Komw Pahn Peikiong Mahsen en Kaweid?
NI May 19, 1997, ehu melimel lelohng nan sapwen Chittagong, Bangladesh. Nan kahnimw en Cox Bazaar, re kilelehdi me kisiniengo marahrahki mwaihl 150 nan awa ehu. Nan wasa kan likin kahnimw, ihmw oahs kan kin ipiruksang, mohn ihmw akan kin luhwe. Tuhke kan oh tuhken dengwa kan kin saretepda; mehteikan timwpeseng nan lukoperail kan duwehte masis. Ehu oaralap en nuhspehpa me adaneki Bhorar Kagoj ripohtki me aramas 105 mehkihlahr melimelo.
Wasahn pakairki mesenleng ripohtki iawasa me kisiniengo kohkohla ie mpen awa 36 mwowe. Ni mehlel, me tohto irail me mourla pwe irail me kid samwa kei kin ruklahr nan ihmw siment kan.
Erein sounpar epwiki kei dower powe, Sounkadehdehn Siohwa kan kin pakapakairki rohng en kahpwal mwuledek me pahn kerenieng wiawi me pahn suwed sang melimel koaros me wiawiehr. Paipel kahdaneki met “rahn lapalap oh kamasepwehk en Siohwa.” (Soel 2:31, NW) Ni atail peikiong rohng en mahsen en kaweid en kokohp kan me dierek nan Paipel, kitail kak pitsang “kalokolok en rahn me Siohwa pahn ketin kasalehda sapwellime engieng.”—Sepanaia 2:2, 3, NW.
Soh, Sounkadehdehn Siohwa kan sohte kin wia soukohp en rohng suwed kei. Arail rohng iei rohng en koapworopwor. Re kin inengieng sewese aramas en sukuhlki duwen Wehin Koht, me pahn ahnsou keren kihsang sampah sapwung koaros. Mahsan en Koht, Paipel, padahkihong kitail: “Ahnsou keren aramas suwed kan pahn sohrala; ke pahn rapahkin irail, ke ahpw sohte pahn diar irail; a me aktikitik kan pahn sapwenikihla sahpwo oh re pahn paiamwahu oh popohl.”—Melkahka 37:10, 11.
[Credit Line]
WHO/League of Red Cross