Mwaren Koht Kapwurpwurdo

“MWURIN mwahro Siohwa ah irihrla sang nan Paipel kan erein sounpar tohto oh ele sounpar epwiki kei, sapwellime sounkadehde kan en rahnwet kin wia kaudok en Kristian kelepw me kin tengidiong kapwurehdo mwahro ni mesen nting en Ipru pahieu me adaneki tetragrammaton.”a

Lokaia pwukat kin kohsang nan pwuhk me oaralap koasoia Jeová dentro do Judaísmo e do Cristianismo (Siohwa nan Pelien Kaudok en Suhs oh Kristian), sang rehn sounnting en Prisil Assis Brasil. Ahpw peideko pahn pwarada: Mendahki kawehwehn Paipel malaulau kei kin ekei pak doadoahngki mwahr sarawi, dahme kahrehda pelien lamalam teikan kin iris sang mwahro nan neirail Paipel kan? “Mwaren Koht irihrla,” Brasil koasoia, “pwehki ketieni . . . , mwekid sapwung, de ineng en kawauwih mwaren Sises oh ine, Mery.”

Ahpw, nin duwen me Mr. Brasil kasalehda ni pwung: “Irihrlahn mwahr [sarawio] uhd kapwungpwungla ni lokaiahn Portugal sang ni kadoadoahkpen Paipelo New World Translation of the Holy Scriptures.” Iaduwen? Mwahro Siohwa kapwurpwuriongehr nan wasa pwung kan me e kileledi ie nan Paipel ni lokaiahn Portugal. Mwahro Siohwa pwarada dauli pahn pak 7,200 nan Paipel en New World Translation.

Sangete tepin ahnsou me e ntingda, pohnangin kopi 6,500,000 en kawehwehn lokaiahn Portugal en ahnsouwet kohpeseng. Ihme kahrehda, emen sounnting en nuhs me kin ntingih nuhspehpa en Prisil me adaneki Diário do Nordeste (Northeastern Daily) idekda, “Komw wehwehki me mie mwaren Koht?” Sang ni kalahngan en kawehwehn Paipel kapw wet, aramas rar kan kak ahnsouwet sapengki, “Ehi, mwahr sarawio iei Siohwa.”

[Nting tikitik me mi pah]