KEIEUN KISINLIKOU EN PITER

1 Piter, wahnpoaron en Sises Krais, ong irail kan me wia mehn keiru kei me mwarahkpeseng nan Pondus, Kalesia, Kapedosia, Eisia oh Pidinia, me pilipildahr 2 nin duwen me Samatail Koht ketin koasoanedier, oh sarawihkihla sapwellimen Koht manaman,* pwe ren kin peikiong oh usupkidier ntahn Sises Krais:

Kadek sapan oh popohl en lalaudla rehmwail.

3 Kaping en kohwong Koht oh Semen atail Kaun Sises Krais, pwe nin duwen sapwellime kadek kalahngan laud e ketin kahrehiong kitail en ipwsapahl ong koapworopwor ehu me momour pwehki iasadahn Sises Krais sang rehn me melahr akan, 4 ong sohso ehu me sohte kak mwerpeseng, sohte saminla de sohrala. E nekinekla nanleng ong kumwail. 5 Koht ketin perehki kumwail sapwellime roson pwehki amwail pwoson ong komour ehu me pahn sansalda ni imwin ahnsou. 6 Pwehki met kumwail kin uhdahn perenda, mehnda ma ahnsou kis, ma anahn, kumwail nsensuwedlahr sang ni soangsoangen kahpwal kan, 7 pwe amwail pwoson me lelohngehr songosong oh uhdahn kesempwal sang kohl me kak ohla mendahki eh mwakelekelkihla kisiniei, en kak kahrehiong kumwail en ale kaping oh lingan oh wahu ni ahnsou me Sises Krais ketin kasalehda pein ih. 8 Mendahki kumwail sohte mwahn kilang ih, ahpw kumwail kin poakohng ih. Mendahki kumwail sohte kin kilang ih ahnsou wet, ahpw kumwail kin kasalehda amwail pwoson ih oh perenkihda kowahlap peren lingan ehu me sohte lokaia kak kawehwehda uwen eh kaperen, 9 ni amwail pahn ale mehn akadei en amwail pwoson, me iei komourpamwail.

10 Me pid komour wet, soukohp ako me kohpadahr duwen kadek sapan me kohieng kumwail wiahier kalelapakpe ni pwerisek oh rompe ni keneinei. 11 Re kin pousehlahte tetehk mwahu dahme pahn wiawi oh iahd me soahng kan me sapwellimen Koht manaman* me mi loalarail kin kasalehda duwen Krais, pwehki e kadehdedahr mwowe duwen lokolok kan me pahn lelohng Krais oh duwen lingan me e pahn ketiki mwuhr. 12 Koht ketin kasalehiong irail me irail sohte kin papah pein irail, ahpw re kin papah kumwail, me pid dahme pakairohngkumwailehr ahnsou wet sang rehn irail kan me kin lohkihong kumwail rongamwahu sang ni sapwellimen Koht manaman* me pekederdo sang nanleng. Soahng pwukat me tohnleng kan kin uhdahn men wehwehkihla.

13 Eri, kumwail katengehdi amwail lamalam akan ong doadoahk; kolokolete amwail koahiek en madamadau ni unsek; koapworopworkihte kadek sapan me pahn kohwong kumwail ni kasansaldahn Sises Krais. 14 Nin duwen seri peik kei, kumwail dehr mweidohng ineng kan me kumwail ahneki mahso ni amwail sehse Koht en kaunkumwailda, 15 ahpw kumwail sarawihla ni amwail wiewia kan koaros duwehte Me Sarawio me ketin malipei kumwail, 16 pwe e ntingdier: “Kumwail anahne sarawihla, pwehki ngehi me sarawi.”

17 Oh ma kumwail kin likweriong Sahmo me kin ketin wia kadeik ni soh poupali nin duwen ahn emenemen wiewia, kumwail en momour ni lemmwin Koht erein amwail keikeiru nin sampah wet. 18 Pwe kumwail ese me kaidehn soahng kan me kak mwerpeseng, duwehte silper de kohl, me kasaledengkumwailla* sang amwail elen mour soh katepe me kodoudou ong kumwail sang rehn samamwail mehn mahs ako.* 19 Ahpw kumwail saledengkihla nta kesempwal, duwehte ntahn sihmpwul men me sohte sapwung kis oh sohte mwahi kis iang, me iei ntahn Krais. 20 Mehlel, Koht ketin pilada ih mwohn tepin tohnsampah,* ahpw e sansalda ni imwin ahnsou pwehki kumwail. 21 Pwehki ih, kumwail kin pwoson Koht, meno me ketin kaiasada ih sang rehn me melahr akan oh ketikihong ih lingan, pwe kumwail en kin pwoson oh koapworopworki Koht.

