KISINLIKOU ONG MEHN KALESIA

1 Sang Pohl, me eh malipilip ong wahnpoaron sohte tepisang rehn aramas de pil idihdida sang aramas, ahpw sang rehn Sises Krais+ oh Samatail Koht,+ me ketin kaiasada Krais sang rehn me melahr akan, 2 oh sang rehn riatail koaros me mi rehi, ong mwomwohdiso kan en Kalesia:

3 Samatail Koht oh Kaun Sises Krais en ketikihong kumwail kadek sapan oh popohl. 4 Krais ketin tounmeteikihla pein ih ong dipatail kan+ pwe en ketin doareikitailla sang koasoandi suwed en mwehi wet*+ nin duwen kupwuren Samatail Koht,+ 5 me lingan en kohwong kohkohlahte. Amen.

6 I pwuriamweikihla amwail mwadangete sohpeiweisang Ih me ketin malipehkinkumwaildo kadek sapan en Krais ong ni ehu rongamwahu tohrohr.+ 7 Sohte pil ehu rongamwahu tohrohr mie; ahpw mie aramas ekei me kin kahpwalihkumwailla+ oh men wekidala rongamwahu duwen Krais. 8 Ahpw, mehnda ma kiht de tohnleng men sang nanleng pahn lohkihong kumwail ehu rongamwahu me tohrohrasang rongamwahwo me se lohkihongkumwailehr, a en riahla. 9 Duwehte me se koasoiaier mwoweo, met I pil pahn pwurehng koasoia, Mehmen me kin lohkihong kumwail ehu rongamwahu me tohrohrasang rongamwahwo me kumwail aleier, a en riahla.

10 Ia duwe, I kin songosong en ale keniken rehn aramas de Koht? De I kin songosong en kaperenda aramas? Ma I kin usehlahte kaperenda aramas, eri kaidehn ngehi ladun Krais men. 11 Pwe riei ko, I men kumwail en ese me rongamwahu me I kin lohkihong kumwail sohte tepisang rehn aramas;+ 12 pwe I pil sohte ale sang rehn aramas, oh pil sohte me padahkihong ie, ahpw pein Sises Krais me ketin kasalehiong ie.

13 Mehlel me kumwail rongehr duwen ei wiewia kan ni ei mi nan pelien lamalam en mehn Suhs,+ me I kin kaloke laud mwomwohdisohn Koht oh kauwehla;+ 14 oh ngehi me keieu rehn me tohto nan ei dih kan nan pelien lamalam en mehn Suhs, pwehki ei kin ngoangki laud tiahk en semei ko.+ 15 Ahpw Koht, me ketin katohreiehsang nan kapehden inei oh malipehkin ie sapwellime kadek sapan,+ ketin kupwurehda me e mwahu 16 en kasalehda sapwellime Ohlo sang rehi pwe I en lohkihong mehn liki kan rongamwahu duwen ih.+ I sohte mwadangete peki kaweid sang rehn aramas emen;* 17 de pil kohdahla Serusalem rehn irail kan me wiahla wahnpoaron mwohi, ahpw I kohla Arepia, oh ngehi eri pwurala Damaskus.+

18 Eri mwurin sounpar siluh, I kohdahla Serusalem+ pwe I en tuhwong Kepas,*+ oh I mihmihki reh rahn eisek limau. 19 Ahpw I sohte tuhwong wahnpoaron teiko, ihte Seims,+ rien Kauno. 20 A duwen soahng kan me I ntingkiwohng kumwail, I kamehlelehiong kumwail mwohn silangin Koht me I sohte likamw.

21 Mwurin mwo I ahpw kohla nan sapwen Siria oh Silisia.+ 22 Ahpw mwomwohdiso kan en Sudia me kin miniminiong Krais saikinte kilang ie. 23 Ihte me re kin rong, iei: “Met, ohl me kin kaloke kitail mahso+ kin kalokalohki rongamwahu duwen pwoson me e kauwehla mahso.”+ 24 Irail eri tepida kalinganahda Koht pwehki ngehi.

