Kaunen Lamalam Koaros Kin Kamehlele Dahme Re Padahngki?
EN liho pwoudo ahpwtehn mehla. Ahn liho pahdireo kawehwehiong me wiewiahn ah pwoudo ahnsou me e momour sohte nohn mwahu, ihme ohlo sohte kak mehlahte inen kohla nanleng oh ah wiewia pil sohte nohn suwed pwehn kohla nan kisiniei en ehl. Ihme kahrehda, nin duwen me pahdireo kawehwehda, ohlo kin wie lokolok lau e pahn warohng kohla nanleng. Liho kin pwain pahdireo pwehn kapakapki pwe ah pwoudo en mwadang pidoi sang nan purkatori. Liohdio kin nsenamwahuki met, oh kin lemeleme me pahdireo kin iang ahneki soahngen kamehlelohte me e ahneki.
Ke lemeleme me liohdio pahn sohla ahneki koapworopwor ma e pahn diarada me pahdireo sohte uhdahn kamehlele me aramas kin kalokolok mwurin mehla? Me tohto kin pwunodki en diarada me kaunen lamalam tohto sohte kin kamehlele dahme pein irail kin padahngki. Ehu nuhs me adaneki National Catholic Reporter, koasoiahda me e kahdaneki “en kaunen lamalam kan arail kahpwal ehu me loal sang arail tiahk en nenek me re kin wiewia,” koasoia: “Nanpwungen kaunen lamalam koaros, mie kaunen lamalam tohto me sohla kin kamehlele me Koht mie de padahk en kating kan oh kalokolok de kaiasadao . . . arail sohla kamehlele padahk pwukat wiahlahr kisehn madamadau en kaunen lamalam kan, me ong ni irair ehu duwehte ediniei.”
Pelien lamalam teikan kin pil mihla nan soahngen kahpwalohte. Ehu roporop en kaun akan en lamalam en Church of England kasalehda me kaunen lamalam tohto “sohte kamehlele tepin padahk kan en Kristian duwehte ipwidi sang meipwon men, wiewia kapwuriamwei kan en Sises oh ket keriau en Mesaia,” nuhspehpa en Australia Canberra Times ripohtki.
Sounnting en pelien lamalam George R. Plagenz kalelepek rehn sounpadahk men iaduwen e kak, ni nsenmwakelekel, wadekada padahk ehu me pein ih sohte kamehlele. Emen sounpadahk koasoia me e kin wiliandi tepin lokaia kan nan padahko me kin koasoia, “I kamehlele.” E koasoia: “I kin tepkihda padahko ni ahi kin koasoia, ‘RE kamehlele Koht Sahm Lapalahpie . . .’” Plagenz kahdaneki soahngen mwalaun wet “likamw me keieu laud nan wehiet.”
E inenen kansensuwed pwe, en kaunen lamalam kan ahr seupwoson oh likamw kin kihsang en aramas tohto koapworopworki pelien lamalam koaros. Ahpw kaidehn mette me kin wia ire kapwunod en pelien lamalam nan rahnwet. Pali moron en irail kan me kin kohla sarawi kin padahngki me Paipel iei Mahsen en Koht. Re pahn pwuriamweiki en sukuhlki me Paipel sohte kin padahngki ekei padahk kan en pelien lamalam kan?