22 Met ni amwail kamwakeledahr pein kumwail* sang ni amwail kin peikiong me mehlelo, kumwail ahnekier limpoak en pirien me sohte mwalaun, eri kumwail en uhdahn poakpene mehlel sang nan mohngiong. 23 Pwe kumwail ipwsapahl, kaidehn sang ni mehkot me kak mwerpeseng, ahpw sang ni war* me sohte kak mwerpeseng, sang ni mahsen en Koht me ketin ieias oh poatopoat. 24 Pwe “aramas koaros* rasehng dihpw, oh eh lingan koaros rasehng masal en wahnrohs nansapw; dihpw kan kin mengila, oh wahnrohs kan kin pwupwudi, 25 ahpw mahsen en Siohwa* kin mihmi kohkohlahte.” Oh “mahsen” wet iei rongamwahu me kalohkdahr ong kumwail.

2 Eri kumwail kihsang rehmwail soangen suwed oh widing koaros oh mwalaun oh peirin oh soangen lokaia kamedek koaros. 2 Duwehte seri pwelel kan, kumwail kakairada ineng ong milik mwakelekel en mahseno, pwe kumwail en kekeirkihda met ong komourpamwail, 3 ma kumwail songadahr* me Kauno me ketin kadek.

4 Ni amwail patohdo reh, takai mour ehu me aramas akan soikalahr, ahpw Koht ketin piladahr oh kesempwalki, 5 pein kumwail wia takai mour kei, me wiahla tehnpas ehu me kokoukihda sapwellimen Koht manaman* oh wia pwihn en samworo sarawi ehu, pwe sang ni kaweidpen sapwellimen Koht manaman,* kumwail en kin wiahda meirong kan me kin kaperenda Koht pwehki Sises Krais. 6 Pwe Nting Sarawio mahsanih: “Kilang! I kihdiong nan Saion takai pilipildahr ehu, takain pwukakeimw kesempwal ehu, oh sohte emen me kin kasalehda eh pwoson met pahn nsensuwedla.”*

7 Ihme kahrehda e kin kesempwal ong kumwail, pwehki kumwail kin pwoson ih; ahpw ong irail kan me sohte kin pwoson ih, “takai me sounkou ihmw kan kesepwekelahro, e wialahr takain pwukakeimw me keieu kesempwal”* 8 oh “takain kadipekelekel ehu oh paip ehu me re kin pwupwukihdi.” Irail kin dipekelekel pwehki ar sohte kin peikiong mahseno. Iei imwila wet me pahn lelohng irail. 9 Ahpw kumwail iei “keinek pilipil ehu, pwihn en samworo oh nanmwarki, wehi sarawi ehu, pwihn en aramas ehu me Koht ketin sapwellimankilahr, pwe kumwail en lohkiseli wasa koaros irair kaselel kan”* en Meno me ketin malipei kumwail sang nan rotorot ong nan sapwellime marain kaselel. 10 Mahso kumwail kaidehn sapwellimen Koht, ahpw met kumwail iei sapwellime; mahso kadek kalahngan sohte kohieng kumwail, ahpw met kumwail aleier kadek kalahngan.

11 Kompoakepahi ko, I kangoangehkin kumwail nin duwen mehn liki kei oh mehn keiru kei, kumwail en kin liksang ineng en uduk kan me kin pelipelian kumwail.* 12 Kolokol amwail wiewia mwahu nanpwungen tohnsampah, pwe ni arail kin karaunehki kumwail me dene kumwail aramas suwed kei, re pahn kilangki masarail amwail wiewia mwahu kan, oh ni imwio, re pahn kalinganahda Koht ni rahn me e pahn ketin kasawih aramas akan.

13 Pwehki Kauno, kumwail uhpahiong aramas koaros me ahneki manaman,* mehnda ma pil nanmwarki men pwehki eh lapalap sang kumwail 14 de kepina kan me pekederdo sang rehn nanmwarkio pwe en kaloke aramas suwed kan ahpw kapinga irail kan me kin wia me mwahu. 15 Pwe iei kupwuren Koht kumwail en katokehdi* lokaia mwahl en aramas pweipwei kan sang ni amwail wiewia mwahu. 16 Kumwail en wia aramas saledek kei, oh kumwail dehpa doadoahngki amwail saledek pwehn wia mehn pwaindi* wiewia suwed, ahpw doadoahngki nin duwen ladu kan en Koht. 17 Wauneki soangen aramas koaros, poakohng riamwail kan koaros, lemmwiki Koht oh wauneki nanmwarkio.

