SEPANAIA
1 Ni mwehin Sosaia+ nein Amon+ nanmwarkien Suda, Siohwa ketin mahsanihong Sepanaia* nein Kusi nein Kedalaia nein Amaraia nein Esekaia:
2 “I pahn koahkoahsang douluhl mehkoaros nin sampah,” Siohwa me ketin mahmahsen.+
3 Siohwa ketin mahsanih, “I pahn koahkoahsang aramas oh mahn.
I pahn koahkoahsang menpihr en pahnlahng kan oh mwahmw en nansed kan,+
Oh mehn kadipekelekel kan*+ iangahki me suwed kan;
Oh I pahn kihsang aramas nin sampah.
4 I pahn kapahla limeiet ong Suda
Oh ong tohn Serusalem koaros,
Oh I pahn kasohrehsang wasaht lipwen kaudok en Paal koaros,+
Eden samworoun koht en liki kan iangahki samworo teikan,+
5 Oh irail me kin poaridiong karis en nanleng kan* pohn ihmw kan,+
Oh irail me kin poaridi oh kahukihla loalopwoat ong Siohwa+
Ni ar kahukihla loalopwoat ong Malkam;+
6 Oh irail me sohla idawehn Siohwa+
Oh sohte kin rapahki Siohwa de peki kaweid reh.”+
7 Nennenla mwohn Kaun Wasa Lapalahpie Siohwa, pwe rahnen Siohwa kerendohr.+
Siohwa ketin kaunopadahr meirong ehu; e ketin kasarawialahr irail me e ketin lukehdo.
8 “Ni rahnen meirong en Siohwa I pahn kadeik lapalap akan,
Nein nanmwarki pwutak kan+ oh koaros me likawih likoun mehn liki kan.
9 Rahno, I pahn kadeik koaros me kin doudahla pohn pasapaso,*
Irail me kin audehkihla imwen ar soumas tiahk lemei oh widing.”
10 Siohwa ketin mahsanih, “Rahno,
E pahn mie ngilen sengiseng sang ni Ewen Kelen Mwahmw,+
Ngilen mwahiei sang ni Pali Keriau en kahnimwo,+
Oh ngilen kumw laud sang ni dohl kan.
11 Mwahiei, kumwail tohn Makdes* kan,
Pwe sounnetinet koaros kasohralahr;*
Irail koaros me kin paunih silper mwomwlahr.
12 Ni ahnsowo I pahn doadoahngki lamp kan oh rapahki nan Serusalem ni keneinei,
Oh I pahn kadeik me seukautih kan,* me kin nda nan ar mohngiong,
‘Siohwa sohte pahn ketin wia me mwahu, oh e sohte pahn ketin wia me suwed.’+
13 Arail kepwe pahn kulsang oh imwarail kan pahn mwomwla.+
Re pahn kauwada ihmw kan, ahpw re sohte pahn kousoan nan ihmw pwukat;
Oh re pahn padok mwetin kreip, ahpw re sohte pahn nim wain sang mepwukat.+
14 Rahn lapalap en Siohwa kerendohr!+
E kerendohr oh e mwadang kohkohdo!+
Ngilen rahnen Siohwa kansensuwed.+
Rahno sounpei men wie weriwer.+
15 Rahno iei rahnen engieng ehu,+
Rahnen kansensuwed oh pwunod,+
Rahnen melimel oh tehnla,
Rahnen rotorot oh mahliok,+
Rahnen depwekin oh rotorot mosul,+
16 Rahnen ngilen mehn pepeuk* oh wer en mahwen,+
Ong kahnimw kehl kehlail kan oh imwen doulik ileile en keimw kan.+
17 I pahn wahdo kahpwal ong aramas akan,
Oh re pahn alu duwehte aramas maskun kan,+
Pwehki re dipada ong Siohwa.+
18 Neirail silper de pil kohl sohte pahn kak doareirailla ni rahnen engieng en Siohwa;+
Pwe sang ni kisiniei en sapwellime engieng sampah pwon pahn isihsla,+
Pwehki e pahn ketin wiahda kamwomwala ehu, me kamasepwehk, ong tohnsampah pwon.”+
2 Mwohn koasoandio eh pweida,
Mwohn rahno eh kohkohla rasehng kilin krein,*
Mwohn engieng kowahlap en Siohwa eh kohdiong pohmwail,+
Mwohn rahnen sapwellimen Siohwa engieng eh kohdiong pohmwail,
3 Rapahki Siohwa,+ kumwail me opampap kan* koaros en sampah,
Me kin kapwaiada sapwellime koasoandi pwung kan.*
Rapahki pwung, rapahki opampap.*
Mweinele kumwail pahn ekiekla ni rahnen sapwellimen Siohwa engieng.+
4 Pwe Kasa pahn wia kahnimw lekdekla ehu;
Oh Askelon pahn tehnla.+
5 “Meid suwediong irail me mihmi ni oaroahro, wehin mehn Kered kan!+
Siohwa ketin kadeingkumwaildahr.
