KISINLIKOU ONG MEHN EPISOS

1 Pohl, wahnpoaron en Krais Sises sang ni kupwuren Koht, ong aramas sarawi kan me mi nan Episos oh me kin lelepek ni arail kin miniminiong Krais Sises:

2 Samatail Koht oh Kaun Sises Krais en ketikihong kumwail kadek sapan oh popohl.

3 Kaping en kohwong Koht oh Semen atail Kaun Sises Krais, pwe e ketin kapaiahkinkitaildahr kapai kan me kohsang sapwellime manaman nanleng pwehki atail kin miniminiong Krais, 4 duwehte eh ketin pilkitailda en miniminiong ih* mwohn tepin tohnsampah,* pwe kitail en sarawi oh sohte sapwung kis mwohn Koht ni limpoak. 5 Pwe e ketin kileleikitaildier mwowe pwe kitail en wiahla sapwellime serien pwekipwek kei sang rehn Sises Krais, nin duwen me e ketin kupwurperenki oh nin duwen kupwure, 6 pwe kaping en kohwong ih pwehki e ketin doadoahngki sapwellime Ohl kompoake pwe en ketin kasalehiong kitail sapwellime kadek sapan me lingaling. 7 Pwehki ih, kitail saledengkihla pweinen pweipwei sapahlo sang ni sapwellime nta, me iei atail ale mahkpen atail sapwung kan, nin duwen sapwellimen Koht kadek sapan laud.

8 E ketin kalaudehla kadek sapan wet ong kitail sang ni eh ketikihong kitail erpit koaros oh wehwe koaros 9 oh ketin kahrehiong kitail en ese rir sarawi en kupwure, nin duwen me e ketin kupwurperenki oh me e ketin koasoanedier. 10 Rir sarawi wet kin pidada wiawihdahn koasoandi ehu ni kaimwiseklahn ahnsou me kileldier, pwe en kihpene mehkoaros rehn Krais, soahng kan nanleng oh soahng kan nin sampah. Ei, rehn Krais 11 me se kin miniminiong oh idihdidahr nin duwen serien sohso kei, pwehki se pilipildahr mwowe nin duwen koasoandi en Koht me kin ketin kapwaiada soahng koaros me e ketin koasoanedier nin duwen kupwure, 12 pwe kiht me tepin koapworopworki Krais en papah ong ni kapingpen eh lingan. 13 Ahpw kumwail pil kin koapworopworki ih mwurin amwail rongada mahsen mehlelo, rongamwahu duwen komourpamwail. Mwurin amwail kamehlelehier, pwehki ih me kumwail kilelkihdi sapwellimen Koht manaman* me e ketin inoukihda, 14 me iei mehn kadehde en dahme pahn kohdo* me pid atail sohso. Koht ketin wia met pwe en ketin kasaledekihala sapwellime aramas akan pwehki pweinen pweipwei sapahl ehu, ong sapwellime kaping oh lingan.

15 Ihme kahrehda ni ei rongada duwen amwail kin pwoson Kaun Sises oh limpoak me kumwail kasalehiong aramas sarawi kan koaros, I pil 16 sohte kin uhdihsang ei kin kalahngankihong Koht kumwail. I kin pousehlahte koasoakoasoia duwen kumwail nan ei kapakap kan, 17 pwe Koht en atail Kaun Sises Krais, Sahm en lingan, en ketikihong kumwail manaman pwe kumwail en loalokongla oh wehwehki soahng kan me e ketin kasalehda me pid loalokong pwung duwen ih. 18 E ketin kamarainihada mesen amwail mohngiong, pwe kumwail en esehda koapworopwor me e ketin malipehkinkumwaildo oh kapai lingaling me e ketin kolokol nin duwen sohso ehu ong aramas sarawi kan, 19 oh uwen laud en sapwellime roson me e ketin kasalehiong kitail me pwoson akan. Roson laud wet kin sansalda sang ni ahl me e kin ketin doadoahngki sapwellime kehl, 20 me e ketin doadoahngkihong Krais ni eh ketin kaiasada ih sang rehn me melahr akan oh ketikihdiong ih ni palimauni nanleng, 21 me pohnangin koperment koaros oh pwuhng en kaunda koaros oh manaman koaros oh kaun akan koaros oh ahd koaros, kaidehnte nan koasoandi en mwehi wet* ahpw pil me kohkohdo. 22 E pil ketikihdiong mehkoaros pahn aluweluwe kan oh ketin kahrehiong ih en wiahla tapwin mehkoaros me pid mwomwohdiso, 23 me iei kahlepe, me kin direkihla sapwellime irair kan oh ih me ketin kaunsekala mehkoaros ni ahl koaros.

