NAHUM
1 Kadeik ehu ong Ninipe:+ Pwuhken kaudiahl en Nahum* mehn Elkos:
2 Siohwa iei Koht emen me ketin kupwurki aramas en poadidiong ih kelehpw+ oh kin ketin ikih sapwellime imwintihti kan;
Siohwa kin ketin ikih oh ketin onopadahr en kasalehda sapwellime engieng.+
Siohwa kin ketin ikih sapwellime imwintihti kan,
Oh e kin ketin nekinekid engieng ong sapwellime imwintihti kan.
3 Siohwa sohte kin ketin mwadang engiengda+ oh sapwellimanki manaman laud,+
Ahpw Siohwa sohte mwahn pahn ketin mweidohng me dipan akan ren sohte ale kalokeparail.+
Ni eh kin ketin alu, kisinieng kehlail oh melimel kin kohda,
Oh pwelpar en aluweluwe kan kin kohda rasehng depwek kan.+
4 E kin ketin angiangih sehd,+ oh e kin ketin kamadahda;
Oh e kin ketin wiahiong pillap koaros ren madada.+
Dihpw en Pasan oh Karmel mengila,+
Oh wahnrohs en Lepanon kan mengila.
5 Nahna kan kin rerada pwehki ih,
Oh dohl akan kin peipeseng.+
Sampah pahn rerrer pwehki silangi,
Iangahki sahpw oh koaros me koukousoan loale.+
6 Ihs me kak kesihnen mwohn sapwellime engieng?+
Oh ihs me kakohng karakar en sapwellime engieng?+
Sapwellime engieng pahn wudekidi rasehng kisiniei,
Oh paip kan pahn pwalpeseng pwehki ih.
7 Siohwa me kupwur mwahu,+ wasahn ruk kehlail ehu ni ahnsoun apwal.+
E kin ketin medemedewe* irail me kin rapahki wasahn ruk reh.+
8 Sang ni lapake laud ehu e pahn ketin kamwomwala douluhl eh* wasao,
Oh rotorot pahn pwakih sapwellime imwintihti kan.
9 Dahme kumwail pilahn en uhkihong Siohwa?
E pahn ketin kamwomwkumwailla douluhl.
Kahpwal sohte pahn pwurehng pwarada.+
10 Pwe re pinipinpene duwehte dihpw tekatek kan,
Re duwehte irail kan me sakaukihla pihru;*
Ahpw re pahn roangala duwehte diperen dihpw kan.*
11 Emen me kin pilahne soahng suwed kan ong Siohwa pahn kohsang rehmw,
Me kin kihda kaweid soh katepe kan.
12 Iet me Siohwa ketin mahsanih:
“Mendahki ar kehlail oh tohto,
Mendahki met re pahn lopdi oh sohrala.*
I kalokeiukehr,* ahpw I sohla pahn kalokeiuk.
13 Oh met I pahn katimpeseng eh tuhkehn wisiko sang pohmw,+
Oh I pahn tehrpeseng selipomw kan wiahda riau.
14 Siohwa ketin kehkehlingki me pid kowe,*
‘Edomwen sohte pahn mihmi kohkohlahte.
I pahn kasohrehla sansal perperda kan oh sansal mete kan sang nan imwen* omw koht kan.
I pahn wiahda sousou ehu ong kowe, pwehki ke wiahla mehkot mwahl.’
15 Kilang! Nehn me kin weuwa kohdo rohng mwahu pohn nahna kan,
Me kin lohki popohl.+
Suda, wia omw kasarawi kan,+ kapwaiada omw inou kan me ke kahukihla,
Pwe me soh katepe men sohla pahn pwurehng keidwei rehmw.
E uhdahn pahn kamwomwmwomwla douluhl.”
2 Emen me kin kamwarakpeseng kohdadohng uhk.*+
Silehdi wasa kelpene kehlail kan.
Sinsilehte pohn ahlo.
Katengeikumwaildi* oh kakehleikumwailda ni uwen amwail kak koaros.