2 Eri mwurin sounpar 14, I ahpw pwuradahla Serusalem oh Parnapas+ iang ie, oh I pil kahrehda Taitus.+ 2 I kohdahla pwehki kaudiahl ehu, oh I tuhwongete ohl akan me waun oh padahkihong irail rongamwahu me I kin kalohki rehn mehn liki kan, pwe I men ese ma doadoahk me I kin wiewia de wiadahr me mwahu de soh. Ma soh, eri dahme I kin wia sohte katepe. 3 Ahpw, sohte me idingkihong Taitus+ en sirkumsaisla+ ni eh mi rehi, mendahki ih mehn Krihs men. 4 Ahpw kahpwal wet pwarada pwehki riatail likamw akan me wailong+ pwe ren lipoahroke saledek+ me kitail ahneki ni atail kin miniminiong Krais Sises, pwe ren kaliduwihkitailla douluhl;+ 5 se sohte dukiong irail,+ sohte mwahn pak ehu, pwe me mehlel en rongamwahwo en kin mihmihte rehmwail.

6 Ahpw me pid irail ko me mwomwen kesempwal+—I sohte katapanki soangen aramas dah irail, pwe Koht sohte kin ketin kadeik maslikin aramas—sohte mehkot kapw me irail me waun ko ndaiong ie. 7 Ahpw, re kilang me I alehdier pwais en kalohki rongamwahu ong irail me sohte sirkumsaisla,+ duwehte Piter eh alehdier ong me sirkumsaislahr kan. 8 Koht me ketikihong Piter manaman en wia wahnpoaron men ong me sirkumsaislahr kan, pil ketikihong ie manaman en wia wahnpoaron men ong mehn liki kan.+ 9 Oh re pohnese kadek sapan me kohieng ie,+ eri Seims+ oh Kepas* oh Sohn, me rasehng uhr ekei nan mwomwohdiso, ahpw kapahdo rehi oh rehn Parnapas+ palimaun en pehrail kan, me kasalehda me re pwungkipene* sen kohla rehn mehn liki kan, a irail pahn kohla rehn me sirkumsaislahr kan. 10 Ihte me re pekien sen tamataman me semwehmwe kan, oh iei met me I pil kin nannantihong wia.+

11 Ahpw ni ahnsou me Kepas*+ kohdo Andiok,+ I ahpw sohpeiong oh pelianda, pwehki e sansal me e sapwung. 12 Pwe mwohn ohl ako me pekederdo sang rehn Seims+ ar leledo, e kin iang mehn liki kan mwenge;+ ahpw ni arail leledo, e sohla wia met oh tohrohrasang irail, pwehki eh masak irail ko me kin utung sirkumsais.+ 13 Mehn Suhs teikan pil iangala ih nan mwekid mwalaun wet, me kahrehda Parnapas pil iangala arail mwalaun. 14 Ahpw ni ei kilang me re sohte weweidki me mehlel en rongamwahwo,+ I ahpw ndaiong Kepas* mwohn irail koaros: “Mendahki kowe mehn Suhs men, ahpw ke kin momour duwehte mehn liki men a kaidehn mehn Suhs, eri, ia duwen omw kak idingohng mehn liki kan ren mour nin duwen tiahk en mehn Suhs?”+

15 Kitail mehn Suhs kei sang ni atail ipwidi, a kaidehn me dipan kei sang rehn mehn liki kan. 16 Kitail kin pohnese me aramas kin pwungla rehn Koht, kaidehn sang ni eh idawehn audepen kosonned, ahpw ihte sang ni eh pwoson+ Sises Krais.+ Eri, kitail kin pwosonla Krais Sises, pwe kitail en pwungla rehn Koht sang ni atail pwoson Krais, kaidehn sang ni atail idawehn audepen kosonned, pwe sohte emen* pahn pwungla rehn Koht sang ni eh idawehn audepen kosonned.+ 17 Eri ma e pil dierekda me kitail aramas dipan ekei ni atail kin songosong en pwungla rehn Koht pwehki Krais, eri ia duwe, Krais kin papah dihp? Soh kowahlap! 18 Ma I pwurehng kauwada soahng kohte me I kauwelahr, eri I kin kasalehda me sounkauwehla kosonned men ngehi. 19 Pwe nin duwen kosonnedo, I melahr ong kosonnedo,+ pwe I en momour ong Koht. 20 I iangehr Krais posdahng nin tuhkeo.+ Kaidehn ngehi me wie momour,+ ahpw Krais me ieias loalei. Ni mehlel, mour me I wie momourki ahnsou wet, I kin mour sang ei pwoson sapwellimen Kohto,+ me ketin poakohng ie oh pangala pein ih ong ie.+ 21 I sohte soikala sapwellimen Koht kadek sapan,+ pwe ma aramas pahn pwungla rehn Koht sang ni kosonnedo, eri en Krais pwoula sohte katepe.+

