KISINLIKOU ONG MEHN KALESIA

1 Pohl, wahnpoaron men, me sohte tepisang rehn aramas de pil aramas emen me idihada, ahpw sang rehn Sises Krais oh Samatail Koht, me ketin kaiasada ih sang rehn me melahr akan, 2 oh riatail koaros me mi rehi, ong mwomwohdiso kan en Kalesia:

3 Samatail Koht oh Kaun Sises Krais en ketikihong kumwail kadek sapan oh popohl. 4 Krais ketin tounmeteikihla pein ih ong dipatail kan pwe en ketin doareikitailla sang koasoandi suwed en mwehi wet* nin duwen kupwuren Samatail Koht, 5 me lingan en kohwong kohkohlahte. Amen.

6 I pwuriamweikihla amwail mwadangete sohpeiweisang Meno me ketin malipehkinkumwaildo kadek sapan en Krais ong ni ehu rongamwahu tohrohr. 7 Sohte pil mie ehu rongamwahu tohrohr; ahpw mie mehkei me kin kahrehiong kumwail kahpwal oh men wekidala rongamwahu duwen Krais. 8 Ahpw, mehnda ma kiht de tohnleng men sang nanleng pahn lohkihong kumwail ehu rongamwahu me tohrohrasang rongamwahwo me se lohkihongkumwailehr, a en riahla. 9 Duwehte at koasoiaier mwowe, oh met I pahn pwurehng koasoia, Mehmen me kin lohkihong kumwail ehu rongamwahu me tohrohrasang rongamwahwo me kumwail aleier, a en riahla.

10 Ia duwe, I kin songosong en ale keniken rehn aramas de Koht? De I kin songosong en kaperenda aramas? Ma I kin usehlahte kaperenda aramas, kaidehn ngehi ladun Krais men. 11 Pwe riei ko, I men kumwail en ese me rongamwahu me I lohkihong kumwail sohte tepisang rehn aramas; 12 pwe I pil sohte ale sang rehn aramas, oh pil sohte emen me padahkihong ie, ahpw pein Sises Krais me ketin kasalehiong ie.

13 Mehlel me kumwail rongehr duwen ei wiewia ni ei mi nan pelien lamalam en mehn Suhs, me I kin kaloke laud mwomwohdisohn Koht oh kauwehla; 14 oh ngehi me keieu rehn iengei mehn Suhs tohto me se wia dihteieu nan pelien lamalam en mehn Suhs, ni ei kin ngoangki laud tiahk en semei ko. 15 Ahpw ni ahnsou me Koht, me ketin katohreiehsang kapehden inei oh malipehkin ie sapwellime kadek sapan, ketin kupwurehda me e mwahu 16 en kasalehda sapwellime Ohlo sang rehi pwe I en lohkihong mehn liki kan rongamwahu duwen ih, I sohte mwadangete peki kaweid sang rehn aramas emen;* 17 de pil kohdahla Serusalem rehn irail kan me wiahla wahnpoaron mwohi, ahpw I kohla Arepia, oh ngehi eri pwurala Damaskus.

18 Eri mwurin sounpar siluh, I kohdahla Serusalem pwe I en tuhwong Kepas,* oh I mihmihki reh rahn eisek limau. 19 Ahpw I sohte tuhwong wahnpoaron teiko, ihte Seims, rien Kauno pwutak. 20 Eri me pid soahng kan me I ntingkiwohng kumwail, I kamehlelehiong kumwail mwohn silangin Koht me I sohte likamw.

21 Mwurin mwo I kohla nan sapwen Siria oh Silisia. 22 Ahpw mwomwohdiso kan en Sudia me kin miniminiong Krais saikinte kilang ie. 23 Re kin rongete met: “Ahnsou wet, ohl me kin kaloke kitail mahso kin kalokalohki rongamwahu duwen pwoson me e kauwehla mahso.” 24 Irail eri tepida kalinganahda Koht pwehki ngehi.

