“Mie Semen Pwoaik?”

EMEN SOUNNUHS nan senturi 19 kin kasalehda me pwoaik iei “kapwat pihl en sampah, me kisinieng kin wiahda.” Atail Sounkapikada kalelepek rehn ohl en mahso Sohp: “Mie semen pwoaik?” (Sohp 38:28) Koht kin ketin katakatamankihong Sohp me pwoaik kesempwalo kin kohsang reh.

Likin ah kin piripir oh lingan duwehte mehn kapwat kaselel ehu, pwoaik kin kadoadoahk nan Paipel ong kapai, kaparapar, wokien, oh doarepen mour. (Senesis 27:28; Deuderonomi 33:13, 28; Sekaraia 8:​12) Erein ahnsoun karakar nan Israel pwehki keteu sohte kin mweredi, “pwoaik en Ermon” kin komourih tuhkehn sahpwo, oh iangahki towe kan. Wahl akan oh sinoh me mih pohn koadoaken Nahna Ermon kin wiahda adi en nipwong me kin tenpene oh wiahda pwoaik. Sounmelkahkao Depit kin kapahrekiong kansenamwahu me kin kohsang pwoaik wet duwehte kansenamwahu en kousoanpene ni minimin rehn sounkaudok kan en Siohwa.​—⁠Melkahka 133:⁠3.

En soukohp Moses kaweid ong Israel kin marahra oh kansenamwahu, duwehte pwoaik. E mahsanih: “Ei pato kan pahn mweredi rasehng keteu pohn poadakapw en wahnsahpw, rasehng keteu pohn dihpw kan.” (Deuderonomi 32:2) Rahnwet, Sounkadehdehn Siohwa kan kin kalokalohngki rongamwahu en komour duwen Wehin Koht lellahng ni irepen sampah. (Madiu 24:14) Koht kin ketikihda luhko: “‘Kohdo!’ Mehmen me men nimpildahr en kohdo; en ale pilen komour nin duwen kisakis ehu, mehmen me men ale, en ale.” (Kaudiahl 22:17) Aramas rar kan en wehi koaros kin perenki ale kansenamwahu en pali ngehn wet sang rehn Koht, me kak komourih mour kohkohlahte.