KERIAUN KISINLIKOU ONG TIMOTY

1 Pohl, wahnpoaron en Krais Sises sang ni kupwuren Koht nin duwen inou en mour me mi rehn Krais Sises, 2 ong Timoty, nei seri kompoak:

Samatail Koht oh Krais Sises atail Kaun en ketikihong uhk kadek sapan, kadek kalahngan oh popohl.

3 I kin kalahngankihong Koht, me I kin papah duwehte semei mehn mahs ako, oh sang ni nsenmwakelekel, I kin tamataman uhk nan ei kapakap ngidingid ni rahn oh nipwong. 4 Ni ei kin tamanda pilen mesomw kan, I kin uhdahn men kilanguhkada, pwe I en direkihla peren. 5 Pwe I kin tamanda omw pwoson me sohte kin mwalaun, me tepin mi rehn omw nohno kahlap Lois oh omw nohno Iunis, ahpw I kamehlele me e pil mi rehmw.

6 Pwehki kahrepe wet me I katamankin uhk ken doadoahngki sapwellimen Koht kisakis me kohieng uhk ni ei pwil pehi kat pohmw, ni ngoang duwehte kisiniei me kin mpwumwpwul. 7 Pwe sapwellimen Koht manaman* sohte kin kahrehiong kitail en masepwehk, ahpw e kin kihong kitail kehl, limpoak oh madamadau pwung. 8 Eri ke dehr namenengki kadehde atail Kauno, de pil ngehi me sensel pwehki ih, ahpw iang lokolongki rongamwahwo sang ni omw kin koapworopworki roson en Koht. 9 E ketin komourkitailla oh ketin malipehkin kitail malipilip sarawi ehu, kaidehn pwehki atail wiewia, ahpw pwehki kupwure oh sapwellime kadek sapan. Met kohieng kitail sang rehn Krais Sises mwohn tepin kawa, 10 ahpw ahnsou wet e uhdahn sansalda sang ni kasansaldahn atail Sounkomour, Krais Sises, me ketin kasohrehla mehla oh kasalehiong kitail ia duwen atail pahn ahneki mour oh paliwar me sohte kak mwerpeseng sang ni rongamwahwo, 11 me I idihdkidahr nin duwen sounkalohk men oh wahnpoaron men oh sounpadahk men.

12 Ih kahrepen ei pil lokolongki mepwukat, ahpw I sohte namenengki. Pwe I ese Meno me I kin kamehlele, oh I koapworopworki me e kak ketin sinsile dahme I likihong ih lao lel ni rahno. 13 Eri, kolokolete koasoandi en padahk mehlel me ke rong sang ie ni pwoson oh limpoak me ke ahneki pwehki omw kin miniminiong Krais Sises. 14 Sinsile likilik kaselel wet pwehki sawas en sapwellimen Koht manaman,* me kin mi loalatail.

15 Ke eseier me irail koaros me mihmi nan wehin Eisia sohpeisangieier, iangahki Pikehlus oh Ermokenihs. 16 Kauno en ketikihong tohn imwen Onesiporus kadek kalahngan, pwe e kin kalapw kangoange ie oh sohte kin namenengki ei senselki selmete. 17 Pwe ni ahnsou me e mihmi Rom, e nannanti rapahkin ie oh diariehda. 18 Kauno Siohwa* en ketikihong ih kadek kalahngan ni rahno. Oh ke wehwehki mwahu soahng koaros me e wiahiong ie nan Episos.

2 Ihme kahrehda kowe nei seri, kin pousehlahte ale kehl sang ni kadek sapan me kin mi rehn Krais Sises; 2 oh soahng kan me ke rong sang ie me sounkadehde tohto kin utungada, likihong ohl lelepek kan soahng pwukat, irail pahn uhd koahiekla pwe ren padahkihong meteikan. 3 Nin duwen sounpei mehlel men en Krais Sises, iang lokolongki kahpwal kan. 4 Aramas emen me wiahla sounpei sohte kin kedirepwkihla wiahda mwohni,* pwehki e men kaperenda aramas me alehda ih en iangala sounpei. 5 Oh pil nan mwadong kan, me kin iang siai sohte pahn alehdi nihn ma e sohte kin idawehn koasoandi kan en mwadongo. 6 Soumwet men me kin doadoahk laud uhdahn pahn tepin ale wahn sapw kan. 7 Ahnsou koaros medemedewe dahme I kin koasoia; Kauno pahn ketin kahrehiong uhk ken wehwehki soahng koaros.

8 Tamataman me Sises Krais ketin iasadasangehr rehn me melahr akan oh ketin wia kadaudok en Depit,* nin duwen rongamwahu me I kin kalohki, 9 me I kin wie lokolongki oh selkihdi nin duwen loallap suwed men. Ahpw mahsen en Koht sohte kak selidi. 10 Ong ni kahrepe wet me I kin dadaurete ni mehkoaros pwehki irail me pilipildahr kan, pwe irail en pil ale komour sang ni arail miniminiong Krais Sises, iangahki lingan poatopoat. 11 Mahsen wet me likilik: Ni mehlel, ma kitail iang ih mehla, kitail pil pahn iang ih momour; 12 ma kitail kin dadaurete, kitail pil pahn iang ih kaunda nin duwen nanmwarki kei; ma kitail kahmahmkihla ih, e pil pahn ketin kahmahmkinkitailla; 13 ma kitail sohte lelepek, e pahn ketin lelepekete, pwe e sohte kak ketin kahmahmkihla pein ih.

