‘I Kin Diar Silipei Rehn Koht’
NAN “ahnsou apwal” pwukat, kasongosong oh kapwunod kin wie kekeirada. Karasepe ehu, atail wiewia mehlel pahn lelohng nan kasongosong nan wasahn doadoahk. Atail tiahk mwakelekel pahn lelohng kasongosong rehn iengetail tohnsukuhl kan. Oh atail mour lelepek kin kalap lelohng kasongosong sang sampah samin ehu.—2 Timoty 3:1-5.
Souninting en Paipel Asap kin pil mour ni ahnsou ehu me wiewia suwed inenen rek. Ekei dih en ah ahnsouwo kin pil suweiki arail wiewia suwed kan. Asap ntingihdi: “Re kin kapwatki aklapalap duwehte elin kapwat nin tepin wararail oh lemei me wia arail likou puhp. Re kin kouruhrki mehteikan oh koasoakoasoiapene duwen mehkan me suwed; re kin aklapalap oh kin koasoakoasoiapene duwen ar pahn kauwe mehteikan.” (Melkahka 73:6, 8) Kitail soh kin kilang met?
On irail ko me kin inengieng wia dahme pwung, soangen wiewia wet me inenen kapwunod, oh pil kansensuwed. Asap mwahieiki: “I kin ale lokolok rahn ehu pwon. E inenen apwal ong ie.” (Melkahka 73:14, 16) Ele komw kin pil lahneki soangen pepehm wette, ahpw en dehr nsensuwed! Asap kak powehdi me suwed kan en ahnsouwo, oh ke pil kak wia soahng wette. Ahpw iaduwen?
Asap wehwehkihda me kopwung pwung sohte kak diarek pahn kaunda soh unsek en aramas. (Melkahka 146:3, 4; Lepin Padahk 17:23) Eri ni eh sohte kauwehkihla ah ahnsou kesempwal oh kehl, oh kepwe kan songosong en kihwei sang me suwed kan limwa, e kin mwohnkihla mahs ah nanpwung rehn Koht. Asap mahsanih: “A duwen ngehi, ia uwen kesempwal en ei karanih Koht, pwe I en diar Silipei rehn Kauno, Koht (Siohwa), Wasa Lapalapie.”—Melkahka 73:28.
Rahnwet, irail ko me kin wiewiahn pisnes mwersuwed kan kin kalap paiekihda pai en kepwe kan. Me tohto kin pil suweiki arail kin mwamwahlki kosonned mwakelekel kan en Koht. Ahpw re sohte pahn pweida kohkohlahte. Asap koasoia: “Komw pahn ketikiniraildiong wasa likekiris kei oh ketin sikeniraildi pwe re en mwomwla!”—Melkahka 73:18.
Ehi, ni ahnsou me Koht kileleong, likamw, pepei, oh mwersuwed, iangahki wiewia suwed kan koaros me Kristian mehlel kan anahne liksang, pahn koakoahksang. Paipel inoukihda: “Irail kan me kin likih Kauno [Siohwa] pahn sapweniki sahpwo, a aramas suwed kan pahn koakoahksang.” (Melkahka 37:9) Nin doken met, kitail en kapwurehiong mahsen kan en sounmelkahkao me mahsanih: “Kauno [Siohwa] me silepei; ih me kelepei kehlail. Ei Koht me silepei. I kin nekinek mwahu pahn kupwure. E ketin pereiehla duwehte mehn sansar ehu; e kin ketin doareiehla oh kin ketin nekinekid ie.”—Melkahka 18:2.