KEIEUN KISINLIKOU ONG MEHN DESELONIKA

1 Sang Pohl, Silpanus*+ oh Timoty,+ ong mwomwohdisohn Deselonika me kin miniminiong Samatail Koht oh Kaun Sises Krais:

Kadek sapan oh popohl en kin ieiang kumwail.

2 Ahnsou koaros se kin kalahngankihong Koht ni at kin tamankumwailda koaros nan at kapakap kan.+ 3 Pwe se kin tamatamante mwohn silangin Samatail Koht duwen amwail doadoahk pwehki amwail pwoson, amwail nannanti pwehki amwail limpoak, oh amwail dadaur pahn kahpwal pwehki amwail koapworopworki+ atail Kaun Sises Krais. 4 Eri, riat ako me Koht kin ketin poakohng, se ese me Koht ketin pilkumwailda. 5 Pwehki rongamwahu me se kalohki sohte lelohng kumwail ni lokaiahte, ahpw ni manaman oh ngehn sarawi,* oh se uhdahn kamehlele me dahme se kalohkihong kumwail me mehlel. Kumwail ese mwomwen at wiewia kan me wia kamwahupamwail ni at mihmi rehmwail. 6 Mendahki kahpwal laud kan,+ kumwail kamehlelehla mahseno ni peren me kohsang ngehn sarawi,* oh ni ahl wet kumwail kin kahlemengih kiht+ oh Kauno.+ 7 Eri kumwail wiahlahr mehn kahlemeng ehu ong me pwoson akan koaros nan Masedonia oh Akaia.

8 Pwe ni mehlel, pwehki kumwail, aramas akan nan Masedonia oh Akaia pwon rongada mahsen en Siohwa* oh pil amwail pwoson Koht lelpeseng wasa koaros,+ kahrehda se sohte anahne koasoia mehkot. 9 Pwe pein irail kin koasoakoasoia duwen at tepin tuhwong kumwail oh duwen amwail sohpeisang noumwail dikedik kan+ oh sohpeiong Koht pwe kumwail en wiahla ladu en Koht ieias oh mehlel, 10 oh awiawih sapwellime Ohl sang nanleng,+ me e ketin kaiasada sang rehn me melahr akan, me iei Sises, me ketin kapitkitailsang engieng en Koht me kohkohdo.+

2 Riat ako, pein kumwail uhdahn ese me at mwemweitwei rehmwail pweida mwahu.+ 2 Pwe kumwail ese me se ale kalokolok oh wiakaula nan Pilipai,+ ahpw Koht ketikihong kiht eimah pwe sen padahkihong kumwail rongamwahu en Koht+ ni at lelohng uhwong laud.* 3 Pwe dahme se kin kangoangehkin kumwail en wia sohte kin kohsang likamw de samin de widing, 4 ahpw pwehki Koht ketin kupwurki likihong kiht sen kalohki rongamwahwo. Oh se kin koasoi kaidehn pwe sen kaperenda aramas, ahpw sen kaperenda kupwuren Koht, me kin ketin kasawih at mohngiong.+

5 Ni mehlel, kumwail ese me se sohte mwahn kin pitihekin kumwail koasoi kapohl kan de mwomwehda aramas mwahu pwehki noahrok;+ Koht me sounkadehde! 6 Se sohte pil kin raparapahki kaping sang rehn aramas, mehnda ma sang rehmwail de meteikan, mendahki at kak wia katoutou pweilaud ehu nin duwen wahnpoaron en Krais kan.+ 7 Ahpw, se kin kadek ni at mihmi rehmwail, duwehte nohno men eh kin kadihdi oh apwalih mwahu* pein nah seri kan. 8 Pwehki at uhdahn poakohng kumwail, se koasoanehdi teng* en kihong kumwail, kaidehn ihte rongamwahu en Koht, ahpw pil pein kiht,*+ pwehki kumwail wialahr kompoakepaht.+

