Ripoht En Sounkalohk Kan En Wehio

Katingpen Rapahki Koht Mehlel

NAN senturi kaeisek B.C.E., wehi keneik riau en Suda mihla pahn kaudok likamw. Ahpw, nanpwungen reklahn kaudok likamw pwukat, mie emen ohl me kin mohngiong mehlel ong Koht. Edeo iei Seosopat. Soukohp Sehu kosoiahkin ih: “Mie mehkot rehmwi me mwahu. . . . komwi nantiongehr idihdawehn kupwuren Kauno.” (2 Kronikel 19:⁠3) Me pil duwehte nan rahnpwukat, nan “ahnsou apwal akan,” aramas rar kei kin ‘kaunopada mohngiongarail’ pwehn rapahki Koht mehlel, Siohwa. (2 Timoty 3:​1-5) Met kin sansalda sang ni eksperiens wet sang Togo, West Aperika.

Casimir kin iang sukuhl en Kadolik oh tepin iang tungoale Mihsa nan sarawi en Roman Kadolik ni ah mahki sounpar duau. Ahpw, ni ahnsou me e lelehr sounpar 14, Casimir sohla kin iang sarawi. Met karehong ih en masapwehk pwehki e lemeleme me ah katiasang Mihsa pahn imwikihla ah kohla nan kisiniei en ehl, de kohla nan purkatorio.

Nan sukuhl Casimir iangala pwihn pwulopwul ehu me kin tuhpene pak ehu nan wihk ehu pwehn onopki Paipel. E pil tepiada pein wadek Paipel. Ehu rahn, Casimir wadekada nan pwuhk en Kaudiahl duwen mahn kamasepwehk men me kohda sang nan madau. (Kaudiahl 13:​1, 2) Ni ahnsou me e kalelepek rehn kaun en pwihn en onop Paipel duwen ire wet, kauno padahkihong me mahno uhdahn mahn emen oh me e uhdahn pahn kohda sang nan madau. Kawehwe wet kapwunodihda Casimir pwehki e kin kousoan karanih ni oaroahr en Atlantic. E kamehlele me e pahn iang tepin kisehn irail kan me mahn lawalo pahn kangala.

Casimir tepiada nekidala nah mwohni pwehn tangala nan sapwtehn ni paliepeng en sahpwo (dohsang nansed) pwehn ruksang mahn lawalo. E padahkihong emen ienge tohnsukuhl duwen ah pilahn. Pwehki ienge tohnsukuhlo iei emen Sounkadehde kan en Siohwa, Sounkadehde menet padahkihong ih me sohte uhdahn mahn me pahn kohda sang nan madau. Mwurinte met, Casimir ale luk ong mihding kan ni Kingdom Hall. E perenkihda mihding kan oh tepiada towehda kaukaule. E pil pwungkihda en onop Paipel.

Ni ahnsou me Casimir wie kekeirada nan onop en Paipel, ah peneinei kan tepiada uhwong. Ah peneinei kin kaudokiohng kadaudekarail mehn mahs akan me melahr oh kin kang uduk kan me re sohte kin kakerehsang nta loale me kin luhwehdi sang arail meirong kan. Ni ahnsou me Casimir padahkiong eh peneinei, ni lokaia kadek, me e sohte pahn kang uduko, ah peneinei kamasak ih oh ndahng me en kohkohsang nan imwarailo. Casimir nennenlahte, oh re sohte kaus. Ahpw, erein sounpwong siluh, re kin kukihte soahngen udukohte pwe peneinei en kang. Casimir apwalkihla sohte kin itar dahme e pahn kang, ahpw e kin dadaur met oh kahpwal teikan.

Casimir kaukaulehte kekeirada ni pali ngehn lau e wiahda ah inou oh papidaisla. Mwuri, e idihdda en wiahla emen ministerial servant oh iang towehda pwihn kapahieu en Ministerial Training School nan Togo. Ahnsouwet, e kin paiekihda toukihda ah ahnsou wiewia doadoahk ni rahn ohpis.

Ehi, ia uwen mahsan kan en Nanmwarki Depit ah kin mehlel pak tohto: “Ma ke pahn rapahki Siohwa, e pahn mweidohng uhk en diarada ih.”​—1 Kronikel 28:​9, New World Translation.

[Kilel kan nan pali 30]

Casimir (palimaun) paiekihda toukihda pein ah ahnsou en doadoahk ni rahn ohpis