“Takai Kesemwpwal en Padahk Mehlel”

“Takai kesemwpwal en padahk mehlel.” Ih duwen met me ehu kisinlikou ong rahn ohpis en Sounkadehde kan en Siohwa nan Nigeria kosoiahki makasihn tohrohr riau. Me ntingio, emen ohl pwulopwul, kawehwe:

“I ntingkiwohng kumwail ahi kalahnganki amwail nannanti en kosoia kereniong ire kan koaros me pid mouren en ehu ehu rahn nan makasihn ko Watchtower oh Awake!.

“I sounpar 17. Nan pahr samwalahro ehu radio station wasaht wiahda ehu siai en ntingih kosoipen oarelapo ‘There Is More to Love Than Sex​—⁠AIDS Is Real.’ (Limpoak Kin Wia Mehkot Me Laudsang Wendipene​—⁠AIDS Uhdahn Mie.) Koasoipen oarelap wet sohte pahn tohtokihsang lepin lokaia 400. Kisakis en mwohni 1,000 [mwohni en U.S., tala $12.50] pahn kohwong koasoio me keiou mwahu. Ahpw ni mehlel, re kosoia me, aramas pahn ntingihda koasoi kan kaidehn ihte pwehn kanakihda ehu kisakis en, ahpw, en sukuhlkihdi mehkot sang met. . . .

“I diarada ire kan duwen AIDS nan makasihn riau pwukat. Me pid duwen limpoak, mie artikel tohto me pid duwen ire wet. I doadoahngki ire kan sang nan Awake! en August 8, 1978.

“Sohte pwand mwurinte ahi kadarwei dahme ih ntingihdi, pasepengo ahpw pwuredo. I pwuriamweiki, pwe ngehi me keiou nan State kan en Cross River oh Akwa Ibom!

“Ire kan koaros me I doadoahngki kohsang nan makasihn ko. E uhdahn kaselel pwe Siohwa kin ketikihda ire kan ni ahnsou kan me konehng nan sampah wet me apwal oh suwed. Nin duwen Kristian kan, kitail ese me e wia mehkot laud en limpoak sang en wendipene. Oh, ni mehlel, mourki mour ehu me mwakelekel oh tiahk mwahu kin pere kitail sang soumwahu me duwehte AIDS.

“I sohte kak uhdisang kalahnganki ong kumwail takai kesemwpwal pwukat en padahk mehlel me kumwail sohte pwangahkihda wiahda. Siohwa en kaukaule kapaiada amwail nannanti kan ni amwail kin kaukaule wiahda soahngen makasihn kesempwal pwukat.”