2 Oh Koht pil ketin kamourkumwailda, mendahki amwail melahr nan amwail sapwung kan oh dipamwail kan, 2 me kumwail kin weweidki mahso nin duwen koasoandi en sampah wet, nin duwen kaunen manaman en nan wehwe, me iei elen madamadau* me kin doadoahk ahnsou wet rehn irail kan me kin sapeik. 3 Ei, mahso ni atail mi rehrail, kitail koaros kin mwekidki pein atail ineng suwed kan oh kapwaiada pein atail madamadau suwed. Sangete atail ipwidi, kitail warohng ale engieng en Koht duwehte meteikan. 4 Ahpw Koht me diren kadek kalahngan oh pwehki sapwellime limpoak laud ong kitail, 5 e ketin kamourkitailda rehn Krais, pil ni atail melahr nan atail sapwung kan⁠—​kadek sapan me kumwail komourkihla. 6 Patehng met, e ketin kaiasada kitail oh kamwohdedi kitail en iang Krais Sises nanleng ni atail kin miniminiong ih, 7 pwe nan koasoandi en mwehi me kohkohdo,* e pahn ketin kasalehda sapwellime kadek sapan me lapalahpie sang ni sapwellime kupwuramwahu ong kitail me kin miniminiong Krais Sises.

8 Kadek sapan wet me kumwail komourkihla sang ni amwail pwoson, oh met kaidehn pwehki pein amwail wiewia; ahpw iei sapwellimen Koht kisakis. 9 Soh, e sohte kohsang wiewia kan, pwe emen en dehr ahneki kahrepen eh suwei. 10 Kitail iei wiepen nin limen Koht oh e ketin kapikada kitail ni atail miniminiong Krais Sises ong doadoahk mwahu me Koht ketin koasoanedier mwowe kitail en wia.

11 Ihme kahrehda, kumwail tamataman me kumwail mehn liki kei sang ni amwail ipwidi, oh irail me sirkumsaisla rehn aramas kin kahdanekin kumwail aramas me sohte sirkumsais. 12 Ni ahnsowo kumwail sohte ese Krais, dohsang wehin Israel, oh wia mehn keiru kei ong inou lap kan me poahsoankihda sapwellimen Koht inou; ni amwail mi nin sampah, kumwail sohte ahneki koapworopwor oh sohte ese Koht. 13 Ahpw kumwail, me kin dohsang Koht mahso, kin miniminiong Krais Sises ahnsou wet oh karanihala Koht sang ni ntahn Krais. 14 Pwe iei ih me atail popohl, me ketin kapatapene pwihn riauo en wiahla ehu oh ketin kauwehla kehl me kin ireirailpesengo. 15 Sang ni kahlepe,* e ketin kasohrehla mehkoto me kahrehda kailok, me iei Kosonned en kehkehlik kan me wiawihkihda koasoandi kan, pwe en ketin wiahiong pwihn riauo me kin miniminiong iho en wiahla aramas kapw men oh ketin wiahda popohl 16 oh ketin kahrehiong aramas pwukat en uhdahn pwurehng alehda kupwuramwahu rehn Koht ni paliwar tehieu sang ni tuhkehn kalokoloko,* pwehki eh ketin kasohrehla kailoko sang ni sapwellime pwoula. 17 Oh e ketin pwarodo oh lohki rongamwahu en popohl ong kumwail, me dohsang Koht, oh me karanih Koht. 18 Met pwehki sapwellime meirong kahrehiong kitail koaros nan pwihn riau pwukat en kak patohong Sahmo ni saledek pwehki kitail koaros kin ale sapwellimen Koht manamanohte.*