18 Ladu kan en uhpahiong arail soumas akan ni wahu mehlel, kaidehn ong irail kante me mwahu oh toupahrek ahpw pil irail kan me apwal en kaperenda. 19 Pwe Koht kin ketin kupwurperenki emen eh kin dadaur pahn kahpwal* oh lokolok ni eh sohte dipada pwehki eh nsenmwakelekel mwohn Koht. 20 Pwe kamwahu dah mie ma kumwail kamakamki dihp ahpw dadaurete? Ahpw ma kumwail dadaur pahn lokolok pwehki amwail wia me mwahu, Koht pahn ketin kupwurperenki met.

21 Ni mehlel, kumwail aleier malipilip wet, pwehki Krais pil ketin lokolongkin kumwail, oh ketikihdiong kumwail mehn kahlemeng ehu pwe kumwail en idawehn mwahu dahme e kin ketin wia.* 22 E sohte ketin wiahda dihp, sohte pil widing ehu dierek sang nin doauese. 23 Ni ahnsou me aramas akan kin kauwe ih, e sohte ketin kauwe irail. Ni ahnsou me e kin ketin lokolok, e sohte ketin kamasak irail kan me kin kaloke ih, ahpw e ketin mweidala pein ih ong Meno me kin ketin kadeikada ni pwung. 24 E ketikidahng dipatail kan nin kahlepeo pohn tuhkeo, pwe kitail en saledek sang dihp oh momourki mour pwung. Oh “pwehki sapwellime ohla kan kumwail mwahula.” 25 Pwe kumwail rasehng sihpw kan me salongalahr, ahpw met kumwail pwurodohng rehn silepen sihpwo oh sounapwalih amwail mour.*

3 Pil duwehte, kumwail lih pwopwoud kan, kumwail uhpahiong amwail pwoud kan, pwe ma ekei sohte kin peikiong mahseno, re pahn pwosonla sang ni amwail wiewia kan ahpw kaidehn sang ni amwail lokaia, 2 pwehki arail kin kilang amwail tiahk mwakelekel iangahki wahu laud. 3 Kumwail dehr kin kapwatahda mas liki me duwehte ingihng en pitenmoang oh kapwatki kohl de likawih likou kaselel, 4 ahpw kumwail en kapwatkihda dahme mi loalamwail, me iei meleilei oh mpahi, mehn kapwat me sohte kak mwerpeseng, me kin uhdahn kesempwal mwohn silangin Koht. 5 Pwe ih duwen lih sarawi en mahs ako me kin koapworopworki Koht ar kin kapwatahda pein irail oh uhpahiong arail pwoud kan, 6 duwehte Sara eh kin peikiong Eipraam oh kin ekerki ih kaun. Oh kumwail wialahr nah seri kan, ma kumwail kin wiewiahte me mwahu oh sohte masepwehk.

7 Kumwail ohl pwopwoud kan, ni ahlohte kumwail en pil mihmihte rehrail ni loalokong.* Kihong irail wahu pwehki lih akan me luwet duwehte dahl kopwukopw ehu oh irail pil pahn iang kumwail sohsohki mour pwehki kadek sapan en Koht, pwe en dehr mie mehkot me pahn kerempwa amwail kapakap kan.

8 Pwe en kaimwisekala, kumwail koaros en ahneki madamadau teieu, iang iangamwail kan nan arail lokolok, ahneki limpoak en pirien, poakeirailla oh kin aktikitik. 9 Kumwail dehr dupungki me suwed ong me suwed de kauwe ong kauwe. Ahpw kumwail wia me mwahu,* pwe Koht ketin malipei kumwail ong ni ahl wet, pwe en ketin kapaiakumwailda.

10 Pwe “mehmen me kin poakohng mour oh men kilang rahn kan me mwahu anahne silehsang lowe me suwed oh silehsang kilin ewe lokaia widing. 11 E anahne sohpeisang me suwed oh wia me mwahu; e anahne rapahki popohl oh nantihongete kolokol met. 12 Pwe silangin* Siohwa* kin mahmahsanih me pwung kan, oh e* kin ketin karonge arail kapakap ni ngidingid, ahpw Siohwa* kin ketin sohpeisang irail kan me kin wia me suwed.”

