KISINLIKOU ONG MEHN KOLOSE

1 Pohl, wahnpoaron en Krais Sises sang ni kupwuren Koht, oh riatail Timoty, 2 ong aramas sarawi kan oh riatail me lelepek kan me kin miniminiong Krais nan Kolose:

Samatail Koht en ketikihong kumwail kadek sapan oh popohl.

3 Ahnsou koaros se kin kalahngan ong Koht, Semen atail Kaun Sises Krais, ni at kin kapakapkin kumwail, 4 pwe se rongehr duwen amwail pwoson Krais Sises oh duwen amwail limpoak ong aramas sarawi kan koaros 5 pwehki koapworopwor me nekinek ong kumwail nanleng. Mahso, kumwail rongehr duwen koapworopwor wet sang ni rohng mehlel me iei rongamwahwo 6 me lelewohngehr kumwail. Duwehte rongamwahwo eh kin kapwarehda wah oh kin lalaudla nan sampah pwon, eri e pil kin wiawi rehmwail sang ni rahn me kumwail rong oh esehla ni pwung mehlelpen sapwellimen Koht kadek sapan. 7 Ihme kumwail sukuhlkier sang rehn Epapras, iengat ladu kompoak, sounpapah lelepek en Krais me wiliankitdi. 8 E pil koasoiaiong kiht duwen amwail limpoak me kekeirkihda sawaspen sapwellimen Koht manaman.*

9 Ihme kahrehda, sang ni rahn me se rong duwen met, se sohte uhdihsang at kin kapakapkin kumwail oh peki me kumwail en direkihla loalokong pwung duwen kupwuren Koht ni erpit koaros oh wehwe me kohsang sapwellime manaman, 10 pwe kumwail en weweid ni ahl me Siohwa* ketin kupwurki pwe kumwail en uhdahn kaperenda ih ni amwail kin pousehlahte kapwarehda wah nan doadoahk mwahu koaros oh kalaudehla loalokong pwung duwen Koht; 11 oh kumwail en kehlailkihda manaman koaros nin duwen sapwellime roson lingaling pwe kumwail en uhdahn dadaurete ni kanengamah oh peren, 12 ni amwail kalahngan ong Sahmo me ketin kahrehiong kumwail en kak iang ale sohso en aramas sarawi kan me mi nan marain.

13 E ketin kapitkitailsang manaman en rotorot oh ketin kasaukitaillahng nan wehin sapwellime Ohl kompoak, 14 me ketin kasaledengkitailla sang ni pweinen pweipwei sapahl, me iei mahkpen dipatail kan. 15 Ih me kasalepen Koht me soh sansal, mesenih en kepikipik kan koaros; 16 pwehki ih soahng teikan koaros me mi nanleng oh nin sampah kapikipikda, mehkan me sansal oh mehkan me soh sansal, mehnda ma mwoahl kan, kaun akan de koperment kan de irail kan me ahneki manaman. Soahng teikan koaros kapikipikda pwehki ih oh ong ih. 17 E pil ketiketier mwohn soahng teikan koaros, oh pwehki ih soahng teikan koaros kapikipikda, 18 oh ih me tapwin paliwar me iei mwomwohdiso. Ih me tapi oh mesenih me tepin iasada sang rehn me melahr akan, pwe en ketin wiahla me keieu ni mehkoaros; 19 pwehki Koht ketin kupwurperenki wiahiong mehkoaros en unsekla rehn meno, 20 oh pwehki ih Koht ketin pwurehng kupwuramwahwih soahng teikan koaros ni eh ketin wiahda popohl sang ni nta me Krais ketin kakerehdi ni tuhkehn kalokoloko,* mehnda ma mehkan en sampah de mehkan en nanleng.

21 Ni mehlel, mahso kumwail kin dohsang Koht oh wia imwintihti kei pwehki amwail lamalam oh wiewia kan me suwed, 22 ahpw ahnsou wet Koht ketin pwurehng kupwuramwahwih kumwail sang ni paliwar uduk en meno me pwoula, pwe ni ahl wet kumwail en sarawi oh sohte sapwung kis oh pil sohte karaunpamwail mwohn silangi⁠— 23 mehlel ma kumwail kin pousehlahte ni pwoson, kokouda teng pohn poahsoano oh kehlail, oh sohte tohrohrasang koapworopwor en rongamwahu me kumwail rongehr oh me lohkseli wasa koaros nin sampah. Ngehi Pohl wiahla sounpapah en rongamwahu wet.

