Kosonned Eisek ko

PISOP en England en Gloucester diarada me tohto sang elep en sounpadahk kan nan wasa me e kin apwapwahli, sohte kak wadiliki Kosonned Eiseko, oh persent 10 sehse depenehn nan Paipel me e ntingihdi ie. Met sounpar 450 samwalahro. Irair wet wekila ahnsouwet? Soh douluhl​—Sunday Times wiahda roporop soh lipilipil ehu ong sounpadahk kan en pelien lamalam en Anglican.

Sang rehn Sounpadahk 200, ihte meh 34 wadiliki Kosonned Eisek pwon. Emen sang nanpwungen mehteikan, lemeleme me kosonned eisek ko nohn kakos, oh mehteio koasoi me e sohte konehng atail kahpwal akan en nan rahn pwukat.

Komw ese Kosonned Eiseko de iawasa e kak dierek ie nan Paipel? Kosonned ko ntingihdi nan pwuhken Eksodus, keriau en pwuhk nan Paipel, iretikitik ehu lel 17 nan irelaud 20. Dahme ke soh wadek met? Iet ehu ahl mengei en koasoanehdi kosonned pwukat. Keieu lel kapahieu kin pid duwen atail kaudok ong Koht, kalimau kin pid duwen mour en peneinei, nempe kaweneu lel kaduwau kin pid kitail oh iengatail kan, kaeisek, kin kahrehong kitail en tehk pein mongiongatail kan. Met iei ehu kohsapahl mwotomwot ong iaduwen Kristian akan pahn kak kapwaiada mouren kosonned pwukat.

Keieu: Papahiong atail Sounkapikada kelepw. Kariau: Dehr doadoahngki dikedik kan. Kasilu: Ahnsou koaros kasalehda wahu oh kalinganada mwaren Koht. Kapahieu: Mweidong ahnsou ong mehkan me kin pid pali ngehn, oh sohte mweidong mehkot en koarompwa kitail. Kalimau: Seri kan en wauneki samamwail oh inamwail kan. Kaweneu: Dehr kemehla aramas. Kaisuh: Dehr kamwahl. Kawalu: Dehr pirap. Kaduwau: Koasoi mehlel. Kaeisek: Dehr noahrok.

Kosonned Eisek iei kisehn kosonned akan me Koht ketkihong Moses. Ahpw mouren kosonned pwukat pahn konehng ni ahnsou kohkohlahte. (Rom 6:​14; Kolose 2:​13, 14) Kahrepe, sapwellimen Sises tohnpadahk kan kin koasoia duwen Kosonned Eiseko. (Rom 13:​8-​10) Mouren aramas akan pahn peren laudsang ni ahnsowet​—oh pil sohte pahn mihla nan keper​—ma koaros kin wauneki oh kapwaiada mouren kosonned pwukat me pwilsang rehn Koht!