KISINLIKOU ONG MEHN PILIPAI

1 Pohl oh Timoty, sapwellimen Krais Sises ladu kan, ong aramas sarawi kan koaros nan Pilipai me kin miniminiong Krais Sises, iangahki sounapwalih kan oh sounsawas akan:

2 Samatail Koht oh Kaun Sises Krais en ketikihong kumwail kadek sapan oh popohl.

3 Ahnsou koaros I kin kalahngankihong Koht ni ei kin tamankumwailda 4 ehuehu ahnsou me I kin kapakapkin kumwail koaros ni ngidingid. I kin wia ehuehu kapakap ngidingid ni peren, 5 pwehki sawas me kumwail kin kihda ong* rongamwahwo sang ni keieun rahn leledo ahnsou wet. 6 Pwe I kamehlele mewet, me ih me ketin tapihadahr doadoahk mwahu rehmwail pahn ketin kanekehla doadoahko lao lel ni rahnen Krais Sises. 7 Eri e uhdahn konehng I en medemedewe kumwail koaros ni ahl wet, pwe kumwail kin mi nan ei mohngiong, kumwail me kin sewese ie ni ei wie sensel oh pil ni ei kin uhki oh alehdi pwuhng en kalohki rongamwahu sang rehn irail kan me ahneki manaman. Ni ahl wet, ngehi oh kumwail me paiekihda sapwellimen Koht kadek sapan.

8 Pwe Koht iei ei sounkadehde duwen ei kin loaleidkin kumwail koaros ni soangen limpoak me Krais Sises sapwellimanki. 9 Oh iet me I kin pousehlahte kapakapkien, amwail limpoak en kin lalaudla iangahki loalokong pwung oh wehwehkihla mwahu; 10 oh kumwail en pilada dahme keieu kesempwal, pwe kumwail en mwakelekel oh sohte kin kadipekelekele meteikan lao lel ni rahnen Krais; 11 oh kumwail en direkihla wahn me pwung me kin kohsang rehn Sises Krais ong ni sapwellimen Koht lingan oh kaping.

12 Eri riei ko, I men kumwail en ese me dahme wiawihong ie imwikihla pweidahn rongamwahwo, 13 pwe silepen nanmwarkien Rom koaros oh pil meteikan koaros rongehr me I wie sensel pwehki Krais. 14 Oh ei kin mi nan imweteng kahrehiong pali laud en riatail kan me kin papah Kauno en kehlailda, oh re kin kasalehda arail eimahiong kalohki mahsen en Koht ni soh masak.

15 Mehlel me ekei kin kalohki duwen Krais sang ni arail peirin oh men siai, ahpw ekei sang ni kahrepe mwahu. 16 Mehn mwuri ko kin lohki Krais sang ni limpoak, pwe re ese me I idihdidahr en uhki rongamwahwo; 17 ahpw mehn mwowe ko kin wia met sang ni akamai, kaidehn sang ni kahrepe mwakelekel, pwe re medemedewe me re pahn kahpwalihiehla ni ei wie sensel. 18 Eri ia imwila? Ihte pwe Krais en lohkseli ni soangen wiepe koaros, mehnda ma ni liksansalmwahu de ni mehlel, oh I kin perenkihda met. Ni mehlel, I pil pahn wie pereperen, 19 pwe I ese me met pahn doareiehla pwehki amwail kapakap ni ngidingid oh sawas en sapwellimen Koht manaman* me Sises Krais kin ketikihda. 20 Met kin pwungiong ei kin kasikasik oh koapworopworki me I sohte pahn namenengkihla mehkot, ahpw sang ni saledek en koasoi koaros, I* pahn kapinga Krais ahnsou wet duwehte me I kin wia mahso, mehnda ma I mour de mehla.

21 A ong ie, ma I mour, I momourki Krais oh ma I mehla, e wia kamwahupei. 22 Eri ma I pahn momour ni paliwar wet, met iei wahn ei doadoahk; ahpw dahme I pahn pilada, I sohte kasalehda. 23 Pwe I sehsehla mehnia rehn me riau pwukat me I pahn pilada, pwe I men saledekla oh patopato rehn Krais, ni mehlel ih me keieu mwahu. 24 Ahpw, I anahne mihmi nan paliwar wet pwehki kumwail. 25 Eri pwehki ei kamehlele met, I ese me I pahn momour oh mihmihte rehmwail koaros pwe kumwail en kak kekeirda oh peren ni pwoson, 26 pwe ni ei pahn pwurowei rehmwail, amwail peren pahn laudla pwe kumwail tohnpadahk en Krais Sises.

