Weuwa Mehn Wisik ni Ansoun Pwulopwul

NAN AHNSOU “apwal pwukat,” me pwulopwul kan kin mihla pahn kapwunod tohto. (2 Timoty 3:1) Rahn koaros re kin lelohng koasoi kan me kin kangoange tiahk en nenek, simok, oh soangen tiahk suwed teikan. Irail ko me kin idawehn kosonned en Paipel kin ale kapaikok pwehki arail sohte kin men iang wia soahng suwed pwukat, oh ekei Kristian kin lemeleme me e mengei en dukulahte pahn kasongosong pwukat pwehn irehdi kapailok kan.

Kerenlahng ni imwin senturi keisuh B.C.E., Seremaia ntingihdi: “Oh me mwahu weuwa mehn wisik ni ansoun pwulopwul.” (Koul Kedepwidepw kan 3:27, New World Translation) Ia wehwehn wasaht? Me sukuhliki e apwaliehla kasongosong kan ni ansoun pwulopwul pahn sewese emen en powehdi kahpwal akan en mour en aramas laud. Imwintihti kan, mendahki kansensuwed, pahn uhdahn wiawihong Kristian koaros me pwulopwul oh me mah. (2 Timoty 3:12) Ahpw kapai kan en mour lelepek kin uhdahn laud sang peren mwotomwot me emen kin kesehkihla pwoson.

Ma kowe emen me pwulopwul, en kehlail pahn kasongosong kan pwehki pwoson. Ni ahnsou me ineng en men wia tiahk sapwung kin pwarada, dehr kahmahmkihla ahmw pwoson. Mendahki ni soangen ahnsouwo e pahn apwal en wia met, nan ahnsou kohkohdo, ke pahn pitsang kapwunod tohto. Sises inoukihda: “Kumwail kohdo rehi . . . I ahpw pahn kommoaleikumwailla. Kumwail ale oh kapaikada ei mehn wisiket, oh kumwail padahngki sang ie, pwe I me opampap oh nan kapehd karakarahk.”​—Madiu 11:29, 30.

Pohnese me kahpwal akan pahn pwarada pwehki ahmw momourki kosonned kan en Paipel. Ni ahmw wia met e pahn kihong uhk elen mour me keieu mwahu ahnsouwet oh koapwoaroapwoar mehlel ong ahnsou kohkohdo. Nin duwen me Paipel mahsanih, “Sampah wet oh mehkoaros nin sampah me aramas kin inengieng kin sosohrala; ahpw me kin kapwaiada kupwur en Koht pahn momour kohkohlahte.”​—1 Sohn 2:17.