Erpit me kin Sewese Emen en “Dehdehki Dahme Pahn Wiawi”
“IRAIL aramas akan me sohlahr kin doadoahngki ahr loaloakong. Ma re loalokong, re pahn dehdehki dahme wiawihong irail.”—Deuderonomi 32:28, 29, Beck.
Moses me koasoiada mahsen pwukat ong mehn Israel kan mwohnte irail pahn pedelong nan Sapwen Inou. Moses kohpada duwen ehu ahnsou me irail pahn sohpeisang Siohwa oh irail pil sohlahr pahn katapanki duwen dahme pahn imwilahn ahr wiewia suwed akan. Erein sounpar epwiki kei mwuri, mehn Israel kan—iangahki nanmwarki tohto—pohnsehsehla sapwellimen Koht kaweid.
Karasepe ieu, Solomon ese kaweid me kohsang powe me kin pid duwen en dehr pwoudki aramas akan me kin kaudokiong koht teikan likin Siohwa. (Deuderonomi 7:1-4) Ahpw, e uhd “pwoudki lih tohto me sohte kin kaudokiong Siohwa.” Met me imwikihla dah? Paipel mahsanih: “Oh ni ahnsou me e likeilapalahr re kahrehiong en pwongih koht en liki kan. E sohte loalopwoatohng Kauno [“Siohwa,” New World Translation] eh Koht, duwehte seme Depit.” (1 Nanmwarki 11:1, 4) Edetehn Solomon emen ohl me loalokong e sohte ‘dehdehki dahme pahn wiawihong’ ih ma e pahn sapeikiong sapwellimen Koht kosonnedo.
Iaduwen kitail? Ma kitail pahn dehdehki mwahu duwen pilipil kan nan atail mour kitail sohte pahn lelohng kahpwal laud kan. Karasepe ieu, Kristian akan kin ale kaweid en “kamwakeleikitailsang mehkoaros me kin kasaminehla paliwar oh pali ngehn.” (2 Korint 7:1) Met iei kaweid mwahu ehu, ahpw tohto aramas sohte kin dehdehki dahme pahn wiawiong irail ma re sohte kapwaiada kaweid en Pohl. Karasepe ieu, pwulopwul tohto kin kasaminehla paliwararail kan ki simoak tipaker, oh irail medemedewe me arail kin wia met pahn kahrehong irail en mwomwen aramas palan. Ahpw ia uwen paisuwed ni ahnsou mwuhr re kin ahneki soumwahu en mohngiong, canser en ngolungol, soumwahu en nget, de mwopw!
E inenen kesempwal en dehdehki mwahu duwen dahme pahn wiawiong kitail ni ahnsou kitail kin wiahda atail pilipil kan oh wiewia kan. Ki kahrepe mwahu, Pohl ntingihdi met: “Pwe mehkot me aramas pahn padokedi, ihme e pahn dolung. Ma e padokedi nan mwetuwel en paliwere ineng en paliwar, e pah dolungasang mehla; a ma e padokedi nan mwetuwel en Ngehn, e pahn dollungasang reh Ngehno mour soutuk.”—Kalesia 6:7, 8.