Kana Powehdi Me Suwed

“DAHME komw ketin mweidohngki kidi menet en lahlahwei komwi? Komw mweidohng ie pwe I en kohlang lupukasang moange.” Pekipek wet kohsang rehn Apisai, emen kaunen sounpei en Israel. E lingeringerda oh koasoia met ni ahnsou me e rongada en Simei, emen mehn Pensamin lahlahwe ah kaun, Nanmwarki Depit.​—⁠2 Samuel 16:​5-9.

Apisai kin ahnekihla lamalam ehu me aramas tohto kalapw doadoahngki nan rahnwet​—⁠en dupungki me suwed ong me suwed. Ehi, Apisai men kaloke Simei pwehki lahlahwe me e wiahiong Depit.

Ahpw, dahme Depit sapengki? Depit kauhdi Apisai, oh koasoia: “Komw piseksang.” Mendahki soahng kan me Simei kosoiahki Depit me likamw, Depit ni karakarahk liksang nan kasongosong en pelianda Simei. Ahpw, e mweidala ire wet nan limen Siohwa.​—⁠2 Samuel 16:​10-13.

Ni ahnsou me Depit pwurodo nan mwoale mwurin ah tangasang sapwellime pwutak me uhwongada ahpw sohte pweida, Simei me iang tepin irail aramas kan me kasamwo ih oh peki mahk reh. Apisai pil pwurehng men kemehla ih, ahpw pil pwurehng Depit sohte mweidohng en wia met.​—⁠2 Samuel 19:​15-23.

Nan irair wet, Depit kadehdehda ah warohng mwete Sises Krais, me wahnpoaron Piter ntingihdi duwe: “Ni aramas akan ar lahlahwe, e soh mwahn dupukohng irail; . . . pwe e ketin mweidalahte sapwellime koapworopwor koaros rehn Koht, Sounkadeik Pwung.”​—⁠1 Piter 2:23.

Nan rahnwet, kaweid kin kohieng Kristian kan en “aktikitik, kumwail dehr dupungki me suwed ong me suwed.” (1 Piter 3:​8, 9) Ni atail kin idawehnla mehn kahlemeng mwahn en Depit oh Sises Krais, kitail pil kak “powekihdi me suwed me mwahu.”​—⁠Rom 12:​17-21.