KEIEUN KISINLIKOU ONG MEHN DESELONIKA

1 Pohl, Silpanus,* oh Timoty ong mwomwohdisohn Deselonika me kin miniminiong Samatail Koht oh Kaun Sises Krais:

Kadek sapan oh popohl en kin ieiang kumwail.

2 Ahnsou koaros se kin kalahngankihong Koht ni at kin tamankumwailda koaros nan at kapakap kan, 3 pwe se kin tamatamante mwohn silangin Samatail Koht duwen amwail doadoahk pwehki amwail pwoson, amwail nannanti pwehki amwail limpoak, oh amwail dadaur pahn kahpwal pwehki amwail koapworopworki atail Kaun Sises Krais. 4 Pwe se ese me Koht ketin pilkumwailda riat ko, me e ketin poakohng, 5 pwehki rongamwahu me se kalohki sohte lelohng kumwail ni lokaiahte, ahpw ni kehl, oh ni sapwellimen Koht manaman,* oh ni at kamehlele unsek, nin duwen amwail ese soangen aramas dah kei me se wiahla nanpwungamwail ong ni kamwahupamwail. 6 Oh kumwail kin kahlemengih kiht oh Kauno pwehki amwail kamehlelehla mahseno ni peren me kohsang sapwellimen Koht manaman* mendahki kahpwal laud, 7 kahrehda kumwail wiahlahr mehn kahlemeng ehu ong me pwoson akan koaros nan Masedonia oh Akaia.

8 Pwe ni mehlel, pwehki kumwail, aramas koaros nan Masedonia oh Akaia rongada mahsen en Siohwa,* oh amwail pwoson Koht lelpeseng wasa koaros, kahrehda se sohte anahne koasoia mehkot. 9 Pwe pein irail kin koasoakoasoia duwen at tepin tuhwong kumwail oh duwen amwail sohpeisang noumwail dikedik kan oh sohpeiong Koht pwe kumwail en wiahla ladu en Koht ieias oh mehlel, 10 oh awiawih sapwellime Ohl sang nanleng, me e ketin kaiasada sang rehn me melahr akan, me iei Sises, me ketin kapitkitailsang engieng en Koht me kohkohdo.

2 Riat ko, pein kumwail uhdahn ese me at mwemweitwei rehmwail pweida mwahu. 2 Pwe mendahki nin tapio se ale lokolok oh wiakaula nan Pilipai nin duwen amwail ese, Koht ketikihong kiht eimah pwe sen padahkihong kumwail rongamwahu en Koht ni at lelohng uhwong laud.* 3 Pwe kaweid me se kin kihda sohte kin kohsang likamw de samin de widing, 4 ahpw nin duwen Koht eh kupwurki ketikihong kiht rongamwahwo, eri se kin koasoi kaidehn pwe sen kaperenda aramas, ahpw Koht, me kin ketin kasawih at mohngiong.

5 Ni mehlel, kumwail ese me se sohte mwahn kin pitihekin kumwail koasoi mwahu de mwomwehda aramas mwahu pwehki noahrok; Koht me sounkadehde! 6 Se sohte pil kin raparapahki kaping sang rehn aramas, mehnda ma sang rehmwail de sang meteikan, mendahki se kak wia katoutou pweilaud ehu nin duwen wahnpoaron en Krais kan. 7 Ahpw, se kin kadek ni at mi rehmwail, duwehte nohno men eh kin kadihdi oh apwalih mwahu* pein nah seri kan. 8 Pwehki at uhdahn poakohng kumwail, se koasoanehdi teng* en kihong kumwail, kaidehn ihte rongamwahu en Koht, ahpw pil pein kiht,* pwehki kumwail wialahr kompoakepaht.

