KERIAUN KISINLIKOU ONG MEHN DESELONIKA

1 Pohl, Silpanus,* oh Timoty, ong mwomwohdisohn Deselonika me kin miniminiong Samatail Koht oh Kaun Sises Krais:

2 Samatail Koht oh Kaun Sises Krais en ketikihong kumwail kadek sapan oh popohl.

3 Riat ko, ahnsou koaros se kin anahne kalahngankihong Koht duwen kumwail. Met konehng pwe amwail pwoson kin kekeirda laud oh limpoak en emenemen kumwail koaros kin lalaudla nanpwungamwail. 4 Ihme kahrehda se kin suweikin kumwail nan mwomwohdiso kan en Koht pwehki amwail kin dadaur oh pwoson nan amwail kalokolok oh kahpwal koaros me kumwail kin lelohng.* 5 Met kadehdepen sapwellimen Koht kadeik pwung, me kahrehiong kumwail en warohng pedolong nan Wehin Koht, me kumwail kin lokolongki.

6 Sapwellimen Koht kadeik wet me pwung, pwehki e pahn ketin dupukohng irail kan me kin kahrehiong kumwail kahpwal. 7 Ahpw kumwail me kin lokolongki kahpwal pahn iang kiht saledekla ni ahnsou me Kaun Sises pahn ketin sansalda sang nanleng iangahki sapwellime tohnleng kehlail kan 8 nan mpwulen kisiniei ehu, ni eh pahn ketin ikih irail kan me sohte ese Koht oh irail kan me sohte kin peikiong rongamwahu duwen atail Kaun Sises. 9 Irail pwukat pahn pakadeingkihda kasohrala soutuk me pahn kihsang irail mwohn silangin Kauno oh mwohn sapwellime roson lingan, 10 ni ahnsou me e pahn ketido pwe en linganla iangahki sapwellime aramas sarawi kan, oh ni rahno irail koaros me kin kasalehda ar pwoson pahn kapinga ih. Oh pwehki kumwail kamehlele mehn kadehde me se ndaiong kumwail, kumwail pil pahn iang irail.

11 Ihme kahrehda se kin kapakapkin kumwail ahnsou koaros, pwe atail Koht en ketin kilangwohng kumwail nin duwen irail kan me warohng sapwellime malipilip, oh sang ni sapwellime roson me e pahn ketin wiahda ni unsek mehkoaros me mwahu me e ketin kupwurki oh doadoahk en pwoson koaros. 12 Se kin wia met pwe mwaren atail Kaun Sises en linganla rehmwail oh kumwail en linganla ni amwail miniminiong ih, nin duwen kadek sapan en atail Koht oh Kaun Sises Krais.

2 Ahpw riat ko, me pid duwen ketier en atail Kaun Sises Krais oh atail pahn pokonpene reh, se peki rehmwail 2 kumwail en dehr mwadang pingida ma emen nda me rahnen Siohwa* leledohr. Kumwail dehr pwunodki, mehnda ma re nda me rohngo sang rehn Koht, de re wadekasang nan kisinlikou me dene se ntingihada.

3 Emen en dehr pitihkumwaildi, pwehki rahno sohte pahn leledo ma uhwong kaudok mehlel* sohte pahn wiawi mahs oh aramas suwedo sohte pahn sansalda, me iei serien kasohrala. 4 Ih soun uhwong men oh kasapwilada pein ih pohnangin mehkoaros me adaneki koht de mehkoaros me aramas kin pwongih, pwe en mwohndiong nan tehnpas sarawi en Koht, oh kasalehda pein ih mwohn wehipokon me ih koht men. 5 Ia duwe, kumwail sohte tamataman me ni ei kin mihmi rehmwail, I kin ndaiong kumwail mepwukat?

6 Oh met kumwail eseier dahme kin irehdi aramas suwedo, pwe e pahn sansalda ni ahnsawi. 7 Ni mehlel, rir suwed wet kin doadoahk ahnsou wet, ahpw e pahn wie ekiek lao me kin irehdi aramas suwedo ahnsou wet pahn sohrala. 8 Eri ni mehlel, aramas suwedo pahn sansalda, me Kaun Sises pahn ketin kauwehkihla angin* nin doauese oh kasohrehla ni sansaldahn sapwellime ketier. 9 Ahpw aramas suwedo pahn pwarada sang ni manaman en Sehdan, oh e pahn wiahda manaman tohto oh kilel likamw kan oh soahng kapwuriamwei kan 10 oh widing suwed koaros ong irail kan me pahn sohrala, nin duwen kalokolok ehu pwehki arail sohte kin kamehlele oh poakohng me mehlelo me kak komourirailla. 11 Ihme kahrehda Koht ketin mweidohng manaman widing en pitihiraildi pwe irail en kamehlele likamw, 12 pwe irail koaros en pakadeikda pwehki re sohte kin kamehlele me mehlelo ahpw kin perenki me suwed.