24 Met I pereperenki ei kin lokolok pwehki kumwail, oh I kin lokolok duwehte Krais. Ahpw I anahnehte kaimwisekala lokoloko pwehki kahlepen Krais me iei mwomwohdiso. 25 I wiahla sounpapah en mwomwohdiso wet nin duwen pwukoa doadoahk me Koht ketikihong ie pwehki kumwail pwe I en kalohki ni unsek mahsen en Koht, 26 me iei rir sarawio me wie ekiek sang ni koasoandi en mwehin mahs* oh dih kan en mahs. Ahpw met e sansalohngehr sapwellime aramas sarawi kan, 27 me Koht ketin kupwurperenki kasalehiong irail nanpwungen wehi kan, kapai lingaling en rir sarawi wet, me iei Krais me kin ketin miniminiong kumwail, me iei koapworopwor en sapwellime lingan. 28 Iei ih me kitail kin lohki, oh panawiheki aramas koaros oh padahkihong aramas koaros ni erpit koaros, pwe kitail en patohwanohng mwohn silangin Koht aramas koaros nin duwen tohnpadahk koahiek kan en Krais. 29 Ong ni kahrepe wet, I kin doadoahk laud oh nannanti ni ei doadoahngki sapwellime kehl me kin doadoahk kehlail loalei.

2 Pwe I men kumwail en ese uwen doadoahk laud me I kin wia ong kumwail oh ong irail me mi Laodisia oh pil ong irail koaros me saikinte kilang ie.* 2 I kin wia met pwe arail mohngiong en nsenamwahula oh irail en patpene mwahu ni limpoak oh ahneki kapai koaros me kohsang arail uhdahn wehwehki mwahu me mehlelo, pwe irail en ale loalokong pwung duwen rir sarawi en Koht, me iei Krais. 3 Pai kesempwal koaros en erpit oh loalokong kin ekiekla mwahu reh. 4 I kin nda met pwe emen de pitihekin kumwail lokaiahn widing kan. 5 Mendahki ei sohte mi wasahn ni paliwar, I kin mi rehmwail ni madamadau,* oh kin perenki kilang amwail soandi mwahu oh tengeteng ni amwail pwoson Krais.

6 Eri, nin duwen amwail alehdahr Kaun Krais Sises, kumwail pousehlahte weweid ni amwail miniminiong ih, 7 oh poadidi teng oh kokouda reh oh kehlail ni pwoson nin duwen me kumwail sukuhlkier, oh kumwail kalahngan ong Koht ahnsou koaros.

8 Kumwail kanahieng pwe emen de lidipihekin kumwail* erpit en sampah oh widing mwahl nin duwen tiahk en aramas, nin duwen madamadau oh tiahk en sampah wet, ahpw kaidehn nin duwen padahk en Krais; 9 pwehki e ketin audaudkihda ni unsek sapwellimen Koht irair kan koaros. 10 Eri kumwail ahneki mehkoaros pwehki ih, me wia tapwin koperment koaros oh manaman en kaunda koaros. 11 Ni amwail miniminiong ih, kumwail pil sirkumsaislahr, kaidehk ni sirkumsais me aramas kin wia, ahpw ni amwail kapwuhrasang paliwar uduk. Ih duwen ladu en Krais kan ar kin sirkumsaisla. 12 Pwe kumwail iang ih seridi nan sapwellime papidais, oh ni amwail miniminiong ih, kumwail pil iang ih iasada ni amwail pwoson doadoahk manaman en Koht, me ketin kaiasada ih sang rehn me melahr akan.

13 Patehng met, mendahki amwail melahr nan amwail sapwung kan oh mi nan irair en sohte sirkumsaisla ni uduk, Koht ketin kamourkumwailda rehn Krais. Ni kadek, e ketin mahkikihong kitail atail sapwung kan koaros 14 oh ketin irisasang dahme ntingdi nan doaropwe me audaudki koasoandi kan oh me kin uhwong kitail. E ketikihsang met ni eh ketin pasurdiong ni tuhkehn kalokoloko.* 15 E ketin kakilisawihada koperment kan oh pil irail kan me ahneki manaman oh ketin kasalehda mwohn wehipokon me re lohdier, oh kahluwa irail nan kapar en powehdi pwehki tuhkehn kalokoloko.*

16 Eri, emen dehpa kadeingkin kumwail dahme kumwail kin kang oh nim de amwail kin wia kasarawi ehu de kasarawien maram pwul de sapad. 17 Soahng pwukat iei mwetehn soahng kan me pahn kohdo, ahpw me mehlelo iei Krais. 18 Dehr mweidohng emen me kin perenki mwomwehda aktikitik oh kin pwongih tohnleng kan,* en kihsang kumwail kisakiso. Soangen aramaso kin uhki* soahng kan me e kilangehr. E aklapalapala ni soh kahrepe konehng sang ni elen eh madamadau me duwehte aramas dipan, 19 oh e sohte kin tengediong tapwio, meno me kin ketikihong dahme paliwaro pwon kin anahne oh kin kahrehiong kisehn paliwaro pwon en kin patpene mwahu oh kekeirda nin duwen Koht eh ketin kahrehiong en kekeirda.

