nei aramas akan oh udukarail kan ni tihrail kan.+
3 Kumwail pil kang uduken nei aramas akan+
Oh tehrasang kilirail kan,
Sukpeseng tihrail kan, kamwutepene mepwukat ni pisetik,+
Duwehte mehkot me kuk nan einpwoat ehu,* duwehte uduk nan einpwoat en kuk ehu.
4 Ni ahnsowo re pahn likweriong Siohwa peki sawas,
Ahpw e sohte pahn ketin sapeng irail.
5 Iet me Siohwa ketin mahsanihong soukohp kan me kahrehiong nei aramas akan ren salongala,+
Me kin lohki ‘Popohl!’+ ni eh mie mehkot me re pahn rukoa*+
Ahpw kin lohki* mahwen ong ih me sohte kin kihong mehkot nan awarail kan:
6 ‘Kumwail pahn mi nan rotorot duwehte nipwong;+ e sohte pahn mie kaudiahl;+
Ihte me pahn mie ong kumwail iei rotorot, sohte kosetipw.
Ketipino pahn kihrla pohn soukohp kan,
Oh rahn pahn rotorotala ong irail.+
Irail koaros pahn perehla awarail kan,*
Pwe sohte pasapeng sang Koht.’”
8 A ngehi, I audaudkihda kehl sang sapwellimen Siohwa ngehn sarawi,*
Oh audaudkihda pwung pahrek oh eimah,
Pwe I en padahkihong Seikop eh uhwong oh padahkihong Israel dipe.
9 Kumwail kaunen kadaudok en Seikop kan, menlau rong met
Oh kumwail kaunen aramas en Israel kan,+
Me kin kailongki pwung pahrek oh me kin kapirekihala mehkoaros me inen,+
10 Me kin kaukihda Saion kakerkerdien nta oh kaukihda Serusalem suwed.+
11 Nah kaun akan kin kopwung pwehn ale kisakis ni ahl sapwung,+
Nah samworo kan kin kaweid pwehn ale pweipwei,+
Ahpw re kin likih Siohwa,* nda:
“Siohwa sou ketiket reht?+
Sohte kahpwal pahn lelohng kiht.”+
12 Eri pwehki kumwail,
Saion pahn deipwelda rasehng mwaht ehu,
Serusalem pahn wiahla koasoakoasoak en mohn kahnimw,+
Oh nahnahn Tehnpaso pahn duwehla wasa ile kan en nanwel ehu.+
4 Ni kaimwiseklahn rahn akan,*
Nahnahn tehnpesen Siohwa+
Pahn poadada teng pohnangin kadoken nahna kan,
Oh e pahn pwekipwekda pohnangin dohl kan,
Oh aramas akan pahn pokonlahng wasao.+
2 Oh tohnwehi tohto pahn kohla oh nda:
“Kohdo, kitail kohdahla ni nahnahn Siohwa
Oh ni tehnpesen Koht en Seikop.+
E pahn ketin padahkihong kitail duwen sapwellime ahl akan,
Oh kitail pahn keid nan sapwellime ahl akan.”
Pwe kosonned* pahn kohsang Saion,
Oh mahsen en Siohwa pahn kohsang Serusalem.
3 E pahn ketin wia kadeik nanpwungen aramas tohto+
Oh ketin kapwungala ire kan nan wehi kehlail kan me doh.
Irail pahn wekidohng neirail kedlahs kan ni mehn deipwel kan
Oh neirail ketieu kan ni siset en lop tuhke.+
Wehi ehu sohte pahn pwekada nah kedlahs pwehn pelianki ehu wehi,
Re pil sohla pahn sukuhlki mahwen.+
4 Emenemen irail pahn mwohndi* pahn eh tuhkehn kreip oh pahn eh tuhke pik,+
Oh sohte me pahn kamasak irail,+
Pwe doauesen Siohwa kaunen karis en sounpei me ketin mahmahsen.
