KISINLIKOU ONG TAITUS

1 Pohl, ladun Koht oh wahnpoaron en Sises Krais nin duwen pwoson en sapwellimen Koht me pilipildahr kan oh loalokong pwung duwen me mehlel me kin pahrekiong poadidiong Koht 2 oh me poahsoankihda koapworopwor en mour soutuk me Koht, me sohte kak ketin likamw, ketin inoukidahr mahsie; 3 ahpw ni pein sapwellime ahnsou me e ketin kileledier, e ketin kasalehdahr sapwellime mahsen sang ni kalohk me e ketin likihong ie nin duwen poahngok en atail Sounkomour, Koht; 4 ong Taitus, nei seri mehlel nan pwoson me kita ahnekipene:

Samatail Koht oh Krais Sises atail Sounkomour en ketikihong uhk kadek sapan oh popohl.

5 I pwilkinuhkedi nan Krihd pwe ken kapwungala soahng kan me sapwung* oh idihada sounapwalih kan* nan ehuehu kahnimw, nin duwen me I kaweidkin uhk: 6 ma pahn mie ohl emen me sohte karaunpe, pwoudiki lihtehmen oh naineki seri kan me pwoson me sohte karaunepen ar tiahk suwed de sapeik.* 7 Pwe nin duwen sounpapah en Koht, sounapwalih men uhdahn pahn sohte karaunpe, sohte kin keptakai, sohte kin mwadang lingeringer, sohte kin kamamsakau, sohte kin lemei, sohte kin rapahki pein kamwahupe ni noahrok, 8 ahpw kin perenki kasamwo aramas, poakohng me mwahu, ahneki madamadau pwung,* pwung, loalopwoat, kin kaunda pein ih, 9 oh kin kolokol teng mahsen likilik me pid eh koahiek en padahk, pwe en kak kangoangehki meteikan padahk mehlel oh pil panawih irail kan me kin uhwong.

10 Pwe mie aramas tohto me kin sapeik, oh me kin koasoia soahng soh katepe kan, oh me kin pitipitih aramas akan, ahpw mehlel irail kan me kin uhki sirkumsais. 11 E inenen konehng ken katokehdi auwerail kan, pwehki soangen aramas pwukat kin usehlahte kauwehla douluhl ekei peneinei sang ni arail padahngki soahng kan me sohte konehng ren padahngki pwe ren ale kamwahuparail pwehki noahrok. 12 Emen rehrail, pein arail soukohp, nda: “Mehn Krihd kan kin likamw ahnsou koaros, re rasehng mahn lawalo me keper oh kin pohnkahke oh kapehd en mwenge.”

13 Mehn kadehde wet mehlel. Pwehki kahrepe wet, usehlahte panapanawih irail ni kehlail pwe irail en kehlail ni pwoson 14 sang ni arail sohte pahn kin rong soai likamw en mehn Suhs akan oh kehkehlik en aramas akan me sohpeisangehr me mehlelo. 15 Soahng koaros kin mwakelekel ong aramas mwakelekel kan; ahpw ong irail kan me samin oh sohte pwoson, sohte mehkot kin mwakelekel, pwe arail madamadau oh kadeikpen loalarail me samin. 16 Re kin kasalehiong wehipokon me re ese Koht, ahpw re kahmahmkihla ih sang ni arail wiewia kan, pwehki re me kasaut oh kin sapeik oh sohte warohng en wia soangen doadoahk mwahu koaros.

2 Ahpw ken pousehlahte padahngki dahme kin pahrekiong padahk mehlel. 2 Ohl mah kan en kin ese kaunda arail wiewia kan, mehlel, ahneki madamadau pwung, kehlail ni pwoson, ni limpoak, oh ni dadaur. 3 Pil duwehte lih mah kan, ren mour nin duwen aramas poadidi kei, dehr kin karaun likamw, dehr kin wia lidun wain, ahpw ren kin wia sounpadahk en me mwahu, 4 pwe ren kin kaweidki* peinakapw kan ren poakohng arail pwoud kan, poakohng neirail seri kan, 5 ahneki madamadau pwung, mwakelekel, apwalih imwarail kan, tiahk mwahu oh uhpahiong arail pwoud, pwe emen de kauwe mahsen en Koht.