9 Riat ako, kumwail uhdahn tamataman at doadoahk laud oh nannanti. Se kin doadoahk nin rahn oh nipwong, pwe sen dehr kihong kumwail katoutou pweilaud ehu+ ni at kin kalohkihong kumwail rongamwahu en Koht. 10 Kumwail me sounkadehde, oh pil Koht, duwen at kin loalopwoat oh pwung oh sohte karaunpat ni at wiewia kan ong kumwail me pwoson akan. 11 Kumwail uhdahn ese me se kin pousehlahte kangoange oh kansenamwahwih kumwail oh kaweid emenemen kumwail,+ duwehte me sahm men+ kin wiahiong nah seri kan, 12 pwe kumwail en pousehlahte weweid ni ahl me Koht ketin kupwurki,+ me ketin malipeikumwaildohng nan sapwellime Wehi+ oh lingan.+

13 Ni mehlel, ih kahrepen at kin usehlahte kalahngan ong Koht,+ pwehki ni amwail aleier mahsen en Koht me kumwail rongasang kiht, kumwail kamehlelehla met, kaidehn nin duwen koasoi en aramas, ahpw nin duwen mahsen en Koht me iei me mehlel, oh e pil kin doadoahk loalen kumwail me pwoson akan. 14 Pwe riat ako, kumwail kin kahlemengih karasepen mwomwohdisohn Koht kan me kin miniminiong Krais Sises nan Sudia. Pwehki kumwail ale kalokolok sang rehn tohn amwail wehi,+ duwehte soangen kalokolok me riatail kan nan Sudia aleier sang rehn mehn Suhs akan, 15 me kemelahr Kaun Sises+ oh soukohp ako oh kin kalokei kiht.+ Patehng met, re sohte kin kaperenda kupwuren Koht, ahpw re kin uhwong kamwahupen aramas koaros, 16 ni arail kin song en irehdi at pahn koasoiong mehn liki kan pwe ren komourla.+ Ni ahl wet, re kin kadirehla diparail kan ahnsou koaros. Ahpw sapwellime engieng pahn kereniong leledohng irail.+

17 Riat ako, ni at tohrohrasang kumwail (ni paliwar, kaidehn ni mohngiong), mendahki erein ahnsou kiste, se wia uwen at kak koaros en pwarowei rehmwail* pwehki se uhdahn men tuhwong kumwail. 18 Ihme kahrehda se men kohwei rehmwail, oh ngehi, Pohl, I song en kohwei kaidehn pak ehute, ahpw pak riau; ahpw Sehdan perehla at ahlo. 19 Pwe ia at koapworopwor de peren de nihn me se pahn suweiki mwohn silangin atail Kaun Sises ni eh ketier?* Kaidehn kumwail?+ 20 Kumwail me se kin suweiki oh perenki.

3 Eri ni at solahr kak kanengamahiong at men tuhwong kumwail, se lemeleme me e pahn mwahu sen mihmi kelehpw nan Adens;+ 2 oh se kadarewei Timoty,+ riatail oh sounpapah en Koht* me kin lohki rongamwahu duwen Krais, pwe en katengeikumwaildi* oh kansenamwahwihkumwailla pwe en wia kamwahupen amwail pwoson, 3 pwe emen en dehr luwetkihla* kahpwal pwukat. Pwe pein kumwail ese me kitail sohte kak pitsang soangen lokolok pwukat.+ 4 Pwe ni at mihmi rehmwail, se kin ndaiong kumwail mwowe me kitail pahn lokolongki kahpwal, oh ih me wiawi nin duwen amwail eseier.+ 5 Ihme kahrehda, ni ei solahr kak kanengamahiong ei men tuhwong kumwail, I ilekwei pwe I en esehda duwen amwail lelepek,+ ma Sounkasongosongo+ sou kasongosongeikumwailehr, oh ma at doadoahk laud sou solahr katepe.