27 Kumwail momourkihte mour me konehng rongamwahu duwen Krais, pwe mehnda ma I kohwei oh tuhwong kumwail de soh, I ahpw pahn rong oh ese me kumwail kin kesikesihnen teng ni madamadau tehieu,* ni mohngiong tehieu,* oh doadoahkpene pwe kumwail en kolokolte amwail pwoson rongamwahwo, 28 oh kumwail pil sohte kin masak irail me kin pelian kumwail. Met iei kadehdepen kasohrala ong irail, ahpw komour ong kumwail; oh met kohsang rehn Koht. 29 Pwe kumwail sohte kin alehte kapai en pwoson Krais, ahpw pil kapai en lokolongki ih. 30 Pwe kumwail pil kin iang wia soangen peiohte me kumwail kin kilang I wia, oh kumwail rong me I kin wiewiahte.

2 Eri ma kumwail kin miniminiong Krais oh kin kangoange oh kaloalamwahwih meteikan sang ni amwail kin limpoak ong irail oh pil nsenohkin irail, poakohng irail, oh poakeirailla, 2 kumwail kaunsekala ei peren sang ni amwail kin ahneki madamadauteieu, limpoakteieu, oh miniminpene ni unsek oh ehukihpene lamalamteieu. 3 Kumwail dehr wia mehkot sang ni akamai de aklapalap, ahpw ni aktikitik,* kumwail wiahki meteikan lapalapasang kumwail 4 ni amwail kin raparapahki kamwahupen meteikan, a kaidehn amwail kante.

5 Kumwail kolokol elen madamadau wet me pil kin mi rehn Krais Sises. 6 Mendahki e ieias ni mwomwen Koht, e sohte ketin medewehda en alehdi dehu me Koht ketin sapwellimanki, me iei, en pahrekiong Koht. 7 Soh, pwe e ketin pwilikihdi mehkoaros me e sapwellimanki oh duwehla ladu men oh ketin wiahla aramas. 8 Patehng met, ni eh ketido nin duwen aramas emen,* e ketin aktikitikla oh ketin peik lao e pwoula, ei, pwoula nin tuhkehn kalokoloko.* 9 Ong ni kahrepe wet, Koht ketin kasapwiladahng ih nan dehu lapalap ehu oh ni kadek ketikihong ih mwar ehu me lapalapasang mwar teikan koaros, 10 pwe koaros me mi nanleng oh nin sampah oh pahn pwehl en kelepwikihdi ni mwaren Sises, 11 oh koaros en sakarkihda ni sansal me Sises Krais iei Kaun ong kalinganpen Samatail Koht.

12 Eri, kompoakepahi ko, duwehte amwail kin peik ahnsou koaros, kaidehnte ni ei kin mi rehmwail ahpw kumwail uhdahn pahn peik ahnsou wet ni ei sohte mihmi rehmwail, kumwail nantihlahte kaunsekala komourpamwail ni masak oh rerrer. 13 Pwe Koht kin ketin doadoahk ni ahl me kin kaperenda ih ni eh ketin kakehlakahda amwail ineng en wia soahng koaros me e ketin kupwurki. 14 Kumwail pousehlahte wia soahng koaros ni soh kaulim oh akamai, 15 pwe kumwail en mwakelekel oh sohte karaunpamwail oh wia sapwellimen Koht seri me sohte sapwung kis nanpwungen dih ehu me suwed oh dipan. Kumwail kin wie lingaling nanpwungarail duwehte marain nin sampah, 16 ni amwail kin kolokol teng mahsen en mour. Eri, e pahn mie kahrepen ei pereperen ni rahn en Krais, pwehki ei ese me I sohte kin tangatang mwahl de doadoahk laud ni soh katepe. 17 Ahpw mehnda ma I mweidala pein ngehi en duwehte meirong en wain me kin wudekdiong pohn meirong en doadoahk sarawi* me amwail pwoson kin kahrehiong kumwail en wia, I pahn perenda oh I pahn iang kumwail koaros pereperen. 18 Ni soangen ahlohte, kumwail pil perenda oh iang ie pereperen.

19 Eri, ma iei kupwuren Kaun Sises, I koapworopworki me I pahn kadarewei Timoty ni ahnsou keren, pwe I en ale kangoang ni ei pahn rong rongamwail. 20 Pwe sohte emen me mi rehi me duwehte ih me uhdahn pahn nsenohkin kumwail. 21 Pwe meteikan koaros kin rapahki pein kamwahuparail, ahpw kaidehn kamwahupen Sises Krais. 22 Ahpw kumwail eseier duwen mehn kadehde me e kasalehdahr duwen ih, pwe duwehte seri men me kin iang eh pahpa, e kin iang ie papah pwe rongamwahu en kekeirda. 23 Eri, iei ih me I koapworopworki en kadarewei mwurinte ei pahn esehda dahme pahn pweida rehi. 24 Ni mehlel, ma iei kupwuren Kauno, I kamehlele me pein ngehi pil pahn kohwei ni ahnsou keren.