13 Ni mehlel, ihs me pahn kauweikumwailla ma kumwail pahn ngoangki wia me mwahu? 14 Ahpw ma kumwail pil lelohng lokolok pwehki me pwung, kumwail perenda. A kumwail dehr kin masak dahme re kin masak,* de pil salohkihda kowahlap. 15 Ahpw kumwail kasarawihala Krais nin duwen Kaun nan mohngiongimwail, oh onopada ahnsou koaros pwe kumwail en sapeng irail koaros me kin idek rehmwail kahrepen koapworopwor me kumwail ahneki, ahpw kumwail wia met ni mpahi oh wahu laud.

16 Kolokol amwail nsenmwakelekel, pwe ni soahng sohte lipilipil me aramas kauwehkin kumwail, irail en sarohdi pwehki amwail wiewia mwahu nin duwen ladun Krais kei. 17 Pwe ma iei kupwuren Koht kumwail en lokolok pwehki amwail wiewia mwahu, e mwahusang amwail lokolok pwehki amwail wiewia suwed. 18 Pwe Krais pwoula pak ehute ong dihp kan, aramas pwung men ong aramas akan me sapwung, pwe en ketin kahreikumwaillahng rehn Koht. E ketin kamakamala ni paliwar,* ahpw ketin iasada nin duwen ngehn emen. 19 Oh ni eh wia ngehn emen, e ketila oh kalohk ong ngehn akan me selidi, 20 me sapeik ni mwehin Noha ni ahnsou me Koht ketin awiawih ni kanengamah,* nindoken warihmwo eh wie kokou, me aramas malaulau kei mi loale, iei aramas* welimen me pitsang pihlo.

21 Papidais, me pahrekiong met, pil kin komourkumwailla ahnsou wet (kaidehk sang ni kihsang samin en paliwar, ahpw sang ni peki nsenmwakelekel rehn Koht), pwehki iasadahn Sises Krais. 22 E kin ketiket ni palimaun en Koht, pwe e ketidalahr nanleng, oh tohnleng kan, irail kan me ahneki manaman oh irail kan me ahneki kehl kin uhpahiong ih.

4 Pwehki Krais eh ketin lokolok ni paliwar,* kumwail pil kakehlailihkumwailda ni elen madamadauohte;* pwehki aramas me kin lokolok ni paliwar uhdihsangehr wia dihp, 2 pwe erein luhwen eh ahnsoun mour ni paliwar,* e solahr pahn kin momourki ineng en aramas, ahpw kupwuren Koht. 3 Pwe e itarehr ahnsou me kumwail doadoahngkilahr ong amwail wia dahme tohnsampah kin wiewia ni ahnsou me kumwail kin wia me suwed ni ngidingid,* sohte kak kaunda ineng kehlail kan, sakau daulihala, wia kamadipw mwoarongorong kan, siai en kang sakau oh wia tiahk kasaut* en pwongih dikedik. 4 Irail kin pwuriamweikihla amwail solahr kin iang irail wia wiewia suwed kan me re kin wia, ihme kahrehda re kin kauwehkin kumwail. 5 Ahpw aramas pwukat pahn pakadeingkihda arail wiewia kan rehn meno me ketin kaunopadahr en kadeikada irail kan me momour oh pil irail kan me melahr. 6 Ni mehlel, ih kahrepen rongamwahwo eh pil kalohk ong irail me melahr akan,* pwe mehnda ma re pakadeingkihda mwomwarail sang ni madamadau en aramas, re kak mour pahrekiong sapwellimen Koht manaman* sang ni madamadau en Koht.

7 Ahpw imwin mehkoaros kerendohr. Kahrehda, kumwail en ahneki madamadau pwung oh mwasamwasahn* en kin kapakap. 8 Mwohn mehkoaros, kumwail en uhdahn limpoakpene, pwehki limpoak kin pwaindi dihp tohto. 9 Kumwail kasamwo emenemen ni soh kaulim. 10 Ni uwen me emenemen alehkihdi kisakis ehu, en papahki emenemen nin duwen sounapwalih mwahu en sapwellimen Koht kadek sapan me kin sansalda ni soangsoangen ahl akan. 11 Ma emen kin koasoi, a en koasoi nin duwen mahsen en Koht; ma emen kin papah, a en wia met ni eh pahn kin koapworopworki kehl me Koht ketikihda; pwe Koht en ketin linganla ni mehkoaros pwehki Sises Krais. Lingan oh roson iei sapwellimen Koht kohkohlahte. Amen.