20 Ma kumwail iang Krais pwoulahr me pid madamadau oh tiahk en sampah wet, dahme kahrehda kumwail kin momour likamwete kumwail kisehn sampah sang ni amwail kin peikiong koasoandi pwukat: 21 “Dehr ale, dehr song, dehr sair,” 22 me dokedoke soahng kan me kin sohrala ni ar kin kadoadoahklahr, nin duwen kehkehlik kan oh padahk en aramas? 23 Mendahki mepwukat kin mwomwen erpit, ahpw e sohte kin sewese aramas en pelianda ineng en paliwararail. Met kin wiawi pwehki aramas kin pein pilada duwen arail pahn kaudokiong Koht, re kin mwomwehda aktikitik oh kin kaloke paliwararail.

3 Ahpw ma kumwail iangehr Krais iasada, kumwail pousehlahte rapahki soahng kan me mi powe, wasa me Krais ketidier ie ni palimaun en Koht. 2 Kumwail medemedewehte soahng kan me mi powe, kaidehn soahng kan me mi nin sampah. 3 Pwe kumwail melahr, oh amwail mour ekieklahr rehn Krais nin duwen kupwuren Koht. 4 Ni ahnsou me Krais me iei atail mour pahn ketin sansalda, kumwail pil pahn iang ih sansalda ni lingan.

5 Eri, kumwail kemehla ineng en kisehn paliwaramwail kan* me pid duwen tiahk samin me pid wia nsenen pwopwoud,* samin, ineng kehlail en wia nsenen pwopwoud, ineng suwed, oh noahrok me iei tiahk en pwongih dikedik. 6 Eri, pwehki soahng pwukat, engieng en Koht pahn leledo. 7 Ihme kumwail pil kin wia nan amwail mouren mahs. 8 Ahpw met kumwail anahne kihsang mepwukat koaros rehmwail: mwehl, lingeringer, wiewia suwed, lokaia kamedek oh lokaia suwed me kohsang nan awamwail. 9 Kumwail dehr likamw ong emenemen. Kumwail kapwuhrasang amwail mouren* mahs iangahki eh wiewia kan, 10 oh kumwail pwuhriong nan mour kapw me kin wiawihda kapw sang ni loalokong pwung pwe en kasalehda irair en Meno me ketin kapikada mour kapwo, 11 wasa me sohte wekpeseng nanpwungen mehn Krihs oh Suhs, sirkumsais de sohte sirkumsais, mehn liki, mehn Sidia,* lidu de saledek; ahpw Krais iei mehkoaros oh ketiket nan mehkoaros.

12 Nin duwen sapwellimen Koht me pilipildahr kan, me sarawi oh kompoak, kumwail pwuhriong nan limpoak me kin mwekidki poakehla, kadek, aktikitik,* mpahi oh kanengamah. 13 Kumwail pousehlahte kanengamahiong emenemen oh mahkpene douluhl mehnda ma mie kahrepen en kaulimih emen. Nin duwen Siohwa* eh kin ketin mahkohng kumwail, kumwail pil anahne wia duwehte. 14 Ahpw likin mepwukat koaros, kumwail pwuhriong nan limpoak pwe ih me kin kapatapene mehkoaros ni unsek.

15 Oh popohl en Krais en pil kaunda amwail mohngiong, pwe kumwail malipilip ong nan popohl wet ni paliwarteieu. Oh kumwail en kin kasalehda kalahngan. 16 Mahsen en Krais en kadireikumwailla ni soangen erpit koaros. Kumwail pousehlahte padahkih oh kangoangehki* emenemen melkahka kan, kapingpen Koht oh koul sarawi en kalahngan, oh kouliong Siohwa* nan amwail mohngiong. 17 Sohte lipilipil dahme kumwail kin wia ni lokaia de wiewia, kumwail wia mehkoaros ni mwaren Kaun Sises, oh kalahngan ong Samatail Koht pwehki ih.