3 Mehn Kalesia kan, kumwail me salamalam! Ihs me pitihkumwaildier+ mendahki at kawehwehiong kumwail ni sansal duwen Sises Krais me posdahng nin tuhkeo?+ 2 Iet me I men idek* rehmwailen: Kumwail alehdi ngehn sarawi* sang ni amwail idawehn audepen kosonnedo de pwehki amwail pwoson dahme kumwail rongehr?+ 3 Ia duwe, kumwail uhdahn sohte wehwehki? Nin tapio kumwail tepida weweidki ngehn sarawi,* a met kumwail pahn kaimwisengkihla elen aramas soh unsek?*+ 4 Ia duwe, amwail lelohng kahpwal tohto sohte katepe? I sohte kamehlele me sohte katepe. 5 Eri ia duwe, ih me kihong kumwail ngehn sarawi* oh wiahda manaman akan+ nanpwungamwail, wiadahr met pwehki amwail idawehn audepen kosonnedo, de pwehki amwail pwosonla dahme kumwail rongehr? 6 Met duwehte Eipraam me “pwoson Siohwa,* oh E ketin wiahkihla ih aramas pwung men.”+

7 Eri kumwail uhdahn ese me irail kan me pwoson iei nein Eipraam.+ 8 Eri Nting Sarawio, ni eh kohpadahr me mehn liki kan pahn pwungla rehn Koht pwehki pwoson, e lohkihongehr Eipraam rongamwahwo mwowe, mahsanih: “Pwehki kowe, wehi koaros pahn ale kapai ehu.”+ 9 Eri, irail kan me kin pwoson kin iang ale kapai duwehte Eipraam me kin pwoson.+

10 Irail koaros me kin koapworopworki arail idawehn audepen kosonnedo kin mi pahn keria ehu, pwe e ntingdier: “Koaros me sohte kin kapwaiada soahng koaros me ntingdier nan pwuhken* Kosonnedo en riahla.”+ 11 Patehng met, e sansal me sohte aramas emen kin pwungla rehn Koht sang ni kosonnedo,+ pwehki “me pwung men pahn momour pwehki eh pwoson.”+ 12 Eri Kosonnedo sohte kin poahsoankihda pwoson. Ahpw, “mehmen me kin kapwaiada mepwukat pahn momour pwehki mepwukat.”+ 13 Krais ketin pwainkitailda+ oh kapitkitailsang+ ni keria en Kosonnedo ni eh wiahla keria ehu pwe en wiliankitaildi, pwehki eh ntingdier: “Aramas koaros me langada nin tuhke pwoat rialahr.”+ 14 Met wiawi pwe kapai me Koht ketin inoukihong Eipraam en pil kohieng mehn liki kan pwehki Krais Sises,+ pwe kitail en ale ngehn sarawi* me Koht ketin inoukidahr+ sang ni atail pwoson.