5 Pwe aramas koaros pahn alu, emenemen ni mwaren eh koht,
Ahpw kitail pahn weweid ni mwaren Siohwa atail Koht+ kohkohlahte.
6 Siohwa ketin mahsanih, “rahno,
I pahn kapokonepene aramas akan* me siksikel,
Oh kihpene me mwarahkpeseng,+
Iangahki irail me I kahpwalihala.
7 I pahn wiahiong aramas akan* me siksikel en wiahla me luhwehdi kei,+
Oh wiahiong irail* me dohsang uhdakarail ren wiahla wehi kehlail ehu;+
Oh Siohwa pahn ketin kaunirailda nin duwen nanmwarki men ni Nahna Saion,
Sang met oh pil kohkohlahte.
8 A kowe, imwen doulik en pelin sihpw kan,
Dohl en nein Saion serepein,+
E pahn kodohng uhk, ei, keieun kaunda* pahn kohdo,+
Wehi me nein Serusalem serepein ahneki.+
9 Eri dahme ke wie weriwer laudki?
Ia duwe, sohte omw nanmwarki,
De noumw sounkaweido sohralahr,
Me kahrehda medek lelohng uhk rasehng lih emen me pahn neitik?+
10 Nein Saion serepein, pitirek oh ingitik,
Rasehng lih emen me pahn neitik,
Pwe met ke pahn kohla sang nan kahnimwo oh kousoan nan mohs.
Ke pahn kohla lella Papilon,+
Oh ke pahn poadoandoarla wasao;+
Ih wasao me Siohwa pahn ketin pwainuhkada sapahl sang nan pehn omw imwintihti kan.+
11 Eri wehi tohto pahn kohpene uhwong uhk;
Re pahn nda, ‘En saminla,
Oh masatail kan en kilang met eh wiawihong Saion.’
12 Ahpw re sehse sapwellimen Siohwa madamadau kan,
Re sohte wehwehki kupwure;*
Pwe e pahn ketin kapokoneirailpene rasehng kapakap en krein* me ahpwtehn paldi ni wasahn kihsang kilin krein.
13 Nein Saion serepein,+ uhda oh kihsang kilin krein;
I pahn wekidala kodomw kan ong ni mete,
Oh I pahn wekidala patehn nehmw kan ong ni prons,
Oh ke pahn kamwutepene aramas tohto.+
Ke pahn patohwanlahng Siohwa nair mwohni me re alehdi ni ahl mwersuwed,
Oh ar kepwe kan rehn Kaun mehlel en sampah pwon.”+
Re poakiheki sounkopwung en Israel sokon pwoat ni likinsepe.+
Me keieu tikitik nanpwungen meh kid kan* en Suda,
Sang rehmw emen pahn kohdo me pahn wiahla kaun nan Israel ong ie,+
Me eh tapi sangete mahsie, sang rahn akan mahso.
3 Eri Koht pahn ketin likidmelieirailla
Lao lel ahnsou me lih me pahn neitiko neitikila.
Oh rien kaun menet pwutak ko me luhwehdi pahn pwurala rehn aramas en Israel kan.
4 E pahn ketida oh apwalih sapwellime aramas akan sang ni kehl en Siohwa,+
Sang ni lapalap en mwaren Siohwa eh Koht.
Oh re pahn kousoan ni ar sohte perki mehkot,+
Pwe sapwellime roson lapalap pahn lella ni imwin sampah.+
5 Oh e pahn ketikihdo popohl.+
Ni mehn Asiria kan ar pahn pedolong nan sapwatailo oh tiakedi atail imwen doulik kehlail kan,+
Kitail pahn idihada silepen sihpw isimen, ei, lapalap* welimen sang aramas akan, me pahn peiong ih.
Oh e pahn ketin kapitkitailla sang mehn Asiria kan,+
Ni ar pedolong nan sapwatailo oh tiakedi atail wasa.
7 Luhwen kadaudok en Seikop kan pahn mi nanpwungen aramas tohto
Rasehng pwoaik sang Siohwa,
Rasehng keteu eh mweredi pohn dihpw
Me sohte kin koapworopworki
De awih aramas akan.
