“Kitail koaros kisehn peneinei tehieu”
NAN pahr keren kan lipilipilki pelien lamalam kan oh keinek kan paraparlahr wasa koaros nan sampah. Saminimin sang soangen keinek kan karehda kamaramas kan, kalokolok kan, oh pingiping kanamenek teikan. Nin duwen ehu repot sang Amnesty International, kawehla pwung en aramas karehdahr aramas rar pak 23 sang nan sampah pwon en tangasang nan sapwarail nan 1994.
Nan Rwanda kelepw, impen aramas 500,000 kamakamla oh pohnangin aramas 2,000,000 samwa tangasang nan sapwarail mwurin wiewia suwed ah pwarada nanpwungen mehn Tutsi oh mehn Hutu. Ehu nuspehpa en Belgian me adaneki Le Soir repotki: “Sounkadehde kan en Siohwa kin keiou ale lokolok pwehki arail sohte kin men iang mahwin.” Sounkadehde kan en Siohwa sohte kin iang mahwin kan. Mendahki met, irail me epwiki kei kin kamakamla nan wiewia suwed kan. Met kin katamankihong kitail mahsan en Sises ong sapwelime tohnpadahk kan: “Pwehki kumwail kaidehn kisehn sampah, . . . sampah kailongkin kumwail.”—Sohn 15:19.
Ehu peneinei en Sounkadehde—Eugene Ntabana, eh pwoud, oh nah seri riemen— kin koukouson nan pesen kahnimwo, Kigali. Ni ah kin kawehwehiong mehn impe kan duwen en Kristian sohte kin poupali, Eugene kin kalap kosoia duwen tuhke silik, me kin wosada nan wasa karakar.—Madiu 22:21.
Eugene kin kawehwe: “Nan Kigali, tuhkeo silik kin kihda wahn rohs me weitaht, umwpwulapwul, oh ekei pak wahn rohs pwetepwet. Ahpw wahn rohs pwukat koaros kin wia kisehn tuhke tehieu. Met pil duwehte tohnsampah. Mendahki kitail kohsang soangsoangen keinek, soangsoangen pohnkil kan, de tiahk kan, kitail koaros kisehn peneinei tehieu, peneinei en tohnsampah.”
E inenin kansensuwed, pwe mendahki re wia aramas popohl kei oh sohte kin poupali, pwihn en aramas kei kemehla peneinei en Ntabana. Mendahki met, re mehla ni arail lelepek. Kitail kak kamehlele me Siohwa Koht pahn ketin kapwaiada sapwelime inou ong soangen aramas pwukat, oh re pahn iasada pwehn sohsohki sampah ehu me lipilipilki meteikan pahn sohla. (Wiewia 24:15) Eri, peneinei en Ntabana, iangahki meteikan, pahn “paiamwahu oh popohl.”—Melkahka 37:11.