18 Kumwail lih pwopwoud kan, kumwail uhpahiong amwail pwoud kan nin duwen me konehng mwohn silangin Kauno. 19 Kumwail ohl pwopwoud kan, kumwail pousehlahte poakohng amwail pwoud kan oh dehr kin lingeringer pahrail.* 20 Kumwail seri kan, kumwail peikiong amwail pahpa nohno kan ni mehkoaros, pwe met kin kaperenda Kauno. 21 Kumwail pahpa kan, kumwail dehr kamwakara mwahl noumwail seri kan, pwe irail en dehr nan kapehd toutoula.* 22 Kumwail ladu kan, kumwail peikiong amwail soumas en sampah* kan ni mehkoaros, kaidehkte ahnsou me re kin kilikilang pwe kumwail en kaperenda aramas, ahpw sang ni mohngiong mehlel, ni lemmwin Siohwa.* 23 Sohte lipilipil soahng dah me kumwail kin wia, kumwail wia sang ni mour* unsek, duwehte amwail kin wiahiong Siohwa,* a kaidehn aramas, 24 pwe kumwail ese me sang rehn Siohwa* kumwail pahn ale sohso nin duwen keting ehu. Kumwail liduwih Soumaso, Krais. 25 Emen me kin wiahda sapwung uhdahn pahn ale pweinen sapwung me e wiahda, pwe Koht sohte kin ketin lipilipilki aramas.

4 Kumwail soumas akan, amwail wiewia ong noumwail ladu kan en kin pwung oh pahrek, pwe kumwail ese me pil mie amwail Soumas me ketiket nanleng.

2 Kumwail poadidiong kapakap oh mwasamwasahn ni amwail kin wia met oh kalahngan ong Koht. 3 Ni ahnsowohte, kumwail pil kapakapkin kiht pwe Koht en ketin ritingada wenihmw ehu ong mahseno pwe sen kak lohkiseli rir sarawio duwen Krais, me I wie senselki, 4 oh I en lohkiseli ni sansal nin duwen me I anahne wia.

5 Kumwail pousehlahte weweid ni erpit rehn irail kan me kaidehn kisehn mwomwohdiso, oh doadoahngki mwahu amwail ahnsou.* 6 Ahnsou koaros amwail lokaia kan en kin kadek, doalki soahl, pwe kumwail en kin ese duwen amwail pahn sapeng emenemen aramas.

7 Dikikus, riei kompoakepahi oh sounpapah lelepek oh iengei ladu en Kauno, pahn ndaiong kumwail rohng koaros duwen ngehi. 8 I kadarewei ih rehmwail pwe kumwail en ese ia irat oh e pahn kansenamwahwihala amwail mohngiong kan. 9 E kohwei iangahki Onesimus, riei kompoakepahi lelepek, me kohdo sang rehmwail; ira pahn ndaiong kumwail soahng koaros me kin wiawi wasaht.

10 Aristarkus, iengei me selidi, kadarewei eh rahnmwahu oh pil Mark me Parnapas pahn rianiki (duwen ih, kumwail ale kaweid en kasamwo ih ma e kohwei rehmwail), 11 oh Sises me adaneki Sustus, emen irail me sirkumsaisla. Irail pwukatte me iengei tohndoadoahk ong Wehin Koht, oh irail wialahr utupen nsenamwahu laud* ong ie. 12 Epapras, ladu en Krais Sises me kohdo sang rehmwail, kadarewei eh rahnmwahu. Ahnsou koaros e kin nantihong kapakapkin kumwail, pwe kumwail en kesihnenda ni unsek oh uhdahn kamehlele kupwuren Koht koaros. 13 I kin kadehdehda me e kin doadoahk laud pwehki kumwail oh pwehki irail nan Laodisia oh nan Ierapolis.

14 Luk, kompoakepatail toahkte, kadarewei eh rahnmwahu, oh pil Demas. 15 Kihong ei rahnmwahu ong riatail kan nan Laodisia oh ong Nimpa oh mwomwohdiso me kin tuhpene nan imweo. 16 Oh ni ahnsou me kisinlikou wet wadawadier rehmwail, kumwail koasoanehdi pwe kisinlikou kiset en pil wadawad nan mwomwohdisohn Laodisia oh kumwail pil wadek kisinlikou me I kadarala Laodisiao. 17 Pil ndaiong Arkipus: “Tehk mwahu doadoahk me ke alehdi nin duwen tohnpadahk en Kauno pwe ken kapwaiada.”

18 Eri, ngehi Pohl, ni pein mengin pehiet, I kadarewei ei rahnmwahu. Kumwail tamatamante me I wie sensel. Kadek sapan en kin ieiang kumwail.