“Ma Kehl en Soahl Pahn Sarasang”
MAHWIN kan kin wiawi pwehki soahl. Aramas kin doadoahngki soahl ong kawelialih soahng kan. Nan Saina en mahso e kin kesempwal keriauwihte kohl. Ei, tohnsampah kin kesempwalki soahl. Lao lel nan rahnwet, aramas kin doadoahngki soahl ong wini oh kamwakel, oh wasa koaros nan sampah, aramas kin doadoahngki soahl pwehn kihong nemen mwenge oh soahlehki mwenge kan pwehn dehr mwadang kiteila de ohla.
Pwehki soahl kin kak kadoadoahk mwahu ong soahng tohto, e sohte kin kapwuriamwei me Paipel kin doadoahngki soahl ni karasaras. Karasepe ehu, Kosonned en Moses, kin mahsanih me soahng koaros me kin meirongla ong Siohwa pohn pei sarawio anahne en soahldi. (Lipai 2:13) Met sohte kin wiawi pwehn kihong nemen meirong kan, ahpw pwehki soahl kin karasaiong saledek sang samin de kitei.
Nan sapwellimen Sises Krais Kapahrek Pohn Dohlo me kin ndand, e mahsanihong sapwellime werek kan: “Kumwail iei soahlpen sampah.” (Madiu 5:13) Sang ni mahsan pwukat, Sises kin mahsanih me arail kalohk ong meteikan duwen Wehin Koht kin kak komourala irail kan me rong irail. Mehlel, irail ko me kin kapwaiada mahsen kan en Sises pahn ale pereparail sang tiahk samin oh samin en pali ngehn nan wasa kan me re kousoan ie oh kalohk ie.—1 Piter 4:1-3.
Ahpw, Sises pousehla oh kihda kaweid wet: “Eri, ma kehl en soahl pahn sarasang, . . . Solahr katepen soahlo, ihte me pahn mwahuwong, en lekdekla wasa me aramas akan pahn tiakpeseng ie.” Ni ah koasoia duwen ire wet, emen ohl me samanih Paipel, Albert Barnes, koasoia me soahlo me Sises oh sapwellime wahnpoaron kan kin ese kin “samin, kin doalki dihpw oh pwehl.” Ihme ma soahlo kin sarasang kehl, e kin luhwekihdi “pwehl tohr.” “Met,” Barnes koasoia, “kin sohla katepe ihte en . . . pwilikihdi nan ahl akan, de wasahn alu kan, duwehte atail kin doadoahngki kisin takai me aramas kin alu powe.”
Ni ahr kapwaiada kaweid wet, Kristian kan anahne en kanahieng pwe ren dehr uhdisang arail kalohk ohng wehi pokon de pwurelahng nan wiewia samin kan. Pwe ma re pahn wia met, re kak ohla ni pali ngehn oh sohla katepe, duwehte ‘soahl me sarasang kehl.’