8 Luhwen kadaudok en Seikop kan pahn mi nan wehi kan,
Nanpwungen aramas tohto,
Rasehng laion men nanpwungen mahn en nanwel kan,
Rasehng laion pwulopwul men* nanpwungen pelin sihpw kan,
Me kin keidwei rehrail oh tahr pohrail oh kapisetikihirailpene;
Oh sohte me pahn kapitirailla.
9 Pehmwen pahn pwekipwekda pohnangin omw imwintihti kan,
Oh omw imwintihti kan koaros pahn kamwomwmwomwla.”
10 Siohwa ketin mahsanih, “rahno,
I pahn ketikihsang noumw oahs kan oh kauwehla weromw kuruma kan.
11 I pahn kamwomwala kahnimw kan nan sapwomwo
Oh karangkehdi omw wasa kelpene kehlail kan koaros.
13 I pahn kauwehla omw sansal perperda kan oh omw uhr kan,
Oh ke sohla pahn poaridiong doadoahk en pehmw kan.+
15 Ni engieng kowahlap I pahn ikih
Wehi kan me sohte peik.”
6 Menlau, kumwail rong dahme Siohwa ketin mahmahsanih.
Uhda, kihda repenpwung ehu mwohn nahna kan,
Oh dohl kan en rong ngilomw.+
2 Nahna kan, rong sapwellimen Siohwa repenpwung,
Kumwail poahsoan teng kan en sampah,+
Pwe Siohwa sapwellimanki repenpwung ehu ong sapwellime aramas akan;
Iei Israel me e pahn ketin akamaiong:+
3 “Nei aramas akan, dahme I wiahiong kumwail?
Ia duwen ei kapwangeikumwailda?+
Kedipaiehda.
4 Pwe I waikumwaildo sang nan sapwen Isip,+
Sang wasa me kumwail wia lidu ie* I kasaledengkumwailla;*+
I kadarewei mwohmwail Moses, Aaron oh Miriam.+
5 Nei aramas akan, menlau tamataman dahme Nanmwarki Palak en Mohap koasoanehdio,+
Oh dahme Palaam nein Peor sapengki ih+
Pwe kumwail en ese wiewia pwung kan en Siohwa.”
6 Dahme I pahn patohwando mwohn silangin Siohwa?
Dahme I pahn poarikidiong mwohn silangin Koht me ketiket nanleng?
Ia duwe, I pahn patohkihdo mwohn silangi meirong isihs kan me pwonte isihsla,
Koupwul kan me sounpar ehu?+
7 Ia duwe, Siohwa pahn ketin kupwurperenki sihpw wol kid kei,
Oh pil pillap en leh nen kei?+
Ia duwe, I pahn kihla nei mesenih ong ei uhwong,
Wahn paliwereiet ong dipei?+
8 Kowe aramas, e ketin mahsanihonguhker dahme mwahu.
Oh dahme Siohwa ketin kupwurki* ken wia?
9 Kapitien Siohwa ketin malipe kahnimwo;
Irail me ahneki erpit pahn lemmwiki mwaromwi.
Tehk kanahieng kalokoloko* oh ih me ketin koasoanehdi met.+
10 Ia duwe, miehte dipwisou kesempwal kan me alahldi sang ni mwekid en mwersuwed nan imwen aramas suwed
Oh sosohng en ihpah* sapwung me kasaut?
12 Pwe nah* aramas kepwehpwe kan direkihla tiahk lemei,
Oh towe kan kin lokaia likamw;+
Lowarail kan oh awarail kan kin widing.+
13 “Kahrehda, I pahn kauweiukala ni ei wokihiuk,+
Oh kamwomwuhkala pwehki dipomw kan.
14 Ke pahn mwenge ahpw sohte medla;
E pahn sohte kanengen kapehdomw.+
Ke pahn kihsang dipwisou kan pwe ken nekidala, ahpw ke sohte pahn kak nekinekid mepwukat,
Oh dahme ke nekinekid, I pahn kihlahng kedlahs.