9 Riat ko, kumwail uhdahn tamataman at doadoahk laud oh nannanti. Se kin doadoahk ni rahn oh ni pwong, pwe sen dehr kihong kumwail katoutou pweilaud ehu ni at kin kalohkihong kumwail rongamwahu en Koht. 10 Kumwail me sounkadehde kei, oh pil Koht, duwen at kin loalopwoat oh pwung oh sohte karaunpat nan at wiewia ong kumwail me pwoson akan. 11 Kumwail uhdahn ese me se kin pousehlahte kangoange oh kaloalamwahwih kumwail oh kadehdehiong emenemen kumwail, duwehte sahm men eh kin wiahiong nah seri kan, 12 pwe kumwail en pousehlahte weweid ni ahl me Koht ketin kupwurki, me ketin malipeikumwaildohng nan sapwellime Wehi oh lingan.

13 Ni mehlel, ihme kahrehda se pil sohte kin uhdihsang at kalahngan ong Koht, pwehki ni amwail aleier mahsen en Koht me kumwail rongasang kiht, kumwail kamehlelehla met, kaidehn nin duwen koasoi en aramas, ahpw nin duwen mahsen en Koht me iei me mehlel, oh e pil kin doadoahk loalamwail me pwoson akan. 14 Pwe riat ko, kumwail kin kahlemengih karasepen mwomwohdiso kan en Koht me kin miniminiong Krais me mi nan Sudia, pwehki kumwail ale kalokolok sang rehn tohn amwail wehi, duwehte soangen kalokolok me irail kin ale sang rehn mehn Suhs akan, 15 me kemelahr Kaun Sises oh soukohp ako oh kin kalokei kiht. Patehng met, re sohte kin kaperenda Koht, ahpw re kin uhwong kamwahupen aramas koaros, 16 ni arail kin song en irehdi at pahn koasoiong mehn liki kan pwe ren komourla. Ni ahl wet, re kin kadirehla diparail kan ahnsou koaros. Ahpw sapwellime engieng pahn kereniong leledohng irail.

17 Ahpw riat ko, ni ahnsou me se tohrohrasang kumwail ongete ahnsou kis (ni paliwar, kaidehn ni mohngiong), pwehki at inengieng laud, se wia uwen at kak koaros pwe sen tuhwong kumwail.* 18 Ong ni kahrepe wet me se men kohwei rehmwail, ei, pein ngehi Pohl song en kohwei kaidehn pak ehute, ahpw pak riau; ahpw Sehdan perehla at ahlo. 19 Pwe ia at koapworopwor de peren de nihn en peren laud mwohn silangin atail Kaun Sises ni eh ketier? Kaidehn kumwail? 20 Kumwail me uhdahn at lingan oh peren.

3 Eri ni at solahr kak kanengamahiong at men tuhwong kumwail, se lemeleme me keieu mwahu sen kelehpw mi nan Adens; 2 oh se kadarewei Timoty, riatail oh sounpapah en Koht* ong rongamwahu duwen Krais, pwe en katengeikumwaildi* oh kansenamwahwihala kumwail pwe en wia kamwahupen amwail pwoson, 3 pwe emen en dehr luwetkihla* kahpwal pwukat. Pwe pein kumwail ese me kitail sohte kak pitsang soangen lokolok pwukat. 4 Pwe ni ahnsou me se kin mihmi rehmwail, se kin ndaiong kumwail mwowe me kitail pahn lokolongki kahpwal, oh ih me wiawi nin duwen amwail eseier. 5 Ihme kahrehda, ni ei solahr kak kanengamahiong ei men tuhwong kumwail, I ilekwei pwe I en esehda iren amwail lelepek, ma Sounkasongosongo sou kasongosongeikumwailehr, oh ma at doadoahk laud sou solahr katepe.

6 Ahpw met Timoty pwurodohr reht sang rehmwail oh wadohng kiht rohng mwahu duwen amwail lelepek oh limpoak, me ahnsou koaros kumwail kin perenda ni amwail kin tamankitada oh kumwail uhdahn men tuhwong kiht duwehte at pil men tuhwong kumwail. 7 Ihme kahrehda riat ko, ni at semwehmwe oh mi nan kahpwal koaros, se nsenamwahula pwehki kumwail oh amwail lelepek me kumwail kin kasalehda. 8 Pwe se pwurehngehr kehlailda* ma kumwail kin kesikesihnen teng rehn Kauno. 9 Pwe ia duwen at kak kasalehiong Koht at kasapahlkalahngan me pid kumwail ong ni peren laud me se ahneki mwohn silangin Koht pwehki kumwail? 10 Ni rahn oh nipwong, se kin kapakap ni ngidingid ni uwen at kak pwe sen tuhwong kumwail* oh kihong kumwail dahme anahn ong amwail pwoson.