12 Kompoakepahi ko, kumwail dehr pwuriamweikihla songosong laud kan me kumwail kin lelohng me rasehng kisiniei, likamwete mehkot kapw me kin wiawihong kumwail. 13 Me weksang met, kumwail pousehlahte pereperen pwehki kumwail iang pwaisanki en Krais eh lokolok, pwe kumwail en peren oh pil perenda kowahlap ni sansaldahn sapwellime lingan. 14 Ma aramas kin kauwei kumwail pwehki mwaren Krais, a kumwail perenda pwehki manaman lingano, ei, sapwellimen Koht manaman* kin ketiket rehmwail.

15 Ahpw I sohte men emen kumwail en lokolok pwehki amwail wiahla sounkam aramas de lipirap de aramas suwed de emen me kin lidere mouren meteikan. 16 Ahpw ma emen kin lokolok pwehki eh wia Kristian men, a en dehr namenengki, ahpw en pousehlahte kalinganahda Koht sang ni eh pahn kin mour nin duwen Kristian men. 17 Pwe met iei ahnsou me kileldier ong kadeik en tepikihda tehnpas en Koht. Eri ma e tepida rehtail, ia pahn imwilahn irail kan me sohte kin peikiong rongamwahu en Koht? 18 “Oh ma e kin apwal ong aramas pwung men en komourala, a dahme pahn wiawihong aramas me sohte kin wauneki Koht oh me dipan men?” 19 Eri, irail kan me kin lokolok pwehki arail kin wia kupwuren Koht, ren kin mweidohngete Sounkapikada lelepeko pein irail* nindoken arail wiewia me mwahu.

5 Eri, pwehki I wia sounapwalih* men duwehte irail oh wiahier sounkadehdehn lokolok kan en Krais oh pil pahn iang ale lingan me pahn sansalda, I wia pekipek* wet ong sounapwalih kan nanpwungamwail: 2 Kumwail wia silepen sapwellimen Koht pelin sihpw me mi pahn epwelpamwail, oh papah nin duwen sounapwalih kan* kaidehn pwehki idihd, ahpw pwehki pein nsenamwail mwohn Koht; kaidehn pwehki amwail mwahuki rapahki pein kamwahupamwail, ahpw pwehki ngoang; 3 oh dehr kin men kaunda irail kan me Koht ketin sapwellimanki, ahpw wiahla mehn kahlemeng ong pelin sihpwo. 4 Oh ni ahnsou me silepe lapalap en sihpw kan pahn pwarada, kumwail pahn ale nihn lingan me sohte kin sohrala.

5 Pil duwehte kumwail mwahnakapw kan, kumwail uhpahiong ohl mah kan.* Ahpw kumwail koaros en kasalehda aktikitik* nanpwungamwail pwehki Koht kin ketin uhwong me aklapalap kan, ahpw e kin ketikihong kadek sapan me aktikitik kan.

6 Eri, kumwail pein karakarahkala pahn limen Koht manaman, pwe en ketin kasapwilkumwailda ni ahnsou me konehng, 7 nindoken amwail patohwanohng ih amwail pwunod akan koaros, pwehki eh kin ketin nsenohkin kumwail. 8 Kumwail loalokongla oh mwasamwasahn! Amwail imwintihtio Tepil, kin kohkohseli duwehte laion emen me kin weriwer, raparapahki en kadallehla emen. 9 Ahpw kumwail pelianda ih ni pwoson kehlail, pwe kumwail ese me riamwail kan koaros nan sampah pil kin lelohng soangen lokolok me kumwail pil kin lelohng. 10 Ahpw mwurin amwail pahn lokolok ahnsou kis, Koht en kadek sapan koaros, me ketin malipeikumwaildohng nan sapwellime lingan poatopoat ni amwail miniminiong Krais, pein ih pahn ketin kanekehla amwail kaiahn. E pahn ketin katengeikumwaildi, e pahn ketin kakehlaikumwailda oh e pahn ketkinkumwaildiong pohn poahsoan teng. 11 Kehl iei sapwellime kohkohlahte. Amen.

12 Sang Silpanus* me I kin wiahki riatail me lelepek, I ntingwohng kumwail ni mwotomwot pwe en kangoange kumwail oh kihong kumwail mehn kadehde mehlel ehu, me sapwellimen Koht kadek sapan ong kumwail me mehlel. Kumwail tengediong met. 13 Lih* me mihmi nan Papilon, me pilipildahr men me duwehte kumwail, kadarewei eh rahnmwahu oh pil Mark, nei pwutak. 14 Kumwail rahnmwahukipene metik en pirien.*

Popohl en kin ieiang kumwail koaros me kin miniminiong Krais.