19 Eri kumwail solahr wia mehn keiru kei oh mehn liki kei, ahpw kumwail iang irail me sarawi kan wia tohn wehiteieu oh kisehn sapwellimen Koht peneinei, 20 oh kumwail kokouda pohn poahsoanpen wahnpoaron ko oh soukohp ako, oh pein Krais Sises me wia takain pwukakeimw en poahsoano. 21 Ihmwo pwon me kin miniminiong ih oh patpene mwahu, kin kekeirda oh wiahla tehnpas sarawi ehu ong Siohwa.* 22 Ni amwail kin miniminiong ih, kumwail oh meteikan kin kokoudahng wiahla wasa ehu me Koht kin ketiket ie sang ni sapwellime manaman.*

3 Ihme kahrehda, ngehi, Pohl, me wie sensel pwehki Krais Sises ong kamwahupamwail, kumwail mehn liki kan⁠— 2 ma mehlel kumwail rongehr me I alehdi pwukoa en sewesei kumwail pwe kumwail en paiekihda sapwellimen Koht kadek sapan, 3 me rir sarawio sansalohng ie ni kaudiahl ehu, duwehte me I ntingihedi ekis duwe mwoweo. 4 Eri ni ahnsou me kumwail wadek met, kumwail kak ese duwen ei wehwehki rir sarawi me pid duwen Krais. 5 Mahso, ire rir wet sohte sansalohng aramas akan duwehte eh sansalohng wahnpoaron oh soukohp sarawi kan ahnsou wet sang ni sapwellimen Koht manaman.* 6 Ire riro iei me mehn liki kan pahn iang wia serien sohso oh iang wia kisehn paliwaro oh iang kiht nan inowo pwehki arail miniminiong Krais Sises oh pwehki rongamwahwo. 7 I wiahla sounpapah en rir sarawi wet pwehki kisakis* en sapwellimen Koht kadek sapan me kohieng ie sang ni doadoahk en sapwellime roson.

8 Kadek sapan wet kohieng ie, ohl emen me tikitik sang me keieu tikitik nanpwungen aramas sarawi kan koaros, pwe I anahne lohkihong mehn liki kan rongamwahu duwen kapai kan en Krais me sohte kak wadawadedi 9 oh anahne wiahiong aramas koaros en esehla duwen koasoandi en rir sarawio me wie ekiek erein ahnsou reirei rehn Koht, me ketin kapikada mehkoaros. 10 Met wiawi pwe ahnsou wet koperment kan oh irail kan me ahneki manaman nanleng en esehla duwen sapwellimen Koht erpit me kin sansalda ni soangsoangen ahl tohto sang mwomwohdiso. 11 Met kin pahrekiong sapwellime koasoandi poatopoat me pid Krais Sises atail Kaun, 12 pwehki ih kitail ahneki saledek en koasoi oh kak patohong Koht ni saledek oh likilik pwehki atail pwoson ih. 13 Eri, I peki rehmwail en dehr nan kapehd tikitikla pwehki kahpwal kan me I ale ni ei kin sewese kumwail, pwe mepwukat kin wehwehki lingan ong kumwail.

