Ihs me Pahn Wia Sounkalohk kan?

NAN mihding en World Council of Churches mpen sounpahr 40 samwalahro, tohnmwomwohdiso kan ale kangoang en “ale ngehn en kalohk” oh padahkiong tohnmwomwohdiso kan en “kalohk.” Sounpahr limau mwurin met, John A. O’Brien, emen Catholic clergyman, ntingidi duwen anahn ehu en katohnpadahk “en kohla rehrail” oh kaidehn ihte “mwomwohd nan ihmwatail kan.” Oh nan January 1994, Pope John Paul II koiasoia, “met kaidehn ahnsouhn “namenengki Rongamwahu, met ahnsouhn kalohk.”

Ahpw sansal, me sohte me kin men rong likwer pwukat en wia sounkalohk. Ehu artikel nan nuhspepa en Australia, Illawarra Mercury koisoia: “Irail Kadolik kan me kapwepwe nan South Coast sohte kin perenki en alasang Sounkadehdehn Siohwa kan.” Emen ohl koasoiada me kalohk, kaidehn “madamadau en Kahdolik.” Pil emen nda: “E mwahu Pelien Lamalam en padahkiong aramas teikan duwen irail, ahpw kaidehn sang arail kohla ihmw lel ihmw. Ele mwein sang ni arail kihda padahk kan nan sukuhl de kadarewei kisinlikou kan pahn pweida mwahu.” Emen kaun sang ehu mwomwohdiso kin sohte nohn wehwehki iaduwen ah pahn kawehwehda dahme pope nda. “Se men kangoange aramas akan en kapwaiada Rongamwahu.” Ahpw ma met kin wehwehki kohla ihmw lel ihmw, I sohte men koasoi duwen met.” Oralap en artikelo kin oralapieda mwahu mouren koasoi pwukat: “Kahdolik kan sohte men kapwaiada pekipek en Pope en kalohk.”

Edetehn Kristendom sohte kin iang kalohk, Sounkadehdehn Siohwa me dauli lima rar kin kapwaiada kehkehlik en Sises “kowei . . . oh katohnpadahk tohn wehi kan koaros.” (Madiu 28:19, 20; pil kilang Wiewia 5:42.) Ahr kalohk sang ihmw lel ihmw kin wiawi nan sahpw daulih 230. Rohng me irail kin kalohkiseli, iei rong en kangoange ehu, me kin kasansalehda inou kaselel kan en Paipel ong ni ahnsou kohkohdo. Dahme ke soh koasoiong irail ni ahnsou re pwaredo pwarada rehmw?