15 Riei ko, I pahn koasoiahda karasaras ehu me pid mouren aramas: Ni ahnsou me inou lap ehu kin manamanla, mehnda ma pil sang rehn aramas emen, sohte me kak kauwehla de kapatahiong mehkot. 16 Eri inou kei wiawihong Eipraam oh kadaudoke.+ E sohte koasoia, “oh ong kadaudokomw kan,” me wehwehki me tohto. Ahpw e koasoia, “oh ong kadaudokomw,” me wehwehki aramastehmen, me iei Krais.+ 17 Oh I pahn pil kapatahiong met: Kosonnedo me poadada sounpar 430 mwuri,+ sohte kauwehla inou lap me Koht ketin wiadahr mwoweo pwe en kasohrehla inowo. 18 Pwe ma sohsowo poahsoankihda kosonned, eri e solahr poahsoankihda inou ehu; ahpw ni kadek, Koht ketikihong Eipraam sohsowo sang ni inou ehu.+

19 Eri ia kahrepen Kosonnedo? E kapatapatohng pwe sapwung kan en sansalda,+ lao kadaudok me inowo wiawihkihda pahn pwarodo;+ oh tohnleng ko peusehiong+ aramas akan Kosonnedo sang rehn sounkadokepene pali riau.+ 20 Sohte anahnepen sounkadokepene pali riauo ma e kin pid aramastehmen, ahpw Koht mehtehmen ni eh ketin wiahda inowo. 21 Eri ia duwe, Kosonnedo kin uhwong sapwellimen Koht inou kan? Soh kowahlap! Pwe ma kosonned ehu wiawidahr me kak kihda mour, eri kitail kak pwungla rehn Koht sang ni atail kin kapwaiada kosonned. 22 Ahpw Nting Sarawio kihong mehkoaros pahn manaman en dihp, pwe inou me kohsang pwoson Sises Krais en kak kohieng irail kan me kin kasalehda pwoson.

23 Ahpw mwohn pwoson eh leledo, kosonned kin sileikitaildi oh kitail mihmi pahn eh manaman oh kin awiawih pwoson me pahn sansalda.+ 24 Eri, Kosonnedo wialahr atail sounkaweid me kin kahluweikitaillahng Krais,+ pwe kitail en pwungla rehn Koht pwehki pwoson.+ 25 Ahpw met ni pwoson eh leledohr,+ kitail solahr mi pahn sounkaweid men.+

26 Ni mehlel, kumwail koaros sapwellimen Koht seri+ sang ni amwail kin pwoson Krais Sises.+ 27 Pwe kumwail koaros me papidaislahr oh miniminiong Krais kin kahlemengih Krais.*+ 28 Sohte wekpeseng ehu mie nanpwungen mehn Suhs oh mehn Krihs,+ pil sohte wekpeseng en ladu men de me saledek men,+ pil sohte wekpeseng en ohl emen de lih emen,+ pwe kumwail koaros wiahla ehu ni amwail miniminiong Krais Sises.+ 29 Patehng met, ma kumwail sapwellimen Krais, eri kumwail uhdahn kadaudok en Eipraam,+ oh kumwail kak ale sohso+ me inoupe wiawihong Eipraam.+

4 Eri met, I pahn nda me ni serien sohso men eh wiewiahte kisin seri, e sohte weksang ladu men, mendahki ih me kaunen mehkoaros, 2 ahpw e kin mi pahn sounkaweid kan oh sounapwalih kan lao lel rahn me eh pahpa koasoanediero. 3 Pil duwehte, ni atail wia seri kei, kitail kin liduwih madamadau oh wiewia en sampah wet.+ 4 Ahpw ni imwiseklahn ahnsou me koasoandiero eh leledo, Koht ketin poaronehdo sapwellime Ohlo, me ipwidi sang lih emen,+ oh me mi pahn kosonned,+ 5 pwe en pwainla pweipwei en kasaledekihala irail kan me mi pahn kosonned,+ pwe Koht en ketin pwekkitailda nin duwen sapwellime seri.+

6 Eri pwehki kumwail wia sapwellimen Koht seri, Koht ketin kadarodohng nan mohngiongitail+ ngehn sarawi*+ me sapwellime Ohlo alehdi. Oh ngehn sarawi wet kin kahrehiong kitail en ngihl laudida nda: “Apa,* Samat!”+ 7 Eri ke solahr wia ladu men ahpw sapwellime seri. Oh ma kowe sapwellimen Koht seri, e pil pahn ketikihong uhk sohso ehu.+