2 Eri mwurin sounpar 14, I pwurehng kohdahla Serusalem iangahki Parnapas, oh I pil kahrehda Taitus. 2 I kohdahla pwehki kaudiahl ehu, oh I tuhwongete ohl akan me waun oh padahkihong irail rongamwahu me I kin kalohki rehn mehn liki kan, pwe I men ese ma doadoahk me I kin wiewia de wiadahr me mwahu de soh. Ma e sohte mwahu, eri dahme I kin wia sohte katepe. 3 Ahpw, pil Taitus me iang ie, e sohte itoit ong pwe en sirkumsaisla, mendahki ih mehn Krihs men. 4 Ahpw ire wet pwarada pwehki riatail likamw akan me wailong pwe en lipoarokih saledek me kitail kin ahneki ni atail kin miniminiong Krais Sises, pwe ren kaliduwihkitailla douluhl; 5 se sohte dukiong irail, sohte mwahn pak ehu, pwe me mehlel en rongamwahwo en kin mihmihte rehmwail.

6 Ahpw me pid irail ko me mwomwen kesempwal⁠—​sohte lipilipil ihs irail, e sohte wiahda mehkot rehi, pwe Koht sohte kin ketin kadeik maslikin aramas⁠—​sohte mehkot kapw me irail me waun ko ndaiong ie. 7 Ahpw, ni arail kilangehr me I alehdier pwais en rongamwahu ong irail me sohte sirkumsaisla, duwehte Piter eh alehdier ong irail me sirkumsaislahr⁠— 8 pwe meno me ketikihong Piter manaman en wia wahnpoaron men ong irail me sirkumsaislahr, pil ketikihong ie manaman en wia wahnpoaron men ong irail mehn liki kan⁠— 9 oh ni arail pohnese kadek sapan me kohieng ie, Seims oh Kepas* oh Sohn, me rasehng uhr ekei nan mwomwohdiso, ahpw kapahdo rehi oh rehn Parnapas palimaun en pehrail, me kasalehda me re pwungkipene* sen kohla rehn mehn liki kan, a irail pahn kohla rehn me sirkumsaislahr kan. 10 Ihte me re pekien sen tamataman me semwehmwe kan, oh iei met me I pil kin nannantihong wia.

11 Ahpw ni ahnsou me Kepas* kohdo Andiok, I ahpw sohpeiong oh pelianda, pwehki e sansal me e sapwung. 12 Pwe mwohn ohl ako me pekederdo sang rehn Seims ar leledo, e kin iang mehn liki kan mwenge; ahpw ni arail leledo, e sohla wia met oh tohrohrasang irail, pwehki eh masak irail ko me kin utung sirkumsais. 13 Mehn Suhs teikan pil iangala ih nan wiewiahn mwalaun wet, me kahrehda Parnapas pil iangala arail mwalaun. 14 Ahpw ni ahnsou me I kilang me irail sohte weweidki me mehlel en rongamwahwo, I ahpw ndaiong Kepas* mwohn irail koaros: “Mendahki kowe mehn Suhs men, ma ke kin mour duwehte mehn liki men a kaidehn mehn Suhs men, ia duwen omw kak idingohng mehn liki kan ren mour nin duwen tiahk en mehn Suhs?”

