KERIAUN KISINLIKOU EN PITER

1 Saimon Piter, sapwellimen Sises Krais ladu oh wahnpoaron, ong irail kan me ahnekier pwoson me uhdahn kesempwal duwehte aht* pwehki pwung en atail Koht oh Sises Krais, atail Sounkomour:

2 Kadek sapan oh popohl en lalaudla rehmwail sang ni loalokong pwung en Koht oh Sises, atail Kaun, 3 pwe roson en Koht kin kihong kitail* soahng koaros me kin sewese kitail en mour poadidiong Koht pwehki loalokong pwung en Meno me ketin malipehkin kitail sapwellime lingan oh kupwuramwahu. 4 Pwehki sapwellime lingan oh kupwuramwahu, e ketikihong kitail* inou kan me uhdahn kesempwal oh kaselel, pwe sang ni mepwukat kumwail en iang ale sapwellimen Koht lingan, ni amwail pitsang suwed en sampah me ineng suwed kin kahrehda.

5 Ong ni kahrepe wet, nantihong wia uwen amwail kak pwe kumwail en kapatahiong amwail pwoson kamwahu, oh ong amwail kamwahu loalokong, 6 ong amwail loalokong kaunda pein kumwail, ong amwail kaunda pein kumwail dadaur, ong amwail dadaur poadidiong Koht, 7 ong amwail poadidiong Koht limpoak en pirien, ong amwail limpoak en pirien limpoak ong koaros. 8 Pwe ma kumwail direkihla mepwukat, kumwail sohte pahn dangahngahla de sohte wah nin duwen loalokong pwung en atail Kaun Sises Krais.

9 Pwe ma emen sohte ahneki mepwukat, e maskun oh sohte kin men kilang maraino,* oh e pil manokelahr me e mwakelekelsangehr eh dihp en mehn mahs ako. 10 Eri riei ko, wia uwen amwail kak koaros pwe amwail malipilip oh pilipil en pweiong kumwail, pwe ma kumwail pahn kin wiewiahte mepwukat, kumwail sohte mwahn pahn lohdi. 11 Ni mehlel, iei ahl wet me kumwail pahn alehkihdi kapai laud en pedolong nan Wehi poatopoat en atail Kaun oh Sounkomour Sises Krais.

12 Iei kahrepen ei koasoanehdi en kin katamankin kumwail mepwukat ahnsou koaros, mehnda ma kumwail ese mepwukat oh poadidier teng nan padahk mehlel me kumwail sukuhlkier. 13 Ahpw I kin lemeleme me mehkot pwung ehu ei kin katamankin kumwail mepwukat erein ei kin mihmi nan impwalet,* 14 pwe I ese me I pahn kereniong kohkohsang impwal wet, duwen me atail Kaun Sises Krais pil ketin padahkihong ie ni sansal. 15 Ahnsou koaros I pahn wia uwen ei kak pwe mwurin ei pahn mweselda, kumwail en kak pein tamanda* mepwukat.

16 Soh, se sohte kin idawehn soai likamw me aramas wiahda ni at padahkihong kumwail duwen roson oh ketier en atail Kaun Sises Krais, ahpw se pein kilangki masat sapwellime lingan. 17 Pwe e ketin alehdi sang rehn Samatail Koht wahu oh lingan ni ahnsou me soangen mahsen pwukat* peidohng reh sang ni wasa lingalihngie, mahsanih: “Iet nei Pwutak kompoake, me pein ngehi kin kupwurperenki.” 18 Ei, se rong mahsen pwukat eh peipeidihdo sang nanleng nindoken at mihmi reh nin nahna sarawio.

19 Ihme kahrehda se uhdahn kamehlelehla me kokohp kan pahn pweida, oh e konehng kumwail en tetehk mwahu kokohp kan me duwehte lamp ehu me kin dakedaker wasa rotorot (wasa lao rahnpeseng oh usuhn rahn pwarada) me iei nan amwail mohngiong. 20 Pwe kumwail uhdahn ese met, me sohte kokohp ehu nan Nting Sarawio kin pwilsang ni madamadau en aramas. 21 Pwe saikinte pak ehu me aramas emen koasoiahda kokohp ehu sang ni pein nsene, ahpw sapwellimen Koht manaman* me kin kaweid aramas akan pwe ren koasoia mahsen en Koht.