8 Ahpw ahnsou me kumwail sehse Koht, kumwail kin wia lidun koht likamw akan. 9 Ahpw met, ni amwail esehlahr Koht, de ni Koht eh ketin mwahngihkumwaillahr, dahme kahrehda kumwail men pwuralahng madamadau oh tiahk mwahl+ en sampah oh men pwurehng wiahla arail lidu?+ 10 Kumwail uhdahn kin kesempwalki rahn akan, sounpwong kan,+ ahnsou kan* oh sounpar kan. 11 I perkinkumwaildahr, pwe mwein ei nantihong sewese kumwail sohte katepe.

12 Riei ko, I peki rehmwail, kumwail en duwehte ngehi, pwe I pil kin duwehte kumwail mahso.+ Kumwail sohte wiahiong ie mehkot sapwung. 13 Ahpw kumwail ese me kahrepen ei kalohkihong kumwail rongamwahu nin tapio, iei pwehki ei soumwahu. 14 Oh mendahki ei soumwahu eh wia kahpwal ehu ong kumwail, kumwail sohte mwamwahlikin ie de kasautkin ie;* ahpw kumwail kasamwo ie duwehte sapwellimen Koht tohnleng men, de duwehte Krais Sises. 15 Eri, ia peren me kumwail ahnekio? Pwe I ese ni mehlel me, ma e kak wiawi, kumwail kapitasangehr pwoaren masamwail kan oh kihong ie.+ 16 Eri, ia duwe, I wialahr amwail imwintihti pwehki I koasoiaiong kumwail me mehlelo? 17 Irail kin ngoangkihla pwe kumwail en pwungkinirailla, ahpw kaidehn ong kahrepe mwahu ehu; re men kadohwankumwailweisang ie, pwe kumwail en uhdahn men idawehnirailla. 18 Ahpw ahnsou koaros, e kin mwahu emen en kin ngoangki rapahkin kumwail ong kahrepe mwahu ehu, a kaidehnte ni ahnsou me I pahn mihmi rehmwail. 19 Nei kisin seri ko,+ I pwurehng weirek en neitik lao lel mouren Krais eh uhdahn pahn keirda loalamwail. 20 I men mihmi rehmwail ahnsou wet oh wekidala ngileiet, pwe I sehse dahme I pahn wiahiong kumwail.

21 Kumwail me kin men mi pahn kosonned, ndaiong ie mahs, Kumwail sohte kin rong Kosonnedo? 22 Karasepe, e ntingdier me Eipraam naineki pwutak riemen, emen sang rehn lih lidu men+ oh emen sang rehn lih saledek men;+ 23 ahpw pwutak me sang rehn lih liduwo ipwidi nin duwen aramas ar kin ipwidi,+ a pwutak teio me sang rehn lih saledeko ipwidi nin duwen inou ehu.+ 24 Mepwukat duwehte sipai en karasaras pwoat; pwe lih riemen pwukat kin wehwehki inou lap riau, ehu rehra wiawihda pohn Nahna Sainai;+ aramas koaros me mi pahn inou lap wet wia lidu kei oh inou lap wet duwehte Akar. 25 Eri Akar kin wehwehki Sainai,+ nahna ehu me mi nan Arepia, oh e rasehng Serusalem rahnwet, pwe e wia lidu men iangahki nah seri kan.* 26 Ahpw Serusalem en powe me saledek, oh iei ih atail nohno.

27 Pwe e ntingdier: “Ken pereperen, kowe lih depwen me sohte kin neitik; weriwerki omw peren, kowe lih me sohte kin medek en neitik; pwe nein lih me lekdeklahro seri kan me tohtohsang nein lih me mie eh pwoud.”+ 28 Eri riei ko, kumwail me serien inowo duwehte Aisek.+ 29 Ahpw ni ahnsowo, pwutak me ipwidi nin duwen aramas ar kin ipwidi tepida kaloke pwutak me ipwikihdi ngehn sarawi,*+ ih pil duwen ahnsou wet.+ 30 Ahpw, dahme nting sarawio mahsanih? “Kasarehla lih liduwo oh nah pwutako, pwe nein lih liduwo pwutako sohte mwahn pahn iang nein lih saledeko pwutako ale eh sohso.”+ 31 Eri riei ko, kaidehn kitail serien lih liduwo, pwe serien lih saledeko.