15 Kitail mehn Suhs kei sang ni atail ipwidi, a kaidehn me dipan kei sang rehn mehn liki kan. 16 Kitail kin pohnese me aramas kin pwungla rehn Koht, kaidehn sang ni eh idawehn audepen kosonned, ahpw ihte sang ni eh pwoson Sises Krais. Eri, kitail kin pwosonla Krais Sises, pwe kitail en pwungla rehn Koht sang ni atail pwoson Krais, kaidehn sang ni atail idawehn audepen kosonned, pwe sohte emen* pahn pwungla rehn Koht sang ni eh idawehn audepen kosonned. 17 Eri ma e pil dierekda me kitail aramas dipan ekei nin doken atail songosong en pwungla rehn Koht pwehki Krais, eri ia duwe, Krais sounpapah en dihp men? Soh kowahlap! 18 Ma I pwurehng kauwada soahng kohte me I kauwelahr, I kin kasalehda me sounkauwehla kosonned men ngehi. 19 Pwe nin duwen kosonnedo, I melahr ong kosonnedo, pwe I en momour ong Koht. 20 I iangehr Krais posdahng nin tuhkeo. Kaidehn ngehi me wie momour, ahpw Krais me ieias loalei. Ni mehlel, mour me I wie momourki ni uduk ahnsou wet, I kin mour sang ni pwoson sapwellimen Kohto, me ketin poakohng ie oh pangala pein ih ong ie. 21 I sohte soikala sapwellimen Koht kadek sapan, pwe ma aramas pahn pwungla rehn Koht sang ni kosonned, eri en Krais pwoula sohte katepe.

3 Mehn Kalesia kan, kumwail me pweipwei! Ihs me pitihkumwaildier mendahki at kawehwehiong kumwail ni sansal duwen Sises Krais me posdahng tuhkeo? 2 Iet me I men idek* rehmwailen: Kumwail alehdi sapwellimen Koht manaman* sang ni amwail idawehn audepen kosonnedo de pwehki amwail pwoson dahme kumwail rongehr? 3 Ia duwe, kumwail uhdahn pweipwei? Nin tapio kumwail tepida weweid pahrekiong sapwellimen Koht manaman,* a met kumwail pahn kaimwisengkihla elen aramas me soh unsek?* 4 Ia duwe, amwail lelohng kahpwal tohto sohte katepe? I sohte kamehlele me uhdahn sohte katepe. 5 Eri ia duwe, ih me kihong kumwail sapwellimen Koht manaman* oh me wiadahr manaman akan nanpwungamwail, wiadahr met pwehki amwail idawehn audepen kosonnedo, de pwehki amwail pwosonlahr dahme kumwail rongehr? 6 E pahn duwehte Eipraam me “kin pwoson Siohwa,* oh E ketin wiahkihla ih aramas pwung men.”

7 Eri kumwail uhdahn ese me irail kan me pwoson iei nein Eipraam. 8 Eri Nting Sarawio, ni eh kohpadahr me mehn liki kan pahn pwungla rehn Koht pwehki pwoson, lohkihongehr Eipraam rongamwahwo mwowe, mahsanih: “Pwehki kowe me wehi kan koaros pahn ale kapai kan.” 9 Eri irail me pwoson ko kin iang ale kapai duwehte Eipraam me kin pwoson.

10 Irail koaros me kin koapworopworki arail idawehn audepen kosonnedo kin mi pahn keria ehu, pwe e ntingdier: “Koaros me sohte kin kapwaiada soahng koaros me ntingdier nan pwuhken* Kosonnedo en riahla.” 11 Patehng met, e sansal me sohte aramas emen kin pwungla rehn Koht sang ni kosonnedo, pwehki “me pwung men pahn momour pwehki eh pwoson.” 12 Eri Kosonnedo sohte kin poahsoankihda pwoson. Ahpw, “mehmen me kin kapwaiada mepwukat pahn momour pwehki mepwukat.” 13 Krais ketin pwainkitailda oh kapitkitailsang ni keria en Kosonnedo ni eh wiahla keria ehu pwe en wiliandi kitail, pwehki eh ntingdier: “Aramas koaros me langada nin tuhke pwoat riahlahr.” 14 Met wiawi pwe kapai en Eipraam en pil kohieng mehn liki kan pwehki Krais Sises, pwe kitail en ale manamano* me Koht ketin inoukidahr sang ni atail pwoson.