25 Ahpw ong ahnsou wet, I medemedewe me I anahne kadarewei Epaprodaitus, riei oh iengei tohndoadoahk oh iengei sounpei, oh wiliapamwail oh sounpapah men ong ei anahn, 26 pwehki e uhdahn men kilang kumwail koaros oh e uhdahn nsensuwedkihla amwail rong me e soumwahuda. 27 Mehlel, e uhdahn soumwahuda oh kereniong mehla; ahpw Koht me ketin kadek kalahngan ong ih, ni mehlel, kaidehn ihete, ahpw pil ong ngehi, pwe I en dehr nohn nsensuwedla. 28 Eri, I uhdahn pahn mwadangete kadarewei ih, pwe ni amwail pahn kilang ih, kumwail en pwurehng perenda oh ei pwunod en pil tikitikla. 29 Eri, kumwail perenki kasamwo ih duwehte amwail kin wiahiong tohnpadahk en Kauno oh kesempwalki soangen aramas akan me duwehte ih, 30 pwehki e kereniong mehkihla doadoahk en Krais* oh mweidala eh mour* en mihla nan keper pwe en papah ie ni amwail sohte mi wasaht.

3 Eri, riei ko, kumwail pousehlahte pereperenki Kauno. E sohte apwal ong ie en ntingkiwohng kumwail soahng kohte, oh met wia perepamwail.

2 Kumwail kanahieng kidi kan; kanahieng irail kan me kin wia soahng suwed kan; kanahieng irail kan me kin leke paliwar. 3 Pwe kitail iei irail kan me wia sirkumsais mehlelo, kitail me kin papah sang ni sapwellimen Koht manaman* oh kin suweiki Krais Sises oh pil sohte kin koapworopworki mehkan me pid aramas, 4 ahpw ma mie emen, ngehi me pahn ahneki kahrepen koapworopworki mehkan me pid aramas.

Ma emen kin medemedewe me mie kahrepen eh pahn koapworopworki mehkan me pid aramas, I ahneki kahrepe me laudsang: 5 I sirkumsaisla ni kawaluhn rahn, ngehi mehn Israel, kisehn keinek en Pensamin, mehn Ipru ipwisang mehn Ipru; nin duwen kosonned, Parisi men;* 6 me pid ngoang, I kin kaloke mwomwohdiso; me pid pwung me poahsoankihda kosonned, I kadehdehda me sohte karaunpei. 7 Ahpw met soahng kan me I kin kesempwalki mahs, I mwamwahlkilahr* pwehki Krais. 8 Laudsang met, I uhdahn mwamwahlkilahr mehkoaros pwehki loalokong me uhdahn sikla mehlel duwen Krais Sises ei Kaun. Pwehki ih, I keselahr soahng koaros oh wiakihla mehn lekdekla kei,* pwe I en alehda Krais 9 oh en sansalda ei kin miniminiong ih, kaidehn pwehki pein ei pwung sang ni ei kin idawehn Kosonnedo, ahpw pwehki pwung me kohsang pwoson Krais, pwung me sang rehn Koht me poahsoankihda pwoson. 10 Ei mehn akadei iei en esehla ih oh manaman en sapwellime iasada oh iang ih nan sapwellime lokolok kan, oh mweidala pein ngehi ong mehla me duwehte sapwellime, 11 pwe I en kilang ma I kak alehdi kaiasada keieu sang rehn me melahr akan.

12 Kaidehn pwe I alehdier met de I unseklahr, ahpw I nannantihong pwe I en kilang ma I pil kak alehdi dahme Krais ketin piliehda* pwe I en ale. 13 Riei ko, I saikinte wiahki me pein ngehi alehdier met; ahpw mehteieu me mehlel: Manokehla soahng kan me mi mwuri oh nantihong lellahng soahng kan me mi mwowe, 14 I kin nannantihong lel mehn akadei, me iei en ale kisakis en malipilip ong nanleng me Koht ketikihda pwehki Krais Sises. 15 Eri kitail me koahieklahr en ahneki elen madamadau wet, oh ma kumwail ahneki ehu soangen madamadau me tohrohrasang met, Koht pahn ketin kasalehiong kumwail elen madamadau wet. 16 Ahpw, nin duwen atail kekeirdahr, kitail en pousehlahte kekeid ni pwung ni soangen ahl wet.