14 Ihme kahrehda I kelepwikihdi mwohn Sahmo, 15 pwehki ih, peneinei koaros en nanleng oh sampah alehdi adarail. 16 I kapakapki me sang ni reken sapwellime lingan, e pahn ketin kakehlakahkihda loalamwail roson en sapwellime manaman,* 17 oh pwehki amwail pwoson, Krais en ketiket nan mohngiongimwail ni limpoak. Kumwail en poadidi oh kokouda teng pohn poahsoano, 18 pwe kumwail en kak wehwehkihla douluhl uwen tehlap oh uwen reirei oh uwen ile oh uwen loal duwehte aramas sarawi kan koaros, 19 oh kumwail en esehla limpoak en Krais me kin siksang loalokong, pwe kumwail en direkihla ni unsek sapwellimen Koht irair kan me e kin ketikihda.

20 Nin duwen sapwellime roson me kin doadoahk rehtail, Koht kak ketin wiahda mehkan me uhdahn siksang mehkoaros me kitail kin peki de medewehda. 21 Lingan en kohwong ih sang mwomwohdiso oh sang Krais Sises erein dih koaros kohkohlahte. Amen.

4 Eri, ngehi, me wie sensel pwehki Kauno, peki rehmwail en weweidki dahme warohng malipilip me kumwail aleier, 2 oh kanengamahiong emenemen ni limpoak ni amwail kin aktikitik* oh mpahi ahnsou koaros, 3 oh kumwail ahneki popohl nanpwungamwail oh nantihong kolokol ehupene me kumwail alehsang sapwellimen Koht manaman.* 4 Paliwarteieu mie oh manamanteieu* mie, pil duwehte koapworopworteieu me kumwail malipilip ong; 5 Kauntehmen mie, pwosonteieu mie, papidaisteieu mie; 6 Koht tehmen me Semen aramas koaros, me kin ketiket pohnangin aramas koaros, rehn aramas koaros oh nan aramas koaros.

7 Eri kadek sapan kohieng emenemen kitail nin duwen Krais eh ketin nehkpeseng kisakiso.* 8 Pwe nting sarawio mahsanih: “Ni eh ketidahla wasa ile, e ketiki me selidi kan; e ketikihdo aramas akan nin duwen kisakis kei.” 9 Eri ia wehwehn mahsen pwoatet “e ketidahla”? Met wehwehki me e pil ketidihdo wasa karakarahk, iei sampah. 10 Ih me ketididohro iei ihohte me pil ketidahla powe pohnangin nanleng kan koaros, pwe en ketin kahrehiong soahng koaros en pweida.

11 Oh e ketikihda ekei nin duwen wahnpoaron, ekei soukohp, ekei sounkalohki rongamwahu, ekei silepe oh sounpadahk, 12 pwe irail en kapwungala* irail me sarawi kan ong doadoahk en papah pwe en kauwada* paliwar en Krais, 13 lao kitail koaros kin ehupene* ni pwoson oh ni loalokong pwung en sapwellimen Koht Ohlo, pwe kitail en wiahla aramas koahiek kei, oh uhdahn koahiekla duwehte Krais. 14 Pwe kitail solahr wia kisin seri kei, me kin pwungupwungdengkiseli ilok kan oh wekiwekidengkiseli angin padahk koaros sang ni widing en aramas akan oh sang ni koasoandi mwersuwed kan. 15 Ahpw kitail anahne koasoia me mehlelo oh kasalehda limpoak, kitail ahpw pahn kak kekeirda ni mehkoaros pwe kitail en duwehla Krais, me iei tapwi. 16 Sang reh, paliwaro pwon kin kakonokonpene mwahu oh kin sawaspene sang ni koakon koaros ar kin kihda dahme anahn. Ni ehuehu kisehn paliwaro eh kin doadoahk mwahu, met kin sewese kekeirdahn paliwaro ni eh kin kokouda ni limpoak.

17 Eri, iet me I pahn nda oh kadehde ni mwaren Kauno, kumwail dehr pwurehng weweid duwehte aramas en sampah nan arail madamadau soh katepe kan.* 18 Arail madamadau mi nan rotorot oh re kin dohsang mour me kin kohsang rehn Koht, pwehki arail sohte men ese Koht oh pwehki keptakai* en mohngiongirail. 19 Solahr arail pepehm en namenek oh re kin mweidala pein irail en wia me suwed ni ngidingid* pwe ren kin wia soangsoangen samin koaros ni mehwo.