15 Riei ko, I pahn koasoiahda karasaras ehu me pid mouren aramas rahn koaros: Ni ahnsou me inou lap ehu kin manamanla, mehnda ma pil sang rehn aramas emen, sohte me kak kauwehla de kapatahiong mehkot. 16 Eri inou kei wiawihong Eipraam oh kadaudoke. E sohte koasoia, “oh ong kadaudokomw kan,” me wehwehki me tohto. Ahpw e koasoia, “oh ong kadaudokomw,” me wehwehki aramastehmen, me iei Krais. 17 Oh I pahn pil kapatahiong met: Kosonnedo me poadada sounpar 430 mwuri, sohte kauwehla inou lap me Koht ketin wiadahr mwoweo pwe en kasohrehla inowo. 18 Pwe ma sohsowo poahsoankihda kosonned, eri e solahr poahsoankihda inou ehu; ahpw ni kadek Koht ketikihong Eipraam sohsowo sang ni inou ehu.

19 Eri ia kahrepen Kosonnedo? E kapatapatohng pwe dihp en sansalda, lao kadaudok me inowo wiawihkihda pahn pwarodo; oh tohnleng ko peusehiong aramas akan Kosonnedo sang rehn sounkadokepene pali riau. 20 Sohte anahnepen sounkadokepene pali riauo ma e kin pid aramastehmen, ahpw Koht mehtehmen ni eh ketin wiahda inowo. 21 Eri ia duwe, Kosonnedo kin uhwong sapwellimen Koht inou kan? Soh kowahlap! Pwe ma kosonned ehu wiawidahr me kak kihda mour, eri kitail kak pwungla rehn Koht sang ni atail kin kapwaiada kosonned. 22 Ahpw Nting Sarawio kihong mehkoaros pahn manaman en dihp, pwe inou me kohsang pwoson Sises Krais en kak kohieng irail kan me kin kasalehda pwoson.

23 Ahpw mwohn pwoson eh leledo, kosonned kin sileikitaildi oh kitail mihmi pahn menemene oh kin awiawih pwoson me pahn sansalda. 24 Eri, Kosonnedo wialahr atail sounkaweid me kin kahluweikitaillahng Krais, pwe kitail en pwungla rehn Koht pwehki pwoson. 25 Ahpw met ni pwoson eh leledohr, kitail solahr mi pahn sounkaweid men.

26 Ni mehlel, kumwail koaros sapwellimen Koht seri kan sang ni amwail kin pwoson Krais Sises. 27 Pwe kumwail koaros me papidaislahr oh miniminiong Krais kin kahlemengih Krais.* 28 Sohte wekpeseng ehu mie nanpwungen mehn Suhs oh mehn Krihs, pil sohte wekpeseng en ladu men de me saledek men, pil sohte wekpeseng en ohl emen de lih emen, pwe kumwail koaros wiahla ehu ni amwail miniminiong Krais Sises. 29 Patehng met, ma kumwail sapwellimen Krais, eri kumwail uhdahn kadaudok en Eipraam, oh kumwail kak ale sohso me inoupe wiawihong Eipraam.

4 Eri met I pahn nda me ni serien sohso men eh wiahte kisin seri, e sohte weksang ladu men, mendahki ih me kaunen mehkoaros, 2 ahpw e kin mi pahn sounkaweid kan oh sounapwalih kan lao lel rahno me eh pahpa koasoanediero. 3 Pil duwehte, ni atail wia seri kei, kitail kin liduwih madamadau oh wiewia en sampah wet. 4 Ahpw ni imwiseklahn ahnsou me koasoandiero eh leledo, Koht ketin poaronehdo sapwellime Ohl, me ipwidi sang lih emen, oh me mi pahn kosonned, 5 pwe en pwainla pweipwei en kasaledekihala irail kan me mi pahn kosonned, pwe Koht en ketin pwekada kitail nin duwen sapwellime seri kan.

6 Eri pwehki kumwail wia sapwellimen Koht seri kei, Koht ketin kadarodohng nan mohngiongitail sapwellime manaman* me sapwellime Ohlo alehdi oh manamano kin ngihl laudida nda: “Apa,* Samat!” 7 Eri ke solahr wia ladu men ahpw sapwellime seri. Oh ma kowe sapwellimen Koht seri, e pil pahn ketikihong uhk sohso ehu.