15 Ke pahn kamwarak werentuhke, ahpw ke sohte pahn dolung.
Ke pahn tiakpene olip kan, ahpw ke sohte pahn doadoahngki leho;
Oh ke pahn wiahda wain kapw, ahpw ke sohte pahn nim wain.+
16 Pwe ke kin idawehn koasoandi kan en Omri oh doadoahk koaros en Eihap oh kadaudoke kan,+
Oh kumwail kin idawehn arail kaweid.
Ihme kahrehda I pahn wiahkinuhkala mehkot kamasepwehk ehu
Oh wiahkihla towe kan mehkot me aramas en kin kuwaiki;+
Oh kumwail pahn weuwa kepit en aramas akan.”+
7 Meid suwediong ie! I duwehte emen
Me sohte kin diar dunen kreip kan pwe en kang,
Me sohte kin diar tepin pik mah me e men kang,
Mwurin rikirikpenehn wahntuhkehn ahnsoun karakar,
Oh rikirikpene me wiawi mwurin dondol en kreip.
2 Me loalopwoat men sohrasangehr sampah;
Nanpwungen aramas akan sohte emen me pwung.+
Irail koaros rukuruk awiawih ren kakerehdi nta.+
Emenemen kin kolekihdi rie pwutak uhk pwoat.
3 Pehrail kan samanih wia dahme suwed;+
Kaun emen kin ngihtehtehki en ale kisakis kan,
Sounkopwung men kin peki pwehn ale keting,+
Me lapalap men kin kasalehda dahme e mwahuki,+
Oh re kin ehupene wia met.*
4 Nair me keieu mwahu rasehng dihpw tekatek kan,
Nair me keieu pwung suwedsang kehl tekatek.
Rahn me noumw sounsilasil kan kin koasoakoasoia oh omw rahnen kadeik pahn kohdo.+
Met re pahn pingida.+
5 Kumwail dehr kamehlele iengamwail men
De likih kompoakepahmwail keren men.+
Kanahieng dahme ke pahn ndaiong emen me wonohn ni omw pwoalpwoale.
6 Pwe pwutak men kin mwamwahliki eh pahpa,
Serepein men kin uhwong eh nohno,+
Oh lih pwopwoud men kin uhwong ahn eh pwoudo nohno;+
En aramas emen eh imwintihti iei tohnimwe.+
7 Ahpw ngehi, I pahn mwasamwasahn awiawihete Siohwa.+
I pahn awih Koht, sounkomourpei ni kanengamah.+
Ei Koht pahn ketin karonge ie.+
8 Ei imwintihti, ke dehr perenda pwehki ei mi nan apwal.
Mendahki ei pwupwudier, I pahn pwourda;
Mendahki ei mi nan rotorot, Siohwa pahn ketin wia kamarainpei.
9 I pahn dadaurete pahn engieng en Siohwa
—Pwe I wiahda dihp ong ih+—
Lao e ketin doare ei repenpwung oh ketikihdohng ie pwung pahrek.
E pahn ketikinielahng nan marain;
I pahn kilang sapwellime pwung.
10 Ei imwintihti pil pahn kilang,
Oh namenek pahn kipehdi ih me ndaiong ie:
“Ia Siohwa omw Koht?”+
Mesei kat pahn kilang ei imwintihtio.
Met e pahn tiatihdi duwehte pwelmatak nanial akan.
11 E pahn wia rahnen kauwada omw kehl takai kan;
Rahno irepen sapwomwo pahn kalaudla.*
12 Rahno irail pahn kohdo rehmw
Kohdo sang Asiria oh kahnimw en Isip kan,
Sang Isip kohla lel ni Pillapo;*
Sang ehu sehd lel ehu sehd oh sang nahna lel nahna.+
13 Oh sahpwo pahn tehnla pwehki towe kan,
Pwehki imwilahn dahme re wiahda.*
14 Komw ketin apwaliheki sapwellimomwi aramas akan sapwellimomwi sokon, sapwellimomwi sohso pelin sihpw,+
Me kelehpw koukousoan nanwel ehu—nanwerengen mwaht ehu.