6 Pil duwehte, pousehlahte kangoange mwahnakapw kan en ahneki madamadau pwung, 7 kasalehda pein kowe nin duwen mehn kahlemeng mwahu ehu ni soangen wiewia mwahu koaros. Padahngki dahme mehlel ni ngoang 8 ni omw pahn doadoahngki lokaia mehlel me soh kaupe, pwe irail kan me uhwong en namenekla oh sohte ndahkin kitail mehkot suwed. 9 Ladu kan en uhpahiong arail soumas kan ni mehkoaros, nantihong kaperenih irail, dehr kin kapwur lokaia, 10 dehr pirapa irail, ahpw kasalehda lelepek ni unsek pwe ren kalinganahda padahk en atail Sounkomour Koht, ni soahng koaros.

11 Pwe sapwellimen Koht kadek sapan sansaldahr oh e kin wahdo komour ong soangen aramas koaros. 12 E kin padahkihong kitail en soikala wiewia kan me kasohwauwih Koht oh ineng en sampah, oh kitail en kin momourki madamadau pwung oh idawehn elen pwung oh kasalehda poadidiong Koht nan koasoandi en mwehi wet,* 13 nindoken atail kin awiawih koapworopwor kaperen oh kasansal lingaling en Koht lapalap oh atail Sounkomour, Sises Krais, 14 me ketin tounmeteikihla pein ih ong kitail pwe en ketin kasaledengkitailla* sang soangen wiewia suwed koaros oh kin ketin kamwakelehda pwihn en aramas ehu ong pein ih pwe ren wiahla sapwellime aramas tohrohr oh kin ngoangki wia doadoahk mwahu kan.

15 Pousehlahte padahngki mepwukat oh kangoange oh panawih meteikan nin duwen manaman me kohieng uhk. Dehr mweidohng emen en kin kilengdiong uhk.

3 Pousehlahte katamankin irail en kin uhpahiong oh peikiong koperment kan oh irail kan me ahneki manaman, oh onopadahng doadoahk mwahu koaros, 2 oh dehr kin kauwe emen, dehr akamai, ahpw ren kin toupahrek, oh kasalehda mpahi ong aramas koaros ahnsou koaros. 3 Pwe mahso kitail pil kin pweipwei, sapeik, meteikan kin pitihkitaildi, lidun soangsoangen ineng kan oh raparapahkihte nsenamwahu, kin wiewiahte me suwed oh peirin, kasaut, oh kailongki emenemen.

4 Ahpw, ni ahnsou me sapwellimen atail Sounkomour Koht kadek oh pil limpoak ong aramas eh sansalda 5 (kaidehn pwehki doadoahk pwung me kitail wiadahr, ahpw pwehki pein sapwellime kadek kalahngan), e ahpw ketin kapitkitailla sang ni kamwakel* me kahluweikitaillahng mour oh sang ni eh ketin kawiliakapwkitailda sang ni sapwellime manaman.* 6 E ketin sapankihong kitail manaman* wet sang rehn Sises Krais atail Sounkomour, 7 pwe mwurin atail pwungla rehn Koht sang ni kadek sapan en meno, kitail pahn wiahla serien sohso nin duwen koapworopwor en mour soutuk.

8 Lokaia pwukat me likilik, oh I men ken kin koasoakoasoiahte ire pwukat ni kehlail pwe irail kan me kin kamehlele Koht en kin nsenohkihte wiewia doadoahk mwahu kan. Mepwukat me mwahu oh e kin wia kamwahu ong aramas akan.

9 Ahpw kalekeiukasang akamai pweipwei kan, irekidien eden mehn mahs ako oh akupwung kan oh pei kan duwen Kosonnedo, pwe soahng pwukat sohte kamwahupe oh soh katepe. 10 Me pid aramas emen me kin kaparapeseng padahk likamw, soikala ih mwurin keieu oh keriapak en eh ale peneu, 11 pwe ke ese me soangen aramas menet wetsangehr ahlo oh kin wiewia dihp oh dipe kan kin kadeikada pein ih.

12 Ni ei pahn kadarowohng uhk Artemas de Dikikus, wia uwen omw kak pwe ken kohdo rehi nan Nikapolis, pwe ih wasa me I koasoanedier I en mi ie erein ahnsoun kopou. 13 Wia uwen omw kak pwe ken sewese Senas, me kin samanih Kosonnedo, oh Apolos pwe soahng koaros en mie ong ara seiloak. 14 Ahpw riatail kan en pil esehla wia doadoahk mwahu ahnsou koaros pwe ren kin sawas ni ahnsou me mie anahn karuwaru kan, pwe ren kin direkihla wiewia mwahu kan.

15 Irail koaros me kin mihmi rehi kadarowohng uhk arail rahnmwahu. Kihong ei rahnmwahu ong irail kan me pwoson me kin poakohng kitail.

Kadek sapan en kin ieiang kumwail koaros.