8 Ahpw ahnsou me kumwail sehse Koht, kumwail wialahr lidun irail kan me kaidehn uhdahn koht. 9 Ahpw met ni amwail esehlahr Koht, de ni Koht eh ketin mwahngihkumwaillahr, dahme kahrehda kumwail men pwuralahng madamadau oh tiahk mwahl en sampah oh men pwurehng wiahla arail lidu? 10 Kumwail uhdahn kin kesempwalki rahn akan, sounpwong kan, ahnsou kan* oh sounpar kan. 11 I perkinkumwaildahr, pwe mwein ei nantihong sewese kumwail sohte katepe.

12 Riei ko, I peki rehmwail, kumwail en duwehte ngehi, pwe I pil kin duwehte kumwail mahso. Kumwail sohte wiahiong ie mehkot sapwung. 13 Ahpw kumwail ese me pwehki ei soumwahu, I ahneki tepin ahnsou mwahu en kalohkihong kumwail rongamwahwo. 14 Oh mendahki ei soumwahu eh wia kahpwal ehu ong kumwail, kumwail sohte mwamwahlikin ie de kasautkin ie;* ahpw kumwail kasamwo ie duwehte sapwellimen Koht tohnleng men, de duwehte Krais Sises. 15 Eri, ia peren me kumwail ahnekio? Pwe I ese ni mehlel me, ma e kak wiawi, kumwail kapitasangehr pwoaren masamwail kan oh kihong ie. 16 Eri, ia duwe, I wialahr amwail imwintihti pwehki I koasoiaiong kumwail me mehlelo? 17 Irail kin ngoangkihla pwe kumwail en pwungkinirailla, ahpw kaidehn ong kahrepe mwahu ehu; re men kadohwankumwailweisang ie, pwe kumwail en uhdahn men idawehnirailla. 18 Ahpw ahnsou koaros e kin mwahu emen en kin ngoangki rapahkin kumwail ong kahrepe mwahu ehu, a kaidehnte ni ahnsou me I pahn mihmi rehmwail, 19 nei kisin seri ko, pwe I pwurehng weiweirek en neitik lao kumwail kasalehda sapwellimen Krais irair kan. 20 I men mihmi rehmwail ahnsou wet pwe I en wekidala ngileiet, pwe I sehsehla dahme I pahn wia pwehki kumwail.

21 Ndaiong ie mahs, kumwail me kin men mihmi pahn kosonned, Kumwail sohte kin rong Kosonnedo? 22 Karasepe, e ntingdier me Eipraam naineki pwutak riemen, emen sang rehn lih lidu men oh emen sang rehn lih saledek men; 23 ahpw pwutak me sang rehn lih liduwo ipwidi nin duwen aramas ar kin ipwidi, a pwutak teio me sang rehn lih saledeko ipwidi nin duwen inou ehu. 24 Mepwukat duwehte sipai en karasaras pwoat; pwe lih riemen pwukat kin wehwehki inou lap riau, ehu rehra wiawihda pohn Nahna Sainai; koaros me mi pahn inou lap wet lidu kei oh inou lap wet duwehte Akar. 25 Eri Akar kin wehwehki Sainai, nahna ehu me mi nan Arepia, oh e rasehng Serusalem rahnwet, pwe e wia lidu men iangahki nah seri kan.* 26 Ahpw Serusalem en powe me saledek, oh iei ih atail nohno.

27 Pwe e ntingdier: “Ke en pereperen, kowe lih depwen me sohte kin neitik; weriwerki omw peren, kowe lih me sohte kin medek en neitik; pwe nein lih me lekdeklahro seri kan me tohtohsang nein lih me mie eh pwoud.” 28 Eri riei ko, kumwail iei serien inowo duwehte Aisek. 29 Ahpw duwehte ni ahnsou me pwutak me ipwidi nin duwen aramas ar kin ipwidi eh kin tepida kaloke pwutak me ipwikihdi sapwellimen Koht manaman,* pil kin duwehte ahnsou wet. 30 Ahpw, dahme nting sarawio mahsanih? “Kausala lih liduwo oh nah pwutako, pwe nein lih liduwo pwutako sohte mwahn pahn iang nein lih saledeko pwutako wia serien sohso.” 31 Eri riei ko, kitail kaidehn serien lih liduwo, pwe serien lih saledeko.