14 Katakatamankin irail mepwukat, kaweidkin* irail mwohn Koht ren dehr kin akamaiki lepin lokaia kan, mehkot me soh mwahn katepe pwehki e kin kauwehla irail kan me kin rongorong. 15 Wia uwen omw kak pwe Koht en ketin kupwurkin uhk, nin duwen tohndoadoahk men me sohte mehkot me e pahn kin namenengki, me kin padahngki oh kawehwehda mahsen en me mehlelo ni pwung. 16 Ahpw soikala koasoi soh audepe kan me kin kauwehla dahme sarawi, pwe koasoi pwukat pahn kalaudehla wiewia kan me kin kasohwauwih Koht 17 oh pahn doupeseng rasehng kens me kin kangkangala uduk. Aimenihus oh Pailihdus pil kin iang irail. 18 Ohl pwukat keselahr me mehlelo pwehki ara kin nda me iasada wiawiher, oh ira kin kauwehla ahn ekei arail pwoson. 19 Mendahki met, sapwellimen Koht poahsoan kehlail wie tengeteng, me kilelkidier kilel wet, “Siohwa* ketin mwahngih irail kan me e ketin sapwellimanki,” oh “Irail koaros me kin likweriong mwaren Siohwa* en kesehla soahng suwed kan.”

20 Eri nan ihmw laud ehu, mie dahl akan me wiawihda sang kaidehnte kohl oh silper, ahpw pil tuhke oh pwehl, oh ekei ong doadoahk waun, ahpw ekei ong doadoahk mwahl. 21 Eri ma emen kin tohrohrala sang mehn mwuhr kan, e pahn wia mehn doadoahk ehu* ong doadoahk waun, sarawihla, katapan ong me nainekio, oh onopadahngehr doadoahk mwahu koaros. 22 Eri tangasang ineng en me pwulopwul kan, ahpw nantihong rapahki pwung, pwoson, limpoak, popohl, oh kin iang irail kan me kin likweriong Kauno sang ni mohngiong mwakelekel.

23 Pil kaleke akamai kan me pweipwei oh sawehwe, pwe ke ese me re kin imwikihla pei. 24 Pwe ladu en Kauno men sohte anahne pei, ahpw e anahne meleilei* ong koaros, kakohng padahk, oh kin kasalehda kanengamah ni eh kin lelohng me suwed, 25 oh kin kaweid irail me kin pelian ni meleilei. Ele Koht pahn ketin mweidohng irail en koluhla* pwe irail en kak esehla loalokong pwung duwen me mehlel, 26 oh irail pahn pwurehng arail madamadau pwung oh tangasang lidip en Tepil, ni arail esehda me e parokiraildier pwe ren kapwaiada nsene.

3 Ahpw ke en ese me ni imwin rahn akan, e pahn mie ahnsou apwal oh keper. 2 Pwe aramas akan pahn kin roporop ong pein irail,* poakohng mwohni, aksuwei, pohnmwahso, lahlahwe, sohte pahn kin peikiong pahpa nohno kan, sohte pahn kin kasapahlkalahngan, soaloalopwoat, 3 sempoak, sohte men pwungki meteikan, karaunlikamw, sohte kak kaunda pein irail, lemei, sohte pahn kin poakohng me mwahu, 4 re pahn kin pangala meteikan, keptakai, aklapalap, re pahn kin nsenkihte wia nsenarail oh sohte kin poakohng Koht, 5 re pahn kin mwomwehda aramas me kin poadidiong Koht, ahpw arail mour sohte kin pahrekiong arail kaudok; kalekeiukasang soangen aramas pwukat. 6 Pahn mie aramas ekei sang nanpwungarail me pahn kin pedolong nan ihmw kan ni elen widing oh pitihedi lih akan me luwet oh toutoukilahr diparail, me kin mweidohng soangsoangen ineng kan en kin kaunirailda, 7 me kin ale padahk ahnsou koaros ahpw sohte kak esehla loalokong pwung duwen me mehlel.

8 Eri nin duwen Sanes oh Sampres ara uhwongada Moses, irail pwukat pil pahn pousehlahte uhwongada me mehlelo. Madamadau en soangen aramas pwukat sapwungalahr mehlel, oh Koht sohte ketin kupwurkin irail pwehki re sohte kin weweid ni pwoson. 9 Ahpw re sohte pahn pweida, pwehki arail pweipwei pahn sansalda mwohn aramas koaros, duwehte ohl riemenet. 10 Ahpw ke kin idawehn mwahu ei padahk kan, mwomwen ei mour, kahrepen ei mour, ei pwoson, ei kanengamah, ei limpoak, ei dadaur, 11 kamakam kan oh lokolok kan me duwehte I lelohng nan Andiok, Aikoniomw oh Listra. I kin dadaur pahn kalokolok pwukat, oh Kauno ketin doareiehsang soahng pwukat koaros. 12 Ni mehlel, irail koaros me men mourki poadidiong Koht ni arail kin miniminiong Krais Sises pil pahn lelohng kalokolok. 13 Ahpw aramas me suwed oh mwersuwed kan pahn doulahte sang ni me suwed ong ni me suwedsang, pitipitih meteikan oh pein irail pahn pitida.