6 Ahpw met Timoty pwurodohr reht sang rehmwail+ oh wadohng kiht rohng mwahu duwen amwail lelepek oh limpoak, me ahnsou koaros kumwail kin perenda ni amwail kin tamankitada oh kumwail uhdahn men tuhwong kiht duwehte at pil men tuhwong kumwail. 7 Ihme kahrehda riat ako, ni at semwehmwe oh mi nan kahpwal koaros, se nsenamwahula pwehki kumwail oh lelepek me kumwail kin kasalehda.+ 8 Met ni at eseier me kumwail kin kesikesihnen teng ni amwail idawehn Kauno, se pwurehng kehlailda.* 9 Pwe ia duwen at kak kasalehda at kalahngankihong Koht kumwail, oh peren laud me se ahneki mwohn silangin atail Koht pwehki kumwail? 10 Ni rahn oh nipwong, se kin kapakap ngidingid ni uwen at kak pwe sen tuhwong kumwail* oh sewesehkin kumwail dahme anahn en kakehlaka amwail pwoson.+

11 Eri, Samatail Koht oh atail Kaun Sises en ketin wiahiong kiht sen kak kohwei rehmwail. 12 Oh Kauno en ketin kalaudehla amwail limpoak ong emenemen+ oh aramas koaros, oh ketin kadirehkihla mohngiongimwail, duwehte at kin poakohng kumwail. 13 Eri amwail mohngiong en tengeteng oh en sohte karaunepen amwail sarawihla mwohn silangin Samatail Koht+ ni ahnsou me atail Kaun Sises pahn ketier*+ iangahki sapwellime aramas sarawi kan koaros.

4 Eri, riat ako, duwehte amwail aleier kaweid sang reht duwen amwail pahn weweid pwehn kaperenda kupwuren Koht,+ ni mehlel kumwail kin wiewia met, eri se peki oh kangoangei kumwail ni mwaren Kaun Sises, kumwail en wonlahte kalaudehla amwail kin wiewia met. 2 Pwe kumwail eseier kaweid kan* me se kihong kumwail sang ni manaman en Kaun Sises.

3 Pwe iet kupwuren Koht, kumwail en sarawihla+ oh liksang tiahk samin me pid wia nsenen pwopwoud.*+ 4 Emenemen kumwail anahne ese duwen eh pahn kaunda pein paliwere*+ ni sarawi+ oh wahu, 5 a kaidehn ni ineng kehlail en wia nsenen pwopwoud+ ni mehwo, duwehte aramas akan me sohte kin ese Koht.+ 6 Kaleke emen de daulihala dahme konehng oh isanekihla rie ni ire wet, pwehki Siohwa* kin ketin kadeikada mepwukat koaros, duwehte me se ndaiong kumwail mahso oh pil panawihekin kumwail ni kehlail. 7 Pwe Koht sohte ketin malipeikitaildohng nan mour samin, pwe nan mour sarawi.+ 8 Eri, mehmen me kin mwamwahliki met, kaidehn aramas me e kin mwamwahliki pwe Koht,+ me kin ketikihong kumwail sapwellime ngehn sarawi.*+

9 Ahpw me pid limpoak en pirien,+ kumwail sohte anahne sen ntingkiwohng kumwail, pwe Koht ketin padahkihongkumwailehr en poakohng emenemen.+ 10 Ni mehlel, kumwail kin wiewia met ong riatail kan koaros nan Masedonia pwon. Ahpw riat ako, se kangoangei kumwail en wonlahte kalaudehla amwail kin wia met. 11 Kumwail nantihong momourki mour meleilei+ oh piseksang mouren meteikan+ oh pein doadoahk,+ nin duwen me se kaweidkin kumwail, 12 pwe kumwail en weweid ni pwung mwohn me seupwoson akan+ oh kumwail sohte pahn anahne mehkot.

13 Riat ako, se pil men kumwail en wehwehki duwen irail me melahr,*+ pwe kumwail en dehr pahtoula duwehte irail kan me sohte arail koapworopwor.+ 14 Pwe ma kitail kin pwoson me Sises pwoulahr oh pwurehng iasada,+ eri Koht pil pahn ketin kaiasada irail kan me melahr* ni arail miniminiong Sises, pwe ren iang ih.+ 15 Pwe iet me se kin padahkihong kumwail sang ni mahsen en Siohwa,* me kitail kan me momour erein ketier* en Kauno sohte mwahn pahn tiengla mwohn irail kan me melahr;* 16 pwehki pein Kauno pahn ketidihdo sang nanleng ni ngilen ruwes en tohnleng me keieu lapalap+ oh kolokol sapwellimen Koht sowi, oh irail kan me melahr ni arail miniminiong Krais pahn iasada mahs.+ 17 A mwuri, kitail me momour ahpw pahn pwekipwekdahla nan depwek+ pwe kitail en iang irail tuhwong Kauno+ nan wehwe; kitail ahpw pahn ieiang Kauno ahnsou koaros.+ 18 Eri kumwail kansenamwahwihki emenemen mahsen pwukat.