5 Krais ketin kasaledengkitailla pwe kitail en ahneki soangen saledek wet. Eri, kumwail kesihnenda teng+ oh dehr pwurehng wia lidu.+

2 Kilang! Ngehi Pohl, I ndaiong kumwail me ma kumwail sirkumsaisla, eri dahme Krais wiadahr solahr pahn wia kamwahu ehu ong kumwail.+ 3 I pahn pwurehng kadehdehiong aramas koaros me sirkumsaisla, me re anahne kapwaiada Kosonnedo pwon.+ 4 Kumwail me kin songosong en pwungla rehn Koht sang ni amwail kapwaiada kosonned, kumwail tohrohreweisangehr Krais;+ kumwail pwupwsangehr sapwellime kadek sapan. 5 A kitail, pwehki ngehn sarawi,* kitail kin awiawih oh koapworopworki en pwungla rehn Koht sang ni atail pwoson. 6 Ong irail kan me kin miniminiong Krais Sises, sohte katepen sirkumsaisla de pil sohte sirkumsais,+ ahpw pwoson me kin sansalda sang ni limpoak me katapan.

7 Kumwail kin pweida mwahu mahso.*+ A ihs me irehdihsang kumwail en kin peikiong me mehlelo? 8 Soangen madamadau wet sohte kin pwilisang rehn Koht me ketin malipeikumwaildo. 9 Kisin ihs kis kin kampwosehda lopwon en pilawa ehu pwon.+ 10 I kamehlele me kumwail me kin miniminiong Kauno+ sohte pahn ahneki madamadau me weksang met; ahpw ih me kin kahrehiong kumwail kahpwal,+ sohte lipilipil ihs ih, pahn ale kadeik me e warohng. 11 A ngehi, riei ko, ma I kin kalkalohkihte sirkumsais, a dahme aramas akan wie kalokalokehkiniehte? Ma ih duwen met, tuhkehn kalokoloko*+ solahr pahn wia mehn kadipekelekel ehu. 12 I men ohl ako me kin songosong kapingkumwailda ren lekwusolla.*

13 Eri riei ko, kumwail malipilipdohngehr nan saledek; ihte kumwail dehr doadoahngki saledek wet en wia ahnsou mwahu en rapahki ineng suwed,*+ ahpw kumwail en papah emenemen sang ni limpoak.+ 14 Pwe Kosonnedo pwon kin pweida* sang ni kehkehlik tehieu, me iei: “Ke anahne poakohng mehn mpomw duwehte omw kin poakohng pein uhk.”+ 15 Ahpw ma kumwail kin pekehkehpene oh kamedekihala emenemen,+ kumwail kanahieng pwe kumwail de kamwomwala emenemen.+

16 Ahpw I pahn nda, Kumwail pousehlahte weweidki ngehn sarawi*+ oh kumwail sohte mwahn pahn kin kapwaiada ineng suwed.*+ 17 Pwe uduk kin uhwong ngehn sarawi* pwehki eh ineng, oh ngehn sarawi* kin uhwong uduk; mepwukat kin uhpene pwe kumwail en dehr kin wia soahng kan me kumwail men wia.+ 18 Patehng met, ma ngehn sarawi* kin kaweid kumwail, eri, kumwail sohte mi pahn kosonned.

