Koaros Kasansal Sarawi Kei?
NGEHNIN Koht, me kamwekidada ntingdi en Paipel Sarawi, kin pil kamwekidada ntingdi en pwuhk teikan me aramas kin leme me sarawi? (2 Timoty 3:16) Peidek wet kin pwarada sang ni makasihn en Jesuit en Itali (La Civiltà Cattolica, me ntingda “pahn kaweid en [Vatican] Secretariat en State” oh me re kin wiahki me mie manaman nan koasoandi en pelien Kadolik..
Makasihn en Jesuito kosoia: “Koht, ki mwekid en Ngehn Sarawi, kin kamwerehdi wahr en Mahsano nan nain irail kan me kaidehn mehn Suhs oh irail kan me kaidehn Kristian neirail pwuhk sarawi kan.” Ong mehn Jesuit kan, pwuhk “sarawi” kan me duwehte Zoroastrian Avesta, de Confucian Four Books, kin intingdi “pahn mwekid en Ngehn Sarawi, oh ihme kahrehda, nan ekei irair re audaudki ‘kasansal sarawi ehu.’”
Ahpw, artikelo pil kihda ehu kawehwe. “Kaidehn soahngen pwuhk sarawi pwukat koaros kin audaudki mahsan en Koht,” artikelo kosoia, oh pil kapataiong me irail ko me ntingihda pwuhk pwukat kin “mih pahn mwekid en wasa kan me kin kamehlele Koht tohto sang emente de kin mih pahn manaman en padahk en aramas” me kin kamwekid arail mour oh wiewia. Nin duwen Marco Politi, emen soun nuhs en wiewia kan en Vatican ong nuhspepa en Itali me adaneki La Repubblica, kosoia me mwekid wet “ritingda ire kan me mahs sohte kin wiawi nanpwungen sarawi en Kadolik oh kaudok laud teikan,” re pwurelahng ngehnin kaminiminpenen kapakap en soangen pelien lamalam kan duwehte me wiawi nan Assisi nan 1986, me John Paul II utungada.
Siohwa kaidehn Koht en liseliping oh Koht en ping men. (1 Korint 14:33) Ihme kitail sohte kak ni pwung nda me ah ngehn sarawi de kehl manaman, pahn kamwekidada ntingdahn pwuhk kan me sohte kin pahrekiong sapwellime Mahsan, Paipel. Ni ah sohte kangoange miniminpenen nanpwungen “tiahk en kaudok kan,” me wekpeseng, Kristian wahnpoaron Pohl ntingihdi me mie “koapworopwoar teieu . . . , Kaun tehmen, pwoson tehieu, pepdais tehieu.”—Episos 4:4, 5.
“Koapworopwoar tehieuwo” kin poahsonda pohn pwosoon Sises Krais. Paipel ni pwung mahsanih: “Sangete reh me komourpen aramas kak dierekdahsang, pwe ihte mwar wet me Koht ketikihong aramas akan, pwe en wia Sounkomourpatail nin sampah.” (Wiewia 4:12) Sohte “pwuhk sarawi” teikan me kin kasalehda me Sises iei poahsonen pweidahn kupwuren Koht kan. Ihte ma kitail pwungki me Paipel iei Mahsen en Koht eri e kak padahkiong kitail duwen sapwellimen Siohwa Koht koasoandi limpoak en komour.—Sohn 17:3; 1 Deselonika 2:13.