“Ihs Me Ketikihong Nan Depwek Kan Erpit”?
“NI amwail kin udiahl depwek ehu sang kepinleng, kumwail kin mwadang nda, ‘E pahn keteuda,’ e ahpw kin pweida. Oh ni amwail kin kilang kisinieng eh uhsang ni palieir, kumwail kin nda, ‘E pahn karakar,’ e ahpw kin pweida.” Mahsen pwukat en Sises, me sounnting en Rongamwahu Luk ntingihdi, kin wia karasepen kokohp en mesenlahng me mehn mahs kan kin wiahda nan Palestine. (Luk 12:54, 55) Nan ekei irair, mehn mahs akan kin kak wadek kilel kan oh wiahda kokohp kan me pwung.
Nan rahnwet, sounkasawih mesenlahng kan (meteorologists) kin doadoahngki kepwe wiepe kan me duwehte, ni lokaiahn wai, earth-orbiting satellites, Doppler radar, oh komputer kehlail kan, pwehn songih mwekimwekid en mesenlahng erein ahnsou werei. Ahpw arail kokohp akan kin kalap sapwung. Dahme kahrehda?
Mie ire tohto me kin kahrehda apwal en kohpada pwung iren mesenlahng. Karasepe ehu, ire pwukat me kin kahpwaliala, duwehte wekidekla kan me re sehse duwehte uwen karakar de lemwlemwur, wisekisek, kehl en kisinieng, oh marahra en kisinieng oh wasa e uhsang ie. Patohngete ire pwukat iei mwekimwekid mengihtik kan en nanpwungen ketipino, depwek kan, oh sehd, me saintis kan saikinte uhdahn wehwehkihla. Ong karepe wet, kohpada iren mesenlahng kin wia pelien sains ehu me sohte kin nohn pwung.
En aramas saikinte wehwehkihla iren mesenlahng kin katamankihong kitail peidek kan me kohwong Sohp: “Mie semen keteu de semen pwoaik? Ihs me naitikihada aihs oh sinoh? . . . Ke kak wer ong depwek kan, pwe re en koaduhpwalkinuhkedi pilen keteu? . . . Ihs me ketikihong nan depwek kan erpit, oh ihs me ketikihong wehwe mwekid kapwuriamwei kan nanleng? Ihs me nohn kupwurokong pwe en wadekedi depwek kan, oh kamwerehdi keteu?”—Sohp 38:28-37.
Pasapeng en peidek pwukat koaros iei Siohwa Koht, kaidehn aramas. Ehi, mendahki aramas ele loalokong, atail Sounkapikada me erpit sang aramas. E inenen limpoak pwe e ketin kasalehong kitail sapwellime erpit nan Paipel, pwe kitail en kapwaiada pwe atail mour kan en pweida mwahu.—Lepin Padahk 5:1, 2.