Kaun akan Kapinga Sounkadehde kan

NAN Cádiz, Spain, ehu kahnimw me mihmi mpen mwail 300 ni palieir en palikapi en Madrid, Mayor Doña Teófila Martínez kihong Sounkadehdehn Siohwa kan kisin lepin takai tehlap ehu me lokaiahn kaping kan nting powe (me mih nan kilel wet powe). Nting ko koasoia: “Sang ni ohpis en kahnimw en Cádiz ong Sounkadehdehn Siohwa kan pwehn kasalehda aht kalahnganki arail sawas minimin oh nannanti kan pwehki kahnimw wet.” Dahme Sounkadehde kan wia pwe ren ale kaping wet?

Kaping wet kohieng Sounkadehdehn Siohwa kan pwehki doadoahk me re wiahda ni arail onehda sapahl wasahn mwadong en kahnimwo. Erein imwin wihk tohto, Sounkadehde epwiki kei kin pein toukihda arail sawas pwehn sewese onehda imwen kainen kan en wasahn mwadong [soccer] nan Carranza. Met, aramas koaros me kin doadoahngki wasahn mwadongo kin paiekihda paip kan, wasahn kainen, taht me re wiahda.

Erein ahnsou tohto, Sounkadehdehn Siohwa kan kin paiekihda arail nanpwung mwahu ong kahnimw en Cádiz. Nan pahr koaros, ohpis en kahnimwo kin ni kadek mweidohng Sounkadehde kan en doadoahngki wasahn mwadong nan Carranza ong arail Kapokon en District me kin wiawi nan pahr koaros. Ihme kahrehda, Sounkadehde kan kin perenki wia dahme re kak wiahda pwehn sewese wasahn mwadong en dehr ohla.

Ahpw, patohngete doadoahk wet me re wiahda, Sounkadehdehn Siohwa kan kin kaukaule pwarek aramas kan nan kahnimwo pwehn utungada tohn wehi pokon ni ehu ahl tohrohr. Re kin lohkiseli “rongamwahu” en Wehin Koht. Ni mehlel, re sohte kin wia arail doadoahk en kalohk pwehn ale kaping sang rehn aramas. Re kin kalohk pwehn peikiong kehkehlik en Sises en kalohki “rongamwahu en Wehin Koht” oh en “katohnpadahk aramas kan en wehi koaros.” (Madiu 24:14; 28:19) Ni ahl wet, Sounkadehdehn Siohwa kan kin koapworopworki en papah tohn kahnimwo ni arail pahn sukuhlkiohng irail “elen me pwung.”​—⁠Lepin Padahk 12:28.