Me Pid Paipel Wet

Paipel ntingdier sang ni kaweid en Koht ong ni lokaiahn Ipru, Aramaik oh Krihs. Pwe “tohnwehi koaros” en paiekihda Mahsen en Koht, Paipel anahne kawehwehdiong ni lokaia tohto. (Madiu 24:​14) Pwuhk rieisek isuh sang Madiu lel Kaudiahl adaneki “Nting Sarawi kan en Kristian ni Lokaiahn Krihs” pwehki pwuhk pwukat tepin ntingdi ni lokaiahn Krihs, oh Koht ketin kamwakid Kristian kan nan mwehin wahnpoaron ko en ntingihedi pwuhk pwukat.

Kawehwe en Sampah Kapw en Nting Sarawi kan en Kristian ni Lokaiahn Krihs tepin pwarada ni lokaiahn Wai nan 1950. Pali laud en audepe kan kohsang nting en Paipel ndand ehu ni lokaiahn Krihs me Westcott oh Hort wiahda, me kin pwungiong pali laud en pelien nting kan en mahsie ni lokaiahn Krihs. Kawehwe en Sampah Kapw kin ni lelepek kawehwehdi nting en Paipel ni lokaiahn Krihs ni uwen me kak. Kawehwehn lokaiahn Pohnpei wet kin kohsang kawehwehn lokaiahn Wai en pahr 2013, oh e kin nantihong idawehn soangen lelepek wet.

Mwaren Koht, Siohwa, kin pwarada pak 237 nan Kawehwe en Sampah Kapw en Nting Sarawi kan en Kristian ni Lokaiahn Krihs. Pwehki kesempwalpen kasarawien mwaren Koht oh anahnepen aramas koaros ar pahn likweriong mwaro pwe ren komourala, kawehwe wet kapwurehiong mwaren Siohwa wasa me uhdahn kin mi ie nan Paipel.​—Madiu 6:9; Rom 10:⁠13.

Ahd wet, Kawehwe en Sampah Kapw, kin poahsoankihda sapwellimen Koht inou duwen sampah kapw pwung ehu me aramas koaros pahn paiekihda. (2 Piter 3:​13) Sounkawehwe kan en doadoahk wet, me kin poakohng Koht me ketin wiahda Paipel, pehm me re ahneki pwukoa kesempwal mwohn silangi en kasalehda ni pwung sapwellime madamadau kan oh mahsen kan ni uwen ar kak. Se kapakapki me kawehwe wet pahn uhdahn katapan ong sounwadawad mehlel kan me kin nantihong “esehla loalokong pwung en me mehlel.”​—1 Timoty 2:⁠4.