Kenan, sapwen mehn Pilisdia kan, I pahn kasohreiukala,
Pwe sohte towe men pahn luhwehdi.
6 Oh oaroahro pahn wiahla mohs,
Wasa me pahn mie pwarer kan ong silepen sihpw kan oh kehl takai ong sihpw kan.
7 E pahn wiahla sahpw ehu ong irail me luhwehdi kan en wehin Suda;+
Re pahn mwenge wasao.
Re pahn wendi nin soutik nan imwen Askelon kan.
8 “I rongehr keria sang Mohap+ oh kapailok kan en mehn Ammon kan,+
Me kepitki nei aramas akan oh suweiki me re pahn kihsang sapwarailo.+
9 Kahrehda nin duwen ei ieias,” Siohwa kaunen karis en sounpei, Koht en Israel me ketin mahmahsen,
“Mohap pahn duwehla Sodom,+
Oh mehn Ammon kan pahn duwehla Komora,+
Wasahn dihpw tekatek kan, wasa me pwehl diren soahl, oh wasa tehn ehu kohkohlahte.+
Nei aramas akan me luhwehdi pahn kulih irail,
Oh luhwen tohn ei wehio pahn kihsang sapwarailo.
10 Ih met me re pahn alehdi pwehki ar aklapalap,+
Pwehki re kepitki oh aklapalapiong aramas akan me Siohwa kaunen karis en sounpei kin ketin sapwellimanki.
11 Siohwa pahn ketin kamasakirailda;
Pwe e pahn ketin kasohrehla* koht en sampah koaros,
Oh deke koaros en wehi kan pahn poaridiong* ih,+
Emenemen sang nan eh wasa.
12 Kumwail mehn Idiopia kan pil pahn kamakamkihla nei kedlahs.+
13 E pahn ketin kapahla lime ong paliepeng oh kamwomwala Asiria,
Oh e pahn ketin wiahiong Ninipe en tehnla,+ en madekeng duwehte sapwtehn.
14 Pelinmen kan pahn wendi nan kahnimwo, soangsoangen mahn lawalo kan koaros.*
Pelikan oh pworkiupain* pahn pweidi nanpwungen uhr kan en kahnimwo me pwupwudi.
Ngihl ehu pahn kokoul ni wenihmwtoko.
Taht en wenihmwo pahn mwomwla;
Pwe e pahn kapwarehda lepin dihd sidar kan.
15 Ih kahnimw akalapalapo met me mwomwohd sohte perki mehkot,
Me ndinda nan eh mohngiong, ‘Ngehi me keieu, oh sohte me kak duwe ie.’
E wialahr mehkot kamasepwehk ehu,
Wasa ehu ong mahn lawalo kan ren wendi ie!
Koaros me kin keid limwah pahn kuwai oh itik kumwuten peh.”+
3 Meid suwediong kahnimw uhwong, samin oh lemei!+
2 E sohte men rong;+ e sohte ale peneu.+
E sohte likih Siohwa;+ e sohte karanihala eh Koht.+
3 Nah lapalap akan me mi reh iei laion kan me kin weriwer.+
Nah sounkopwung kan iei kidien wel kan nipwong;
Sohte tih pwoat luhwehdi lao lel nimenseng pwe ren rukoa.
4 Nah soukohp kan pohnmwahso, aramas widing kei.+
5 Siohwa me ketin pwung nan kahnimwo;+ e sohte kin ketin wia me sapwung.
Nimenseng koaros e kin ketin kasalehda sapwellime kopwung kan,+
Duwehte marain en rahn eh kin mie rahn koaros.
Ahpw me suwed men sohte kin ese namenek.+
6 “I kamwomwala wehi kan; arail imwen doulik en keimw kan tehnla.
I kamwomwala ar ahl akan, pwe sohte me pahn keid mwo.
Ar kahnimw kan mwomwla, sohla aramas mwo, sohla towe.+
7 I mahsanih, ‘Ke uhdahn pahn lemmwikin ie oh ale peneu,’*+
Pwe eh wasahn kousoano en dehr kamwomwmwomwla+
—I pahn kapwukoahki ih* mepwukat koaros.