14 Ahpw kowe, ke en pousehlahte idawehn soahng kan me ke sukuhlkier oh kamehlelehier, oh ke ese ihs me ke sukuhlkihsang soahng pwukat 15 oh sang ni omw seri pwelel, ke eseier nting sarawi kan me kak kahrehiong uhk en ale erpit, me pahn imwikihla omw komourla sang ni omw pwoson Krais Sises. 16 Nting Sarawi unsek ntingdier sang ni kaweid en Koht oh e mwahu ong padahk, ong peneu, ong kapwungala soahng kan, oh ong kaiahn nin duwen sapwellimen Koht koasoandi pwung, 17 pwe sapwellimen Koht aramas en uhdahn koahiekla oh onopadahr ni unsek ong doadoahk mwahu koaros.

4 I ruweseiuk mwohn Koht oh Krais Sises, me pahn ketin kadeik me momour oh me melahr akan ni ahnsou me ih oh sapwellime Wehi pahn sansalda: 2 Kalohki mahseno; ngoangki wia met ni ahnsou mwahu oh ahnsou apwal; panawih, lipwoare, kangoange irail, ni kanengamah oh koahiek en padahk koaros. 3 Pwe ahnsou ehu pahn leledo me irail sohte pahn kin rong padahk mehlel, ahpw re pahn kin idawehnla pein nsenarail oh re pahn kin rapahki sounpadahk kan me kin padahngki dahme re kin men rong. 4 Re pahn sohpeiweisang ar kin rong me mehlelo oh re pahn uhd rong soai likamw akan. 5 Ahpw kowe, kolokolete omw koahiek en madamadau ni soahng koaros, dadaur pahn kahpwal, wia doadoahk en sounkalohki rongamwahwo,* kapwaiada omw doadoahk ni unsek.

6 Pwe I mweidalahr pein ngehi en duwehte meirong en wain me kin wudekidi, oh ahnsoun ei mehla* uhdahn keren. 7 I peikiher pei wauno, I kanekehla weirentango, I kin kolokolete pwoson. 8 Sang ahnsou wet kohla, nihn en pwung me nekinek ong ie, me Kauno, sounkopwung pwung, pahn ketikihong ie nin duwen keting ehu ni rahno, ahpw kaidehn ong ngehite, ahpw pil ong irail koaros me uhdahn men en ketin sansalda.

9 Wia uwen omw kak pwe ken mwadangodo rehi. 10 Pwe Demas keseiehla pwehki eh poakohng koasoandi en mwehi wet,* oh e samwalahr Deselonika, Kresens kohla Kalesia, Taitus kohla Dalmesia. 11 Lukte me mihmi rehi. Mark en iang uhk kohdo pwe e pahn wia sawas laud ong ie nan doadoahko. 12 Ahpw I kadaralahr Dikikus Episos. 13 Ni ahnsou me ke pahn kohdo, wahdo likou puhp me I pwilikihdi rehn Karpus nan Troas oh pwuhk kan,* ahpw mehlel me wiawihkihda kilin mahno.

14 Aleksander, sounsukpronso, uhdahn kauweiehla. Siohwa* pahn ketin dupukohng ih nin duwen eh wiewia kan. 15 Kalekehkin uhk ih, pwe e kin uhwong laud dahme se kin koasoia.

16 Ni ahnsou me I tepin doare ieo, sohte emen me poupalihkin ie, ahpw irail koaros keseiehla⁠—​Koht en dehr ketin kapwukoanekin irail. 17 Ahpw Kauno ketiket limwahi oh ketikihong ie kehl, pwe sang rehi doadoahk en kalohk en uhdahn pweida oh wehi koaros en rong; oh I poadoandoarlahr sang ni ewen laion. 18 Kauno pahn ketin doareiehsang soahng suwed koaros oh pahn ketin nekinekid ie ong sapwellime Wehi nanleng. Lingan en kohwong ih kohkohlahte. Amen.

19 Kihong ei rahnmwahu ong Persila oh Akwila oh tohn imwen Onesiporus.

20 Erastus mihmi nan Korint, ahpw I pwilikihdi Tropimus nan Mailihdus pwehki eh soumwahu. 21 Wia uwen omw kak pwe ken leledo mwohn ahnsoun kopou.

Eupulus kadarewei eh rahnmwahu, oh pil Pudens oh Linus oh Klaudia oh riatail kan koaros.

22 Kauno en ketin ieiang lamalam mwahu* me ke kin kasalehda. Sapwellime kadek sapan en kin ieiang kumwail.