2 Pwe Siohwa pahn ketin onehda sapahl lingan en Seikop,
Iangahki lingan en Israel,
Pwe sounkauwehla kan kauweiraillahr;+
Oh re kauwelahr ar pons kan.
3 Nein nah sounpei kehlail kan mehn sansar kan poh weitahta,
Nah sounpei kan likawihada likou weitahta.
Mete me mi ni were kurumahn mahwen kan kin piripir rasehng kisiniei
Ni rahn me e kin kaukaunop ong mahwen,
Oh sounpei kan kin kamwakamwakid ketieu suniper kan.
4 Kurumahn mahwen kan kin tang uk kohwei nanial akan.
Re kin tangatangseli nan wasahn tuhpene kan.
Re kin lingaling rasehng mehnser lullul kan oh piripir rasehng lioal.
5 E* pahn ekerpene nah kaun akan.
Re pahn dipekelekel ni ar kohkohwei.
Re marahrahlahng ni eh* kehlo;
Re kauwada perehpe.
7 Met koasoandier: E* nameneklahr pwehki eh kilisouda,
E wisiksangehr oh nah lidu serepein kan ingihngtik;
Ngilarail duwehte ngilen mwuroi ni ar pikipikir mwaremwarerail kan.*
8 Sangete mahso Ninipe+ rasehng lepin leh ehu,
Ahpw met aramas akan tangdoaui.
“Kumwail uhdi! Kumwail uhdi!”
Ahpw sohte emen me sohpeido.+
9 Kulihasang silper, kulihasang kohl!
Sohte imwilahn dipwisou kesempwal kan.
Soangsoangen dipwisou kesempwal kan koaros kin nekinekla wasao.
10 Kahnimwo sohla kanenge, tehnla, mwomwla!+
Ar mohngiong kan peikipeseng masepwehk, pwukiarail kan kospene, lukoparail kan rerrer;
Masarail kan koaros poh reireila.
11 Ia pwoahr en laion kan,+ wasa me laion pwulopwul kan* kin mwenge ie,
Wasa me laion kin kohieila kahre wah kan,
Ni eh sohte me kin kamasak irail?
12 Laiono kin tehrpeseng seike me itar ong wah kan
Oh padikpene tepinweren seike ong laion lih.
E kin audehkihda deweo seike,
Oh eh pwoahr kan mahn kan me teipeseng.
13 Siohwa kaunen karis en sounpei ketin mahsanih, “Kilang! I kin uhwong uhk,+
I pahn isikada weromw kurumahn mahwen kan nan ediniei,+
Oh kedlahs pahn kadallehla noumw laion pwulopwul kan.*
I pahn katokehdi omw kin kulih sampah,
Oh sohla me pahn rong ngilen noumw meninkeder kan.”+
3 Meid suwediong kahnimw en kakerehdi nta!
E uhdahn direkihla widing oh pirap.
Sohte pak ehu me sohte seike!
2 Mie ngilen wowoki oh ngilen sekesek en daia kan,
Marahrahn oahs oh ngirisek en kuruma.
3 Soundak oahs, kedlahs lingaling oh ketieu melengileng,
Me tohto me kamakamala oh koasoakoasoak en paliwar mehla kan
—Aramas mehla kan sohte kak wadawadedi.
Re kin dipekelekel pohn paliwar mehla kan.
4 Met wiawi pwehki en lihen netiki paliwaro eh wiewiahn netiki paliwere me tohto,
Lih kaselel oh lingan, lih me samanih akmanaman kan,
Me kin lidipihkihdi wehi kan eh netiki paliwere oh peneinei kan eh akmanaman kan.
5 Siohwa kaunen karis en sounpei ketin mahsanih: “Kilang! I kin uhwong uhk,*+
I pahn pahkada omw likou kan pohn mesomwen;
I pahn kahrehiong tohnwehi kan ren kilang omw kilisou,
Oh wehi kan ren kilang kanamenekpomw.
6 Oh I pahn kesehwei samin pohmw.
Oh wiahiong uhk ken mwamwahlla;
I pahn wiahkinuhkala mehkot me aramas en kangkakil.+
7 Koaros me kilang uhk pahn tangasang uhk+ oh nda,
‘Ninipe mwomwlahr!