Ahpw re uhdahn ngoangki wia wiewia suwed laudsang mahs.+
8 Siohwa ketin mahsanih, ‘Eri kumwail awiawihiehte,*+
Lao lel rahn me I pahn uhda pwehn kulihasang dipwisou kan,*
Pwe ei kosonned iei I en kihpene wehi kan, en kapokonepene wehi kan,
En wudekihdi pohrail ei engieng, ei engieng kowahlap koaros;+
Pwe sang ni kisiniei en ei engieng sampah pwon pahn isihsla.+
9 Pwe ahnsowo I pahn wekidala en aramas akan lokaia ong ni lokaia min ehu,
Pwe irail koaros en kak likweriong mwaren Siohwa,
10 Sang ni sahpw en pillap kan en Idiopia,
Irail me kin kaudokiong ie, nei aramas akan me mwarahkpeseng, pahn wadohng ie kisakis ehu.+
11 Rahno ke sohte pahn namenekla
Pwehki omw wiewia kan koaros me ke uhkihong ie,+
Pwe ahnsowo I pahn kihsang rehmw irail kan me kin suwei ni aklapalap;
Oh ke sohla pahn pwurehng aklapalapala nan ei nahna sarawio.+
12 I pahn mweidohng aramas aktikitik oh mpahi kan ren mihmihte rehmw,+
Oh re pahn diarada wasahn ruk ni mwaren Siohwa.
13 Mehn Israel me luhwehdi+ sohte pahn wia mehkot sapwung;+
Re sohte pahn likamw de doadoahngki lowarail en widinge aramas akan;
Re pahn mwenge oh wendi, oh sohte me pahn kamasak irail.”+
14 Nein Saion serepein, wer ni peren!
Israel, weriwerki ngilen kana!+
Nein Serusalem serepein,+ nsenamwahu oh pereperen nan mohngiongomw unsek!
15 Siohwa ketikihsanguhkehr kalokolok ko me ke wie lokolongki.+
E ketin kasohpeilahr omw imwintihtio.+
Nanmwarkien Israel, Siohwa, ketiket rehmw.+
Ke sohla pahn masak kahpwal kan.+
16 Rahno Serusalem pahn rong mahsen pwukat:
“Saion, ke dehr masak.+
Ke dehpa kamwoatoahrehdi pehmw kan.
17 Siohwa omw Koht kin ketiket rehmw.+
Nin duwen me roson men, e pahn ketin doareiukala.
E pahn ketin kupwurperenkinuhkada kowahlap.+
E pahn ketin nsenamwahula* pwehki sapwellime limpoak ong uhk.
E pahn ketin kupwurperenkinuhkada sang ni wer en peren.
18 I pahn kapokonepene irail me mwahmwahieiki ar sohte towehda omw kasarawi kan;+
Re sohte mi rehmw pwehki ar weuwa kanamenekparail ni ar kalipilipala.+
19 Kilang! Ni ahnsowo I pahn uhwong koaros me kin kahpwalihiukala;+
Oh I pahn doarehla me dangepel,+
Oh I pahn kapokonepene me mwarahkpeseng kan.+
I pahn wiahkinirailla mehn kaping oh ndand*
Nan sahpw koaros me re namenekla ie.
20 Ni ahnsowo I pahn waikumwailongodo,
Ni ahnsou me I pahn kapokoneikumwailpene.
Pwe I pahn wiahiong kumwail en ndand* oh wiahla mehn kaping+ nanpwungen aramas koaros en sampah,
Ni ei kapwurepene noumwail me selidi kan mwohn masamwail kan,” Siohwa me ketin mahmahsen.+
Wehwehki “Siohwa Ketin Karukehla (Nekidala).”
E sansal me soahng kan de mwekid kan me pidada pwongih dikedik.
E dokedoke audepen lahng.
Kakete pasapas me mwoalen nanmwarki mi powe.
E mwomwen wasa ehu nan Serusalem limwahn Ewen Kelen Mwahmw.
LI, “nennenla.”
LI, “irail me tenla pohn dewerail kan,” duwehte nan doupen wain ehu.
LI, “kod.” Kilang KLL.
LI, “mwasahlerail kan.”
Kilang KLL.
De “me aktikitik kan.”
LI, “sapwellime kadeik.”
De “aktikitik.”
De “nin souwas.”
De “pahn ketin apwalih irail.”
De “kaluwetehla.”
De “kaudokiong.”
LI, “mahn koaros en wehi.”
Kitik laud me mie wune tekatek mehn perepe. Ni lokaiahn wai, porcupine.
De “kopwung.”
De “kalokehki ih.”
De “awih ie ni kanengamah.”
De kakete, “uhda nin duwen sounkadehde men.”
De “kaudokiong.”
De “nennenla.”
LI, “ahd ehu.”
LI, “ahd ehu.”