Idipda Pihl me Mihmi nan “Pwarer Loal”

EHU lepin padahk en Paipel mahsanih: “Madamadau en aramas kin rasehng pihl me mi nan pwarer loal, ahpw mehmen me ahneki erpit kak idipasang.” (Lepin Padahk 20:5) Ni ahnsoun Paipel, e inenen apwal en idip pihl nan sahpw tohto en nan rahn pwukat. Ni ahnsou me Sises koasoiong lihen Sameria, liho idip pihl nan pwarer en Seikop, pwarer wet me loalki piht 75!​—⁠Sohn 4:​5-​15.

Nin duwen Lepin Padahk 20:5 mahsanih, irairen erpit me anahn pwehn esehla madamadau oh pepehm akan me tengla nan mongiong en aramas men, oh met pahn duwehte idipda pihl sang pwarer ehu. Met kin mehlel ong pali laud en mouren aramas akan. Karasepe ieu, ele mwein ke ese aramas akan me erein sounpar tohto kin ahneki loaloakong oh ekspiriens laud. Ma aramas pwukat sohte ni pein nsenarail men kihda ahr sawas de kaweid, ke anahne kapeidekih pwehn esehla ah lamalam. Sang ni ahmw pahn kasalehda me ke kin nsenohki, wia peidek kan, koasoi ni kamantik, ke pahn ni karasaras, idip noumw bucket nan pwarer loal en erpit.

Kaweid nan Lepin Padahk 20:5 pil kin pweida nan peneinei. Pak tohto, lih pwopwoud kan kin nda: “Ai pwoud ohl sohte kin padahkiong ie duwen eh pepehmw akan!” Oh ohl pwopwoud kin nda: “Ai pwoud lih sohte koasoiong ie!” Ni irair pwukat, erpit me anahn ong esehla madamadau me mih loal nan mongiong en ahmw pwoud. Peidek mwahu kan (Rahnwet, apwal ong uhk? Dahme wiawi? Dahme I kak wia pwehn sewese iuk?) kak tepiada koasoipene oh esehla dahme mih nan mongiong en ahmw pwoud. Doadoahngki irairen erpit pahn kakehle sahlen pwopwoud, oh ohl pwopwoud oh lih pwopwoud pahn paiekihda.