“Sang Ni Ahmw Seri Pwelel Ke Kin Ese Pwuhk Sarawi”
NIN DUWEN onop me saintis kan ahpwtehn wiahda, irail diarada me wia koasoakoasoaiong seri pwelel kan kin kamwekidada laud kekeiradahn arail mwahliel kan, koahiek en madamadau, oh ese powehdi kahpwal akan. Met kin keieu pid ni tepin pahr en mouren serio. International Herald Tribune ripohtki me ekei sounroporop kan ahnsouwet kin kamehlele me “ia uwen tohtohn lepin lokaia kan me seri pwelel kin rong ehu ehu rahn kin kahreong ih ni ahnsou me e pahn laudla en wia aramas loalokong, pweida nan sukuhl oh kak kapehse mwahu rehn aramas teikan.”
Lokaia kan me serio pahn rong anahne kohsang aramas men. Kaidehn TV de radio pwe met sohte kak wiliandi rongorong uhdahn aramas.
Emen saintis en mwahliel [neuroscientist] nan University en Washington nan Seattle, U.S.A. koasoia: “Ni ahnsouwet, se eseheir me sahl kan nan mwahliel kin tepida kekeirada ni tepidahn mouren aramas oh mwahliel en seri pwelel kin awihawih irair kan en pwarada pwe e pahn kak doadoahngki sahl en mwahliel pwukat. Se ahpwtehn wehwehkihda me irair wet kin tepida ni ahnsou me serio pwelel. Karasepe ieu, seri pwelel kan kin tepida sukuhliki duwen ngihlen ahr lokaia kan sang ni ahr sounpwong weneu.”
Roporop kapw wet kin siaiong lamalam en aramas teikan me seri pwelel kan pahn kak loalokongla ma re kin ken limpoak laud. E pil kin kasansalehda kesempwalpen pahpa oh nohno kan en apwaliahla mwahu ahr pwukoa me kin pid kekeiradahn seri pwelel.
Met kin katamankin kitail duwen mahsen kan en kisinlikou en wahnpoaron Pohl ong Timoty: “Ke pil ese me sang ni omw [seri pwelel] ke pil kin ese Pwuhk Sarawi, me kak kasalehiong uhk erpit me kak kahluweiukalahng nan mour soutuk.” E sansal me ahn Timoty nohno oh nohno kahlap me pwoson kin koasoiaiong Timoty nting sarawi kan ni ahnsou me Timoty seri pwelel, oh met kin keieu sewese ih en kekeirada oh wiahla laduhn Koht tohrohr men.—2 Timoty 1:5; 3:15.