“Kaiahne Pwutak men”

MAHT me pahn pweida mwahu kin anahne doadoahk laud sang ihte kamwerehdi kisin werentuhke kan nan pwehl oh eri pwurala mwurin sounpwong kei pwehn dolung wah kan. Doadoahk laud kin anahn pwehn kaunopada pwehlo, kamwerehdi wahr akan, kalamwur oh apwali mwahu kisin tuhke kan pwe ren kak kekeirada oh wah.

Wiepe wet kin karasahda mwahu mehlel en Lepin Padahk 22:​6, me mahsanih: “Padahkihong kisin seri men duwen eh pahn momour, eri, e pahn tamatamante erein eh mour.” Mehlel, kaiahn sang rehn pahpa oh nohno kin wia mehn kapir laud en kekeirada mwahu seri.

Ahpw, nan sampah wet me kin mweidala soahng koaros en wiawi, pahpa oh nohno tohto sohte kin peikiong kaweid wet. Ni arail kin idawehnla loalokong en aramas me dene seri kan en sukuhlki en pein apwaliala arail kahpwal akan, re kin mweidohng seri kan en pein rapahki pereparail. Soahngen mour wet kin kahrehong me pwulopwul kan en mengeiong lohdi pahn lamalam oh wiewiahn aramas suwed kan.​—⁠Lepin Padahk 13:20.

Ia uwen eh mwahu ong pahpa oh nohno kan en katengehdi nan loalen neirail seri kan mouren kosonned kan en Kristian sang ni ahnsou me seri kan tikitik! Ia uwen tikitik en seri kan? “Sang ni ahr seri pwelel,” wahnpoaron Pohl mahsanih. Ih met me wiawihong pwutako Timoty. Ah nohno, Iunis, oh ah nohno kahlap Lois katengehdiohng rehn Timoty “nting sarawi kan” pwehn “sukuhlki” oh “kamehlele.” Ia imwilahn met? Soahngen kaiahn wet kin kihong ih “erpit me kak kahluwalahng nan mour soutuk.”​—⁠2 Timoty 1:5; 3:​14, 15, New World Translation.

Duwehte nan rahnwet, pahpa oh nohno kan me “sohte kin uhdisang wiewia mwahu kan” pahn dolung kating kan ma re “sohte pwangahkihda.” (Kalesia 6:⁠9) Nanmwarki loalokong Solomon mahsanih: “Semen me pwung men pahn pereperen.”​—Lepin Padahk 23:24.