Ripoht En Sounkalohk Kan En Wehio
Powehdi Kahpwal akan nan “Sahpw Me Dirki Irair Soh Kasikpe kan”
WAHNPOARON Pohl wia peidek pwukat ong Kristian akan nan Korint nan keieun centuri: “Oh ma ngilen sowi sohte dehde mwahu, ihs me pahn onopadahng mahwen? Eri, ih pil duwen rehmwail, ma amwail mahsen kapwonopwon kan sohte pahn dehdehda, ihs me pahn ese dahme kumwail ndinda? Amwail lokaia kan pahn sohrala nan wehwe.”—1 Korint 14:8, 9.
Nan Papua New Guinea, ekei pak adaneki Sahpw Me Dirki Irair Soh Kasikpe kan, Sounkadehdehn Siohwa kan kin lelong kahpwal laud kan ni ahnsou re kin pakairkihseli rongamwahu sansal en Paipel. Irail kin kalohkong aramas akan me kin doadoahngki lokaia dauli 700 oh kin ahneki soangsoangen tiahk tohto. Irail pil anahne kalohk wasa me apwal duwehte pohn nahna kan, wasa me sohte ahl akan, oh nan irair en kekeiradahn dihp. Likin kahpwal pwukat, ekei pelien lamalam kan kin uhwong, oh ekei pak kaun en sukuhl akan kin pil uhwong.
Ahpw, kaweid mwahu kan ni pali ngehn iangahki sawaspen Paipel me kin wie tohtohla ni lokaia en sahpwo kin sewese Sounkadehde kan en padahkiong aramas teikan rongamwahu ni ahl me sansal. Pali laud en ahnsou, tohnihmw akan kin perenki rong, nin duwen ripoht pwukat kin kasalehda:
• Ni tepidahn ehu pahr en sukuhl kapw, emen sounpadahk pwung men ese dahme kahrehda seri kan en Sounkadehdehn Siohwa sohte kin salute flag de koulki koul en wehi kan. E wia peidek wet ong Maiola, emen Sounkadehde papidais me mahki sounpar 13. Maiola kihda eh pasepeng ni sansal, poahsoanda pohn Paipel. Sounpadahk menet pwungki dahme nah tohnsukuhl menet sapengki pwe eh pasepeng kin poahsoanda pohn Paipel. Kawehwe me serepein menet kihda pil kohwong sounpadahk oh kaun teikan en sukuhl wet.
Mwuhr, tohnsukuhl akan wiahda koasoi mwotomwot kan (essay), oh Maiola pilada oaralap en Trinity. Dahme e koasoia me keieu mwahu nan eh class, oh sounpadahko idek reh iawasa e diarada ire pwukat ong eh ripoht. E kasalehong sounpadahko pwuhko Ke Kak Mour Kohkohlahte Nan Paradais Nin Sampah ni lokaiahn wai. Sounpadahk menet uhd kasalehong pwuhk wet class pwon, oh tohto men ale pein neirail pwuhk kan. Mandahn rahno, Maiola kihla pwuhk 14 oh makasihn 7 rehn ienge tohnsukuhl akan, oh e tepida onop en Paipel rehn tohnsukuhl silimen. En Maiola mehn akadei iei en wiahla sounkalohk kaukaule men.
• Pwihn en Sounkadehdehn Siohwa ehu me mih wasa ehu me doh sang aramas nan ehu kisin kanihmw me mih ni oaroar me karanih Port Moresby kin lelong uhwong akan sangete pahr 1970. Ahpw nan ahnsou keren re ale sawas sang rehn aramas akan me re sohte lemeleme pahn sewese irail. Pisop en United Church en wasao, pwilidak en Mehn Papua New Guinea men me ale sukuhl laud liki, kangoange tohnmwomwohdiso en ah sarawi en kihda peidek rahnen sarawi ehu. Emen ohl idek: “Mie pelien lamalam riau nan atail kousahp—United Church oh Sounkadehdehn Siohwa kan. Dahme kitail anahne wia ni ahnsou me Sounkadehdehn Siohwa kan kin pwarado ni imwatail kan?” Mwurin ahnsoukis, pisop sapengki: “Ke ese dah, I sehse dahme I pahn sapengkin iuk. Pwe, sounkadehde riemen apwtehn kohdo rehi. Ira kihong ie peidek ehu, ahpw mendahki I sukuhl laud, I sehse pasepengo. Ahpw, ira ni mengei sapengla peideko sang nan Paipel. Eri, I sohte pahn padahkiong uhk dahme ke pahn wia—I mweidong uhk en wiahda pein ahmw pilipil. Ke sohte anahne rong arail padahk ma ke sohte mwahuki, ahpw menlau dehr kaloke irail.”
Emen wiliepen Watch Tower Society me mwemweitla wasa me kisin pwihn en Sounkadehde kan kin mie ripohtki: “Kereniong koaros nan kousapw wet kin rong dahme Sounkadehde kan en Siohwa kalohki. Ekei pil kin kasamwo irail nan imwarail kan. Nan rahn pwukat, en wia kalohk wasaht mwomwen duwehte paradais.”