Kamwahupe Kan en Mongiong Meleilei

PALIEN SAINS esehier ahnsou werei me lingeringer kin suwediong paliweren aramas. Pohnangin sounpahr epwiki samwalahr oko, The Journal of the American Medical Association (JAMA) koasoia: ”Aramas emen pwupwute mehla ni ah lingeringerda, oh aramas pahn nda me mwein ah mongiong me luwet, oh sohte kakohng uwen pwunod me e alehdi. Sohte me leme me met kohsang ni irair ehu me soangen lingeringer wet wie kohkohpene ahnsou reirei ieu, oh eri ahpw kaluwetehla mongiongi.”

Lokaia pwukat sohte wia mehkot kapwuriamwei ong irail tohnsukuhl en Mahsen en Koht, me iei Paipel. Sounpahr 2,900 mwohn JAMA koasoia duwen keper kan me pid keh lingeringer, Nanmwarki Solomon ale kaweid en Ngehn Sarawi oh ntingihdi: “Mongiong meleilei ehu wia mour en paliwar ehu.” (Lepin Padahk 14:30) Mahsen pwukat pil mehlel ong atail ahnsou.

Sang atail kolokol lamalam meleilei, kitail kak pereikitail sang soangen soumwahu tohto me kin kalap kohsang pwunod, me duwehte mwekid en nta laud, moang medek oh soumwahu en ngolingol akan. Oh pil likin sohte alehdi soumwahu, atail ehu ong mehteikan pahn mwahula ma kitail kin song en “kihdi atail lingeringer oh kailok.” (Melkahka 37:8) Aramas akan kin mengeiong keidohng rehn Sises pwehki e sapwellimaniki irair en opampap oh nsenohkin irail. (Mark 6:​31-​34) Pil duwehte kitail, kitail pahn kihda mehn kainsenamwahu ong madamadau en aramas teikan ma kitail pahn ahnekihla mongiong meleilei.​—⁠Madiu 11:28-​30.