Kaweidpen Pilada Werek Mwahu Kan

ME PWULOPWUL kan kin kilangwohng iengerail kan en kihong irail kaweid kan me pid likou oh keseng kan, ahpw kaidehn arail pahpa oh nohno: ih me ehu ripoht kasalehda nan pwuhken Reader’s Digest. Ihme kahrehda e kesempwal ong pahpa oh nohno kan en ese ihs me neirail seri kan kin werekiohng oh iawasa.

“Ih omw pwukoah en kasawih met,” koasoia Esmé van Rensburg, emen sounpadahk nan pelien kasukuhlki mwomwen mwekid en aramas nan ehu university en South Aperika. Lih menet kapataiong: “Noumw seri pahn mwakar pahmw, ahpw e pahn meleileidi.” Eri lih menet kihong pahpa oh nohno kan sawas pwukat. Kosonned kan anahne en pwung oh mie moure; rong noumw seri; dehr mwadang lingeringerda, ahpw meleilei, oh ese dahme ke men nda. Ma noumw serio kompoakepahkidahr emen me sohte mwahu, en koasoiaiong wiewia suwed me kohsang ah werekiohng menet ahpw dehr ihte irehdi sang en werekiohng aramaso.

Kaweid mwahu kan ong pahpa oh nohno kan mih nan sapwellimen Koht Mahsen, Paipel. Karasepe ehu, e mahsanih: “Emenemen kumwail koaros en nan kapehd mwadang ong rong, ahpw dehr nan kapehd karuaru en lokaia oh lingeringer.” (Seims 1:19) Pwuhk Sarawi pil kihda kaweid mwahu wet me pid pilada irail kan me kitail kin werekih: “Ma ke pahn padahngki mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.” (Lepin Padahk 13:20) Karasepe pwukat kin kasalehda duwen erpit me kin mih rehn irail ko me kin kalahnganki wadek Paipel oh kapwaiada dahme e mahsanih nan arail mour en ehuehu rahn.