Ren mwenge pohn Pasan oh Kilead+ duwehte rahn akan mahso.
15 “Duwehte rahn ako me kumwail kohieisang nan sapwen Isip,
I pahn kasalehiong kumwail soahng kapwuriamwei kan.+
16 Wehi kan pahn kilang oh namenekla mendahki ar kehlail koaros.+
Re pahn pwainkihdi awarail kan pehrail kan;
Salengarail kan sohla pahn kak rong wasa.
17 Re pahn tamwe pwelpar rasehng serpent kan;+
Rasehng mahn kerep kan en sampah re pahn kohieido sang nan ar wasahn ruk kan wie rerrer.
Re pahn patohdo rehn Siohwa atail Koht ni masepwehk,
Oh re pahn lemmwikin komwi.”+
18 Ihs Koht emen me duwei komwi,
Me kin ketin mahkohng sapwung oh pohnsehsehla kauwehla kosonned+ me sapwellime aramas* me luhwehdi kan+ kin wiahda?
E sohte pahn ketin kolokol sapwellime engieng kohkohlahte,
Pwe e kin ketin kupwurperenki limpoak loalopwoat.+
19 E pahn ketin pwurehng kasalehiong kitail kadek kalahngan;+ e pahn ketin kalowehdi* atail sapwung kan.
Komw pahn ketin kesehla diparail kan koaros nan kepin madau.+
20 Komw pahn ketin kasalehiong Seikop lelepek,
Oh limpoak loalopwoat ong Eipraam,
Nin duwen omwi ketin kahukihong samat mehn mahs ako sang mahsie.+
Ahd kamwot ong Maikel (wehwehki “Ihs me Rasehng Koht?”) de Maikaiah (wehwehki “Ihs me Rasehng Siohwa?”).
De “wasa patapat pah.”
LI, “imwen Israel.”
LI, “wudekihdihla.”
De “pweinen eh netiki paliwere pwon.”
De “nan imwen Apra.”
LI, “Towe lih en.”
LI, “Towe lih en.”
LI, “towe lih en.”
LI, “Towe lih en.”
LI, “Towe lih en.”
De “sounadihasang men.”
De “Sapwellimen Siohwa ngehn sarawi.” LI, ruʹach. Kilang KLL “pneuʹma; ruʹach.”
De kakete, “sang ni.”
De “einpwoat auwalek en kuk ehu.”
De kakete, “ni ar ngalispene ngirail kan.”
LI, “kasarawi.”
De “perehla alisen powe.”
De “sapwellimen Siohwa manaman.” LI, ruʹach. Kilang KLL “pneuʹma; ruʹach.”
De “silper.”
De “re kose me re kin likih Siohwa.”
De “Ni imwin rahn akan.”
De “kaweid.”
De “kousoan.”
LI, “ih.”
LI, “ih.”
LI, “ih.”
De “kaundahn mahso.”
De “sapwellime kaweid.”
Kilang KLL.
LI, “Serepein.”
De “keinek kan.”
De “kaun.”
De “laion pwulopwul men me wunaun ni tepinwere.”
LI, “sang nan pehmw.”
Kilang KLL.
Kilang Eks 13:3, ntp.
LI, “pwainkumwailda sapahl.”
De “peki.”
De “ken kin pwung; ken kin pahrek.”
De “ken kin kadek oh loalopwoat nan omw limpoak.” LI, “ken kin poakohng limpoak loalopwoat.”
De “ni omw pohnese omw soh itar akan.”
LI, “sokono.”
Kilang Ortk B14.
De “sohte dipikihda.”
Dokedoke kahnimwo.
LI, “re kin ehupene pahda met.”
De kakete, “koasoandio pahn mi wasa doh.”
Me iei, Iupreitis.
LI, “Pwehki wahn ar wiewia kan.”
LI, “sohso.”
De “tiakedi; kaunda.”