11 Eri, pein Samatail Koht oh atail Kaun Sises en ketikihda ahl ehu ong kiht pwe sen kohwei rehmwail. 12 Oh Kauno en pil ketin wiahiong kumwail en kalaudehla, ei, direkihla limpoak ong emenemen oh pil ong koaros duwehte me se kin wiahiong kumwail, 13 pwe en ketin kahrehiong amwail mohngiong en tengeteng, sohte karaunepen amwail sarawihla mwohn silangin Samatail Koht, ni atail Kaun Sises eh pahn ketier iangahki sapwellime aramas sarawi kan koaros.

4 Eri, riat ko, duwehte amwail aleier kaweid sang reht duwen amwail pahn weweid pwe en kaperenda Koht, ni mehlel kumwail kin wiewia met, eri se peki oh kangoangei kumwail ni mwaren Kaun Sises kumwail en wonlahte kalaudehla amwail kin wiewia met. 2 Pwe kumwail ese kaweid kan* me se kihong kumwail sang ni manaman en Kaun Sises.

3 Pwe iet kupwuren Koht, kumwail en sarawihla oh liksang tiahk samin me pid wia nsenen pwopwoud.* 4 Emenemen kumwail anahne ese ia duwen eh pahn kaunda pein paliwere* ni sarawi oh wahu, 5 ahpw kaidehn ni ineng kehlail en wia nsenen pwopwoud ni mehwo duwehte aramas akan me sohte kin ese Koht. 6 Kaleke emen de daulihala dahme konehng oh isanekihla rie ni ire wet, pwehki Siohwa* kin ketin kadeikada mepwukat koaros, duwehte me se ndaiong kumwail mahso oh pil panawihekin kumwail ni kehlail. 7 Pwe Koht sohte ketin malipeikitaildohng nan mour samin, pwe nan mour sarawi. 8 Eri, aramas emen me kin mwamwahliki met, kaidehn aramas me e kin mwamwahliki ahpw Koht, me ketikihong kumwail sapwellime manaman.*

9 Ahpw me pid limpoak en pirien, kumwail sohte anahne sen ntingkiwohng kumwail, pwe Koht ketin padahkihong kumwail en poakohng emenemen. 10 Ni mehlel, kumwail kin wiewia met ong riatail koaros nan Masedonia pwon. Ahpw se kangoangei kumwail, riat ko, kumwail wonlahte kalaudehla amwail kin wiewia met. 11 Kumwail nantihong momourki mour meleilei oh piseksang mouren meteikan oh pein doadoahk, nin duwen me se kaweidkin kumwail, 12 pwe kumwail en weweid ni pwung mwohn irail kan me likin mwomwohdiso oh sohte kin anahne mehkot.

13 Riat ko, se pil men kumwail en wehwehki duwen irail me melahr,* pwe kumwail en dehr pahtoula duwehte irail kan me sohte arail koapworopwor. 14 Pwe ma kitail kin pwoson me Sises pwoulahr oh pwurehng iasadahr, eri Koht pil pahn ketin wahdo irail me melahr* ni arail idawehn Sises, pwe ren iang ih. 15 Pwe iet me se kin padahkihong kumwail sang ni sapwellimen Siohwa* mahsen, me kitail me momour erein ketier en Kauno sohte mwahn pahn tiengla mwohn irail me melahr;* 16 pwehki pein Kauno pahn ketidihdo sang nanleng ni ngilen ruwes iangahki ngilen tohnleng me keieu lapalap oh sapwellimen Koht sowi, oh irail me melahr ni arail miniminiong Krais pahn iasada mahs. 17 A mwuri, kitail me momour ahpw pahn pwekipwekdahla nan depwek pwe kitail en iang irail tuhwong Kauno nan wehwe; kitail ahpw pahn ieiang Kauno ahnsou koaros. 18 Eri kumwail kansenamwahwihki emenemen mahsen pwukat.