20 Ahpw kaidehn ih me kumwail kin sukuhlki me pid duwen Krais en met, 21 ma mehlel kumwail rong sang reh oh sukuhlki sang reh duwen me mehlel me Sises kin ketin padahngki. 22 Kumwail sukuhlkier en kesehla mouren mahs me kin pahrekiong amwail tiahk en mahs oh me kin ohkihla ineng widingan kan. 23 Oh kumwail anahne usehlahte onohnsapahlih amwail elen madamadau,* 24 oh kumwail anahne pwuhriong nan mour kapw me wiawihda nin duwen kupwuren Koht ni pwung mehlel oh loalopwoat mehlel.

25 Eri, pwehki amwail keselahr likamw, emenemen kumwail en kin lokaia mehlel ong mehn mpamwail, pwehki atail wia kisehn paliwarteieu. 26 Ma kumwail lingeringerda, kumwail dehr wiahda dihp; dehr wie lingeringer lao ketipino kihrla; 27 dehr kihong Tepil eh ahnsou mwahu.* 28 Me kin pirap en uhdihsang eh pirap; ahpw en doadoahk laud, wiahki doadoahk mwahu peh kan, pwe en mie mehkot me en ehukihong emen me mie eh anahn. 29 Dehr mweidohng koasoi suwed* en kohieisang nan awamwail, ahpw me mwahu kante pwe en wia mehn kakehlaka ni ahnsou me anahn pwe en mwahu ong me kin rongorong kan. 30 Pil dehr kansensuwedihada sapwellimen Koht manaman* me kumwail kilelkidier ong rahnen kamaiau sang ni pweinen pweipwei sapahlo.

31 Kumwail kihsang rehmwail soangen kailok koaros, lingeringer koaros, mwehl koaros, weriwer koaros, lokaia kamedek koaros, oh pil soahng suwed koaros. 32 Ahpw kumwail en kin kadekpene, poakpene, oh mahkpene ni mehlel duwehte Koht eh pil ketin mahkohng kumwail ni mehlel rehn Krais.

5 Eri, kumwail kahlemengih Koht, nin duwen seri kompoak kei, 2 oh pousehlahte weweid ni limpoak, duwehte Krais eh pil ketin poakohng kitail* oh tounmeteikihla pein ih ong kitail* nin duwen meirong ehu me pwohmwahu ong Koht.

3 Kumwail dehr kin koasoia duwen tiahk samin me pid wia nsenen pwopwoud* oh soangen samin koaros de noahrok koaros, pwehki mepwukat sohte konehng aramas sarawi kan; 4 kumwail dehr pil kin wia tiahk kanamenek kan, de lokaia pweipwei de kamwan suwed⁠—​soahng kan me sohte konehng⁠—​ahpw kumwail en kalahngan ong Koht. 5 Pwe kumwail eseier oh uhdahn wehwehki met, me aramas me kin wia tiahk samin me pid wia nsenen pwopwoud* de me kin samin de me kin noahrok me iei ehu soangen pwongih dikedik, sohte pahn sohsohki Wehin Krais oh Koht.

6 Emen en dehr pitihkinkumwaildi lokaia mwahl akan, pwe engieng en Koht pahn lelohng irail kan me kin sapeik pwehki soahng pwukat. 7 Ihme kahrehda, kumwail dehr kin wia dahme re kin wia;* 8 pwe mahso kumwail mi nan rotorot, ahpw met kumwail mi nan marain pwehki amwail miniminiong Kauno. Kumwail pousehlahte weweid nin duwen seri en marain, 9 pwe wahn marain iei soangen mwahu koaros oh pwung oh mehlel. 10 Kumwail en kin pousehlahte raparapahki dahme Kauno kin ketin kupwurperenki; 11 oh uhdihsang iang wia wiewia soh katepe kan me wia kisehn rotorot; ahpw kasansalehda soangen wiewia dahkei mepwukat. 12 Pwe e kanamenek en pil koasoiahda soahng kan me re kin wia ni rir. 13 Eri, soahng koaros me kin sansalda* kin sansalkihda marain, pwe soahng koaros me kasansalda iei marain. 14 Ihme kahrehda nting sarawi kan mahsanih: “Pirida, kowe me memeir, oh pwourda sang rehn me melahr akan, oh Krais pahn kamarainihiukada.”