5 Eri riat ako, kumwail sohte anahne emen en ntingkiwohng kumwail duwen ahnsou kan oh rahn akan me koasoandier. 2 Pwe pein kumwail inenen ese mwahu me rahnen Siohwa*+ pahn leledo duwehte lipirap emen nipwong.+ 3 Ni ahnsou me irail pahn nda, “Popohl oh sohte keper!” re ahpw pahn kamwomwmwomwla. Kahpwal wet pahn mwadangete lelohng irail,+ rasehng medek en neitik en lih liseian men, oh re sohte pahn pitsang. 4 Ahpw kumwail, riat ko, kumwail sohte mi nan rotorot, kahrehda rahno sohte pahn mwadangete lelohng kumwail rasehng marain en rahn eh kin lelohng lipirap akan ni soh kasikpe, 5 pwe kumwail koaros serien marain oh serien rahn.+ Kaidehn kitail kisehn nipwong de rotorot.+

6 Eri, kitail en dehr wie memeir duwehte meteikan,+ ahpw kitail en pepehd+ oh kolokol atail koahiek en madamadau.+ 7 Pwe irail kan me kin meir kin meir nipwong, oh irail kan me kin sakaula kin sakaula nipwong.+ 8 Ahpw ong kitail me kisehn rahn, kitail en kolokol atail koahiek en madamadau oh perehki mwaremwaratail perehpen pwoson oh limpoak oh lisoaropkihda lisoarop en koapworopwor en komour,+ 9 pwe Koht sohte ketin pilkitailda pwehn kalokei kitail,* ahpw pwe kitail en komourkihla+ dahme atail Kaun Sises Krais ketin wiadahr. 10 E pwoukinkitailla,+ pwe mehnda ma kitail pepehd de memeir,* kitail pahn iang ih momour.+ 11 Eri, kumwail kangkangoange* oh kangkakehlailih emenemen,+ nin duwen me kumwail kin wiewia.

12 Eri riat ako, se peki kumwail en wauneki irail kan me kin doadoahk laud nanpwungamwail oh kin apwalih kumwail nan doadoahk en Kauno oh kaweid kumwail; 13 oh kasalehiong irail kadek laud ni limpoak pwehki arail doadoahk.+ Kumwail ahneki popohl nanpwungamwail.+ 14 Ahpw riat ako, se kangoangei kumwail en panawih me sapeik kan,+ kansenamwahwih irail kan me pahtoula,* sewese me luwet akan, oh kanengamahiong aramas koaros.+ 15 Kumwail mwasahn pwe emen dehr dupungkihong emen me suwed,+ ahpw ahnsou koaros rapahki dahme mwahu ong emenemen oh pil ong aramas teikan koaros.+

16 Kumwail pereperen ahnsou koaros.+ 17 Poadidiong kapakap.+ 18 Kalahnganki mehkoaros.+ Met iei kupwuren Koht ong kumwail me kin idawehn Krais Sises. 19 Kumwail dehr kakunla kisiniei en ngehn sarawi.*+ 20 Kumwail dehr mwamwahliki kokohp kan.+ 21 Kasawih pwungen mehkoaros;+ kolokol teng dahme mwahu. 22 Liksang soangen suwed koaros.+

23 Koht en popohl en ketin kasarawihkumwailla ni unsek. Oh amwail madamadau* oh mour* oh paliwar en mwahu ni soahng koaros oh en nekinekla ni soh karaunpe erein ketier* en atail Kaun Sises Krais.+ 24 Ih me ketin malipeikumwaildo kin lelepek, oh e uhdahn pahn ketin wia met.

25 Riat ako, kumwail pousehlahte kapakapkin kiht.+

26 Kumwail rahnmwahwih riatail kan koaros oh metik* irail.

27 I peki rehmwail ni mwaren Kauno, kumwail en wadek ong riatail kan koaros kisinlikou kiset.+

28 Kadek sapan en atail Kaun Sises Krais en kin ieiang kumwail.