5 Eri riat ko, kumwail sohte anahne emen en ntingkiwohng kumwail duwen ahnsou kan oh rahn akan me koasoandier. 2 Pwe pein kumwail inenen ese mwahu me rahnen Siohwa* pahn leledo duwehte lipirap emen nipwong. 3 Ni ahnsou me irail pahn nda, “Popohl oh sohte keper!” kauparail ahpw pahn mwadangete lelohng irail, rasehng medek en neitik en lih liseian men, oh re sohte pahn pitsang. 4 Ahpw kumwail, riat ko, kumwail sohte mi nan rotorot, kahrehda rahno sohte pahn mwadangete lelohng kumwail rasehng marain en rahn eh kin lelohng lipirap akan ni soh kasikpe, 5 pwe kumwail koaros serien marain oh serien rahn. Kaidehn kitail kisehn nipwong de rotorot.

6 Eri, kitail en dehr wie memeir duwehte meteikan, ahpw kitail en pepehd oh kolokol atail koahiek en madamadau. 7 Pwe irail kan me kin meir kin meir nipwong, oh irail kan me kin sakaula kin sakaula nipwong. 8 Ahpw ong kitail me kisehn rahn, kitail en kolokol atail koahiek en madamadau oh perehki mwaremwaratail kan perehpen pwoson oh limpoak oh lisoaropkihda lisoarop en koapworopwor en komour 9 pwe Koht sohte ketin pilkitailda pwe en kalokei kitail,* ahpw pwe kitail en komourkihla dahme atail Kaun Sises Krais ketin wiadahr. 10 E pwoukinkitailla, pwe mehnda ma kitail pepehd de memeir,* kitail pahn iang ih momour. 11 Eri, kumwail kangkangoange* oh kangkakehlailih emenemen, nin duwen me kumwail kin wiewia.

12 Eri riat ko, se peki rehmwail en waunekin irail me kin doadoahk laud nanpwungamwail oh kin apwalih kumwail nan doadoahk en Kauno oh kaweid kumwail; 13 oh kasalehiong irail wahu oh limpoak laud pwehki arail doadoahk. Kumwail ahneki popohl nanpwungamwail. 14 Ahpw riat ko, se kangoangei kumwail en panawih me sapeik kan, kaloalamwahwih irail me pahtoula,* sewese me luwet akan, oh kanengamahiong koaros. 15 Kumwail mwasahn pwe emen dehr dupungkihong emen me suwed, ahpw ahnsou koaros rapahki dahme mwahu ong emenemen oh pil ong aramas teikan koaros.

16 Kumwail pereperen ahnsou koaros. 17 Poadidiong kapakap. 18 Kalahnganki mehkoaros. Met iei kupwuren Koht ong kumwail rehn Krais Sises. 19 Kumwail dehr kakunla kisiniei en sapwellimen Koht manaman.* 20 Kumwail dehr mwamwahliki kokohp kan. 21 Kasawih pwungen mehkoaros; kolokol teng dahme mwahu. 22 Liksang soangen mwersuwed koaros.

23 Koht en popohl en ketin kasarawihkumwailla ni unsek. Oh amwail madamadau* oh mour* oh paliwar en mwahu ni soahng koaros, oh en nekinekla ni soh karaunpe erein ketier en atail Kaun Sises Krais. 24 Ih me ketin malipeikumwaildo me lelepek, oh e uhdahn pahn ketin wia met.

25 Riat ko, kumwail pousehlahte kapakapkin kiht.

26 Kumwail rahnmwahwih riatail kan koaros oh metik* irail.

27 I peki rehmwail ni mwaren Kauno, kumwail en wadek ong riatail kan koaros kisinlikou kiset.

28 Kadek sapan en atail Kaun Sises Krais en kin ieiang kumwail.