Pere Ahmw Adamwahu

KASAWIH ni keneinei ehu mahlen kaselel kin wia mehkot kaperen. Ma ke pahn kadehde mwahu, komw pahn tehk iaduwen sounmahleno ah doadoahngki popohk en piroas en litepw epwiki kei pwehn wiahda mahleno.

Me duwehte met, adamwahu kin wiawihda, kaidehn sang ni popohk en piroas en litepw ehute, ni karasaras, ahpw adamwahuwo kin wiawihda sang ni kisin wiewia tohto kan erein ahnsou kan. Ehi, ekis ekis adatail kin wiawihda sang ni mehkan me kitail wiahda.

Ni pali teio, ma kitail pahn litepwih nan mahleno wasa me sapwung, e pahn kauwehla kesempwalpen mahleno. Met pil duwehte adatail. Nanmwarki loalokong Solomon koasoia: “Ekei aramas kin pein kauwehkinirailla arail mwekid en pweipwei kan.” (Lepin Padahk 19:⁠3) Dahme pahn kauwehla adatail iei wiewia pweipwei​—⁠ele tiahk lemei en mwakar, kamamsakau, de nenek​—pahn kasaminehla adamwahu ehu. (Lepin Padahk 6:32; 14:17; 20:⁠1) Ihme kahrehda, ia uwen kesempwal kitail en nantiong wiahda adamwahu ehu oh nantiong pere adamwahu wet.​—Pil kilang Kaudiahl 3:⁠5.