Ia Uwen Irepen Mouratail?
Rahnwet, aramas tohto kin mour werei sang mehn mahs akan, kahrehong me tohto en medemedewe, ‘Ia uwen irepen mouratail?’
NIN DUWEN me The New Encyclopædia Britannica (1995) koasoia, mahso, aramas tohto kin kamehlele me Pierre Joubert me keieu mour werei. Nan 1814 e mehla ni ah mahki sounpar 113. Mehlel, mie meteikan me mour reirei sang met, ahpw arail sounpar sohte kileledi. Ahpw, mie rekord pwung kan me kadehdehda me mie aramas tohto me mour reirei sang Pierre Joubert.
Jeanne Louise Calment ipwidi nan Arles, ni palieir en palimesen France, ni February 21, 1875. Ah mehla ni August 4, 1997—reirei sang sounpar 122 mwuri—alehdi nuhs laud. Nan 1986, Shigechiyo Izumi en Sapahn mehla ni ah mahki sounpar 120. Pwuhko me adaneki Guinness Book of Records 1999 ntingihdi me Sarah Knauss me mahki sounpar 118 iei aramas me keieu mah ni ahnsou me pwuhko ntingdi. Liho ipwidi ni September 24, 1880, nan Pennsylvania, U.S.A. Ni ahnsou me Marie-Louise Febronie Meilleur en Quebec, Canada, mehla nan 1998 ni ah mahki sounpar 118, e mahki rahn 26 laud sang Sarah.
Ni mehlel, nempehn irail kan me uhdahn mahla kin wie tohtohla. Nempehn irail kan me mahki sounpar epwiki samwa pahn kak tohtohkihla pohnangin aramas rar 2.2 erein tepin sounpar kid en senturi kohkohdo! Me pil duwehte met, nempehn aramas me mahki sounpar 80 oh mahsang kin tohtohla sang aramas rar 26.7 nan 1970 lel rar 66 nan 1998. Met kin keirkihda persent 147, kapahrekiong persent 60 kekeiradahn kapatapatpenen tohnsampah pwon.
Oh met kaidehn ihte aramas akan mour werei. Me tohto kin wiahda soahng kan me pali moron en irail kan me mahki sounpar 20 sohte kak wiahda. Nan 1990, John Kelley me mahki sounpar 82 kanekehla ehu marathon—weiren tang ehu me reireiki mwail 26 oh iaht 385—nan awa limau oh minit limau. Nan 1991, Mavis Lindgren me mahki sounpar 84 me mieiehr nein nein nah kan lel dih kesiluh tangkihla uwen reirei en weiren tang wet nan awa isuh oh minit duwau. Oh me ahpwtehn wiawi, mie emen ohl me mahki sounpar 91 me kanekehla marathon me adaneki New York Marathon!
Kitail sohte nda met pwe dene me mah kan en mahso sohte kin wiahda soahng kapwuriamwei kan. Ni ahnsou me e mahki sounpar 99, ohlen mahso nan Paipel Eipraam “tangalahng tuhwong” irail ko me kohdo reh. Ni ahnsou me e mahki sounpar 85, Kalep koasoia: “I wie kehkehlailte duwehte rahn [sounpar 45 mwowe] me Moses kadariehlao. I pil kakete iang mahwen de wia mehkot tohror.” Oh Paipel mahsanihki Moses me ni ahnsou me e mahki sounpar 120, “mese sohte ediedla, oh paliwere kehkehlailte.”—Senesis 18:2; Sosua 14:10, 11; Deuderonomi 34:7.
Sises Krais koasoia duwen tepin ohlo, Adam, oh sounkauwada warihmwo Noha nin duwen aramas kan me mour mahso nan poadoapoad. (Madiu 19:4-6; 24:37-39) Senesis mahsanih me Adam mourki sounpar 930, oh Noha mourki sounpar 950. (Senesis 5:5; 9:29) Mie aramas me uhdahn mour soahngen wereio? Kitail kak mour werei sang met, ele mwein kohkohlahte? Menlau kasawih mehn kadehde kan nan artikel en mwuri.