2 Ahpw soukohp likamw ekei pil pwarada nanpwungen mehn Israel kan, duwehte eh pahn miehla sounpadahk likamw akan nanpwungamwail. Irail pwukat pahn kawailong pwihn kan me pahn kauweikumwailla, oh re pil pahn kahmahmkihla meno* me pwurehng pwainirailda, oh ihme re pahn kahrehkidohng pohrail kaupahr mwadang. 2 Patehng met, me tohto pahn idawehnla arail kin wia me suwed ni ngidingid,* oh irail pahn kahrehda aramas akan ar pahn kin kauwe elen me mehlelo. 3 Oh pwehki ar mehwo, re pil pahn isanekihla pitihekin kumwail lokaia likamw kan. Ahpw arail kadeik me koasoandier mahsie sohte kin pwapwand, oh re uhdahn pahn kasohrala.

4 Ni mehlel, Koht ketin kaloke tohnleng kan me dipada oh ketin keseiraillong nan Dardarus,* salihkinirailpene selmete* nan rotorot mosul pwe ren nekinek ong kadeik. 5 Oh e ketin kaloke sampah en kawao, ahpw e ketin kapitala Noha, sounkalohki pwung, iangahki aramas isimen, ni ahnsou me e ketikihdohng pohn sampah ehu me diren aramas dipan nohlik lapalap ehu. 6 Oh sang ni eh ketin karoangehkihla douluhl kahnimw kan en Sodom oh Komora kisiniei lao pehste me luwehdi, e ketin kadeikirahda pwe en ketin kamwomwada soahng kan me pahn wiawihong irail me dipan akan. 7 Oh e ketin doarehla aramas pwungo Lohd, me nsensuwedkihla kowahlap ahn aramas suwed kan ar kin wia me suwed ni ngidingid*⁠— 8 pwe ehuehu rahn, aramas pwung menet kin uhdahn nsensuwedkihla eh kin kilang oh rong arail wiewia suwed kan erein eh kin koukousoan nanpwungarail. 9 Eri ahpw Siohwa* ketin mwahngih duwen eh pahn ketin kapitasang nan kahpwal aramas akan me kin poadidiong Koht, ahpw e pil ketin mwahngih duwen eh pahn ketin nekinekid aramas suwed kan ong kasohrala* ni rahnen kadeiko, 10 ahpw mehlel irail kan me kin raparapahki meteikan pwe ren kasamineirailla oh kin mwamwahliki irail kan me ahneki manaman pohrail.

Re me loallap oh keptakai, oh re sohte kin masak irail kan me Koht ketin kawauwihala, 11 ahpw mendahki tohnleng kan ar kehlail sang oh manaman sang irail, re sohte kin kauwehkin irail lokaia kamedek, pwehki ar wauneki Siohwa.* 12 Ahpw aramas pwukat rasehng mahn akan me sohte kin madamadau oh kin mwekidki ar pepehm oh ipwidiong poaropoardi oh kamwomwmwomwla, kin kauwe soahng kan me re sohte wehwehki. Re pahn mwomwkihla pein arail elen mour suwed, 13 oh ale lokolok nin duwen pweinen arail elen mour suwed.

Re kin wiahki mehkot kaperen en kaitarala soahng kan me paliwararail kin inangih, mehnda ma pil nin rahn. Irail duwehte mwahi oh ohla kan oh kin perenki wia padahk likamw kan nindoken arail kin iang kumwail kamadipw. 14 Pwoaren masarail kan me diren kamwahl oh re sohte kak uhdihsang wia dihp, oh re kin kasongosonge me luwet akan. Mohngiongirail kaiahndahng noahrok. Re wia seri riahla kei. 15 Re wetsangehr ahl ineno oh salongalahr. Re idawehnlahr elen Palaam nein Peor, me kin poakohng pweinen wiewia sapwung, 16 e ahpw ale peneu pwehki eh kauwehla dahme pwung. Dongki men me sohte kak lokaia ahpw lokaia ni ngilen aramas pwe en kauhdihsang ahn soukohpo eh wiewia pweipwei.

17 Irail pwukat iei utuhnpihl madekeng kan oh pwoaiken pahnlahng kan me kin ipirengkiseli melimel, oh rotorot mosul wie nekinek ong irail. 18 Irail kin wiahda koasoi en pohnmwahso kei me sohte audepe. Ni arail kin doadoahngki ineng suwed oh wia me suwed ni ngidingid,* re kin kasonge aramas akan me ahpwtehn mweidohsang irail kan me kin mihmi nan mour sapwung. 19 Ni arail kin inoukihong irail saledek, pein irail kin wia lidun dihp; pwe ma emen kin lohdi pahn emen, e wialahr eh lidu.* 20 Ni mehlel, ma mwurin arail pitlahsang samin en sampah pwehki loalokong pwung en Kaun oh Sounkomour Sises Krais, re ahpw pwurehng pidada soahng pwukat oh lohdi pah, ni imwila, arail irair pahn suwedsang nin tapio. 21 Arail sohte esehla ni pwung ahl me pwung pahn mwahusang arail esehla, a mwuri re sohpeisang kehkehlik sarawi me re alehdiero. 22 Dahme pweida rehrail kadehdehda duwen pwung en lepin padahk wet: “Kidi kin pwurehng kang eh mwus, oh pwihk me duhduhwer kin pwurehng tapwur nan pwelmatak.”