15 Eri kumwail pousehlahte tetehk kanahieng duwen amwail kin weweid pwe en dehr duwehte aramas pweipwei kan ahpw en duwehte aramas loalokong kan, 16 oh kumwail doadoahngki mwahu amwail ahnsou* pwe rahn akan me suwed. 17 Pwehki met, kumwail dehr kin pweipwei, ahpw kumwail pousehlahte wehwehkihla dahme Siohwa* ketin kupwurki. 18 Pil dehr sakaukihla wain me kin kahrehda tiahk suwed, ahpw pousehlahte audaudkihda sapwellimen Koht manaman.* 19 Koulkihong emenemen* melkahka kan, kapingpen Koht oh koul sarawi kan, oh kouliong Siohwa* iangahki ngilen keseng nan amwail mohngiong, 20 oh ahnsou koaros kalahnganki mehkoaros ong Samatail Koht ni mwaren atail Kaun Sises Krais.

21 Uhpahiong emenemen ni lemmwin Krais. 22 Lih pwopwoud kan en kin uhpahiong arail pwoud kan duwehte arail kin uhpahiong Kauno, 23 pwehki ohl pwopwoud iei moangen eh pwoud duwehte Krais eh tapwin mwomwohdiso oh wia sounkomour en paliwar wet. 24 Ni mehlel, duwehte mwomwohdiso eh kin uhpahiong Krais, lih pwopwoud kan pil anahne uhpahiong arail pwoud kan ni mehkoaros. 25 Ohl pwopwoud kan, kumwail pousehlahte poakohng amwail pwoud kan duwehte Krais eh kin ketin poakohng mwomwohdiso oh ketin tounmeteikihla pein ih ong mwomwohdiso, 26 pwe en ketin kasarawihla mwomwohdiso ni eh ketin kamwakelehkihda pihl, me iei mahseno, 27 pwe mwomwohdiso me pato mwowe en lingan, sohte kisin mwahi de emwirek kis de pil mehkot duwehte mepwukat, ahpw sarawi oh sohte sapwung kis.

28 Pil ni mwohmwohte, ohl pwopwoud kan uhdahn pahn kin poakohng arail pwoud kan duwehte ar kin poakohng pein paliwararail kan. Ohl me kin poakohng eh pwoud kin poakohng pein ih, 29 pwe sohte ohl emen me kin kailongki pein paliwere,* ahpw e kin kamwenge oh kin kanai, duwehte Krais eh kin ketin wiahiong mwomwohdiso, 30 pwehki kitail kisehn paliwere. 31 “Ong ni kahrepe wet me ohl emen pahn mweikihsang seme oh ine oh e pahn patehng* eh pwoud oh ira pahn wiahla warteieu.” 32 Rir sarawi wet me kesempwal. Met I koasoakoasoia duwen Krais oh mwomwohdiso. 33 Ahpw, emenemen kumwail uhdahn pahn kin poakohng eh pwoud lih duwehte eh kin poakohng pein ih, oh ni pali teio, lih pwopwoud men uhdahn pahn kin wauneki laud eh pwoud.