13 Ahpw ahnsou koaros se kin anahne kalahngankihong Koht duwen kumwail, riat ko me Siohwa* ketin poakohng, pwehki sang nin tapio Koht ketin pilkumwailda en komourla sang ni eh ketin kasarawihkinkumwailla sapwellime manaman* oh sang ni amwail pwoson me mehlelo. 14 E ketin malipeikumwaildohng met sang ni rongamwahu me se kin kalohki, pwe kumwail en ale lingan en atail Kaun Sises Krais. 15 Eri riat ko, kumwail kesihnenda teng oh kolokolete tiahk me kumwail sukuhlkier, mehnda ma sang dahme kumwail rong de kisinlikou sang reht. 16 Patehng met, atail Kaun Sises Krais, oh Samatail Koht me ketin poakohng kitail oh ketikihong kitail nsenamwahu poatopoat oh koapworopwor mwahu pwehki sapwellime kadek sapan, 17 en ketin kansenamwahwihala amwail mohngiong oh katengeikumwaildi* pwe kumwail en koasoia oh wia dahme mwahu ahnsou koaros.

3 Eri riat ko, kumwail pousehlahte kapakapkin kiht, pwe mahsen en Siohwa* en kin mwadang lohkseli oh linganla, nin duwen me kin wiawi rehmwail, 2 oh pwe sen pitsang aramas keper oh suwed kan, pwe kaidehn aramas koaros kin ahneki pwoson. 3 Ahpw Kauno me lelepek, oh e pahn ketin kakehlaka oh pereikumwailsang me suwedo. 4 Patehng met, nin duwen tohnpadahk en Kauno kei, se kin koapworopworkin kumwail me kumwail kin kapwaiada oh pil pahn pousehlahte kapwaiada at kaweid kan. 5 Kauno en ketin pousehlahte kaukaweid amwail mohngiong ni ahl me pwung, pwe kumwail en poakohng Koht oh dadaurete pwehki Krais.

6 Eri riat ko, ni mwaren atail Kaun Sises Krais, se kin kaweidkin kumwail, kumwail en kalekeikumwailsang riatail men me sohte kin weweid ni pwung oh sohte kin idawehn tiahk* me kumwail* alehsang reht. 7 Pwe pein kumwail eseier ia duwen amwail pahn alasang kiht, pwehki at wiewia kin konehng ni at kin mihmi rehmwail, 8 oh se sohte kin pekihda kanat mwenge. Ahpw, se kin doadoahk laud oh nannanti ni rahn oh nipwong pwe sen dehr kihong kumwail katoutou pweilaud ehu. 9 Kaidehn pwehki sohte at pwuhng, ahpw se men wia mehn kahlemeng ehu ong kumwail en alasang. 10 Ni mehlel, ni at kin mihmi rehmwail, se kin kehkehlingkihong kumwail met: “Ma emen sohte men doadoahk, a en dehr mwenge.” 11 Pwe se rong me ekei nanpwungamwail sohte kin weweid ni pwung, re sohte mwahn kin doadoahk, ahpw re kin kedirepwki mehkot me sohte arail ong. 12 Ong soangen aramas pwukat, se kehkehlingki oh kaweidki ni mwaren Kaun Sises Krais ren wia pein arail doadoahk oh kin kang mwenge me re pein koadoahkihada.

13 A kumwail, riat ko, kumwail dehr pwangahki wiewia mwahu. 14 Ahpw ma emen sohte kin peikiong dahme se koasoia nan kisinlikou kiset, kilelehdi aramas menet oh kumwail uhdihsang amwail werekiong, pwe en namenekla. 15 Oh kumwail dehr wiahkin ih imwintihti men, ahpw pousehlahte panawih ih nin duwen riatail men.

16 Eri Kaunen popohl en ketikihong kumwail popohl ahnsou koaros ni ahl koaros. Kauno en ketin ieiang kumwail koaros.

17 Eri, ngehi Pohl, ni pein mengin pehiet, I kadarewei ei rahnmwahu. Ih mwomwen ei kin nting nan kisinlikou koaros pwe kumwail en ese me ngehi me ntingihedi.

18 Kadek sapan en atail Kaun Sises Krais en kin ieiang kumwail koaros.