Kaleke Tiahk En Pwainda De Netikihla Pwukoah Sarawi Kan!
SAIMON en Sameria kin inenen ndand nan ah kousapwo. E momour nan keieu senturi C.E., oh aramas akan kin pwuriamweikihla eh wunahni me kahrehda re kin koasoiahki ih: “Iei ih manaman en Koht, me kitail kin kahdaneki ‘Manaman Lapalap.’”—Wiewia 8:9-11.
Ahpw, mwurin en Saimon wiahla Kristian papidais men, e pohnesehda duwen ehu manaman me lapalap sang manamano me e kin kasalehda mahso. Met iei manaman me kohieng sapwellimen Sises wahnpoaron kan, me kahrehong irail en kak ketikihong mehteikan kisakis manaman en ngehn sarawi. Saimon inenen wadekala met me kahrehda e men kihong wahnpoaron kan mwohni oh peki rehrail: “Kumwa pil ketikihong ie manamanen, pwe aramas koaros me I pahn pwil peh kat powe en ale ngehn sarawi.”—Wiewia 8:13-19.
Wahnpoaron Piter lipwoare Saimon, ndahda: “Kowe oh noumw mwohnien en lekdekla nan ehl, pwehki omw kihkihong me ke kak pwainkihda mwohni sapwellimen Koht kisakis! Sohte pwaisomw de omw tungoal nan at doadoahk, pwehki omw mohngiong sohte pwung mwohn silangin Koht.”—Wiewia 8:20, 21.
Sang ni koasoi en Paipel wet, iei me lepin lokaiahn wai wet “simony” kohsang ie, me wehwehki “dihp en pwainda de netikihla pwukoah sarawi kan.” New Catholic Encyclopedia wehkada me keieu sang nan senturi 9 lao lel senturi 11 “wiewia wet: ‘simony’ kin rekla rehn padire kan oh rehn kaun tikitik kan en pelien lamalam kan oh rehn pisop kan oh pil rehn pahpa sarawi en Kadolik.” Pali kaduwau en pwuhken The Encyclopædia Britannica (1878) koasoia: “Ma emen pahn onopki mihding kan en pahpa sarawi en Kadolik ahnsou me re pahn pilada pahpa sarawi kapw, e pahn diarada me mihding pwukat kin saminkihla wiewia wet ‘simony,’ oh ‘simony’ kin wiawi ni ahl me keieu samin, oh keieu kanamenek, me sohte kin ekiekla.”
Kristian mehlel kan nan rahnwet anahne kaleke wiewia wet simony. Karasepe ehu, ekei kak kapinga emen daulihla de kisekise daulihla irail ko me kak kihong irail pwukoah kan. Irail ko me kak kihda soahngen pwukoah kan kin kasalehda arail perenkihte irail ko me kak—oh kalap ngoangki—kisikisehkin irail kisakis kan. Irair pwukat koaros kin pidada wiewia wet ‘simony,’ oh Pwuhk Sarawi kin kasalehda me wiewia wet kin sapwung. Piter kangoangehki Saimon: “Eri, koluhkihla omw lamalam suweden, oh peki rehn Kauno [“Siohwa,” New World Translation] pwe en ketin mahkikihong uhk soahngen lamalam suweden [omw wiewia suweden,” New Jerusalem Bible]. Pwe I ese me ke inenen diren peirin oh dihp salihiukdier.”—Wiewia 8:22, 23.
E kaperen pwe, Saimon kilang duwen toutou en ah ineng sapwungo. E peki rehn wahnpoaron ko: “Kalahngan en kumwa, kumwa kapakapkin ie rehn Kauno [“Siohwa,” NW], pwe soahng pwukat me kumwa mahsaniher en dehr lelohng ie.” (Wiewia 8:24) Ni ahr kapwaiada mehn kasukuhl kesempwalo nan ire wet, Kristian mehlel kan kin nantiong en liksang saminkihla wiewia wet ‘simony.’