6 Seri kan, kumwail peikiong amwail pahpa nohno kan ni ahl me Kauno ketin kupwurki, pwe met me pwung. 2 “Kahkahki semomw oh inomw” iei tepin kehkehlik me inou ehu iang: 3 “Pwe kumwail en pweida mwahu oh mour werei nin sampah.” 4 Oh pahpa kan, kumwail dehr kamwakara mwahl noumwail seri kan, ahpw kumwail pousehlahte kakairirailda ni kaiahn oh kaweid en Siohwa.*

5 Ladu kan, kumwail peikiong amwail soumas en sampah* kan ni masak oh rerrer nan amwail mohngiong mehlel, duwehte amwail kin peikiong Krais, 6 kaidehkte ahnsou me meteikan kin kilikilang pwe kumwail en kaperenda aramas, ahpw nin duwen sapwellimen Krais ladu kei me kin wia kupwuren Koht ni mour* unsek. 7 Kumwail perenki papah amwail soumas kan, duwehte amwail kin papah Siohwa* a kaidehn aramas akan, 8 pwe kumwail ese me emenemen kumwail pahn ale ketingpe sang rehn Siohwa* ong soahng mwahu koaros me e kin wia, mehnda ma ih ladu men de aramas saledek men. 9 Pil kumwail soumas akan, kumwail pousehlahte wiahiong irail soahngohte, ahpw dehr kamasak irail, pwe kumwail ese me arail Soumas oh pil amwail kin ketiket nanleng, oh e sohte kin ketin lipilipilki aramas.

10 Eri, kumwail pousehlahte ale kehl sang rehn Kauno pwehki sapwellime roson me lapalap. 11 Pwuhriong tehtehn mahwen koaros sang rehn Koht pwe kumwail en kak pelianda kehlail widing kan en Tepil; 12 pwehki kaidehn nta oh uduk me kitail kin peiong,* ahpw ong koperment kan, ong irail kan me ahneki manaman, ong kaun akan en sampah rotorot wet, ong ngehn suwed kan en nanleng. 13 Ong ni kahrepe wet, kumwail pwuhriong tehtehn mahwen koaros sang rehn Koht, pwe kumwail en kak pelian ni rahn suwedo eh pahn leledo, oh kesihnenda teng mwurin amwail kapwaiada mehkoaros.

14 Eri kumwail kesihnenda teng, katengehki lukepamwail kan kateng en me mehlel, oh perehki mwaremwaramwail kan perehpen pwung, 15 oh pwuhriong nan suht pwe kumwail en onopadahng lohki rongamwahu en popohl. 16 Ahnsou koaros, kumwail wahda mehn sansar laud en pwoson, pwe kumwail en kak kakunkihla nein me suwedo arep kisiniei kan koaros. 17 Kumwail pil alehda lisoarop en komour oh kedlahs en sapwellimen Koht manaman,* me iei mahsen en Koht, 18 oh kumwail pousehlahte kapakapki manamano* ahnsou koaros ni amwail kin doadoahngki wiepen kapakap koaros oh kapakap ni ngidingid. Ong ni kahrepe wet, kumwail en ahnsou koaros pepehd oh kapakapki ni ngidingid aramas sarawi kan koaros. 19 Kumwail pil kapakapkin ie, pwe mahsen kan en kak pwildohng ie ni ei kin kihpeseng eweiet, pwe I en kak eimah koasoi ni ei kin kasalehda rir sarawi en rongamwahwo, 20 me I wia meninkederpe ni ei wie sensel, pwe I en koasoia met ni eimah nin duwen me konehng.

21 Eri pwe kumwail en pil ese duwen ngehi oh ia irei, Dikikus, emen riatail kompoak oh sounpapah lelepek en Kauno pahn padahkihong kumwail mehkoaros. 22 Kahrepen ei kadarewei ih rehmwail, iei pwe kumwail en ese ia irat oh pwe en kansenamwahwihala amwail mohngiong kan.

23 Riatail kan en ahneki popohl oh limpoak iangahki pwoson sang rehn Samatail Koht oh Kaun Sises Krais. 24 Kadek sapan en kin ieiang irail koaros me kin ahneki limpoak poatopoat ong atail Kaun Sises Krais.