Ihs me pahn poakehla ih?’
Ia wasa me I pahn diar irail me pahn kansenamwahwihiuk?
8 Ia duwe, ke mwahusang No-amon,*+ me mwohndi limwahn dahu en Nail kan?+
Pihl kan kapilpene ih;
Eh kepwe iei sehd oh eh dihd iei sehd.
9 Idiopia oh Isip iei utupen eh kehl me sohte irepe.
Pud+ oh mehn Lipia kan me wia sounsawaspe.*+
10 Ahpw e pil wiahla me kalipilipala men;
E selidi.+
Nah seri kan pil kamakamala ni lemei ni keimwen ahl koaros.
Re usuhski nah ohl waun kan,
Oh nah ohl lapalap akan koaros selikihdi selmete kan.
11 Ke pahn pil sakaula;+
Ke pahn rukula.
Ke pahn rapahki wasahn rukusang imwintihti.
12 Omw wasa kelpene kehlail kan koaros duwehte tuhke pik kan me mie tepin wah kan;*
Ma re kin itiht, re pahn pwupwudi nan ewen sounkadallehla kan.
13 Kilang! Noumw pwihnen sounpei kan duwehte lih ekei.
Ewen kehl kan en sapwomwo pahn wie langalang ong omw imwintihti kan.
Kisiniei pahn isikala lepin tuhkehn katenge omw ewen kehl kan.
14 Idipada pihl oh onopada ni omw pahn kapilpilpene!+
Kakehlakahda omw wasa kelpene kehlail kan.
Kohdihla nan pwelmatako oh tiak pwehlo;
Kaunopada koakon mehn wiahda prik.*
15 Pil wasao kisiniei pahn isikuhkala.
Kedlahs pwoat pahn peleiukpeseng.+
E pahn kadalleiukala duwehte me loukust pwulopwul kan kin wia.+
Katohtohweiukala duwehte loukust pwulopwul kan!
Ei, katohtohweiukala duwehte loukust kan!
16 Ke katohtohwehla noumw sounnetinet kan tohtohsang usuhn nanleng.
Loukust pwulopwul kan kin kapwuhrasang kilirail kan oh pipihrla.
17 Noumw sounsilasil kan duwehte loukust,
Oh noumw kaun akan duwehte pelin loukust ehu.
Re kin mihmi nan kehl takai kan ni rahnen kopou,
Ahpw ni ketipino eh kin dakada, re kin pipihrla;
Oh sohte me ese ia irail.
18 Nanmwarkien Asiria, noumw sounsilepen sihpw kan lislisoi;
Noumw lapalap akan mihmi nan ar wasahn kousoan kan.
Noumw aramas akan mwarahkpesengier pohn nahna kan,
Oh sohte me kin kihirailpene.+
19 Sohte mehn kamwahwihala omw kahpwal laud.
Omw ohla sohte kak mwahula.
Irail koaros me rong duwen kowe pahn lopwolopw;+
Pwe ihs me sohte lokolongki omw tiahk lemei me soh imwi?”+
Wehwehki “Sounkansenamwahu.”
De “kin ketin apwalih.” LI, “kin ketin mwahngih.”
Me iei, en Ninipe.
De “pihru wihd.”
Met kin wehwehki kirikirihn krein me luwehdi nan mwahto mwurin dondol.
De kakete, “oh e pahn kotehwei.”
Me iei, Suda.
Me iei, Asiria.
De “imwen kaudok en.”
Me iei, Ninipe.
LI, “Kakehlahda lukop kan.”
E kakete dokedoke nanmwarkien Asiria.
Me iei, Ninipe.
De “pwupwudi.”
Met iei Ninipe.
LI, “mohngiongirail kan.”
De “laion pwulopwul kan me wunaun ni tepinwere.”
De “laion pwulopwul kan me wunaun ni tepinwere.”
Me iei, Ninipe.
Me iei, Dihpes.
LI, “sounsawaspomw.”
De “tepin wah mah kan.”
Met kin kalapw dokedoke prik kan me wiawihkihda reh meng oh pwehl.