3 Kompoakepahi ko, met iei nei keriaun kisinlikou me I ntingkiwohng kumwail duwehte nei keieun kisinlikowo, me I men pangenki amwail koahiek en madamadau mehn wia kataman ehu ong kumwail, 2 pwe kumwail en tamanda dahme soukohp sarawi ko koasoiaier* oh kehkehlik en Kauno oh Sounkomour sang rehn amwail wahnpoaron ko. 3 Ahpw mwohn mehkoaros, kumwail en ese duwen met, me ni imwin rahn akan, sounkepit kan pahn kohkihdo arail kepit, oh pahn wonlahte nan pein arail ineng kan 4 oh kin nda: “Ia inoupen eh ketieren? Sohte mehkot me wekila sang nin rahn me samatail mehn mahs ako melahr,* mehkoaros kin duweduwehte sang ni tepin Koht eh ketin kapikada aramas.”

5 Pwe irail kin men pohnsehsehla ire mehlel wet, me mahsie, pwehki mahsen en Koht, lahng oh sampah poadada teng sang nan pihl oh nanpwungen pihl kan; 6 oh pwehki mepwukat, sampah en ahnsowo kasohrala ni nohlik eh wiawi. 7 Ahpw sang ni mahsenohte, lahng oh sampah en ahnsou wet kin nekinek ong kisiniei oh pil kin nekinek lao lel ni rahn en kadeik oh kasohralahn aramas suwed kan.

8 Ahpw kompoakepahi ko, kumwail dehr manokehla mehkotet, me rahn ehu rehn Siohwa* kin duwehte sounpar kid oh sounpar kid kin duwehte rahn ehu. 9 Siohwa* sohte kin ketin pwapwand en kapwaiada sapwellime inou, duwen ekei ar kin lemeleme, ahpw e kin ketin kanengamahiong kumwail pwehki e sohte kin ketin kupwurki emen en kasohrala ahpw e ketin kupwurki aramas koaros en koluhla. 10 Ahpw rahnen Siohwa* pahn leledo duwehte lipirap emen, me nanleng pahn mwadang sohrala ni ngiringirisek en nansapwe, ahpw soahng kan me wiahda lahng oh sampah pahn peipeseng pwehki ar karakar mwuledek, oh sampah oh doadoahk kan me mihmi ie pahn sansalda.

11 Pwehki mepwukat koaros pahn peipeseng nin duwen met, medemedewe soangen aramas dah me konehng kumwail en wia ni wiewia kan me sarawi oh me pid poadidiong Koht, 12 nindoken amwail kin awiawih oh tamatamante* ketidohn* rahnen Siohwa,* me lahng pahn ohkihla mpwulen kisiniei oh soahng kan me wiahda lahng oh sampah pahn peikipeseng karakar mwuledek! 13 Ahpw mie lahng kapw oh sampah kapw me kitail kin awiawih nin duwen sapwellime inou, wasa me pwung pahn mi ie.

14 Eri kompoakepahi ko, pwehki kumwail kin awiawih mepwukat, kumwail wia uwen amwail kak pwe ni imwio en sohte mwahi kis oh sohte sapwung kis rehmwail oh kumwail en kin popohl mwohn silangin Koht. 15 Patehng met, kumwail en kin wiahki kanengamah en atail Kaun nin duwen komourpamwail, duwen riatail kompoak Pohl eh pil ntingkiwohngkumwailehr nin duwen erpit me kohieng ih. 16 E kin koasoia duwen soahng pwukat duwehte me e kin wiahiong nah kisinlikou kan koaros. Ahpw ekei soahng pwukat kin apwal en wehwehki, oh me pweipwei* oh luwet kan kin wekidala soahng pwukat, duwehte me re pil kin wiahiong iren Nting Sarawi teikan. Met pahn imwikihla arail kasohrala.

17 Eri kumwail kompoakepahi ko, pwehki kumwail eseier loalokong wet, kumwail kaleke pwe aramas suwed pwukat en dehr kahrehiong kumwail en idawehnirailla pwehki arail sapwung kan oh pwupwuweisang poahsoan me kumwail katengetengdiongehr. 18 Ahpw kumwail wonlahte kekeirda ni kadek sapan oh loalokong en atail Kaun oh Sounkomour Sises Krais. Lingan en kohwong ih met oh pil kohkohlahte. Amen.