17 Riei ko, kumwail ehupene kahlemengih ie oh tetehk irail kan me kin kekeid ni ahl ehu me kin pahrekiong mehn kahlemeng me se wiadahr ong kumwail. 18 Pwe mie aramas tohto me I kin kalapw koasoia mahs, ahpw ahnsou wet I pil kin koasoia irail ni ei sengiseng, pwehki re kin kekeid nin duwen imwintihti kei en tuhkehn kalokolok* en Krais. 19 Imwilahn irail iei kasohrala, oh arail koht iei kapehdirail, oh arail lingan iei kanamenekparail, oh re kin medemedewehte mehkan en sampah. 20 Ahpw kitail wia towe mehlel en nanleng, oh kitail kin uhdahn kasikasik sounkomour men sang wasao, iei Kaun Sises Krais, 21 me pahn ketin doadoahngki manaman laud me e ketin alehdier pwe en ketin kaunda mehkoaros oh wekidala paliwaratail me luwet en duwehla kahlepe me lingan.

4 Eri, riei ko me I kin poakohng oh men kilang, kumwail iei ei peren oh nihn ehu ong ie. Kompoakepahi ko, kumwail kesikesihnen teng ni ahl wet rehn Kauno.

2 I kangoange Iuodia oh Sindiki ira en ahneki madamadauteieu rehn Kauno. 3 Ei, I pil peki rehmw, nin duwen iengei tohndoadoahk mehlel,* ken pousehlahte sewese lih pwukat me kin iang ie doadoahk laud ong rongamwahwo, iangahki Klement oh pil iengei tohndoadoahk teikan me adarail ntinting nan pwuhken mour.

4 Kumwail en pereperenki Kauno ahnsou koaros. I pahn pil pwurehng nda, Kumwail pereperen! 5 Aramas koaros en ese amwail madamadau toupahrek. Kauno me keren. 6 Kumwail dehr kin pwunodki mehkot, ahpw ni mehkoaros, kumwail en peki rehn Koht sawas ni kapakap oh kapakap ni ngidingid iangahki kalahngan; 7 oh sapwellimen Koht popohl me inenen siksang madamadau en aramas koaros pahn pere amwail mohngiong oh amwail kehl en madamadau* pwehki Krais Sises.

8 Eri riei ko, sohte lipilipil soahng kan me mehlel, soahng kan me kesempwal, soahng kan me pwung, soahng kan me mwakelekel,* soahng kan me kahrehda limpoak, soahng kan me wahu, soahng kan me mwahu, oh soahng kan me warohng kaping, kumwail pousehlahte medemedewe* mepwukat. 9 Soahng kan me kumwail sukuhlkier oh pil kamehlelehier oh rongehr oh kilangehr me pid duwen ngehi, kumwail kin wia soahng pwukat oh Koht en popohl pahn ketiket rehmwail.

10 Pwehki Kauno, I perenkihda laud amwail pwurehng tepida medemedewe ie ahnsou wet. Mendahki amwail kin medewe ie, sohte amwail ahnsou mwahu en kasalehda met. 11 I sohte ndinda met pwehki I anahne mehkot, pwe I eselahr itarki dahme I ahneki sohte lipilipil soangen irair dah me I mi loale. 12 I eselahr ia duwen ei pahn momourki soahng me malaulau oh ia duwen ei pahn momourki soahng me tohto. Ni mehkoaros oh ni irair koaros, I eselahr ire rir ong duwen ei pahn medla oh duhpekla, oh pil duwen ei pahn ahneki soahng tohto oh sohte ahneki mehkot. 13 I kakohng mehkoaros pwehki I ahneki kehl sang rehn me ketikihong ie manaman.

14 Ahpw, e mwahu amwail iang ie nan ei kahpwal. 15 Ni mehlel, kumwail mehn Pilipai kan pil ese me mwurin amwail tepin sukuhlki rongamwahwo oh ni ei mweselsang Masedonia, sohte mwomwohdiso ehu me kin iang ie me pid duwen kihwei oh ale, ahpw kumwailte; 16 pwe nindoken ei mihmi Deselonika, kumwail kadarodohng ie mehkot me I anahne, kaidehn pak ehute ahpw pak riau. 17 Kaidehn pwe I raparapahki kisakis ehu, ahpw I men kilang wah me kin wahdo kamwahupamwail. 18 Ahpw, soahng koaros me I anahne mie oh pil laudsang me I anahne. I sohte anahne mehkot pwe ahnsou wet I alehsang Epaprodaitus dahme kumwail kadarodo, meirong ehu me pwohtik pwohmwahu oh kin kaperenda Koht. 19 Ei Koht pahn uhd ketikihong kumwail soahng koaros me kumwail anahne nin duwen sapwellime kapai lingaling pwehki Krais Sises. 20 Eri, lingan en kohwong Samatail Koht kohkohlahte. Amen.

21 Kihong ei rahnmwahu ong aramas sarawi kan koaros me kin miniminiong Krais Sises. Riatail kan me mi rehi pil kadarewei arail rahnmwahu. 22 Aramas sarawi kan koaros, ahpw mehlel irail me tohn imwen Sihsar kadarewei arail rahnmwahu.

23 Kadek sapan en Kaun Sises Krais en kin ieiang lamalam mwahu* me kumwail kin kasalehda.