19 Eri wiewiahn uduk kin uhdahn sansal, oh mepwukat iei tiahk samin me pid wia nsenen pwopwoud,*+ samin, wia me suwed ni ngidingid,*+ 20 tiahk en pwongih dikedik, wunahni,+ kailok, pei, luwak, lingeringer, akamai, saminimin, wiahda pali kan, 21 peirin, sakau daulihala,+ kamadipw mwoarongorong kan, oh soahng kan me duwehte mepwukat.+ I panawihekin kumwail duwen mepwukat, duwehte me I panawihekinkumwailehr me irail kan me kin wia soahng pwukat sohte pahn sohsohki Wehin Koht.+

22 Ni pali teio, irair kan me* ngehn sarawi* kin kapwarehda, iei limpoak, peren, popohl, kanengamah, kadek, kamwahu,+ pwoson, 23 mpahi, kaunda pein kowe.+ Sohte kosonned ehu me uhwong mepwukat. 24 Patehng met, sapwellimen Krais Sises akan kemelahr* pepehm kehlail oh ineng en uduk kan.+

25 Ma kitail kin momourki ngehn sarawi,* eri kitail en pil weweidki ngehn sarawi* ni pwung.+ 26 Kitail en dehr aklapalap+ oh kahrehda siaipene+ oh peirinpene.

6 Riei ko, ma mie emen me weweid nan ahl sapwung ni eh sohte wehwehki, eri kumwail me kin mwekidki ngehn sarawi* en song kapwungala soangen aramas menet ni kadek.+ Ahpw ken mwasamwasahn pein kowe,+ pwe ke de pil lohdiong nan kasongosong.+ 2 Kumwail pousehlahte sawaskipene amwail wisik toutou kan,+ oh ih met mwomwen amwail pahn kapwaiada kosonned en Krais.+ 3 Pwe ma emen kin medewe me ih mehkot ni eh sohte mehkot,+ eri, e kin pitipitih pein ih. 4 Ahpw emenemen en kasawih pein eh wiewia kan,+ e ahpw pahn perenkihda pein ih, a kaidehn en kapahrekiong ih meteikan.+ 5 Pwe emenemen pahn wa pein eh wisik.*+

6 Patehng met, mehmen me kin ale padahkpen mahseno,* a en ehukihong eh sounpadahko* soahng mwahu koaros.+

7 Kumwail dehr pitida: Kumwail sohte kak pitih Koht. Pwe dahme aramas kin kamwarak, ih me e pahn pil dolung;+ 8 pwehki me kin kamwarak ong kamwahupen ineng en uduk pahn dolung mehla* sang ineng en uduk, ahpw me kin kamwarak ong kamwahupen ngehn sarawi* pahn dolung mour soutuk sang ngehn sarawi.*+ 9 Eri kitail en dehr uhdihsang wia dahme mwahu, pwe ma kitail sohte pahn pwangahkihda,* kitail pahn dolung ni ahnsou me kileldiong.+ 10 Eri, nindoken eh mie atail ahnsou mwahu,* kitail en wia me mwahu ong aramas koaros, ahpw mehlel ong irail kan me kisehn atail pwoson.

11 Kumwail kilang uwen laud en mesen nting me I ntingkiwohng kumwail sang ni pein mengin pehiet.

12 Koaros me men adamwahula* rehn aramas, iei irail kan me kin songosong en itonehng kumwail en sirkumsaisla, oh re kin wia met pwe ren pitsang kalokolok pwehki tuhkehn kalokolok* en Krais. 13 Pwe pil irail kan me sirkumsaislahr sohte kin kapwaiada Kosonnedo,+ ahpw re men kumwail en sirkumsaisla pwe ren suweiki dahme wiawihong paliwaramwail kan. 14 Ahpw I en dehpa suwei, ihte I en suweiki tuhkehn kalokolok* en atail Kaun Sises Krais.+ Ong ie, sampah kamakamalahr* pwehki ih, a ong sampah I kamakamalahr pwehki ih. 15 Pwe sirkumsais de sohte sirkumsais sohte kesempwal,+ ahpw me kesempwal iei kepikipik kapw ehu.+ 16 A ong irail koaros me kin weweidki koasoandi en tiahk wet ni pwung, popohl oh kadek kalahngan en kohieng irail, ei, ong Israel en Koht.+

17 Sang met kohla, emen dehpa wiahiong ie kahpwal, pwe I kin weuwa ni paliwereiet kilel en sapwellimen Sises ladu.+

18 Riei ko, kadek sapan en atail Kaun Sises Krais en kin ieiang lamalam mwahu* me kumwail kin kasalehda. Amen.