Lamp ehu Mehn Kaweid uhk Pohn Elen Mour

“MAING Kauno (Siohwa), I ese me sohte mehmen me kaunda pein imwilahn eh mour; sohte aramas emen me kaunda pein eh mour.” (Seremaia 10:​23, New World Translation) Ki mahsan pwukat soukohp Seremaia kasalehda me aramas sohte kak pweida ni ar kaweid elen ahr mour ni soh sawasparail. Iawasa soahngen sawas wet kak dierek ie? Sounmelkahkao sapeng nan ah kapakap ong Siohwa Koht: “Sapwellimwomwi mahsen, iei serepei, mehn kaweid ie, oh kamarainpen elei kan.”​—⁠Melkahka 119:105.

Irail ko me kin onopki Mahsan en Koht, Paipel Sarawi, oh kapwaiada dahme e mahsanih kin duwehte emen me tepiada eh seiloak ni mensengie. Nin tepio, e sohte nohn kak kilang wasa pwehki e rotorotte. Ahpw nin doken ketipino wie kohkohda, e kakehr ekis kilang wasa. Ikmwuri, ketipino dakadahr miehr nanleng. Aramaso kakehr kilang soahng koaros ni sansal. Soahngen karasaras wet kin katamanda ehu lepin padahk en Papel: “Ahl me aramas pwung kan kin weid loale rasehng dakadahn ketipin me kin maramarainla lao rahn pwarada.”​—⁠Lepin Padahk 4:⁠18.

Iaduwen irail ko me kin soikala kaweid en Koht? Paipel mahsanih: “Ahl en me suwed kan me rotorot rasehng pwohng. Re kin pwupwudi, ahpw re sohte kin kilang dahme re dipikelekelki.” (Lepin Padahk 4:19) Ehi, me suwed kan kin rasehng ohlo me kin dipikelekel nan rotorot. Pil arail mwomwen pweida kan me mwotomwot, pwehki “loalokong en aramas, marain, oh erpit sohte wia sawas ehu ma Kauno (Siohwa) ketin uhwong uhk.”​—⁠Lepin Padahk 21:⁠30, NW.

Ihme karehda, idawen kaweid en Mahsan en Koht, Paipel. Ma komw pahn wia met, komw pahn diarada mehlel en Lepin Padahk 3:​5, 6 (NW): “Likih Kauno (Siohwa) ni mohngiongomw unsek. Dehr koapwoaroapwoarki mehkan me ke pein lemeleme me ke ese. Tamanda Kauno (Siohwa) ni omw wiewia kan koaros, oh e pahn ketin kasalehiong uhk ahl me pwung.”