5 Krais ketin kasaledengkitailla ong soangen saledek wet. Eri, kumwail kesihnenda teng oh dehr pwurehng wia lidu.

2 Kilang! Pein ngehi Pohl pahn ndaiong kumwail me ma kumwail sirkumsaisla, Krais solahr pahn wia kamwahu ehu ong kumwail. 3 I pahn pwurehng kadehdehiong aramas koaros me sirkumsaisla, me re anahne kapwaiada Kosonnedo pwon. 4 Kumwail kin tohrohreweisang Krais, kumwail me kin songosong pwungla rehn Koht pwehki kosonned; kumwail pwupwsangehr sapwellime kadek sapan. 5 Ahpw ong kitail, sang ni sapwellimen Koht manaman oh atail pwoson, kitail kin awiawih oh koapworopworki en pwungla rehn Koht. 6 Ong tohnpadahk en Krais Sises men, sirkumsais de pil sohte sirkumsais sohte katepe, ahpw pwoson me limpoak kin kamwakid iei me katapan.

7 Kumwail kin pweida mwahu mahso.* Ihs me irehdihsang kumwail en peikiong me mehlelo? 8 Soangen madamadau wet sohte kohsang rehn Koht me kin ketin malipeikumwaildo. 9 Kisin ihs kis kin kampwosehda lopwon en pilawa ehu pwon. 10 I kamehlele me kumwail me kin miniminiong Kauno sohte pahn ahneki madamadau me weksang met; ahpw ih me kin kahrehiong kumwail kahpwal, sohte lipilipil ihs ih, pahn ale kadeik me e warohng. 11 Ahpw ong ie, riei ko, ma I kin kalkalohkihte sirkumsais, a dahme kahrehda I kin wie kalokolongki? Ma ih duwen met, tuhkehn kalokoloko* solahr pahn wia mehn kadipekelekel ehu. 12 I men ohl ako me kin songosong kapingkumwailda ren lekwusolla.*

13 Eri riei ko, kumwail malipilipdohngehr nan saledek; ihte kumwail dehr doadoahngki saledek wet ong ahnsou mwahu en rapahki ineng en uduk, ahpw kumwail en papah emenemen sang ni limpoak. 14 Pwe Kosonnedo pwon kin pweida* sang ni kehkehlik tehieu, me iei: “Ke anahne poakohng mehn mpomw duwen omw kin poakohng pein uhk.” 15 Ahpw ma kumwail kin pekehkehpene oh kamedekihala emenemen, kumwail kanahieng pwe kumwail de kamwomwala emenemen.

16 Ahpw I pahn nda, Kumwail pousehlahte weweidki sapwellimen Koht manaman* oh kumwail sohte mwahn pahn kin kapwaiada ineng en uduk. 17 Pwe uduk kin uhwong sapwellimen Koht manaman* pwehki eh ineng, oh manamano* kin uhwong uduk; mepwukat kin uhpene pwe kumwail en dehr kin wia soahng kan me kumwail men wia. 18 Patehng met, ma sapwellimen Koht manaman* kin kaweid kumwail, kumwail sohte mi pahn kosonned.

19 Eri wiewiahn uduk kin uhdahn sansal, oh mepwukat iei tiahk samin me pid wia nsenen pwopwoud,* samin, wia me suwed ni ngidingid,* 20 tiahk en pwongih dikedik, wunahni, kailok, pei, luwak, lingeringer, akamai, saminimin, wiahda palih kan, 21 peirin, sakau daulihala, kamadipw mwoarongorong kan, oh soahng kan me duwehte mepwukat. I panawihekin kumwail duwen mepwukat, duwehte me I panawihekinkumwailehr me irail kan me kin wia soahng pwukat sohte pahn sohsohki Wehin Koht.

