Pwopwoud Ni Soh Wendipene?

NI arail songosong en kapwungala padahko me dene Mery meipwonte erein ah mouren pwopwoud ong Sosep, sounmahlen oh sounpoarusda mwomwen aramas tohto kin wiahda mwomwen Sosep me e wia ohl emen me mahla douluhl. Re kose me dene me Sosep kin wiahte epwelpen Mery ahpw kaidehn ni elen pwopwoud. Ahpw nan ahnsou keren kan, Pope John Paul II wiahda padahk ehu me weksang met. E kose me dene Sosep “kaidehn ohl mah men ahnsouwo.” Ahpw, “ah unsek en loale, oh iangahki wahn kalahngan, karehong ih en mourki ah mouren pwopwoud ong Mery ni ah sohte wendi reh.”

Ma Mery men meipwon kohkohlahte, dahme karehda e inou en pwopwoudkihda? Pope sapengki: “Kitail en kihkihong me ni ahnsou me ira inouda, Sosep oh Mery pil pwungkihpene pilahn en mour nin duwen meipwon men.”

Ahpw, dahme Paipel kin koasoia kin weksang met. Rongamwahu en Madiu koasoia me Sosep “sohte kapwaiada nsenen pwopwoud ong Mery lau e naitikihada sapwellime pwutako.” (Madiu 1:​25, Catholic New American Bible, italics ours.) Mwurin ipwidi en Sises, en Sosep oh Mery pwopwoudo sohte kin mihmihte ni irair me dene ira sohte kapwaiada nsenen pwopwoud. Ehu mehn kadehdehpen met iei me mwuhr nan Rongamwahuwo, e kin kasalehda me mie rien Sises ohl oh lih kan ni pali uduk.​—⁠Madiu 13:​55, 56.

Ihme karehda, nin doken Paipel kin kasalehda me Mery meipwonte ni ahnsou me e naitikihada Sises, sohte poahsoanpen en koasoia me e meipwonte erein ah mouren pwopwoud ong Sosep.