“Dehr Kaus Irailla!”

“MA EMEN Sounkadehdehn Siohwa, de ma pil meh riemen, pahn sek pehl en amw wenihmw, dehr kaus irailla!” Corriere della Sera kaweidki. Nuhspehpao kin kosokosoia duwen wiewia ehu me pwarada nan Treviso, ni paliepeng en Itali, me emen ohlen pisines kereniong luhs sang nah mwohni me mihmi ni mwohnien Itali pohnangin rar ehu (ong mwohni en U.S. pohnangin tala 600) pwehki ah kaus Sounkadehde riemen me pwarek reh.

Nin duwen me nuhspepao kosoia, tepin lokaia me Sounkadehde ko indahiong ohl iei: “Rahnwet wia rahn mwahu ehu ong uhk. Kiht Sounkadehdehn Siohwa, oh mie mehkot kesemwpwal reht me se pahn kihong uhk.” Ni ara kosoia met, ohlen pisineso lingerengerda ritingidi wenihmwo, sohte mweidohng ren kanekehla dahme re pahn kosoia.

Ma ohlo pahn rong ira, e pahn esehda me Sounkadehde ko kohlahng imweo pwehn kapwurehla nah walet, me re diarada pohn ehu sehr nan ehu wasahn mwemweit (park). Eri sohte mehkot me Sounkadehde ko kak wia ihte en wahla waleto iangahki soang koaros me mih loale ni polis station. Rahn mwuri, polis ko wahlahng rehn ohlo nah waleto.

Nuhspepao Il Gazzettino di Treviso kosoia: “Ma emen tohror likin [Sounkadehde kan], ele e pahn. . . kihsang kanengen waleto. Ahpw kaiden Sounkadehde kan en Siohwa, me kin uhdahn mehlel.”

Dahme kin kamwekid Sounkadehdehn Siohwa kan pwe ren “uhdahn mehlel”? Met pwehki arail kin poakohng Koht oh mehn imperail kan, me kin parekiong padahk kan en Sises Krais. (Madiu 22:​37-39) Ih karepe wet me Sounkadehde kan en Siohwa kin kalohk sang ihmw lel ihmw pwehn kadehde duwen rongamwahu duwen “sampah kapw” kaselel ehu me Siohwa Koht inoukihda. Soangen rohng en koapworopwor wet me kesemwpwal sang dipwisou kan!​—⁠2 Piter 3:⁠13.