Inou En Ihs Me Ke Kak Likih?
NAN 1893 ehu pwihn en kasawih mwekimwekid en aramas tuhpene ni World Fair nan Chicago pwehn kosoia dahme pahn wiawi nan ahnsou kohkohdo. (Wasao sansalda nan kilel wet.) Ni ahr kilangwohng sounpar 100 mwowe ong pahr 1993, re kohpada soahng pwukat: “Aramas tohto pahn mour lel sounpar 150.” “Imweteng kan pahn malaulaula oh mweipeseng en pwopwoud sohla pahn wiawi.” “Wiepen koperment pahn mengeila, nin duwen soahng kan me inenin lapalap kin mengeila.”
Me duwehte met, nan 1967 pwuhk ehu me oarelape kosoia The Year 2000 kohpada: “Nan pahr 2000, komputer kan pahn ahnekihla koahiok en kaparekihpene, kamwekid, de pil wia deila sang koahiok en aramas, ele pil iangahki en aramas koahiok en lemehda soahng kan.” “Lamalam me misihn pweilaud kan pahn wiahda pali laud en doadoahk en nan ihmw . . . mwomwen kak wiawi nan pahr 2000.”
En aramas sohte kak kohpada wiewia kan nan ahnsou kohkohdo kin uhdahn weksang en Koht erpit en kohpada ahnsou kohkohdo. Karaspe ehu, kaparekihpene kokohp pwukat ong dahme Paipel kohpada sounpar 2000 samwalahro me pid atail ahnsou: “Aramas pahn roporop ong pein irail, mehwo, aksuwei oh pohnmwahso; re pahn kamwakara, re sohte pahn peikiong ar pahpa oh nohno kan, oh re sohte pahn kin kasapahlkalahnganki mehkot. Re sohte pahn poadidiong pelien lamalam; irail pahn sempoak, soh mahk, karaun likamw oh pehmara, lemei, oh re pahn kailongk me mwahu; re pahn pangala iangarail kan, re pahn loaumwohmw oh kalawasa, oh re pahn inengieng pein arail peren laudsang kupwur en Koht. Re pahnkin liksansalamwahuki mwomwen atail pelien lamalam, ahpw re kin kahmahmki katepe.”—2 Timoty 3:1-5.
Kokohp en Paipel wet en “imwin rahn akan” kin wia ehu kisehn kokohp tohto kan me pweidaiehr nan atail ahnsou. Mahsan en Koht kohpada me “kilel” en ketier en Sises pahn iangahki mahwen en sampah kan, lehk en mwenge, soumwahu lusulus kan, rerrer en sahpw kan, oh kalohkpen rongamwahu en Wehin Koht nan sampah pwon.—Madiu 24:3-14; Luk 21:11.
Pwung en inou kan en Koht kin kamwekid emen sounnting en Paipel en mahsanih: “Emen emen kumwail patohwan ese nan mohngiongimwail oh ngehnomwail me Kauno (Siohwa) amwail Koht ketikihong kumwail soahng mwahu koaros me e ketin inoukidahr. E ketin kapwaiadahr inou koaros me e ketin wiahda, sohte ehu me sapwungala.”—Sosua 23:14.
Ehi, kitail kak koapworopworki me sapwellimen Koht inou kan koaros pahn ahnsou keren pweida. Wehin Koht pahn katokedi soumwahu, mwersuwed, tengala pahn wini suwed, duhpek, oh mahwen—sampah unsek pahn wiahla paradais ehu. (Melkahka 37:10, 11, 29; Kaudial 21:3, 4) Komw kak likih pweidahn kokohp wet! E kohsang rehn atail Sounkapikadao, “me sohte kak ketin likamw.”—Taitus 1:2; kaparekiong Ipru 6:13-19.
[Credit Line]
Cleveland State University Archive