22 Ni pali teio, wahn sapwellimen Koht manaman* iei limpoak, peren, popohl, kanengamah, kadek, kamwahu, pwoson, 23 mpahi, kaunda pein emen. Sohte kosonned ehu me uhwong mepwukat. 24 Patehng met, sapwellimen Krais Sises akan kemelahr* pepehm kehlail oh ineng en uduk kan.

25 Ma kitail kin momourki sapwellimen Koht manaman,* eri kitail en pil weweidki manamano* ni pwung. 26 Kitail en dehr aklapalap oh kahrehda siaipene, oh peirinpene.

6 Riei ko, ma emen weweid nan ahl sapwung ni eh sohte wehwehki, eri kumwail me kin ale kaweid sang sapwellimen Koht manaman* en song kapwungala soangen aramas menet ni kadek. Ahpw kumwail en mwasamwasahn pein kumwail, pwe kumwail de pil lohdiong nan kasongosong. 2 Kumwail pousehlahte sawaskipene amwail wisik toutou kan, oh ni ahl wet kumwail pahn kapwaiada kosonned en Krais. 3 Pwe ma emen kin medewe me ih mehkot ni eh sohte mehkot, e kin pitih pein ih. 4 Ahpw emenemen en kasawih pein eh wiewia kan, e ahpw pahn perenkihda pein ih, a kaidehn en kapahrekiong ih meteikan. 5 Pwe emenemen pahn wa pein eh wisik.*

6 Patehng met, mehmen me kin ale padahkpen mahseno,* a en ehukihong me kin wia soangen padahko* soahng mwahu koaros.

7 Kumwail dehr pitida: Kumwail sohte kak pitih Koht. Pwe dahme aramas kin kamwarak, ih me e pahn pil dolung; 8 pwehki me kin kamwarak ong kamwahupen ineng en uduk pahn dolung mehla* sang ineng en uduk, ahpw me kin kamwarak ong kamwahupen sapwellimen Koht manaman* pahn dolung mour soutuk sang ni manamano.* 9 Eri kitail en dehr uhdihsang wia dahme mwahu, pwe ma kitail sohte pahn pwangahkihda,* kitail pahn dolung ni ahnsou me kileldiong. 10 Eri, nindoken eh mihmiehte atail ahnsou mwahu,* kitail en wia me mwahu ong aramas koaros, ahpw mehlel ong irail kan me kisehn atail pwoson.

11 Kilang uwen laud en mesen nting me I ntingkiwohng kumwail sang ni pein mengin pehiet.

12 Irail koaros me men liksansalmwahu* iei irail kan me kin songosong en itonehng kumwail en sirkumsaisla oh kin wia met pwe ren pitsang kalokolok pwehki tuhkehn kalokolok* en Krais. 13 Pwe pil irail kan me sirkumsaisla, pein irail sohte kin kapwaiada Kosonnedo, ahpw re men kumwail en sirkumsaisla pwe ren suweiki dahme wiawihong paliwaramwail kan. 14 Ahpw I en dehpa suwei, ihte I en suweiki tuhkehn kalokolok* en atail Kaun Sises Krais. Ong ie, sampah kamakamalahr* pwehki ih oh ong sampah, I kamakamalahr pwehki ih. 15 Pwe sirkumsais de sohte sirkumsais sohte kesempwal, ahpw me kesempwal iei kepikipik kapw ehu. 16 A ong irail koaros me kin weweidki koasoandi en tiahk wet ni pwung, popohl oh kadek kalahngan en kohieng irail, ei, ong Israel en Koht.

17 Sang met kohla, emen dehpa wiahiong ie kahpwal, pwe I kin weuwa ni paliwereiet kilel en sapwellimen Sises ladu.

18 Riei ko, kadek sapan en atail Kaun Sises Krais en kin ieiang lamalam mwahu* me kumwail kin kasalehda. Amen.